Job 35 - Nobonob Baibel

¹ Elihu nug anam mattia mala, nug nai tuɗitta aum.

² “Job na inam attem. ‘Dahil genab tutukku hak kobol am Kayaknu eɗidtte,’ aon attem. Amge amuam mattiak tutukkute?

³ Na Kayak amegppa inam attem. ‘Da hipunin ii hekkul dayeb amu, amuppa na ehanittak attem aokkut; kobol amuppa da aɗi keeke ena laa aokkul?’ aon attem.

⁴ Na anam attem amunu, diig amunu da nahip nainu nob na amenppa, amu na laipad amelagppa ele madakkulnu hettem.

⁵ Na neegppe, habppa teeb, hab antte! Ao, na neegppe teeb, lombig attannab daatteb antte!

⁶ ⌊Kayak Nug lombig, hab ele eɗata, attannab daatte amunu,⌋ na hipunin hettem dayeb amu, Nug keeke ena, o keeke nau aottete? Ge, na hipunin kuɗumnab hettem dayeb amu, na nuhigppa keeke laa hettemte?

⁷ O iitta, na genab tutukku hak kobol dim lamidttem dayeb amu, na Nug keeke ena laa medattemte; Nug na eppenppa keeke ena laa aottete?

⁸ Na nau hettem dayeb amu, na danab, na bia, na amu dilagppa hettem. Ge, na genab tutukku hak kobol hettem dayeb amu, na danab laa, nug ah ooppan laa aakku, na nuhigppa hettem.

⁹ Danab okkai ag laa eheɗ hattegeg, danab ag eheɗ aotteb amu, ag Kayak ehanadkkunu gaatteb. Ao, ag Kayak ehanatteb, ag danab ɠagattag amu eppelkadppa daamnanu oo doyakppa Kayak unuqidtteb.

¹⁰ Anam, amge laa ag oolagppanu nug onig qe ne, ‘Kayak, Nugib ig tuqan gamag ahaknu ahi megatte,’ ii maditte.

¹¹ Nug doɗ dabmak madatte, amge Nug ig danab ah dabmak okkai, doɗ dilag eɗittak megatte. Ge, Nug he, ihinig doyak dabmak ena ele am ai dilag doyak dabmak ena ele eɗidtte.

¹² Danabnu amu, ag uug doon, Kayak amegppa gaatteb. Amge ag nau hak danab daan, dada kobol dim lamidna hetteb amunu, Nug gayak ahilagnu nob laa ii madatte.

¹³ Am genab, Kayak Nug ahilag unuqittak haen amunuib ehanittak awaknu, dimppa Nug dim lamidkkulagnu ii dabmemana, Nug unuqittak amunu ii dabmette. Ge, Laa Nukka Ɠagattag Oh Ele Nug unuqittak amunu nakok laa ii dabmette.

¹⁴ Job, na gemu na Kayak anidkkutnu elele iitta daattem attem, na nahip nai Nug noobppa daatte, amu na Nug ameg mettem attem,

¹⁵ na nug oo nauhak dootte, amge nug danab bu ii madatte attem, na danab ag hak nau hetteb, amge Nug nakok laa ii dabmette attem, amunu Nug laa dilag unuqittak hamu ii dabmette bia, Nug amu eɗittak Nug nahip iinab dabmema.

¹⁶ ⌊Gadon, Job, am anam amunu ig nahipnu inam akkunig.⌋ ‘Job nug hamu hamu nai maditte. Ge, nug nai doyak iitta ele huana aakkuib maditte.’ ” Elihu anam mattia aum.