Job 34 - Nobonob Baibel

¹ Elihu nug anam ana mala, nug nai tuɗitta aum.

² “Ag danab doyak dabmak ena ele, ag daulag human, dahil nai doyeg! Ao, ag danab ag doyak kuɗum aoppig amu, ag da nai madippi doyeg!

³ Danab nug miti ena, o nau dookkunu ee lemaɗuppa nakok ya, amuppa mitinu ma anttak medatte, amubia danab nug daugppa nai doya, nai ena, o nau ma anttak medatte amunu,

⁴ amubia ig ele oo maittak aot, aɗi nai am tutukku dootu! Ao, ig oh daat hettoɗitta, aɗi am ena anidtu!

⁵ Job nug atte. ‘Da beɗulppa aab iitta, amge Kayak Nug dahilnu nai doya mala hettoɗia epeɗia elele mettak kobol ii dim lamitta, bu aakku diig iittappa da meɗatte.

⁶ Ao, da tutukkuib madittem, amge Nug dahilnu, “Nai hambuppuak maditte,” dabmette; da beɗulppa aab iitta, amge Nug bu meɗe, ihilad nau, iitta mekkunu am iitta da beɗulppa daatteb.’ Job nug anam atte.

⁷ Anam amunu, auntai laa nug Job bia daatte? Nug Kayak eheɗ nau awa awa qedatte.

⁸ Nug danab eheɗ hetteb ele ouqak daatteb. Ao, nug nau hak danab ele oh laippu daatteb.

⁹ Nug amu hettenu diig am, nug inam ana malom. ‘Danab nug heeb, Kayak nuhignu ena dookkunu am uɗat meu iitta. Ao, danab amu hette ele nug meu ena laa ii aotte,’ awa mattiom.

¹⁰ Anam amunu, ag danab diignu doyak tutukku ele ag dahil nai doyeg! Kayak Nug eheɗ hekkunu elele iitta. Ao, Laa Nukka Ɠagattag Oh Ele Nug kobol nau laa ii hette.

¹¹ Amuam genab daattenu diig am, Nug danab aɗi kobol hette amu, Nug kobol amunu nob danab amu medatte. Ao, danabnu hak attem daatte, hak amunu nob elele aakkuib Kayak medatte.

¹² Kayak Nug kobol eheɗ laa iinab hema. Ge, Laa Nukka Ɠagattag Oh Ele Nug nai doya mala hettoɗia epeɗia elele mettak kobol dim lamidkkunu iinab uuma.

¹³ Laa nug Kayak wan oh dilag okkai daakkunu ii tituanom. Ao, laa nug Kayak wan oh gumakkunu Nug ii meum. ⌊Nugib hanhan anamib dayom daatte.⌋

¹⁴ Kayak Nug danab ha, noobppa ulah iwale, bau dayom amu, Nug oo heeb, ulah amu, nuhig Ouɗi ele eɗua aokku dayeblob,

¹⁵ danab ah ohnab ag mauhlob. Ao, ag mauhna, ag eɗun, gappud daalob.

¹⁶ Na diignu doyak tutukku ele aɗattem dayeb amu, na dahil nai doye; da nai madittem amu, na daut human doye!

¹⁷ Nahip dabmakppa laa nug nai doya mala hettoɗia epeɗia elele mettak kobolnu nau ninig ele dootte amu, nug laa gumadkkunu elelete; na Kayak, Nug nai doya mala hettoɗia epeɗia elele mettak kobol hanhanib dim lamidtte, Nug ɠagattag okkainab ele amu, na Nug eheɗ hette laa oh ippunadkkutnu hettemte?

¹⁸ Kayak Nugib king amelagppa, ‘Ag ena iinab hetteb,’ iite atte? Ao, Nug anuqak danab laa amelagppa, ‘Ag nau hak danab daatteb,’ iite atte?

¹⁹ Kayak Nug king tiigppan danab, enub danab, daɗek ele oh hattom amunu, Nug laa nug king tiigppanu amunu, nuhignu diig iittappa ena doya, laanu diig iittappa eheɗ ii dootte. Ao, Nug laa am enub danab amunu, diig iittappa nuhignu ena doya, laa am daɗek amunu diig iittappa nuhignu eheɗ ii dootte.

²⁰ Ag oh tuqan tugmag, haen amuppa ag paha mauhtteb. Danab ag dabmak maɗoɗ iitta daan, mauhtteb. Danab ɠagattagnab ag mauhtteb, amge danab heeg ii mauhtteb. ⌊Iitta. Kayak he, ag mauhtteb.⌋

²¹ Kayak Nug danab ah dilag oiyak anidtte; Nug ahilag kobol oh amegppa anidtte, lokkumak laa iitta.

²² Diig amunu danab eheɗ hette ele nug aben laa gatatunab ele, o aben laa lokko teppu ele, appa lokkumkkunu elele iitta.

²³ Anam amunu, Kayak Nug danab Nug noobppa uɗin, aɗi aɗi heppignu appeg doya, epeɗiadkkunu uɗat laa ii daatte. ⌊Nug doya malom.⌋

²⁴ Kayak Nug danab okkai dilag hak antta malom amunu, nau hak daatte dayeb, Nug tatam hettoɗiak abenppa maatta, ahilag nai hettoɗia mala ii epeɗiadtte. Iitta. Nug amu dilag, eheɗ hetteb ele, Nug ag eheɗ hatte, ag nena qena, nauhna autna aoeg, Nug he, laa ag ag abenlagppa bena daan, okkai daatteb.

²⁵ Ao, Nug ahilag eheɗ hak antta dabmette amunu, Nug tuqan ag eheɗ hatte, ag nauhna autna aotteb.

^26-27 Danab okkai amu ag Kayak dimettan, Nug ii dim lamidppig. Ao, ag nuhig ibnu ena ii dooppig. Anam amunu diig amunu Nug ahilag hak nau, Nug amunu danab ah oh dilag neekkakppa bu madatte.

²⁸ Danab okkai amu ag daɗek danab ah dilag eheɗ hatteg, daɗek amu ag Kayak ehanadkkunu gaappig. Ag gaaegeg, Nug ahilag unuqittak doyom.

^29-30 Kayak Nug manin haen daakkunu akku dayeb amu, laa nug manin amu heeb nauhkkunu elele iitta. Ao, Kayak Nug laa Nug anidmanu iɗu hautkku dayeb amu, laa nug neekkeb ukkeb anidkkunu elele iitta. Ge, Kayak Nug laa, nug Kayaknu, nuhig haknu ele uuak dootte, danab amu nug danab ah dilag gumak danab daamanu, danab amu nug danab ah dilag eheɗ hattamanu, Kayak nug wanppan wan anen anen, danab anen anen ele dilag okkai dayakib daatte.

³¹ Danab laa nug Kayak amegppa, ‘Da hipunin hemi, beɗulppa aab ele, amge da baula anam ii hepa,’ akku dayeb,

³² nug tuɗitta, ‘Ippuniɗppe, da keeke gemu ii anidttem anttoya, da eheɗ aɗi laala ii doyeye hemi amu, da baula ii hepa,’ akku dayeb, ⌊diig amunu Kayak Nug danab amu keeke laala aokkunu oɗe dim lamidkkuoitte? Iitta.⌋

³³ Na Kayak dimettame amunu, Kayak Nug na oot hette bia hekkuoittete? Na amunu dabmak aoppe, gogppa tekkuoitte! Nahip dabmak amunu da eppelppa ii daatte amunu, na attem dabmettem amu, na appe doyei!

³⁴ Danab ag diignu doyak tutukku ele ag inam atteb. Ao, danab ag doyak dabmak ena ele, ag dahil nai dootteb ele, ag da amelppa inam atteb.

³⁵ ‘Job nug doyak iitta ele nai maditte. Ao, nug dabmak meu unuqagnu ele iitta, nug kobol amu iitta amunu nuhig nai am unuqag ii gotte, hamu gaɗaib maditte,’ aon atteb.

³⁶ Job nug nau hak danab maditteb bia nainu nob mette amunu, Job nug ma anttak okkainab aokku am ena.

³⁷ Aɗinu? Nug hipunin aakkuib ii hette. Iitta! Nug nai tappe nak ha, nug Kayaknu, ‘Keeke hamunab,’ dootte. Ao, nug Kayaknu nai nau kuɗumnab ele maditte.” Elihu anam mattiom.