Job 32 - Nobonob Baibel

Danab onig Elihu nug Job laikkud dilagnu oo nauhom

¹ Job nug anam ana mala, nug nukka nug nuhig neekkakppa nug am genab tutukku hak danab daya dabmeum amunu, nug laikkud ewam eɗun nob mekkulagnu uuppig. Ag nai laa Job amegppa baula ii madippig.

² Danab ewam amu ag aakku anam heppig, amge Bus buɗubppan danab, nug Barakel bekka Elihu, nug Ram buɗub, nug Job ii daye daye, “Da eheɗ laa ii hemi,” ana, nug, “Kayak bu meɗatte am, Nug tutukku hette,” ii a doya, nug Jobnu oo huana nauhom.

³ Nug Jobnu oo nauhe amu, Job laikkud ewam ag Job eheɗ heum anan, nai amuppa nug yaappig, amge ag Jobnu nai qeppeg nekkunu ib laa ii anidppig amunu, nug amu dilag ele oo nauhom.

⁴ Danab ewam, Job laikkud amu, ag nai mattiegeg, Elihu dayom, amge nug am nid bau, danab ewam amu ag am danab maɗ ahilag am nuhig eɗittom amunu, Elihu nug paha Job amegppa nai ii mattiom. Danab ewam amu madippeg doya, dimppa nai madikkun dabmaama, amelag meum.

⁵ Elihu anam dabma dayom, amge danab ewam amu ag nai baula mattiglagnu iitta antta doye, nug oo nauhom.

⁶ Nug oo nauhom amunu, nug, nug am Barakel bekka Elihu, nug Bus buɗubppan danab, nug aha aum. “Da am nid bau, ag am kaino amunu, da baɗe, da aɗi keeke laala doottem ele am appi dooglagnu elele ii doomi.

⁷ Da dabmein, da oolppa dabmak dahilppa, da ‘Danab kaino ag nai mattiglag am ena. Ao, danab haen elab wanppa oippig, ag doyak dabmak ena ele nai laa mattiglag am ena,’ ami.

⁸ Da anam ami, amge Ouɗi Nug danab ooppa daatte. Ao, Laa Nukka Ɠagattag Oh Ele, Nug Ouɗi danab ooppa daatte. Amu Nugib danab diignu doyak tutukku medatte.

⁹ Kaino ag doyak dabmak ena ele, amge agib iitta. Ao, laa haen elab wanppa oippig, ag aɗi kobol am genab tutukku, ag amu dootteb, amge ag aakkuib iitta.

¹⁰ Anam amunu diig amunu da ag dahil nai dooglagnu oɗ madattem. Ao, da ele aɗi keeke doottem appi dooglag.

¹¹ Ag nai mattiegeg, da oɗel qamuten daami. Ao, ag diig dooglagnu nai mattiegeg, da daul humen daami. Ag aɗi nai mattiglagnu dabmak aon daaegeg,

¹² da dabmak dahil oh ahilagppaib dayom. Da anam hei, ag nai ahilag madippig, amge ag oolagppan laa nug nai mattia, Job nug dabmak eheɗ awa maditte am laa ii ippunittom. Genab, Job aɗi nai maditte amu, ag oolagppanu laa nug nai amunu nob elele laa ii mettom.

¹³ Anam amunu, ag inam ele amananu dabmeig! ‘Ig doyak dabmak ena ele aot, Job ippunidmut, ⌊amge nug dookkunu uuom amunu,⌋ Kayak, danab laa iitta, Kayak Nugib nuhig nai qeeb naɗ!’ Ag anam aib appig.

¹⁴ Job nug nai da madikkulnu hettemnu nob ii meum amunu, da ahilag naippa nug nob ii medapa. Iitta. Da nai laa awen, nug nob medakkul.” Elihu nug anam mattia aum.

¹⁵ Elihu nug anam ana, ⌊danab nukka daya, nukka nukka ele nai maditte bia,⌋ Elihu nug nai imu tuɗitta aum. “Job laikkud ewam ag nai mattieg ukke ukke, elele iitta doon, oo uug nau qak doon, ag oɗelag qamutppig; ag nai laa iitta.

¹⁶ Ag nai laa iitta, amge diig amunu da ele nai iite madipa? Ao, ag nai laa anana, Jobnu nai nob mekkulagnu elele iitta daatteb amunu, da tuɗid tuɗid, ag amelag mekkuloittete?

¹⁷ Iitta! Da ele dahil nai madippi dooglag. Ao, da ele aɗi keeke da doottem, am da appi dooglag.

¹⁸ Aɗinu? Nai da oolppa ambaknab daatte; da ouɗil da nai madikkulnu duttuniɗtte, ⌊amunu da nai madikkul⌋.

¹⁹ Da danab grep leppu bau awa, doɗ gaɗa nippudppa ine, titiɗa he, doɗ gaɗa nippud huana taiedatte bia, da dahil nai da oolppa dayeye, da anambia daattem. Ge, da danab grep leppu bau awa, doɗ gaɗa nippudppa ine, titiɗa he, doɗ gaɗa nippud aoɗkkunu hette, da anam bia daattem.

²⁰ Nai amu da oolppaib dayebeb, guittak tuɗittak meɗamanu da nai madikkuloitte. Ge, da oɗelppa nai mattien, guittak amu baula ii doopanu madikkuloitte.

²¹ Da nai mattieye, da laanu diig iittappa ena doya, laanu diig iittappa eheɗ doyak kobol dim lamitten, ii nai madipa; da danab laa nug dahilnu ena dookkunu hambuppuen, oo eeɗaknu ittag nai ii madipa.

²² Aɗinu? Da hambuppuitta, oo eeɗaknu ittag nai mattilom amu, Kayak, Nug da heiɗom, Nug paha heeb, da nauhkkul.” Elihu nug anam ⌊danab nukka daya, nukka nukka ele nai maditte bia⌋ mattiom.