Job 31 - Nobonob Baibel

¹ Amu da ena daami, haen amuppa da dakka da ele da nug tituanen nai qakkami. Da nai qakkami am, da ah makkun laa oo hak nau ele ii neekkidpa.

² Aɗinu? Kayak attan daatte, Nug danab ⌊ag mauhnoak oitteb ele,⌋ Nug ahilagnu aɗi hette? Ao, Laa Nukka Ɠagattag Oh Ele, Nug attan daatte, Nug ag aɗi madakku?

³ Am inam. Nau hak danab ag uug naunabppa daaglag. Ao, laa eheɗ hetteb ele, ag padal mekkulag.

⁴ Kayak Nug dahil oiyak iite anidtte? Ge, da aɗi keeke nakok nakok hettem amu, Nug iite dootte?

^5-6 Kayak Nug ib tutukkuppa da epeɗilkku dayeb amu, nug anidkku; da nuhig neekkakppa da am danab ooppa kaliak laa iitta ele daattem. Da hambuppuak kobol aɗe dim lamidlomlob, O iitta, da hambuppuak kobolppa oilomlob,

⁷ O iitta, da ib apiɗitten, ib nauppa oilomlob, O iitta, da oolppa aɗi kobol helomnu doomi, amge da keeke laa amel qeeb, nau amu helomlob, O iitta, da eppelppa kobol dubuttid ele laa helomlob amu,

⁸ laa ag uɗin, ee da eppami ele amu, ag aon lalob am elele, am tutukku. Ge, laa ag uɗin, ee da eppami ele, ag hiɗalob am elele, am tutukku.

^9-10 Da danab laa nug wau eeɗila heebeb, da nug ele oignihnu dabmein helomlob amu, ⌊da amunu mauhppi,⌋ dahil ah nug danab laa wau dayebeb oiglah am elele, am tutukku! Ao, da dahil mudippan layal laanu ah ele niignihnu ib babaittette, nug laug odppa daye helomlob amu, danab laa nug ah dahil awa, nuhig ah daalo am elele, am tutukku.

¹¹ Aɗinu? Da laa wau ele niiloplob, amuam kobol nau, uɗa nak ele daalo; hipunin amunu Kayak Nug danab hette ele bu medakkunu elelenab.

¹² Laa amu, danab kobol nau amu hette ele amu, nuhig bu am nug nauha auta autanab awa, padal mette. Amu da hipunin amu helom, da nauhe aute autenab awen, padal melom; dahil ee oh amu, laa ag hiɗalob.

¹³ Amu dahilad maɗi nid laa, o dahilad maɗi ah laa nug dahilnu nai ele, amge da haen amuppa nai doya mala hettoɗia epeɗia elele mettak kobol ii dim lamidlomlob amu,

¹⁴ Kayak Nug wanppan danab hettoɗia, epeɗiadkku amunu, haen amuppa da attem helom? Ge, Nug wanppan danab ag aɗi aɗi heppignu hettoɗia, epeɗiak hekku amunu, haen amuppa da aɗi nai laa mattilom?

¹⁵ Kayak Nug da, dahilad maɗi nid maɗi ah ele oh ig aninkad oolagppa iite heikkom? Ao, Nug ig aninkad oolagppa ig oh ig beɗunig iite babaittom?

¹⁶ Amu da daɗek danab ag eenu oolag heehe, da ee keeke, ii mattalomlob, o iitta, ah qab nug ehanittak laa aolonu dabmaama dayom am, da ii mettalomlob,

¹⁷ o iitta, da nid ag mamelkad mauhppig ele ee keeke, ii mattalomlob, da dakka, daib, da dahil ee lalomlob, ⌊da Kayak eppegppa eheɗ aolom am elele, am tutukku⌋.

¹⁸ Amge da amu ii hemi. Iitta. Da nid bau dayeye uɗie, gemu batak, da nid ag mamelkad mauhppig dilag dabmein, dahilad nid bia doyeye atognoadmi. Ge, da hanhan ah qab dilag, ag ib enappa oiglagnu, keeke ele daaglagnu ulum matte ⌊ehanadmi⌋.

^19-20 O iitta, oug nau haenppa da laa daɗeknab daya, lamen iitta amunu mauhkkunu heehe antten, lamen laa sipsip dahilad uɗilkadppa hak ii mettalomlob, nug amuppa gakkaɗak awawa, dahilnu gamag ahak doya, itittak ena ii meɗalolob, o iitta, da danab laa nug keekenu tutu ma, lamen elele iitta oiya, eheɗ doye antten, lamen laa sipsip dahilad uɗilkadppa hak ii mettalomlob, nug amuppa gakkaɗak awawa, dahilnu gamag ahak ii doololob,

²¹ o iitta, da hettoɗiak abenppa, da oolppa, ‘Da am danab onig ele, laa ag dahil nai dim lamidtteb,’ alom amunu, da nid ag mamelkad mauhadppig dilagppa eheɗ helomlob amu,

²² da eppel apiɗitta, wanppa na qelo am elele, am tutukku. Ge, laa nug da eppel aɗa, gukkalppa qiia aolo am elele, am tutukku.

²³ Amge da eheɗ amu ii hemi. Aɗinu? Da Kayak heiɗeb nauhpanu baɗami. Ao, Kayak Nug dagom onig ɠagattag ele amunu, da keeke amu hekkulnu elele iittanab doomi.

²⁴ Da gol ehaniɗeb, enaib daakkulnu oolppa genab doolomlob, o iitta, da gol ena dubuttid iitta ele am danab bia dabmein, ‘Na ehaniɗe, da enaib daattem,’ alomlob,

²⁵ o iitta, da en okkai ele amunu, gamag ahak eheɗ doolomlob, o iitta, da uɗat huana hein, en okkai aomi amunu, gamag ahak eheɗ aolomlob,

^26-27 o iitta, da aam enanagnab amahalele antten, da aamnu, ‘Kayak laa,’ doye, binag melomlob, o iitta, da tuqan kalam manin ele oiyeye antten, da kalamnu, ‘Kayak laa,’ doye, binag melomlob amu,

²⁸ da hipunin amunu bu aolom am elele, am tutukku. Aɗinu? Da anam helom amu, da Kayak, Nug attan daatte, da Nug ippuniɗom bia Nug dim lamidkkulnu uuen helom.

^29-30 Da kekeɗ dabmein, nug eheɗ laa awaknu anak waappa daakkunu ii ainne, hipunin amu laa ii hemi. Anam amge, da kekeɗ dahil nug na qe antten, da gamag ahak doolomlob, o iitta, da kekeɗ dahil uug nau qeum antten, diig amunu da gamal eheɗnab ahalolob amu, ⌊da Kayak eppegppa eheɗ aolom am elele, am tutukku⌋.

^31-32 Dahilad danab laa nug deɗ laa, ‘Ihinig okkai Job, nug danab amu he, enug qeeqe eɗua ukkom,’ alolob, ⌊da Kayak eppegppa eheɗ aolom am elele, am tutukku⌋. Amge anam iitta. Aɗinu? Dahil od am aab diig danab iitta dilagnu matulakib dayom amunu, ag uɗin, niiaknu aben iitta daan, ag dimittim ib giginppa niiglagnu dabmeegeg, da hei, ag da laulppa niippig. Ag dimittim ii niippig.

^33-34 Laa amu, deɗ laa da hipunin hemi, haen amuppa da danab ah ag dahilnu eheɗ doomnanu dabmemilob, o iitta, da aab ikki dilag danab ah ag dahilnu, ‘Keeke hamunab,’ doomnanu dabmemilob, haen amuppa danab hetteb bia da beɗulppa aab daatte oolppa lokkumlomlob; da dimittim ukken, miag ii ainne, hipunin dahil amu danab ah noolagppanu lokkumlomlob, ⌊Kayak bu meɗalo am elele, am tutukku.⌋

³⁵ O gadon, laa nug dahil nai dookkunu ool okkai daatte. Da eheɗ laa ii heminu nai pepappa yaak niitte amu, da pepa amuppa nai amu genab daatte laa ippunadkkulnu amu, da onil iikku yaattem. Ao, Laa Nukka Ɠagattag Oh Ele Nug dahil nai nob mekkunu ool daatte. Ge, laa nug da naippa yaaiɗtte amu, nug da aɗi eheɗ hemi uɗugppa yeeb anidkkulnu ool hette.

³⁶ Nug anam hekku dayeb amu, da pepa amu da gukkalppa qataqewoya, mawewe oilom. O iitta, da ikkilppa haɗ bia mein mawewe oilom.

³⁷ Nug anam heeb, da anam hein, da keeke ohnab da hemi appi doolo. Ao, da king bekka bia nug gumitten golom.

³⁸ Da danab laa qe mauhe, nug baekkudppan nuhignu eheɗ gaaegeg, da nuhig wan hamu aolomlob,

³⁹ o iitta, da danab laa ag wan dahilppa uɗat henana, ee keeke eppaeg, meu o, hamu awen, nakok laa danab uɗat heppig ii mattalomlob, ag uug naunab dooloblob amu,

⁴⁰ wit dahil wanppa ii beeb, keeke qaun ele belo am elele, am tutukku. Ge, bali wan dahilppa ii beeb, uudib belob am elele, am tutukku.” Job nug nai amu mattia mala, nug aakku nai baula laikkud danab ewam amelagppa ii mattiom. Nug oɗe qamutom.