Job 30 - Nobonob Baibel

¹ Haen amuppa da anam daaiyi, danab ag dahilnu anam doon oippig, amge gemu amu, nid bau ag aon aon iutteb. Ao, nid amu mamelkad, ag am danab hamunab; dahil qai sipsip gumadtteb dilag hak, am ahilag hak eɗidtte. Da ag mamelkad qai dahil amu ele oh laippu uɗat hekkulagnu oɗ meɗalob amu, da uulom. Anam, amge gemu ag bekkalkad ag da aon aon iutteb.

² Nid amu hetteb ele ag beɗulag gai-iitta daye, uɗat hekkulagnu elele iitta amunu, ag da attem ehaniɗkkulag?

³ Danab amu ag daɗeknab daan, ag beɗulag ebehi teum. Ag atu taɗakppa hamu hamu oitteb; ag wan meu waknu nakokib eleleppa, am atu hele-ettak ele, appa ag tuqan oitteb.

⁴ Ag atu amuppa oin, ag appa ee ena iitta anidna, lakkulagnu aotteb; gakkaɗak aon daaglagnu aab ahilag am ad brum diɗi.

⁵ Danab ah laa ag danab amu lamatteg, akka akka daatteb; laa ag ag anadna, ag yab danab anadlob bia hena, danab amu ag qe mena, laih gona daaglagnu huana etteb.

⁶ Nid da aon aon iutteb ele ag oolnu noak qaɗaiettakppa daatteb; ag men oɗeppa, o wan oɗeppa, o men heqo heqoppa ele daatteb.

⁷ Ag doɗ gaatteb bia ad naunau waalagppa daan gaatteb; ag ulah aqamanu nug guguittak, ad naunau waappa daatteb.

⁸ Ag danab dabmak ena iitta ele, ag onilkad laa iitta; danab laa ag lamatteg, ag laih gona daatteb.

⁹ Nid amu ag anam mauhnoaknab, onilag iittanab anam daatteb, amge gemu ag ahi nau ettanna, ag da aon aon iutteb. Ao, ag da am nau bekkunu at daattem dabmena, ag da aon aon iutteb.

¹⁰ Ag da ele oh laippu daagnignu uuna, ag dahilnu oolagppa uuaknab dootteb. Ao, ag da iɗul hunu qekkulagnu uug laa ii dootteb.

¹¹ Gemu da Kayak Nug he, da gai-iitta, beɗul ele nauhak daattem amunu, ag dagattolppa daan, aɗi aɗi kobol hekkulagnu dabmak ahilagppa be, ag aakku hetteb.

¹² Nid bau nau amu ag ahan, eheɗ heiɗtteb. Ag da amuppa tekkulnu pelem metteb. Ge, ag da banel uɗin, da guittak meɗaglagnu hetteb.

¹³ Ag da oole gopanu da ippul oo netteb. Ao, ag da eheɗ heiɗppeg nauhkkulnu hetteb. Ge, ag dootteb, danab laa da ehaniɗkkunu ii daatte.

¹⁴ Kekeɗ ag aab laa eɗadkkulagnu henana, ag aab amunu aɗ gamag laa loppaɗna, giɗo naɗi amuppa ag aab ooppa gotteb, amubia nid bau amu ag dahilppa uɗin, eheɗ heiɗtteb. Ge, kekeɗ aɗ loppaɗeg, men keeke mauhnoak dayeye, giɗo amuppa wana, paha aab ooppa gotteb bia, nid bau ag dahilppa amubia hetteb.

¹⁵ Baɗak eheɗ nau da toniɗom daatte. Da dakka da dahilnu ena dookkulnu ib laa iittanab iitta. Ao, da ena, baɗak ele iitta daakkulnu ib laa iitta.

¹⁶ Gemu amu, da beɗul nauhe, da mauhkkulnu hettem; da deɗ oh guittak nauib doottem.

¹⁷ Tuqan da guittak nau, laa banppa da ebehil yaalo, da amubia doottem; guittak dahil ii bodoedatte.

¹⁸ Da gai-iitta dayeye, da wagai mein, lamen dahil baolittem; lamen dahil baalppa daakkunu daatte, am da imualppanu elele.

¹⁹ Laa nug buɗile, lekkohppa noin daattem; da wan gappud, aab uhuɗ ele bia daattem.

²⁰ O Kayak, da na ehaniɗkkutnu unuqidttem, amge na nob laa ii meɗattem. Ao, da na noomppa wain, hibaitten daattem, amge na amenppaib neekkiɗttem.

²¹ Na nakka na hena, na eɗun, ban danab ɠagattagnab daan, eheɗ heiɗttem; na nahip ɠagattagppa na eppenppa oiɗttem.

²² Ulah ad uɗug keeke, ye gotte, na he, da amubia daattem. Ao, ulah ɠagattag he, ad uɗug keeke, hamu laih laih gotte, amubia na he, da eheɗ daattem.

²³ Da doottem, na heppe, da mauhkkul; danab ohnab mauhak abenppa gokkulag, amu na heppe, da appa gokkul doottem.

²⁴ ⌊O lailad,⌋ dahil dabmakppa amu, Kayak Nug danab nauhakib daatte anttebeb, nug uugppa dayaya, ehanittak aokkunu ekku dayeb, Kayak Nug danab amu, nuhigppa tuɗitta eheɗ laa ii hekku bia doottem.

²⁵ Da amu, da ele da laa ag uug okkaippa daaegeg, da ahilagnu iite gaami. Ao, laa ag daɗek daaegeg, da oolppa ahilagnu uug doye, iite mahiadmi?

²⁶ Da laa uugppa daappig am anam hemi amunu, da dahilppa ena anambia bekkunu dabmak aɗe oimi, amge kobol eheɗ dahilppa beum; da amahlak anidkkulnu dabmemi, amge gatatu toniɗom.

²⁷ Da oolppa maɗoɗ nakok laa ii daatte; da deɗ deɗppa guittak dookkulnu doottem.

²⁸ Da gaɗal hinqeum daatte, amge aam qe ii heum. Iitta. Oɗe dahil he, anam beum. Da aabnu qagmakppa ahe, laa ehaniɗkkunu ettem ⌊amge iitta⌋.

²⁹ Da doɗ jakal amalag bia daattem. Ao, da hipunai lailag bia daattem.

³⁰ Oɗe dahil he, da gaɗal hin qe, tola gotte; da beɗul am gakkaɗaknab daatte.

³¹ Da harp qettem, amge oo doyaknu ahi aakkuib qettem. Ao, da dumuttum iwalttem, amge mahiaknu ahi aakkuib iwalttem.