Job 29 - Nobonob Baibel

¹ Amu Job nug anam mattia mala, nug nai tuɗitta aum

² “Da anukkan haennu ool gaatte. Ao, da haen Kayak Nug da atognoiɗa he, da enaib daaminu gaattem.

³ Haen amuppa Kayaknu amahlak da honaɗilom. Ao, nuhig amahlak gatatuppa amahalele, da amuppa oimi.

⁴ O gadon, gemu da haen da danabnab daami, da dahil dayak amunu da ool huana gaatte; haen amuppa da daaiyi, Kayak Nug dahilnu, ‘Da layalnab,’ doyaya, Nug dahilad oh itatte daami.

⁵ Haen amuppa Laa Nukka Ɠagattag Oh Ele Nug da ele daamuɗ; nid naunau dahilad ele da taliliɗna daappig.

⁶ Haen amuppa da keeke kuɗumnab ele. Ge, olip goɗen huanak, menppa gokkaɗa nelo, amubia dahil dayom.

⁷ Haen amuppa amu, da ikki danab dilag qagmak aben aab odppa daatteppa wami; da wain, appa aabnu haɗap-ppa da heɗep nein daami.

⁸ Haen amuppa, da anam heiyi amu, nid bau ag aniɗna, ag qe mena, ib meɗappig; danab kaino ag aniɗna hippaidppig.

⁹ Danab okkai laa nai madippig ele, ag oɗelag qamutppig; ag eppelag oohap tena, oɗelag hautppig.

¹⁰ Anuqak danab ag nai mattiak uuppig; ag lemaɗulag ɠagattag eppom.

¹¹ Am laa nug dahil nai doyom, nug diig amunu dahilnu enaib mattiom. Ao, laa nug da aniɗom, nug diig amunu dahilnu, ‘Nug enaib hette,’ aum.

¹² Ag amu heppignu diig am, daɗek danab ag ehanittak awaknu gaaegeg, da ehanatti, ag padal ii meppig. Ao, laa mamelkad mauheg, akkaib daatteb, laa ehanadkkunu iitta amu, da ehanatti, ag padal ii meppig.

¹³ Laa nug mauhkkunu heehe, da ehanitti, nug da itiɗom; da hei, ah qab, nug gamag ahak okkai doya, ahi ettom.

¹⁴ Da genab tutukku hak kobol amu, da lamen bia amu takkami. Ao, nai doya mala hettoɗia epeɗia elele mettak kobol am dahil lamen elab, da ikkilppan lamen ele bia dayom.

¹⁵ Danab ameg gaɗuak ele amu, da nug ameg bia daami. Ao, danab baeg nauhom ele, da nug baeg bia daami.

¹⁶ Laa keekenu tutu mak daappig ele, da ag mamelag bia daami. Ao, aab diig danab iitta amu, da hettoɗiak abenppa amu dilag nai doyen, ehanadmi.

¹⁷ Da hei, nau hak danab ag ahilag kobolppa eheɗ hekkulagnu elele iitta daappig, danab nug qai aeg qiia aotte, amubia. Ao, da laa nau hak danab eppelagppa daappig ele ehanatti, ag uhuqak aoppig.

¹⁸ Anam amu, da dabmemi. ‘Da dahil haenppa, da, da laulppa mauhkkul. Ao, maɗ kuɗum huanak, ebqak ihi yu ihippa daatte, maɗ amubia ukka maleb, da kainonab mein malen, da mauhkkul,’ dabmemi.

¹⁹ ‘Da ad diɗi leppa noa daatte bia daakkul. Ao, da ad ebekkud, tuqan baito na, tuqan oh leppu ele daatteb, da amubia daakkul.

²⁰ Da ɠagattagib dayeye daakkul. Ge, dahil lat am da eppelppaib daakku.’ Da anam dabmemi.

²¹ Da anam dabmemi amu, haen amuppa danab laa ag da nai matti, ag daulag human, dahil nai dooppig; ag dahil ulum nai dooglagnu oɗelag qamutna daappig.

²² Da nai mattien malai, auntai laa nai madikkunu ii dayom; baito na, keeke leppu medatte, amubia dahil nai ag ehanattom.

²³ Danab ag gu haen elab ii ne, digma nekkunu ameg mena, tappaɗna hetteb, amubia danab ag dahil nai dooglagnu oolag dayom. Ao, ag gu ne, wan qaɗaiettak leppu paha aotte, ag amubia dahil nai aoglagnu daappig.

²⁴ Haen da danab anatten, iɗulppa humatti, ag enanag dooppig; da ag ena neekkattitti, ag oolagppa enanag dooppig.

²⁵ Haen amuppa amu, da ahilag okkai dayeye, da ib ippunadmi. Ao, da king laa, nuhikkud daup oolagppa daatte, da amubia ag oolagppa daami. Ge, da laa nug laikkud laa ag mahiak henan daaeg, nug ag oolag ɠagattag qedatte, da amubia ag oolagppa daami.