Job 28 - Nobonob Baibel

¹ ⌊Amu Job nug anam mattia mala, nug tuɗitta aum.⌋ “Danab ag silwa wan ooppanu buutteb; ag gol aon, gol amu babaitta epeɗia awak daakkunu uɗat hettebnu aben ele daatte.

² Ag aen ele wanppanu buutteb; ag bras ele aab aɗuppa brasib daakkunu bappaidtteb.

³ Danab ag wan buun, keeke amu aotteb ele, ag wan buueg ukke ukke, wan ooppanab gona, gatatunab daatteppa nona, neegppeg ukkeb, uɗat hekkulagnu ag lam aon nona, aben amu amahlak medatteb. Ao, danab amu ag keeke amu anidna aoglagnu, ag wan ooppa, umanab nona gona hetteb. Ge, ag aben amahlak ii daye, gatatunab daatteppa nona hetteb.

⁴ Ag danab ah ii daattebppa, wan ooppa umanab appa ag men hoin, giɗo elab hoitteb. Ao, aben danab ah ii oittebppa, appa ag amu hetteb. Ge, ag appa men hoin, muɗippa aihak daan, ilul qena, ahilag uɗat hetteb.

⁵ Wan qaɗeppa ee ba, meu otte, amge wan ooppa danab ag silwa, gol keeke aoglagnu buueg ukke ukke, appa keeke dayom bia ii daatte. Lag aab ewe keeke, aben dayom bia ii daatte, amubia wan ooppa ag heeg, keeke dayom bia ii daatte.

⁶ Aben amuppa men hamuppa men sapaia, ag amuppa daatteb; gol ele men amuppa daatte.

⁷ Ai teppu latteb ele, ai amu oolagppanu laa nug danab wan ooppa oitteb ele dilag ib nakok laa ii anttom. Ge, ai palkon laa ib amu ii anttom.

⁸ Doɗ laala ag doɗ laa ii baɗadtteb ele, ag appa nakok laa iinab oitteb. Ge, laion laa appa nakok laa ii oitte.

⁹ Ai, doɗ ele ag appa ii oitteb, amge danab ag eppelagppa tuls aɗan, wan ooppan men qeegeg aoɗtte; ag heeg, qauko diig aakku miag atitte.

¹⁰ Danab ag amu henana, menppa giɗo elab hetteb; ag henana, en men hamu ooppa daatteb, gol, silwa keeke, en amu aakku miag atie anadtteb.

¹¹ Danab ag le gog wan ooppa adeppa daatte anidkkulagnu heeg, miag atitte; ag keeke lokkumakppanab daatteb heeg, miagib daatteb.

¹² Danab ag amu oh heeg, miag atitte, amge danab nug ukka, doyak dabmak ena ele aben adekkuppa anidkku? Ao, diignu doyak tutukku, nug adeppa daatte.

¹³ Danab ag keeke laalanu, ‘Am keeke okkai, ig amu aognignu men doɗo okkainab eta aognig am nai iitta,’ dootteb, amge ag doyak dabmak ena ele aoglagnu am keeke laa oh eɗittak ii dootteb. Ao, danab wanppa bau daatteb amu, amu oh oolagppa laa nug wanppa aben laappa ukka, doyak dabmak ena ele aokkunu elele iitta.

¹⁴ Yu nug atte. ‘Dahilppa ii daatte,’ awa atte. Ge, yu nug atte. ‘Da ii aɗattem, dahilppa ii daatte,’ awa atte.

¹⁵ Danab nug doyak dabmak ena ele aokkunu nug gol, amge gol hamu iitta, nug gol enanagnab eppegppa aɗa, aben laappa ukka, daden mekkunu elele iitta. Ao, nug silwa uug gane awa ukka, daden mekkunu ele, elele iitta.

¹⁶ Am genab, gol wan onig Opir, gol amuppanu am gol enanag, amge danab nug amuppa doyak dabmak ena ele daden ii mema. Ao, nug men oniks, o men sapaia, aa oh am daden nob okkainab ele, nug amuppa doyak dabmak ena ele aokkunu elele iitta.

¹⁷ Doyak dabmak ena ele am gol, glas laa amahlak awa he, abibia gotte ele eɗat-tte; danab nug waa golppa hak, nug amuppa doyak dabmak ena ele daden mekkunu elele iitta.

¹⁸ Danab men maal, men jaspa ele, ag amu aon, doyak dabmak ena ele daden mekkulagnu elele iittanab. Ge, men rubi, amuam daden nob okkainab ele, amge men amuam doyak dabmak ena ele iinab eɗidtte.

¹⁹ Danab ag Kus wanppa men topas aotteb, amge danab ag amuppa doyak dabmak ena ele daden mekkulagnu elele iitta. Gol ena dubuttid iitta ele, am ele elele iitta.

²⁰ Amu oh elele iitta amunu, danab nug doyak dabmak ena ele adeppan aokku? Ge, diignu doyak tutukku adeppa daatte?

²¹ Danab, doɗ ele oh ag doyak dabmak ena ele amelagppa anidkkulagnu elele iitta. Ao, ai hab waappa oitteb, ag ele amelagppa anidkkulagnu elele iitta.

²² Mauhak, amu mauhak aben ele aa danab daaloplob, aa alop. ‘I doyak dabmak ena elenu ulah nai nakokib daunihppa doomuɗ,’ alop.

²³ Amu oh ii dootteb, amge Kayak, nukka, Nug doyak dabmak ena elenu ippu dootte. Ao, Nugib doyak dabmak ena ele aben adeppa daatte dootte.

²⁴ Aɗinu? Nug wanppan keeke oh neekke uɗie anidtte. Ao, Nug aɗi keeke hab waappa daatte anidtte.

²⁵ Kayak Nug ulah ɠagattag gane metta; Nug yu nuhig okkai attem daakkunu mettom.

²⁶ Nug gunu ɗo ma; nug lombig hinqak ele ippu mettom.

²⁷ Nug keeke amu oh hewowa, Nug doyak dabmak ena ele neekka antta, uɗat mettom ele am, elele he doyom. Ao, Nug doyak dabmak ena ele gumak okkai daakkunu abenppa ma, uɗat mette, elele haaha daye anttom.

²⁸ Nug amu ha, nug danab ah amelagppa aum. ‘Doyak dabmak ena ele amu, amuam dahilnu ebehi oh bodoetta le mak. Ao, diignu doyak tutukku amu, amuam eheɗ laa ii hemanu dabmaama oiyak.’ Kayak Nug danab ah amelagppa anam aum.” Job nug anam aum.