Job 27 - Nobonob Baibel

¹ Job nug anam mattia mala, nug nai tuɗitta aum.

² “Kayak, Nug genab bau daatte, Nug dahilnu nai doya mala hettoɗia epeɗia elele mettak kobol ii dim lamittom. Ao, Laa Nukka Ɠagattag Oh Ele, Nug genab bau daatte, Nug he, da oolppa nau ninig ele doottem.

^3-4 Kayak nug anam genab bau daatte, genab amubia da bau daattem haenppa, da oɗelppa nau laa ii madipa. Ao, genab amubia Kayak ehanikkekke, ulah da noolppa daatte haenppa, da ham-laa-ii-bubupa.

⁵ ⌊Ag da hipunin hemi amunu, Kayak bu meɗatte atteb, amge amuam hambuppuak.⌋ Da bau dayeye, da ag ena maditteb iinab madipa. Ao, da eheɗ laa ii hemi mattie ukke ukke, mauhe batakkul.

⁶ Da genab tutukku hak aakkuib dim lamidmi, da dabmak amu aɗeib daakkul. Ao, da oolppan oiyak ippunittaknu ulumppa, da eheɗ heminu dabmak nakok laa ii daama. Anam ii daye ukke ukke, da mauhkkul.

⁷ Anam amu, dahilad kekeɗ ag nau hak danab bu aotteb bia aoglagnu ool daatte. Ge, laa kekeɗ meɗatteb ele ag laa, Kayaknu ɗo ii dim lamidna, bu aotteb bia bu aoglagnu ool daatte.

⁸ Aɗinu? Danab nug Kayaknu nuhig haknu ele uuak danab daatte ele nug mauha, eɗua ena bekkunu dabmak aɗa oiyaknu ib laa iitta; Kayak Nug he, nug mauhtte, amu dimppa nug eɗua, ena daakkunu dabmak aokkunu elele iitta.

⁹ Uug nau nuhigppa bette haenppa amu, Kayak Nug nuhig unuqittak doottete?

¹⁰ Danab nug Kayaknu nuhig haknu ele uuak danab daatte amu, nug Laa Nukka Ɠagattag Oh Elenu enanagnab dookkute? Ge, nug haen oh Kayak unuqidkkute?

¹¹ Aria, gemu ag daulag humappeg, da Kayaknu ɠagattagnu ag ippunadkkul. Ao, da Laa Nukka Ɠagattag Oh Elenu hak ii lokkumpa.

¹² Ag matu amu oh anidna malappig. Anam amunu aɗinu ag nai hamu laala huana maditteb?

¹³ ⌊Ag atteb.⌋ ‘Kayak Nug nau hak danabnu inam hette. Ao, Laa Nukka Ɠagattag Oh Ele Nug danab nug oo doyak ii doyaya nau hette, Nug nuhignu inam hette.

¹⁴ Danab amu nug nid gane ele, amge ag oh qep elabppa mauhkkulag; nid nuhikkud ag ee elele iitta daan, enug aqakku.

¹⁵ Nuhikkud nid danab laala ag paha ii mauhkkulag dayeb, mamelag tatam mauheb daappeg, dimppa oɗe nau danab kuɗum aqe mauhtteb ele ag aqeb mauhkkulag; ahilkad ah, ag qab daan, gamulkad dilag ii mahimna.

¹⁶ Nau hak danab nug silwa huanaknab, gappud bia aokkutai, o iitta, nug lamen huanaknab, danab ag wan sowelppa qagmetteb bia aokkutai,

¹⁷ amge nug na qeeb, genab tutukku hak danab ag lamen nuhig aon takkaglag. Ao, danab ag beɗulagppa aab iitta, ag silwa nuhig aoglag.

¹⁸ Nau hak danab nug lag hette, lag amuam gai-iitta, maman gaɗa bia; am haen tutunu peh bia aakkuib.

¹⁹ Nug en okkai ele dayaya, tuqan niiak balal attan ukka qa niitte, amge baula anam ii hema; nug buttua aha, en oh iitta meum anidkku.

²⁰ Baɗak eheɗ nau, ui oawa, keeke awa gotte bia, nuhigppa bette. Ao, ulah eheɗ nau tuqan he, nug nauhtte.

²¹ Kaɗag ɠagattag uɗia he, nug na qa, baula ii daatte; am he, nug dayomppa baula ii daatte.

²² Ulah amuam danab dilagnu oo gai-iitta doya oo metta ehanittak kobol ii dootte amunu, ulah amu huanaknab na he, nau hak danab nug oolkkunu haaha, elele iitta daatte.

²³ Ulah amu danab daalo, nug anam ha mala, nug gamag ahak naɗi doya, eppeg tap qelo. Nug danab amu eheɗnab awa awa qettalo.’ ⌊Ag anam atteb.⌋” Job nug anam awa aum.