Job 26 - Nobonob Baibel

Job nug Bildadnu nai nob meum

¹ Bildad nug anam mattia male, Job nug oɗeppa awa aum.

² “Genabnab genab, na danab laa gai-iitta dayeye, elelenab aakku ehanidme! Ge, laa nug eppeg gai-iitta meum dayeye, ehanitte padal ii meumde!

³ Danab laa nug doyak dabmak ena ele iitta amu, gadon, na ulum nai ena nug mettame! Ge, na dabmak meu unuqagnu okkainab hee, miag atiak, laa oh anidkkulagnu dayomde!

⁴ Aunnab ehanitte, aakku na nai enanag da amelppa ame? Aɗi ouɗi na oɗen ehanitte, na nainab amu mattime? ⌊Amu oh iitta. Na nai ena laa ii mattime!⌋

⁵ Laa mauhna Kayak noobppa daatteb amu, ag eheɗ hahaɗtteb. Ao, laa mauhak abenppa daatteb ag anam hetteb.

⁶ Mauhak aben am Kayaknu neekkakppa lokkumak ii daatte. Ao, Kayaknu neekkakppa mauhak aben am miagib daatte.

⁷ Kayak he, hab am keeke ii daatte attan aihak aakku dayom. Ao, nug he, wan imu ele keeke ii daatte attan aihak aakku daatte.

⁸ Kayak he, le naɗi lombigppa daatte. Ao, am anam, amge lombig ii aoɗtteb; ag le aɗan daatteb.

⁹ Kalam kunum haenppa Nug he, kalam hautak daatte; lombig kalam tone, ii amahaltte.

¹⁰ Kayak he, yu nuhig tom ii eɗidtte. Ao, am anam dayeb ukkeb, gog tak haenppa batakku.

¹¹ Kayak Nug nai heehe, hab ukku uɗaltteb.

¹² Kayak Nug nuhig ɠagattag okkainab eleppa he, yu manin niiom. Ao, Nug nuhig doyak dabmak ena okkai eleppa yuppan doɗ naɗinab Rahap, Nug doɗ amu eɗitta okkule, beɗu huppu naunau neum.

¹³ Kayak Nug ouɗi iwale, hab eɗua, lombig keeke iitta, enanag dayom. Ao, Nug mat naɗinab, uug iitta oiyom, Kayak Nug mat amu banppa ye, iitta meum.

¹⁴ Keeke amu oh am Kayak Nug ɠagattag okkainab ele ippunigtte, amge elele ii ippunigtte; nakoknab aakkuib ippunigtte. Ao, danab nai otiptip-ppa mattie, ig nai oqotti nakokib doottem, amubia keeke amuam Kayaknu ɠagattag nakokib ippunigtte. Otiptip mattiak am oqotti nakokib, hakkaɗ qak am oqotti okkai; amubia Kayak Nug nuhig ɠagattag okkai oh ippunikkeb, ig attem dabmelom?” Job nug anam Bildad amegppa aum.