Job 25 - Nobonob Baibel

Bildad nug ebqak haen ewam aakku Job amegppa nai mattiom

¹ Job nug anam mattia male, Suha ted Bildad nug oɗeppa awa aum.

² “Kayak Nug ɠagattag oh ele. Ig danab ah, ig nuhignu ebehinig oh bodoetta le maɗ! Ig laanu anambia doognignu ii daatte. Ao, Kayak Nugib hab attannab dayaya, appa ɗo attem attem dim lamittaknu daatteb amu, Nug meum daatteb.

³ Aun nug Kayaknu daup ebaqadkkunu elele? Ge, auntai laa nug Kayak eppegppanu amahlak iite aotte?

⁴ Kayak Nug okkainab anam daatte amunu, ig danab ah oh, ig oonigppanu laa nug Kayaknu neekkakppa, nug genab tutukku hak danab daakkunu elelete? Ge, laa ah ooppanu doum ele, nug Kayaknu neekkakppa ooppa oppiak ele daakkunu elelete?

⁵ Nuhig neekkakppa kalam ena ii amahaltte; hoɗoppai ele ag oppiak ele ii daatteb.

⁶ Nuhig neekkakppa kalam, hoɗoppai ele ag enanag iitta anam daatteb amunu, ig danab ig gawat bia daattem amu, ig nuhig neekkakppa ena laa iinab daattem. Ao, ig danab, ig maɗwai bia daattem amu, ig nuhig neekkakppa ena laa iinab daattem.” Bildad nug anam Job amegppa aum.