Job 24 - Nobonob Baibel

¹ Am aɗinu Laa Nukka Ɠagattag Oh Ele Nug haen ganeb hettoɗiak abenppa daakkunu a, ig ii doottem? Ao, laa ag Nug dootteb ele, ag Nug hettoɗiak abenppa anidkkulagnu dabmetteb ele amu, aɗinu ag amu hekkulagnu ib oo nak daatte?

² Danab eheɗ hetteb ag men wannu tomppa daatteb aon akkan, laih maadtteb. Ao, ag sipsip yab aon diin, ahilkad gikkiɗah dadppa maadtteb.

³ Ag nid ag mamelkad mauhppig ele dilag donki yab aotteb. Ao ag ah qab, ag ahilkad makau okkai ebehi ele keeke lonnu onig awak daaglagnu ele diin aotteb.

⁴ Daɗek danab ag ibppa oiyegeg, danab eheɗ hetteb ag ibppanu lamadtteb. Ge, eheɗ hak danab ag anam eheɗ hattegeg, daɗek danab ah oh ag oolna, lokkumna daatteb.

⁵ Daɗek ag donki dakkuɗ wan meu waknu nakokib eleleppa ee mattia oitte bia ee aoglagnu hetteb. Ao, daɗek ag wan meu waknu nakokib elele, ag amuppa ahilkad nid naunau dilag ee aotteb.

⁶ Daɗek danab ah ag nau hak danab dilag dad okkaippa ⌊men doɗo nakokppa⌋ uɗat hena, doɗ dilag ee qagmetteb. Ao, ag amu dilag grep dadppa wana, ⌊men doɗo nakokppa⌋ grep meu laib laib ii awak ele nuhignu aotteb.

⁷ Ag ⌊ulahnu⌋ lamen iitta amunu, tuqan ag lamen elele iittappa niitteb. Ge, ag oug doomnanu lamen laa laappeg, gakkaɗeb niiglagnu laal iitta.

⁸ Qaukoppa gu na, eheɗ aqatte. Ao, ag lag laa iitta amunu, ag men okkai guguittak, nakokib ena daaglagnu aakku daatteb.

⁹ Nid yuɗ, mameg mauhom ele amu, nug anignu huh ii uuom, huh lanan dayeye, anig nug gamu iitta, keeke ele iitta amunu, nug eɗua lonnu men doɗo nau hak danab medakkunu elele iitta dayeye, nau hak danab nug uɗia, ah amunu nid yuɗ huh laawo, aɗitta awa ukka me, laa nid am okkai ma, nuhig maɗi nid daakkunu daden mette. Ge, daɗek ag men doɗo aoglagnu gona, nau hak danab eppelagppa lon aon, eɗun men doɗo amu nob mattaglagnu elele iitta daaegeg, nau hak danab ag ahilag men doɗo eɗun aoglagnu daɗek dilag nid yuɗ diitteb.

¹⁰ Daɗek ag lamen iitta amunu, ag beɗulag miag ele oitteb; ag nau hak danab dilag ee maon oin, ma lakka, o daden mak abenppa metteb, amge ag ee lakkulagnu laal iitta amunu, enug aqatte.

¹¹ Daɗek ag olip mameg nug goɗen aokkunu olip meu baelagppa mumuɗtteb, ⌊amge ag amuppa ehanittak nakok laa aoglagnu elele iitta⌋. Ao, daɗek ag wain dad mameg nug wain hekkunu grep meu baelagppa tabatteb, amge ag le baalag diitte.

¹² Aab okkaippa laa mauhkkulagnu henana, ag aiqakkanna daatteb, ⌊amge auntai ehanadte? Laa iitta⌋. Ao, laa lailkad guittak okkai mattaeg, guittak aoppig ele, ag laa ehanadkkunu enan daatteb, ⌊amge auntai ehanadte? Laa iitta⌋. Nau amu oh daatteb, amge Kayak Nug laa amu hetteb ele naippa ii yaaladtte.

¹³ Nau hak danab ag amahlakppa oiyaknu uutteb. Ag amahlaknu dabmak nakok laa ii aotteb. Ag amahlaknu ibppa ii oitteb.

¹⁴ Aam no, gatatu ne, qe mauhak danab ag ahan, daɗek danab aqaeg mauhtteb; tuqan ag yabhok danab hetteb bia ahan, qinonob qinonob oitteb.

¹⁵ Danab wau uuitta ah laa ele oittep, nug gappai hekkunu dabmette amu, nug gatatu nekkunu ameg maama, nug, ‘Gatatu neeb, gappai heppi, laa ii aniɗmana,’ atte. Ao, nug nuhig kobol hekkunu gatatu ne oiyaya, iɗu hauta oitte.

¹⁶ Tuqan yab danab ag lag loppaɗna, keeke yab aotteb. Ao, ag amu tuqanppa hetteb, amge amunppa ag lag ooppa, danab anadmananu daatteb; ag amahlakppa daaglagnu uutteb.

¹⁷ Aɗinu? Danab ag nau amu oh hetteb ele, ahilag wagkkaɗak am gatatunab. Ao, laa amu, ag aɗi keeke tuqan oiyegeg, danab ah baɗak eheɗ nau madatteb ele amu, ag amu ele layam batak daatteb.

¹⁸ ⌊O lailad, ag mattin, inam atteb.⌋ ‘Nau hak danab ag amu hetteb ele ag am le hipaɗ le qaɗeppa daatte bia daan, ⌊pahanab iitta metteb⌋. Ahilag wan am eheɗ laa awaknu anak waappa daye, appa laa grep meu aokkunu grep dadppa ii gotte. Iitta.

¹⁹ Aam huana ne, keeke oh qaɗaiedette, le iitta mette, amubia laa hipunin heppig ele ag iitta mena, moɗppa niitteb.

²⁰ Ag mauhegeg, ag anilkad ahilagnu daulag atitte. Gawat ag beɗulag moɗppa heeg nauhtte. Danab laa ag hipunin danab dilagnu haen elab ele ii dabmetteb; ag paha ahilagnu daulag atitte. Ao, hipunin danab ag ad qiia na qette, ahilagppa amubia bette.

²¹ Ah mattoi, nid ii menutteb ele, ag ehanittak laa iitta amunu, hipunin danab ag ah amu dilagnu eheɗ hetteb; ag ah qab dilagnu ele oolag nakok laa ii bodoette, eheɗ hadatteb.

²² Ag amu hetteb, amge Kayak Nug nuhig ɠagattag okkaippa danab ɠagattagnab ele hatte nauhtteb. Ge, danab amu ag ɠagattag bena daatteb, amge ag anamib bau daan, ag tuɗidna anamib daaglagnu oolagppa genab dooglagnu ib laa ii daatte.

²³ Kayak Nug paɗatteb, hipunin danab ag, “Ig baɗak iittappa inamib daagnig,” akkulagtai; amge Kayak Nug ahilag hak neekkidtte.

²⁴ Ag haen tutu danab okkai mena, ɠagattag daan oitteb, amge paha ag nena qetteb, ii daatteb. Ao, Kayak he, ag mauhna, moɗppa niitteb. Ge, ag danab ee aeg meu oɗue otaɗtte bia, ag iitta metteb.’ ⌊Ag da lailad, ag anam atteb,⌋

²⁵ ⌊amge dahil nainu amu, dahil nai am ahilag nai am hambuppuak ippunigtte.⌋ Anam ii daatte dayeb amu, laa nug anam ippuniɗaɗ! Ge, laa nug dahil nai am nai hamu heeb, miag atiaɗ!” Job nug anam aum.