Job 23 - Nobonob Baibel

Job nug Elipasnu nai nob meum

¹ Elipas nug anam mattia male, Job nug oɗeppa awa aum.

² “Gemu dahil dabmakppa dabmak daatte am uug nau ninig ele. Ge, Kayak he, da guittak okkai doottem amunu, da mahittem.

³ O gadon, da Kayak adeppa daatte doolom am ena. Ge, da Nug daatteppa gokkulnu elele doyen, appa golom am enanag.

⁴ Da elele anam daalomlob, da ukken, da eheɗ laa ii heminu nai dahil Nug amegppa alom. Ge, da ukken, Nug noobppa dayen, da oɗelppa diig aɗinu Nug dabmak eɗua, bu ii meɗalonu nai iɗu iɗu mattilom.

⁵ Da anam hekkulnu elele daalomlob amu, da anam heppi, Nug aɗi nob da meɗakku amu, da doolom; Nug aɗi nob meɗeb, da nob amu dabmein aute aolom.

⁶ Da anam hekkulnu elele dayen, anam helomlob amu, Nug ɠagattag nuhigppa heeb, da nein qekkulte? Iitta. Nug dahil nai doya, naippa nakok laa ii yaaiɗma.

⁷ Appa genab tutukku hak danab nug nuhig nai Nug amegppa akkunu elele daalo; da anam helomlob, Nug heeb, da bu baula ii aolom.

⁸ Anam, amge gemu da Kayak mattien anidkkulnu elele iitta. Da kaɗag uɗitteppanu ukkai, Nug appa ii daatte. Da qaban uɗitteppanu ukke, appa da Nug ii anidttem.

⁹ Kayak Nug yawalti uɗitteppanu uɗat heehe, da Nug ii anidttem. Nug yau uɗitteppanu gokkunu eɗua ugekke, da Nug nakok laa ii anidttem.

¹⁰ Da Nug ii anidttem, amge Nug da ib attenppa oittem amu, Nug dootte amunu, Nug ma anttak elele meɗa maleb, da enanag bein daakkul; da danab nug he, gol enanag ba daatte, da gol amubia enanag bein daakkul.

¹¹ Da hanhan tutukku Nug baeg matten gomi, gemu ele anamib hettem. Ao, da Nugib dim lamitten, da laih laih wanak uuen, ib apiɗitten ii gomi.

¹² Da haknunab nai Kayak oɗeppanu doomi amu, da nai amu ii uumi. Da dim lamidmi. Ao, da ee lakkulnu ool hette, amge da Kayak nai, Nug oɗeppanu aomi amu, da nai amunu ool huanaknab hette.

¹³ Da anam hettem, amge Kayak Nug dahilnu aɗi hekkunu dabmeum ele amu, Nug hette. Aun Nug heeb, Nug dabmak eɗukku? Laal iitta! Kayak Nug aɗi hekkunu oo hette amu, Nug aakku hette.

¹⁴ Nug aɗi maittak uug ele dahilnu matu awa, amu bekkunu ɗo meum amu, Nug he, nai amu aakku meu otte; nuhig dabmakppa kobol kuɗum laa amubia ele dahilppa bekkunu maittak awom daatte.

¹⁵ Diig amunu da Nug noobppa dayeye, baɗak eheɗ nau doottem. Ao, da amu oh dabmein, da nuhignu baɗattem.

¹⁶ Kayak Nug he, da ool baɗatte. Ao, Laa Nukka Ɠagattag Oh Ele Nug he, da baɗak eheɗ nau doottem.

¹⁷ Aɗinu? Gatatu da toniɗom daatte. Ao, da gatatu teppu ele ooppa daattem.