Job 22 - Nobonob Baibel

Elipas nug ebqak haen ewam aakku Job amegppa nai mattiom

¹ Job nug anam mattia male, Teman ted Elipas nug oɗeppa awa aum.

² “Danab laa nug Kayak ehanidkkunu elelete? Ge, danab nug doyak dabmak ena ele, nug Kayak ehanidkkunu elelete?

³ Na genab tutukku hak danab daalomlob, diig amunu Laa Nukka Ɠagattag Oh Ele Nug ooppa, gamag ahak laa aolote? Ao, na Kayaknu neekkakppa danab ooppa kaliak laa iitta ele daalomlob, diig amunu Kayak Nug keeke ena laa aolote?

⁴ Na Kayaknu ebehin oh bodoetta le ii mette amunu, Nug na daut batatte. Ao, na Kayaknu ebehin oh bodoetta le ii mette amunu, diig amunu Nug na eheɗ hemenu atte.

⁵ Nahip hak nau am okkainab. Ge, na hanhan hipunin hettem.

⁶ Anak amunu diig am inam. Na layap laa lon mettan, na hamu, diig iittappa keeke lon amunu onig awak daatte nug eppegppanu aome. Ao, ib amuppa na hee, danab ag ulahnu lamen ahilag keeke lonnu onig awak daakkunu na metton, ag lamen amu iitta ele, beɗulagppa lamen elele iitta aakku oippig.

⁷ Danab ag maidadaɗna daaeg, le baalag diiom amu, na ag le oug laa ii mattame. Na danab ag enug aqe, na ag ee laa ii mattame.

⁸ Na danab ɠagattag ele, na wan ele, na wan amuppa daame, na binan ele, amge na kobol nau amu heme.

⁹ ⌊Na amu heme, amge laala ele am:⌋ na ah qab laa gamu mauhom ele, nug eenu na unuqitte, na hee, nug eɗua, ee iitta ele lakka ukkom. Ao, na hee, nid ag mamelkad mauhadppig, ag nau daappig amu, ag eppelkad qiiak bia daappig.

¹⁰ Na amu heme, amu, diig amunu pelem digdig kuɗum na talilidna daatteb. Ao, diig amunu na uug pahanab be anidna, na baɗak eheɗ nau doottem.

¹¹ Diig amunu na gatatu tonitte, na aɗi keeke anidkkutnu elele iitta. Ao, diig amunu uug okkainab na tonittom daatte.

¹² Amu Kayak Nug hab attan iite daatte? Ao, Nug hoɗoppai attannab, aben amu eɗittak, attannab daatte ⌊amunu Nug keeke oh wanppa bette anidtte⌋.

¹³ Kayak Nug anam dayaya, keeke oh anidtte, amge na attem. ‘Kayak Nug keeke laa antta doottete? Ge, Nug gatatu teppu ele attan daatte amunu, Nug neekka, aɗi kobol wan imuppa hetteb ele antta, epeɗiadttete? Iitta.

¹⁴ Nug habppa oiyaya, lombig gatatunab ooppa daatte amunu, Nug ig ii anigtte.’ Na anam attem.

¹⁵ Na anam dabmettem, amge amuam eheɗ hak danab anukkanu, gemunu ele dilag dabmak. Na dabmak amu dim lamidkkutte?

¹⁶ Danab amu ag amunu dabmena, eheɗ henana, ag mauhkkulagnu haen iittappa nauhppig. Ao, Kayak he, le ui eheɗ na, keeke ye ukka nauhtte, amubia danab amu ag nauhna autna aoppig.

¹⁷ Danab amu ag, ‘Laa Nukka Ɠagattag Oh Ele Nug ihinigppa keeke laa hekkunu iitta,’ anana, ag Kayak amegppa, ‘Uuigna ukke!’ appig.

¹⁸ Ag anam heeg, ahilagppa anam beum, amge ⌊tatam, haen amu ii nak⌋ Kayak, laa iitta, Kayak Nugib ag ehanatte, ag laulkadppa keeke ena ena ele daappig. Nau hak danab dilagppa am anam amunu, da amu dilag ulum nai ii dim lamidttem; ag ele ouqak ii daattem.

¹⁹ Genab tutukku hak danab ag nau hak danab dilag nauhak anidna, ag gamag ahak dootteb. Ao, danab beɗulagppa aab iitta ele ag nau hak danab nauheg, ag aon aon aqan, inam atteb.

²⁰ ‘Genabnab genab Kayak he, ihinkad kekeɗ ag nauhppig; Kayak he, ahilkad en oh aab ewa iitta mette,’ aon atteb.

²¹ Anam amunu, Job, na nakka na hena, na Kayak waappa daakkut dayeb amu, na Nug ele maɗoɗ daaglah. Ao, na anam hekkut dayeb amu, na ena daakkut.

²² Na daut human, ippunittak nai Nug oɗeppanu awe! Ge, na nuhig nai doon, dabmakppa me!

²³ Na eɗun, Laa Nukka Ɠagattag Oh Ele dim lamidkkut dayeb amu, Nug heeb, na ena daakkut. Na nakka na awaidna, hak nau ii hena, na lautppa ele hak nau ii daamanu hena,

²⁴ amu na gol nahip aon, gappudppa gokkaɗppe noob, o iitta na nahip gol Opirnu aome amu, na gol amu aon, oolnu noakppa men daatteppa gokkaɗppe ukkeb amu,

²⁵ haen na amu heppe, Laa Nukka Ɠagattag Oh Ele Nug nahip gol bia daakku. Ge, Nug nahip silwa enanagnab bia daakku.

²⁶ Aɗinu? Na amu hekkut dayeb amu, na genab Laa Nukka Ɠagattag Oh Elenu enanagnab doon daakkut; na iɗun human neegppe, Kayak, nuhigppa gokku.

²⁷ Na am hekkut dayeb amu, na Nug unuqidppe, Kayak na baat dookku; Nug doya ehanitteb, na aɗi keeke genabnab hekkutnu nai anan qakkame amu, na amu hekkutnu elele daan hekkut.

²⁸ Na aɗi keeke hekkutnu dabmak aon malakkut amu, Nug heeb, am anam bekku; na ippunppa amahlak okkai daakku.

²⁹ Aɗinu? Danab laa uugppa tena, uɗa nak dooppeg, na Kayak amegppa, ‘Ehanadppe, ag eɗun, uɗa nak iitta ele daaglagnu oɗ medattem!’ unuqidppe, Nug danab uɗa nak aoppig ele ehanatteb, ag eɗun, enaib daaglag.

³⁰ ⌊Na Kayak waappa tutukku anam daakkut dayeb amu, na Kayak oɗ medappe,⌋ laa ag beɗulagppa aab ele amu, Nug ⌊nahip unuqittak doya,⌋ ag ehanatteb, ena daaglag. Ao, na Kayak waappa tutukku anam daakkut dayeb amu, na eppenppa dubuttid laa ii daama amunu, Nug anam hekku.” Elipas nug Job amegppa anam aum.