Job 21 - Nobonob Baibel

Job nug Sopar oɗeppa nai awa, eɗua nob ma mattia, inam aum

¹ Sopar nug anam mattia male, Job nug oɗeppa awa aum.

² “Ag da ool ɠagattag qettaglagnu, ag daulag human, dahil nai tutukku dooglagnu oɗ madattem.

³ Ag oɗelag qamutna, dahil nai doon malan, ag tuɗidna, aon aon niɗeg!

⁴ Da danab laa eheɗ heiɗomnu naittuɗ hettemte? Iitta! Da Kayak eheɗ heiɗomnu naittuɗ hettem amunu, aɗinu da ool maɗoɗ ele dayeye, Nug ameg mekkul?

⁵ Ag neekkiɗna, ottaina dabmak kuɗum aweg! Ge, ag dahilppa kobol aɗi aɗi beum anidna, ag dabmak huana aweg!

⁶ Haen da keeke imunu dabmettem, da baɗak okkainab doottem; da beɗul eheɗ hahaɗtte.

⁷ ⌊Amuam⌋ aɗinu nau hak danab ag kaino mena, bau daan oitteb? Ao, aɗinu ag ɠagattag tuɗidna aon, anam daan oitteb?

⁸ Ahilkad nid ag taliliadna daan, ena mena, ɠagattag daatteb. Ao, ahilkad nid ag amelagppa ena daan oitteb.

⁹ Ag laulkadppa uug laa ii daatte, appa baɗak laa ii daatte; Kayak ag bu ii madatte.

¹⁰ Ahilkad makau dawai ag makau anig hanhan oo noak madatteb. Ao, makau anig ag hanhan nalkad elelenab menuadtteb.

¹¹ Nau hak danab ag nid kuɗum ele; ahilkad nid ag gamag ahak doon, ahi goɗatteb.

¹² Ag laa tambarin, harp ele qeegeg, laa ag ahi edatteb. Ao, laa ag dumuttum iwalegeg, laa ag gamag ahak okkai doon, ahi goɗak keeke, hetteb.

¹³ Nau hak danab ag keekenu elelenab daan, ee le ele lanana, gamag ahak ele dootteb; ag anam heeg ukke ukke, ag mauhna, boumak abenppa maɗoɗ ele gotteb.

¹⁴ Laa ag nau hetteb ele, ag Kayak amegppa, ‘Na uuikke! Ig nahip ib doognignu oonig ii daatte,’ aon atteb.

¹⁵ Ag anam Nug amegppa anana, ag ele atteb. ‘Laa Nukka Ɠagattag Oh Ele, Nug am aun amunu, ig diig amunu Nug waappa daat, Nug oɗe dim lamidkkunig? Ao, ig Nug unuqidkkunig dayeb, diig amunu ig aɗi ehanittak aognig?’ aon atteb.

¹⁶ Ag anam atteb, amge ahilag keekenu elelenab dayak am ag eppelagppa ii daatte amunu, da nau hak danab dilag ulum nai ii dim lamidttem; da ag ele ouqak ii daattem.

¹⁷ Anam, amge Kayak Nug haen kuɗum he, nau hak danab ag paha mauhttebte? Iitta. Haen kuɗum Kayak Nug he, uug naunab nau, uug amuam Kayak Nug oo nauhe, danab bu madatte amu, bu amuam nau hak danab dilagppa haen kuɗum bettete? Iitta.

¹⁸ Haen kuɗum Kayak Nug he, ag ulah keeke uug iitta iwala, ye gotte bia daattebte? Iitta. Ao, haen kuɗum Kayak Nug he, ulah huana iwalala, ee aeg dappunkkeg ye gotte bia daattebte? Iitta.

¹⁹ Laa ag atteb. ‘Danab laa nug hipunin heehe, Kayak Nug bekkod bu madakkunu dabmette,’ aon atteb. Anam amge danab nug hipunin hette, nug amunu guittak doya, eheɗ heum dookkunu, Kayak Nug danab amu bu mettaɗ! Laa aib mettom.

²⁰ Danab nau hette, nugnab nug amegppa Kayak nugib heeb nauhkku anttaɗ! Ao, nugnab Laa Nukka Ɠagattag Oh Elenu bu awaɗ!

²¹ Aɗinu? Danab amu nug wan uua ukkak dimppa, nug baekkud dilagppa aɗi bekku dabmettete? Iitta. Ao, nuhig haen iitta mak dimppa, nug baekkud dilagppa aɗi bekku dabmettete? Iitta.

²² Laa nug Kayak doyak laa ippunidkkunu elelete? Iitta. Nug danab okkai okkai ele epeɗiadtte.

²³ Danab oolagppan danab laa amu, nug ɠagattag dayaya mauhtte. Ao, nug baɗak iitta, maɗoɗ ele dayaya, nug mauhtte.

²⁴ Nug hanhan ee elele laawo, nug beɗu am enaib daatte; nug ebehippa mukki huanak daatte.

²⁵ Danab laa nug anam ena daya mauhtte, amge laa nug uug naunabib doya, bau daya, mauhtte. Ao, nug deɗ laa keeke ena nakok laa ii anttom, amge nug mauhtte.

²⁶ Danab ena daya mauhtte, danab uugib doya mauhtte, aa oh mauhya, gappudppa niittep. Ao, gawat danab amu oh gaɗalahppa tena daatteb.

²⁷ O lailad, ag aɗi dabmak aotteb amu, da doottem. Ao, dahilppa ag aɗi hekkulagnu lokkumakppa dabmenana maittak eheɗ aotteb amu, da doottem.

²⁸ Aɗinu? Ag inam atteb. ‘Danab okkai, ⌊nug hipunin heum ele amu,⌋ nug laug gemu adeppa daatte? Ao, nau hak danab dilag peh lag, ag amuppa daappig amu, peh amu adeppa daatteb?’

²⁹ Ag anam atteb, amge ag laa, ag wan atu kuɗumppa oitteb ele, ag ag keekenu oɗ iite madappig? Danab amu ag nai mattiegeg, ag amunu dabmak nakok laa iite aoppig?

³⁰ Amuam inam. Kayak Nug danab ah laa oh bu madakkunu heehe, eheɗ hak danab ag bu ii aotteb. Ao, laa heehe, eheɗ hak danab ag bu awak haenppa bu ii aotteb.

³¹ Genab, eheɗ hak danab dilagnu amu, auntai laa nug eheɗ hak danab laa noobppa dayaya, nug hipunin hette attete? Ao, auntai laa nug eheɗ hak danab laa nug laanu eheɗ he, nug eɗua nob elele medattete?

³² Eheɗ hak danab nug mauhe, laikkud ag nug gaɗa maon, moɗppa gotteb. Ao, ag gona boumona, ag appa ag nuhig boumak aben guman daatteb.

³³ Ag oolnu noaknu wan enappa appa niikkunu boumeg, appa nug ena niitte. Danab kuɗumnab, huanak ele ag nug gaɗa aon, anuqna ukkaegeg, kuɗumnab ag ele nug gaɗa dim lamidna gotteb.

³⁴ Anam daatte amunu, ag da lailad, ag nai meu iittanab iitta mattinna, ag ehaniɗak attem meɗatteb? Ag dahil nai nob metteb, amge nob ahilag am hambuppuak, kaboliak ele.” Job ag amelagppa anam mattia aum.