Job 20 - Nobonob Baibel

Sopar nug ebqak haen aɗit aakku Job amegppa nai mattiom

¹ Job nug anam mattia male, Nama ted Sopar nug oɗeppa awa aum.

² “Da nahip nai doyen, oolppa uug okkai doomi amunu, da dabmakppa nob mekkulnu duttunak doottem.

³ Na madittem amu, nahip nai amu genab daalo, am da daul batalo; am heeb, da binal iitta daalom. Amge da keeke diignu doyak tutukku doottem amunu, da nahip nai am nob mekkulnu doyeye hettem.

⁴ Am dahil dabmakppa na anukkanab digme uɗie uɗie, gemu batak, haen amu oh na kobol laa wanppa daatte amu, da na kobol amunu oot maidtte bia doottem. Ao, Kayak Nug danab wanppa meum, haen amuppa digma uɗiak, da na kobol amu dayeye doottem bia doottem.

⁵ Kobol amuam inam. Nau hak danab ag wanppa daan, deɗ laala ag gamag ahak dootteb, amge gamag ahak amuam haen tutuib daatte. Ge, Kayaknu nuhig haknu ele uuak danab ag ahilag gamag ahak haen tutuib daatte.

⁶ Nau hak danab nug danab okkai okkai daakkutai. Ge nug danab okkai okkai beebeb, ikki lombig ta yaakkutai.

⁷ Amge danab amu nug biie, biiak nuhig amu iitta mette, amubia danab amu nug iitta mekku. Ao, laa ag nug ii iitta meum haenppa anidppig amu, ag nug ii anidna, ag akkulag, ‘Danab amu dayom, amge gemu nug adeppanab daatte?’ aon akkulag.

⁸ Nug dayaya, danab tul niia, wagɗe buttua tul niiom daug atitte, amubia nau hak danab nug iitta ma qettoɗtte; ii daatte. Ge, danab tulegleg anitte, iitta mette, amubia nau hak danab nug iitta mette.

⁹ Laa ag nug anidppig, ag baula nug ii anidmana; mudippan laikkud ag nug baula ii anidmana.

¹⁰ Nug bekkod aɗekkud ele ag nuhig eheɗ hak, nug daɗek dilagppa heum amu, ag eheɗ hak amu bappaidkkulag; ag en nuhig, nug aokkunu wagai ma awom amu, ag en amu aon eɗun, daɗek danab mattaglag.

¹¹ Nau hak danab nug nid bau, ebehi ele dayaya, nug mauhtte.

¹² Nau hak danab nug eheɗ hekkunu enanag dootte. Nug danab ee ubuhinab ele oɗeppa ma, ⌊paha iitta memanu⌋ lemaɗu waappa mette, nug eheɗ haknu amubia hette.

¹³ Danab ee ubuhi ele paha lae nekkunu dabmak nakok laa iinab aotte, nug ee oɗeppa aɗe daatte amu, amubia nau hak danab nug eheɗ hekkunu anam bia doya hette.

¹⁴ ⌊Nug anam hette amge,⌋ eheɗ hak nuhig am ee oɗeppa ubuhinab ele, amge ooppa eɗua ninig daatte bia daakku. Ao, eheɗ hak amuam mat naunu ouɗi eheɗ, danab beɗuppa emalakppa tette, amubia daakku.

¹⁵ Danab amu nug danab ee laawo, oo gahag be bahe gotte, amubia nug en okkai okkai ib eheɗppa awom ele buɗieb ukkeb, laa aoglag. Ao, Kayak heeb, nug en okkai ib eheɗppa awom ele buɗieb ukkeb, laa ag aoglag.

¹⁶ Mat naunu ouɗi eheɗ nug beɗuppa tekku. Ao, mat nau emaleb mauhkku.

¹⁷ Nug en okkai aokku, amge nug amuppa gamag ahak nakok laa ii aoma. Ao, nug keeke ena ena kuɗum aokku, amge amuppanu gamag ahak nakok laa ii aoma. Iitta.

¹⁸ Nug aɗi keeke aokkunu wagai ma haaha awom ele amu, nug amuppa gamag ahak ii aoma. Ge, nuhig uɗatppa en awom amu, nug uɗat amunu meuppa maɗoɗppan gamag ahak nakok laa ii aoma. Iitta.

¹⁹ Aɗinu amu oh am nau hak danab, nuhigppa bekku? Nug daɗek danab eheɗ hadatta, ahilag keeke awe, ag daɗeknab daappig. Ao, nug wagai ma, lag nug ii heum ele hamu awom.

²⁰ Laa amu, nug hanhan en okkai okkai qagmekkunu hik qeeqe daatte, ii iitta mette; en okkai amuppa amu, nug uug haenppa ehanittak laa ii aoma.

²¹ Nug eɗua daɗek dayaya, ee lakkunu laa ii anidma. Ao, nug keekenu elele ii daama.

²² Nug en okkai awa, dayeb ukkeb, uug nau nuhigppa bekku; guittak naɗinab nuhigppa tutukku bekku.

²³ Nug elelenab, danab ee okkainab la, oo dittia auta autanab aotte, nug amubia dayebeb, Kayak nuhignu oo nauha autanab aweb, bu eheɗ medakku; Kayak Nug danab amu huana okku.

²⁴ Kekeɗ laa lat doɗo aeg aenppa hak eeb, qe-eɗidkku dayeb, kekeɗ laa nug lat doɗo aeg brasppa hak ewa, qeeb mauhkku.

²⁵ Lat doɗo amuam danab amu gome qeeb, hiɗakku. Ge, aeg amuam nug gamag yeeb hiɗakku. Nug hiɗakku, amge nug yom doya, eheɗ nau baɗa mauhkku.

²⁶ Nau hak danab amu nug en qagmeum, amge en amuam nuhig ii daama; gatatu naunabppa qettoɗkku. Ge, nuhignu amu, Kayak Nug heeb, nug aab qauhaknu iitta ele, amuppa mauhkku; nuhig en nug laugppa daatte, am amu ele eweb, iitta mekku.

²⁷ Hab aabppan daup ag nug eheɗ heum heppeg, miag atikku. Ge, wanppan danab ag ahan, ‘Nug eheɗ heum,’ akkulag.

²⁸ Ui oawa, nug laug mawa gokku. Ge, Kayak danab ah bu mattak deɗppa Nug heeb, le ui huana oawa heeb, nug laug ii daama.

²⁹ Kayak Nug nau hak danab dilag anam bekkunu ana malom daatte. Ao, Kayak Nug nau hak danab ag uug amu aoglagnu tituanom daatte.” Sopar nug mattia anam aum.