Job 19 - Nobonob Baibel

Job nug Bildad oɗeppa awa, nai mattiom

¹ Bildad nug anam mattia male, Job nug oɗeppa awa aum.

² “Ag ahilag naippa da guittak naunab, eheɗ oɗoɗilak ele meɗatteb; amu haen gane laa ele ukkeb, ag amu uuglag?

³ Haen kuɗum ag da eheɗ heminu aeg doomi; ag uɗa nak iitta ele banel uɗin, da amelppa nai maditteb.

⁴ Ag da hipunin hemi atteb, amge genab da anam hemi dayeb amu, amuam dahil keeke. Am ahilag keeke iitta.

⁵ Ag da aniɗnana, ‘Nug hipunin heum amunu, nug aakku na qeum daatte,’ dabmetteb dayeb, ge, ag ‘ig am anam iitta amunu, ig ena daattem,’ ag genab anambia dootteb dayeb amu,

⁶ ag eheɗ dabmetteb. Kayak Nug dahilppa eheɗ he, da nein qein daattem; Nug nuhig uhuippa da awiɗom.

⁷ Da, ‘Laa eheɗ heiɗtte,’ ettem, amge laa nug da ii ehaniɗtte. Ge, da laa nug ehaniɗkkunu ettem, amge laa nug amu doya, nai doya mala hettoɗia epeɗia elele mettak kobol dim ii lamidtte.

⁸ Kayak Nug da ib enappa oikkulnu ib oɗe oo ne, da appa gokkulnu elele iitta. Ao, Nug he, da ippul am gatatuib daatte.

⁹ Nug he, da binal iitta daattem. Ao, Nug he, da king laa, kekeɗ ag uɗin eɗidna, king haɗ nuhig aoeg, binag iitta ele daatte, da amubia daattem.

¹⁰ Kayak Nug kekeɗ ag aab heeg nauhtte bia he, da nauhe aute autenab aottem; da iitta memi. Ao, Nug he, da eɗuen, ena bekkulnu dabmak aɗe oikkulnu elele iitta; danab ad gaɗa tole, eɗua ena ii daatte bia.

¹¹ Kayak Nug dahilnu oo nauhak huanak dootte; Nug dahilnu, ‘Kekeɗ dahil laa aakku,’ Nug anam dootte.

¹² Nuhikkud daup ag huanak uɗitteb. Ao, ag da ele ban hekkunignu keeke oh bappaidtteb; ag da laul talilidna daatteb.

¹³ Kayak he, da awalad amalad ag da ele daagnignu oolag iinab daatte; da lailad ele ag da aniɗaknu uun autna aotteb.

¹⁴ Dahilad, da ele tiig laippu, ag da uuiɗna goppig. Ge, da lailad oh ag dahilnu daulag atiom.

¹⁵ Laa da laulppa ɗo danab bia daatteb, ag, amu maɗi ah dahilad ele ag dahilnu, ‘Ig nug ii doottem,’ bia anam oitteb; ag dahilnu, wan laihnu danab dootteb.

¹⁶ Da dahil maɗi nid onigppa ettem, amge nug ii uɗitte. Am genab, da oɗelppanab oo doyak ele onigppa ettem, amge nug gumiɗa ii uɗitte.

¹⁷ Ah dahil nug da gukkuiɗa daakkunu uua auta autanab aotte. Ao, da awalad amalad, ag dahilnu, ‘Am naunab; ig anidta, gahag bak doottem,’ ag anam aakku dootteb.

¹⁸ Aabppan nid danab naunau ag dahilnu, ‘Keeke hamunab,’ dootteb. Ge, da dimittim oiiyi, ag da aon aon iutteb.

¹⁹ Da lailad, oiyak laippu, da ag ele ouqak daamut, ag oh dahilnu oolagppa uuaknab dootteb. Ao, laa da ahilagnu ool mauhtte amu, ag da geɗiltteb.

²⁰ Da beɗul ebehi ta auta autanab awom. Ge, da genab mauhlom, amge da ii mauhmi, da ina daattem, amge da ena iinab daattem.

²¹ O da lailad, Kayak Nug eheɗ oiɗom amunu, ag dahilnu oolag gai-iitta doon oolag meɗan ehaniɗkkulagnu oɗ madattem. Ge, ag dahilnu oolag gai-iitta doon oolag meɗan ehaniɗkkulagnu oɗ madattem.

²² Kayak Nug da uug meɗatte, amge aɗinu ag ele anam hetteb? Ge, doɗ laa nug layag qa, teppu lanan daatte, ag dahilppa anam hetteb, amge haen gane laa ele ukkeb, ag kobol amu uuglag?

²³ O gadon, laa nug dahil kaya yaa malalo am ena. Ge, laa nug dahil kaya buk itoɗiak eleppa yaalo am enanag.

²⁴ Laa nug dahil kaya yaaknu keeke ɠagattag ainppa hak eleppa menppa hanhan daakkunu otaɗlo am ena. Ge, laa nug yaaknu keeke amuppa dahil kaya keeke hanhan daakkunu otaɗlo am ena.

²⁵ Aɗinu? Da inam doottem; laa Nug da qagaiettakppanu eɗua uhuqak danab dahil daatte. Ao, Nug daatte amu, gog tak haenppa Nug wanppa daakku.

²⁶ Nug daatte, amu gog tak haenppa Nug wanppa daakku, amge haen gamag imuppa da mauhppi, gawat ag beɗul imu moɗppa heppeg nauhkku. Gawat ag amu hekkulag, amge dimppa da beɗul ele eɗuen daye, da amelppa Kayak anidkkul

²⁷ Da dakka, laa iitta, da, da amelppanab anidkkul. Amu da Nug anam anidkkulnu amu, da ool naɗinab daatte.

²⁸ Anam amunu, ag dahilnu, ‘Nug eheɗ he, Kayak bu medatte amunu, ig genab, ig nug amegppa ii daye daye amunu akkunig,’ akkulag dayeb amu,

²⁹ ag bu aomnanu baɗaglag am ena. Aɗinu? Ag dahilnu anam hekkulag dayeb, Kayak Nug ahilag hak amunu oppoɗi bak doya, bu matteb, ag dooglag, Kayak Nug danab dilag hak hettoɗia, laa eheɗ hette ele bu medatte dooglag.” Job nug anam aum.