Job 18 - Nobonob Baibel

Bildad nug ebqak haen aɗit aakku Job amegppa nai mattiom

¹ Job nug anam mattia male, Suha ted Bildad nug oɗeppa awa aum.

² “Haen gane laa ele ukkeb, na nai anambia madikkutnu uukkut? Ao, na dabmak pehettak aoppe, ig nai mattignignu elele.

³ Aɗinu na ihinignu, ‘Ag am doɗib,’ dabmak aottem? Ge, aɗinu na ihinignu, ‘Ag dabmak iitta, ag kaaka,’ dabmettem?

⁴ Na oot huana nauhehe, na nakka na guittak okkainab na medattem. Ao, na ena daakkutnu danab laa oh wanppanu ahaglagoittete? Ge, na ena daakkutnu laa men oh ag abenlagppanu aon, laih mekkulagoittete?

⁵ Danab laa nug lamnu ewak iwale qauhtte, amubia nau hak danab nug iitta mette. Ao, laa lam qauhe ii eotte, amubia nau hak danab nug iitta mette.

⁶ Nug laugppa amahlak ii daatte. Ao, nau hak danabnu lam ii eotte.

⁷ Nau hak danab nug ena dayeye, beɗu gai-iitta mette. Yo, nuhig keeke laa hekkunu lokkumakppa dabmaama maittak eheɗ awak amu, maittak amu he, nug na qette.

⁸ Aɗinu? Ai laa nug oiyaya, uhuippa tette, amubia nau hak danab nug nauhtte. Ao, ai nug hamu oiyaya, uhuippa ta, uhuinu muɗippa nauhtte, amubia nau hak nug nauhtte.

⁹ Doɗ nug pelemppa te, pelem ɠagattag aɗatte, amubia nau hak danab nug qagaiettak daatte. Ao, doɗ pelemppa ta, eɗua laih gokkunu ib iitta bia, nau hak danab nug mauhtte.

¹⁰ Pelem muɗippa hak am nau hak danab aokkunu ibppa lokkumak daatte. Ge, pelem ibppa lokkumak daatte.

¹¹ Baɗak eheɗ nau nuhigppa baaba daatte; nug adeppa adeppa gotte, baɗaknu keeke beegeg, nug baɗaɗa oitte.

¹² Uug naunab nau nuhigppa bekkunu miagnab daatte. Ao, nug na qekkunu heehe, nauhak pahanab nuhigppa bette.

¹³ Oɗe naunab nug qe, nug gaɗa nauhtte; nug eppeg, baeg ele beɗatteb.

¹⁴ Nau hak danab nug laugppa baɗak iittappa dayeye, uug naunab nau ba he, nug ib naunab nau, baɗak eheɗ nau eleppa ukka mauhtte.

¹⁵ Nug mauhe, oɗenu gawat ag nug laugppa daatteb. Ao, nug mauhe, laa ag oɗenu gawat daamanu elele bappaidna, ag nug laugppa daatteb.

¹⁶ Nau hak danab nug am ad laa, diɗi beɗom bia daatte. Ao, nug ad ebekkud bunaɗom, nug amubia daatte.

¹⁷ Nug amubia nauhe, wanppan danab laa nuhignu ii dabmette; nug onig wanppa ii daatte.

¹⁸ Laa ag lamitteg, nug aben gatatu ele, aben amahlak iittappa wana daatte; nug wanppa baula ii daatte.

¹⁹ Nau hak danab nug buɗub laa, nug laikkud, nug tiig laippu ele amu, buɗub amu, nug amu oolagppa daakkunu laa iitta; nug buɗub laa nug dayomppa ii daatte.

²⁰ Danab ah qaban uɗitteppanu daatteb, ag nau hak danabnu aɗi aɗi bette anidna, ag dabmak huanak aotteb. Ao, danab ah kaɗag uɗitteppanu daatteb, ag nau hak danabnu aɗi aɗi bette anidna, ag ameg iɗuak dootteb.

²¹ Kobol amu oh am eheɗ hak danab dilagppa betteb. Ao, danab ag Kayak dimettan, dim ii lamidtteb ele, ahilagppa anam betteb.” Bildad nug anam aum.