Job 17 - Nobonob Baibel

¹ Da eɗuen, ena daakkulnu dabmak iinab awe aɗattem. Ao, dahil haen am tutu okkulom daatte. Ge, da moɗppa gokkulnu hettem.

² Am genab, danab ag dahilnu, ‘Keeke hamunab,’ dootteb ele, ag da taliliɗna daatteb. Ao, ag da aon aon iwegeg, da ib laa iitta, da ahilag hak nau amu anidkkuloitte daattem.

³ O Kayak, da uhuqak awen, hamu gokkulnu keeke aɗi medakkulnu dabmettem amu, na amu meɗappe, da eɗuen medakkulnu oɗ medattem; na amu ii hekkut dayeb am, auntai laa ehaniɗa meɗakku?

⁴ O Kayak, na paɗatte, da lailad ag diig aɗinu da guittak nau imu doottemnu diignu doyak tutukku iitta ele daatteb. Am anam amunu, na heppe, ag da ii eɗilmananu oɗ medattem.

⁵ Danab laa nug layag eheɗ laa ii heum, amge danab amu nug men doɗo aokkunu layag eheɗ heum akku dayeb, danab amu heum ele amu, nug bekkod ag amelag gaɗuak daakku.

⁶ Kayak Nug he, danab ah oh ag da am nau baknu at daattem dabmena, ag da aon aon iutteb; Nug he, danab ag hunueg, da iɗulppa tette.

⁷ Da oolppa guittak naunab nau doyeye, da amel oh nauhkkunu hettep; da ebehil te, da danab itotog bia daattem.

⁸ Genab tutukku hak danab ag da aniɗna, ag ottaitteb; laa ag beɗulagppa aab iitta, ag ahan, ag danab ag Kayaknu nuhig haknu ele uuak danab daatteb dilag naippa yaaladtteb.

⁹ Genab tutukku hak danab ag ib oittebppa daan oiglag; ag ib ii apiɗidmana. Ge, laa ag eheɗ ii hetteb ele, ag ɠagattag daatteb amu, ag tuɗidna, ɠagattagnab daaglag.

¹⁰ Anam, amge ag ⌊uɗin daatteb ele amu, ag⌋ oh baula ippuniɗkkulagnu ma anttak heig! Ag anam hebeppeg amu, da ag oolagppanu laippu laa nug doyak dabmak ena ele iinab anidpa.

¹¹ Da mauhkkulnu hettem. Da aɗi keeke laa hekkulnu maittak aomi amu, maittak amu oh na qeum niitte. Dahil oo hak ele anamib.

¹² Ag keeke oh kabolitteb; ag tuqannu, ‘Amahlak,’ atteb. Ge, haen gatatu daatte, wagkkaɗak miag ii daatte, haen amuppa ag amahlaknu ii alobbia, amge ag, ‘Amahlak miag daatte,’ aon atteb.

¹³ Da mauhak abenppanu am da laul daatte aakkuib dabmettem dayeb, da gatatu amuppa niikkulnu aakkuib dabmettem dayeb,

¹⁴ da moɗnu, ‘Na da mamel,’ akkulnu aakkuib dabmettem dayeb, da mauhen, moɗppa niippi, gawat da beɗul heppeg nauhkkun daaglag, da gawat amunu, ‘Ag am da anil, appinalad ele,’ akkulnu aakkuib dabmettem dayeb amu,

¹⁵ da attem hein, butti haen adekku da ena bekkulnu dabmak aɗe oikkul? Ao, auntai laa nug dahilnu, ‘Nug eɗua ena ba oikku,’ dabmak aɗa oikkunu elele?

¹⁶ Ena bekkunu dabmak aɗa oiyak am da ele oh moɗppa noɗa iite daagnih. Ao, ena bekkunu dabmak aɗa oiyak am da ele oh gappudppa iite daagnih?” Job nug nai amu mattiom.