Job 16 - Nobonob Baibel

Job nug Elipas oɗeppa awa, nai amu nob nug amegppa aum

¹ Elipas nug anam mattia male, Job nug oɗeppa awa aum.

² “Haen kuɗum da nai amubia doyen malami. Ag ehaniɗkkulagnu henana, oo mak nakok laa ii meɗatteb. Ag oh, ag oo mak uɗat nauib hetteb!

³ Ag ulah naiib ii daye daye mattiglagte? Ge, ag aɗi uug anidna, ag ge iitta da amelppa, dahil dabmak eɗuglagnu nai maditteb?

⁴ Ag da daattem bia daalob, da ag abenlagppa dayeye, da ag maditteb bia ele madikkulnu elele daalom. Ao, da ag amelagppa, ‘Ag eheɗ inam inam hetteb,’ akkulnu, da ag eheɗ heppignu ikkil matuɗen daakkulnu elele daalom.

⁵ Ag da daattem bia daalob, da anam hekkulnu elele daalom, amge da anam ii helom. Iitta. Da ag oolag ɠagattag qettalom. Ao, da oɗelppa ehanittak nai madippi, ag oo mak aon, ag oolagppa guittak okkainab ii doolob.

⁶ Anam, amge gemu amu, da nai madittem dayeb, dahil guittak ii iitta mette. O iitta da nai ii madittem dayeb, dahil guittak ii bodoedatte, ina daatte.

⁷ O Kayak, am genab na hee, da ebehilad oh bodoette, da beɗul gai-iitta daatte; na hee, dahilad oh ag nauhna daatteb.

⁸ Na hippaliɗe, ⌊laa ag amu anidna,⌋ da hipunin hemi, diig amunu da anam daattem dabmetteb. Ao, na hee, da beɗul ebehi ta, gai-iitta dayeye, ⌊laa ag amu anidna, ag⌋ da hipunin hemi, diig amunu da anam daattem dabmetteb.

⁹ Kayak dahilnu oo nauhak doyaya, banel uɗia, Nug doɗ layag beɗu aegppa he nauhtte, amubia Nug da beɗul he nauhtte. Ao, Nug dahilnu aeg emala daatte. Ge, Nug da eheɗ heiɗkkunu ɠagattag neekkiɗtte.

¹⁰ Kayak Nug anam heehe, danab ag aon aon iutteb. Ag dahilnu, ‘Keeke hamunab,’ doon, eppelag oohap tena, ag da hippel laih laih mataɗtteb. Ag da eheɗ heiɗkkulagnu qagmena, dahilppa uɗitteb.

¹¹ Kayak Nug da eheɗ hak danab eppelagppa meiɗom. Ao, Nug he, nau hak danab ag da aɗaeleg, ag eppelagppa daattem.

¹² Dahilppa keeke enaib ukkom, amge Kayak Nug he, da nein qein, nauhmi daattem. Ao, Nug da duul aɗa ha, beɗul oh maduduɗom. Danab nug ma anttak haaha, at ma, lat doɗo at amu qekkunu ette, Kayak Nug da at amubia daakkulnu qappiɗe daattem.

¹³ Kayaknu lat doɗo ewak danab ag da taliliɗna daatteb. Nug dahilnu oo gai-iitta doya oo meɗa ehanittak kobol nakok laa ii dim lamittatta, Nug dahil aɗitta doɗo yaatte. Ao, Nug he, da kahipalnu leppu wanppa nette.

¹⁴ Kayak Nug ii daye daye, da guittak meɗakkunu banel uɗia, eheɗ heiɗtte; Nug ban danab kekeɗ yaakkunu nuhigppa qaietta gotte bia dahilppa uɗitte.

¹⁵ Kayak Nug anam hette amunu, da lamen heɗiag ele tagattem; da dup noin, ikkil wan ye, iɗul gappudppa memi daattem.

¹⁶ Da gayeye daaiyi, da amel kokoɗ eppom; Da amel laih laih oh gatatu manattep.

¹⁷ Da anam daattem, amge da danab laa guittak nau, hamu ii mettami. Ao, dahil unuqittakppa am hambuppuak laa iitta; am oppiak ele daatte.

¹⁸ Amu da mauhppi, da wan da tiil tonamanu ool daatte. Ao, da mauhppi, da eheɗ laa ii hemi, amge da eheɗ hemi bia mauhmi, da nai amu miagib hanhan daakkunu ool daatte.

¹⁹ Da aɗi heminu nai am gemu, geha iikku hab aabppa daatte. Ao, dahilnu nai Kayak amegppa hab attan daatte.

²⁰ Wan imuppa da lailad ag dahilnu, ‘Keeke hamunab,’ dootteb. Ag anam dooiɗegeg, da Kayak unuqittitti, amel leb huanaknab nette.

²¹ O gadon, gamag danab nug huu aɗit oo mak laippu daaglahnu gamag danab uɗat hette, amubia laa nug gamag danab dayaya, Kayak da ele gamanihppa gamag danab uɗat hekku, amuam ena.

²² Aɗinu? Maɗ kuɗum iitta, haen tutuib ukkeb, da mauhkkul. Ao, da mauhe, wan imu uuen, eɗuen ii uɗipa.