Job 15 - Nobonob Baibel

Elipas nug ebqak haen aɗit aakku Job amegppa nai mattiom

¹ Job nug anam mattia male, Teman danab Elipas nug oɗeppa awa aum.

² “Danab nug doyak dabmak ena ele amu, nug laanu nai nob ma, nai hambuppua ii mattima. Ge, nug ulah gakkaɗak kaɗag uɗitteppanu uɗia, hamu doa gotte, nug amubia ii mattima.

³ Nug nai meu iittappa heeb, layag nug nuhig dabmak eɗukkunu ii hema; nug nai elab, meu iittanab ele ii mattima.

⁴ Danab nug doyak dabmak ena ele nug anam ii mattima, amge Job na, na amu hettem. Na nahip nai mattiakppa na hee, laa nug Kayaknu ebehi oh bodoetta le mekkunu kobol dim lamidkkunu hette amu, nug uua, Kayak dimedatte. Ao, na hee, laa nug Kayak waappa pehettak daakkunu hette ele amu, nug amu uua, ib laappa gotte.

⁵ Aɗinu? Na hipunin ooppa daanna, oɗenppa nahip nai madittem. Ge, na danab nug lokkumakppa kobol kobol hekkunu doya auta autanab aotte elenu nai mattiak bia nai madittem.

⁶ Am nahip nai, da iitta, nahip nai nug na bu aokkutnu daattem ippunigtte. Ge, nahip mattiak am na eheɗ hettem ippunigtte.

⁷ Na danab tatamnab wanppa neum daattem amunute ⌊na doyak okkai ele⌋? Ge, qauko naunau ii daappig haenppa na anin menuittomte?

⁸ Kayak Nug nuhig ehanittak ele ag nai mattiegeg, na nai amu dautppa doottemte? Ao, nahip dabmakppa amu, na nakka naib na doyak dabmak ena elete?

⁹ Na aɗi keeke ig ii doout, na doottemte? Ge, na dabmak meu unuqagnu atten laala ig ii doout, na doottemte?

¹⁰ Danab kainonab ag ig ehanigna mattiegeg, ig laa ig ahilag nai bia na amenppa madittem. Ge, danab ag na mamen ii dayom haenppa daappig, ag ig ehanigna mattiegeg, ig ahilag nai bia na amenppa madittem.

¹¹ Kayak Nug ⌊ig oɗenigppa⌋ oot mekkunu ehanittak mettom amu, nai amuam nahipnu elele iittate? Ao, nai amu oo bodoettakppa mettak am elele iittate?

¹² Aɗi dabmak nau nahip dabmak eeɗe, na eheɗ madittem? Ao, aɗinu na dada danab dilag hak dim lamidttem?

¹³ Na amu hettem amunu, na nai nau mattinna, Kayak yaattem; na nai nau huanak na oɗenppa madittem.

¹⁴ ⌊Na, ‘Da beɗulppa aab iitta,’ attem, amge⌋ danabnu amu, laa nug oppiak ele daakkunu elelete? Ge, laa ah oolkadppanu dotteb ele oolagppan laa nug genab tutukku ele hak daakkunu elelete?

¹⁵ Kayak Nug nuhikkud laa nuhignu tituanak daatteb ele dilagnu, ag eheɗ laa ii hemananu ooppa genab ii dootte dayeb; nuhig neekkakppa hab ele oppiak ii daatte dayeb amu,

¹⁶ Nug ig danab, ihinig kobol am uɗig wak ele, ig hipunin hettem amu, Nug ihinignu ig eheɗ laa ii hematanu, ig oppiak ele daagnignu ooppa genab iinab dooma. Ge, ig danab, ig laa le baag diie, le huana latte, ig amubia eheɗ huana hettem.

¹⁷ Job, na daut human, dahil nai doon, na dabmak ena aokkut; na daappe, da aɗi keeke laa antten malami amu, da na amenppa akkul.

¹⁸ Amuam da danab doyak dabmak ena ele aɗi aɗi mattiegeg doomut. Ao, amuam amu mamelkad aɗi, ag aɗi nai madippig oh ele na amenppa akkul. Da keeke laa ii lokkumpa.

¹⁹ Kayak Nug wan amu dilag matte, akka daaegeg, wan laihnu danab ahilag dabmak ii kaboliom.

²⁰ Nai ag ippunigtteb am inam. Nau hak danab nug nuhig wanppa oiyak haen ohppa guittak okkai doyaya oitte. Ao, danab nug oo doyak ii doyaya nau hette ele amu, nuhig bau dayak haen ohppa, nug guittak okkai doyaya oitte.

²¹ Nug oqotti nau daugppa doya, nug eheɗ nau baɗatte. Ao, nug maɗoɗ daatte bia doya dayeye, haen amuppa danab ag ban hena danab aqadna ahilag keeke yab aotteb, danab amu ag banelag uɗieg, nug ele ban hetteb.

²² Nug gatatuppa dayaya, eɗua amahlakppa daakkunu dabmak aɗa oikkunu elele iitta; laa nug qep elabppa yeeb mauhkkunu daatte.

²³ Nug mauhnoak atu laih laih oitte. Nug appa mauheb, kaub ag nug teppu lakkulagnu oitteb. Ao, nug gatatu nug tonakkunu daatte dootte.

²⁴ Nau hak danab nug ooppa, nug eɗua ena daakkunu elele iitta doya, nug uug nau ele doya, nug aakku eheɗ nau baɗatte; keeke ewam amu, king nug baneb ha, laa eɗidkkunu daatte bia hipunin danab eɗidtteb.

²⁵ Amunu diig am, nug eppeg bitakka, Kayak amegppa ewawa hette; nug Laa Nukka Ɠagattag Oh Ele noobppa hib guitta haaha, Kayak nai tappe nette.

²⁶ Ge, nau hak danab ag ban haknu guppiɗ teppu ele ahilag aɗan, baneb gona, Kayak ele ban hekkulagnu hetteb.

²⁷ Anam amunu, deɗ laala nau hak danab nug beɗu enanag, hime ele daakkutai; ao, nug beɗu oh am enaib daakkutai,

²⁸ amge nug aab laala hatteg nauhppig, nug amuppa daakku. Ao, nug lag laala, danab ah ii daattebppa, nug aguppa daakku; nug lag nauhkkulagnu hettebppa daakku.

²⁹ Nau hak danab nug deɗ laala enanag daakku, amge nuhig en iitta meeb, nug men doɗo, keeke ele ii daama; nuhig keeke am okkai ii mema. Iitta.

³⁰ Gatatu nug toneb, nug qe-eɗidkkunu elele iitta daakku. Ao, aab aɗu ee qaɗu he nauhtte, amubia Kayak Nug heeb, nug nauhkku. Ge, ulah keeke ye gotte, amubia Kayak Nug heeb, nau hak danab nug nauhkku.

³¹ Nau hak danab nug keeke diig iitta elenu ooppa genab dootte, amge nug amubia aib heum. Aɗinu? Nug amu hekku dayeb amu, nug meu laa ii anidma.

³² Nug ad okkai ma, alag ii maama bunaɗa, eɗua bau ii mette, nug amubia daakku; nug ba, ena ii daama.

³³ Nug muɗi grep laa, meu ii oɗuom haenppa, meu hamu na qette bia daakku. O iitta, nug olip ad oɗe laa he, haɗag paha bunaɗe, meu ii otte, nau hak danab nug amubia daakku.

³⁴ Nau hak danab ag ad, o grep muɗi amubia daaglag. Aɗinu? Danab ag Kayaknu nuhig haknu ele uuak dootteb ele, ag hamu, keeke iitta ele daaglag. Ao, laa ag lokkumakppa eheɗ haknu ehanittak aoglagnu doon autna aotteb ele amu, aab am ahilag keeke oh ewa maleb, ag hamu, keeke iitta ele daaglag.

³⁵ Nau hak danab ag kobol nau hekkulagnu dabmak aon oitteb. Ag eheɗ hetteb. Ge, hambuppuak kobol ag oolagppa daatte.” Elipas nug Job amegppa mattia, anam aum.