Job 14 - Nobonob Baibel

¹ Danab oh ag ah oolkadppanu dotteb ele, ag wanppa haen elab ii daatteb. Ao, ag uug kuɗumnab ele maon oitteb.

² Bala ag hamu paha bena, eɗun bunaɗna iitta metteb bia amu, danab oh ag anam hetteb; lombig itotog wanppa paha ukka qettoɗtte, amubia danab oh ag anamnab hetteb.

³ Danab oh am anam, amu na, Kayak, na danab oolagppan laa amubia genab dabmekkut-te? Ge, na laa amu onigppa genab eppe, na nug hettoɗidkkutnu na noomppa dokkute?

⁴ Danab laa nug heeb, keeke dubuttid ele eɗua, oppiak ele daakkun elelete? Iitta!

⁵ Danab nug wanppa haen gane daakku amu, na Kayak, na keeke amu matu dabmena malame. Ao, nug kalam gane wanppa daakku amu, na amu aakku ana malame. Ge, na amunu ae, nug haen amu eɗidkkunu elele iitta daatte.

⁶ Na amu hettem amunu, na danab oh uuadppe, ag daappeg ukkeb, ahilag wanppa dayaknu haen iitta meeb gokkulag am ena. Danab nug laanu uɗat nid daya, uɗat haaha, tueb me, uɗat haen male lakka gotte, amubia uuadppe hekkulag am ena.

⁷ Aɗinu? Am inam. Danab nug ad o qiie, ad mameg nug ad amu diɗippa eɗua ba daakkunu dabmak aɗa oikkunu elele. Ao, ad amuam baula ebekkud ele daakku.

⁸ Ad amu diɗi wanppa haen elabnab daaglag, ad diig ele wanppa qaɗaietta auta autanab aokku,

⁹ amge gu na, wan leppu metteb, ita aakku bekku Bala qaɗu hamu hamu betteb, amubia gu neeb, ad ita ag eɗun bekkulag.

¹⁰ Adnu am anam, amge ig danab, ig mauhut, ig beɗunig balalppa aakku niitte. Ao, ig danab ah, ig hik aot autta awota, ig adeppa daattem?

¹¹ Le gottu qaɗaiedatte; o iitta, le laa qaɗaiette, le amun ippu ele qaɗaietta aut auta awak daatte,

¹² amubia ig danab ig niit, baula ii ahattem. Ao, hab abenppa daatte, butti aɗi daakku, amu haen hab anam ii iitta mette, haen hab anam dayeye, ig danab ig mauhota, ig haen amu oh ii ahamta. Ge, haen amu oh laa niiak amuppanu maɗeɗikkeb ii ahamta.

¹³ O Kayak, na mauhak abenppa lokkumiɗppe, nahip oo nauhak iitta meeb, na eɗun maɗeɗilomnu ool daatte. Ao, na haen adekkunab eɗun ehaniɗppe, da ena daakkulnu haen tituanna, haen amuppa na dabmeɗan ehaniɗlomnu ool daatte.

¹⁴ Danab nug mauhowa, nug eɗua bau daakkute? Nug eɗua bau daakku dayeb amu, da haen nau dahilppa daakkunu daatte amu, da haen amu ohppa deɗ laa, da deɗ amuppa eɗuen, ena daakkul, da deɗ amuib ameg mekkulnu elele. Da dahil baoliak haen amu ameg mekkulnu elele.

¹⁵ Anam daatte dayeb amu, na da onilppa eppe, da doyen, nob medakkul. Ao, anam daatte dayeb amu, na da, na heiɗme ele amu, na dahilnu oot heebeb, da na ele daagnihnu oot hekku

¹⁶ amunu, na dahil oiyak ohnab atognokkut. Ao, na da hipunin hepanu oiyak dahil atognokkut.

¹⁷ Anam daatte dayeb amu, na heppe, dahil hipunin oh battam, oɗe qakkak eleppa inak daaglag. Ao, na dahil hipunin da hemi ele oh uhuqna meɗakkut.

¹⁸ ⌊Amge haen imunu amu⌋ qauko ag nena, honap daatteb; men ele ag abenlagppanu nena qetteb.

¹⁹ Le heehe, men oɗe daatteb. Ao, le wan ele mawa gotte. Anam amu, amubia na danab ag ⌊bau daaglagnu keeke aoglagnu⌋ dabmak aɗan oitteb ele amu, na he, dabmak amu iitta mette.

²⁰ Na danab laa nahip ɠagattagppa eɗitte, danab amu nug baula wanppa ii daatte; na hee, nuhig iɗu baolie, nug laih gotte.

²¹ Danab mauhe, dimppa nug bekkod ag binalag okkai ele aotteb dayeb amu, nug ii dootte. O iitta, nug bekkod ag uɗa nak aotteb dayeb, nug amu ele ii anidtte.

²² Danab nug beɗuppa guittak dayeye dootte, laa dilag ii dootte; nug nuhignu mahiak hette, laa dilagnu iitta.” Job nug anam mattia aum.