Job 13 - Nobonob Baibel

¹ Da amu oh antten malami. Da daulppa ele mattiegeg doomi. Ao, da keeke amu oh daulppa doyen, da diignu doyak tutukku aomi.

² Ag gemu da ele nai madittem, ag aɗi keeke laa dootteb amu, da ele doottem. Ag da ii eɗiltteb.

³ Anam, amge ⌊da ag ele nai mattignignu ool ii daatte. Iitta.⌋ Da Laa Nukka Ɠagattag Oh Ele, da Nug ele nai mattignihnu ool daatte. Ge, da hettoɗiak abenppa Kayak amegppa dahil nai appi doya, hettoɗilkkunu ool daatte.

⁴ Ag amu, ag dahilnu nai hambuppuak huanak maditteb. Ag oh, ag dokta nuhig uɗat pehettak ii heehe, danab ah ehanittak ii aotteb, ag amubia hetteb.

⁵ Ag nai nakok laa iinab mattiloblob, amuam enanag. Ag amu helob, ag doyak dabmak ena ele dim lamidlob.

⁶ O lailad, ag dahil nai diig ele abippi, ag dooglagnu oɗ madattem. Ao, ag da ⌊eheɗ laa ii heminu⌋ nai appi, ag daulag human, nai amu dooglagnu ool daatte.

⁷ Ag Kayak ehanidnana, nai eheɗ mattiglagte? O iitta, ag nai hambuppuak madippeppeg, Kayak Nug ehanittak amuppa aokkute?

⁸ Kayak Nug danab iitta, amge nug danab daalo, hettoɗiakppa ag laanu diig iittappa ena doya, laanu diig iittappa eheɗ doyak kobolppa Nug ehanidkkulagte? Ge, ag Kayak ehanidnana, hettoɗiak abenppa ahilag naippa Nug ehanidkkulagte?

⁹ Nug ag hettoɗiak abenppa maatta hettoɗiattebeb, ag ena daaglagte? Ge, ag danab hambuppualadtteb, ag Kayak ele anam hambuppuidkkulagnu elelete?

¹⁰ Ag laanu diig iittappa ena doya, laanu diig iittappa eheɗ doyak kobolppa laanu ena doon, lokkumakppa nuhigppa ena hekkulag dayeb amu, Kayak Nug amunu ag daulag iite batama?

¹¹ Ag amu hekkulag dayeb, Kayak antta heeb, ag nuhig ɠagattag haknu baɗak eheɗ nai iite doomna? Ao, ag Nug bu mattamanu baɗak okkai iite doomna?

¹² Ahilag nai tutu tutu meu ele, am oiyak ehanittaknu nai tutu ahilag amu, ahilag nai amu oh am ena iitta, uhuɗ bia. Ao, ag maditteb ele am danab nug guppiɗ gai-iitta qala dayaya, ehanittak aokkun dabmette, nai ahilag am anam bia daatte.

¹³ Ag oɗelag qamutppeg, da madikkul. Da anam madippi, dimppa aɗi dahilppa bekku am baɗ!

¹⁴ Da diig aɗinu da anam hein, dakka da mauhkkulnu ib oɗeppa meiɗttem? Ge, aɗinu da mauhak ib oɗeppa da beɗul mettem?

¹⁵ Da amu hekkulnu diig am inam. Kayak heeb, da mauhkkultai, amge anam bekkunulob, da Nug ehaniɗeb, da eɗuen ena daakkulnu dabmak aɗe daattem; da Nug amegppanab da dahilnu nai madippi, Nug dookku oolppa genab doottem.

¹⁶ Antte! Danab laa nug Kayaknu nuhig haknu ele uuak dootte amu, nug Kayak noobppa wab, Nug ele nai mattiglahnu oo ii hema. ⌊Amge da ool hette⌋ amunu amu, da beɗulppa aab iitta daattem ippunigtte, amuppa da ehanittak aottem.

¹⁷ Ag dahil nai pehettak doyeg! Ao, ag daulag human, da aɗi aɗi madittem doyeg!

¹⁸ Da beɗulppa aab iitta nai bappaidmi amu, da nai amu tutukku, elele bappaidmi. Da anam babaitten malen, elele anidttem amunu, da doottem, da nai amu Kayak amegppa appi, Nug da beɗulppa aab iitta daattem ab doognig.

¹⁹ Aun laa nug da naippa yaaiɗkkunu elele? Laal iitta, amge laa anam hekkunu daalo amu, da oɗel qamuten mauhlom.

²⁰ O Kayak, da na keeke aɗitib meɗakkutnu oɗ medattem. Na amu meɗakkut dayeb amu, da na gumitten gokkulnu elelenab doottem.

²¹ Keeke aɗit amuam inam; na eppen bahin, bu meɗattem amu, na eppen amu eɗun aon, bu baula ii meɗan, na baɗak eheɗ nau da meɗattem amu, na amu ele baula ii meɗamna.

²² Na amu hekkut dayeb amu, na aɗi aɗi oɗ meɗakkut dayeb amu, da oɗmak amunu nob mekkul; o iitta, na appe, da na amenppa nai madippi, na nai amunu nob da meɗakkut.

²³ Da hipunin aɗi aɗi, eheɗ atten atten ele heminu ⌊ippuniɗkkutnu ool hette⌋. Ao, na dahil nau hak, dahil hipunin ele ippuniɗppe anidkkulnu da ool daatte.

²⁴ O Kayak, na iɗun dahilppanu lokkumna, dahilnu, ‘Nug dahil kekeɗ,’ doottemnu diig ippuniɗppe, da anidkkulnu oɗ medattem.

²⁵ Na ad uɗug laa ulah ye gotte, na dahilnu amubia doon, genab guittak tuɗidna meɗakkut-te? Ao, da am ee aeg dappunkkeg ulah ye gotte bia daattem, amu na da genab guittak tuɗidna meɗakkutnu da dim lamiɗkkutte?

²⁶ Da anam oɗ medattemnu diig am, na da ninig dookkulnu yaan bappaidna malame. Ao, na he, hipunin da nid bau dayeye hemi am, da hipunin amunu guittak aottem.

²⁷ Na da bael senppa qagattem. Na hanhan da adeppa adeppa gokkulnu hei, na neekkiɗna daattem. Na da laih gopanu, aben nakok laippuppa daakkulnu, na wanppa at laa mee, da aben amuppaib daakkulnunab daattem.

²⁸ Da am ad keeke beɗom daatte bia daattem; da lamen gawat heeg nauhom daatte amu, da amubia daattem.