Job 12 - Nobonob Baibel

Job nug Soparnu nai doya, nob ma aumnu nai

¹ Sopar nug anam mattia male, Job nug oɗeppa awa aum.

² “Ag akka, ag doyak dabmak ena ele aɗan oittebnu iite dabmena oitteb? Ao anam amunu, ag mauhkkulag amu, doyak dabmak ena ele am haen amuppa ele iitta mekkunu iite dabmettem.

³ Amge da ele dabmak ele. Ag da ii eɗiltteb. Auntai laa keeke ag maditteb ele ii dootte?

⁴ Anukka da Kayak unuqitti, Nug dahil unuqittak doya, nob ena da meɗom, amge gemu da lailad ag da eheɗ imiɗtteb. Ge, da am genab tutukku hak danab, da Kayaknu neekkakppa danab ooppa kaliak laa iitta ele daattem, amge gemu laa oh ag dahilnu, ‘Keeke hamu,’ doon, ag imiɗtteb.

⁵ Danab ag keeke oh elele, ag laa uugppa daatteb dilagnu, ‘Ag am keeke hamunab,’ dootteb; ge, ag laa nena qekkulagnu hetteb dilagnu anamib dootteb.

⁶ Danab laa ag ban hena, laa guittak mettanna, ahilkad keeke aotteb ele, ag maɗoɗ ele daatteb. Ao, laa ag ahilag hakppa heeg, Kayak oppoɗi bette ele, ag baɗak iittappa daatteb. Ag ahilag kayak hambuppuak eppelagppa aɗan maon oitteb.

⁷ ⌊Ag uɗin daatteb ele amu, ag ahilag dabmak aib dabmeppig. Iitta.⌋ Ag gona neegna, doɗ anadppeppeg, ag ippunittak mattaglag. O amu iitta, ag wana, ai neegna anadna, danab layag keekenu a doya, doyak aotte bia, ag doyak aoglag.

⁸ Amu iitta dayeb amu, ag wannu keeke neegna anidna, amuppa ippunittak ena aoglag. O iitta amu, ag yuppan kakai neegna anadna, laa layag keeke laanu ippunittak he dootte, amubia ag doyak aweg!

⁹ Amu oh oolagppanu laa, nug Yawe Nug ag hattom iite dootte?

¹⁰ Doɗ oh ag Nug eppegppa daaegeg, Nug a, ag bau daatteb. Nug a, ag mauhtteb. Ao, danab ah oh ele, Nug ag ulah matte, ag bau daatteb. Nug ii madatte amu, ag mauhtteb.

¹¹ Ig daunigppa nai doottem. Ao, ig lemaɗunigppa eenu miti doottem.

¹² Danab ah kaino ele ag doyak dabmak ena ele. Ao, danab ah ag wanppa haen elab daan oitteb ele amu, ag oinna, ag diignu doyak tutukku aotteb.

¹³ Amge doyak dabmak ena elenu diig, ɠagattagnu diig ele am Kayak eppegppa daattep. Ao, ulum mettak nai, diignu doyak tutukku ele am nuhigppaib daattep.

¹⁴ Kayak Nug keeke laa he nauhtte amu, laa nug eɗua babaitteb, ena daakkunu elele iitta. Auntai laa Kayak Nug maniguittakppa inatte amu, laa nug uhuqkkunu elele iitta.

¹⁵ Kayak Nug gu nemanu a, gu ii ne, wan qaɗaietta auta autanab aotte. Kayak Nug he, gu huanaknab ne, le ui eheɗ o, wan aakku nauhtte.

¹⁶ Kayak Nug ɠagattag oh ele, Nug doyak dabmak ena hambuppuak nakok laa iitta ele; laa nug layag hambuppuidtte, layag bubuittom ele, aa oh Kayak eppegppa daattep.

¹⁷ Kayak he, kekeɗ ag wan laa eɗidna malan, wan amuppan ulum mettak danab ag wan amunu okkai danab ulum medappig ele, ag kekeɗ amu eppelagppa daaeg, kekeɗ ag danab amu beɗulag miag diin gotteb; Kayak he, epeɗiak danab ag ahilag nai maditteb, amge nai amuam kaaka nai miag atie, laa anidtteb.

¹⁸ Kayak Nug he, qakkaknu keeke king nug laa beɗuppa meum ii daatte; king nug laa waappa, daɗek daatte.

¹⁹ Kayak Nug he, kekeɗ ag mana mettak danab diin heeg, ag beɗulag miag dayeye, diin gotteb; Nug he, danab ag haen elabnab ɠagattag daaeg, laa ag waalagppa daappig ele, danab amu ag nena qetteb.

²⁰ Kayak Nug he, danab okkai dilag ulum mettak danab, laa ag ahilagnu genab elele dootteb ele, danab amu ag nai ena baula ii maditteb; Nug he, ikki danab ag oo maittak awaknu ehah ahilag am iitta mette.

²¹ Nug anuqak danab dilagppa he, laa ag ahilagnu awa awa qettak nai maditteb; Nug he, danab ɠagattag ag gai-iitta daatteb.

²² Kayak Nug keeke gatatunab ooppa daatte am he, miag atitte. Ge, nug keeke lokkumakppanab daatte am he, miag atitte.

²³ Nug he, wanppan wan laa ɠagattag ba daye, Nug he, wan laa amu na qa, nauhakib daatte. Ao, Nug he, wanppan wan laa okkainab ma dayeye, Nug he, ⌊wan laa amu nauhe,⌋ wan amuppan danab ah ag tamtam gona daatteb.

²⁴ Kayak Nug he, wan gumak danab ag dabmak ena iitta ele daan oitteb; Nug he, ag mauhnoak, aben nauhakib, appa mauhnoak oitteb.

²⁵ Ag mauhnoak anam oinna, ag danab gatatuppa, aben amahlak iittappa eppeg bahihib oitte bia oitteb; Nug he, ag danab le ɠagattag la, kaaka qe, baeg taataɗ qettat oitte bia oitteb.