Job 11 - Nobonob Baibel

Soparnu nai tatamnu

¹ Job nug anam mattia male, Sopar, Nama ted, nug oɗeppa awa aum.

² “Laa nug nai huanak amubia maditte amu, laa nug noob tutukku iite mettama? Ao, laa anam bia maditte amu, nuhig mattiakppa laa oh ag nuhignu, ‘Danab amu nug tutukkuib haaha, nai maditte,’ akkulagte?

³ Na ulah nai huana madippeppe, laa ag nob laa mettaglagnu elele iitta dooglagte? Ge, haen na awa awa qettak nai madikkut amu, laa nug na daut iite batakku?

⁴ Na Kayak amegppa attem. ‘Da nai madittem am tutukkuib, am kaliak laa iitta,’ attem. Ao, na, ‘Da nahip neekkakppa oolppa oppiak ele daattem,’ ana madittem.

⁵ Na anam attem, amge Kayak Nug digma, na amenppa na eheɗ hettemnu nai madikkunu ool naɗi daatte; Nug na amenppa ab, na nuhig nai na eheɗ hettemnu dookkutnu ool okkai daatte.

⁶ Nug doyak dabmak ena ele ippunitteb anidkkutnu ool daatte. Aɗinu? Nug doyak dabmak ena hambuppuak nakok laa iitta ele. Antte! Kayak Nug na eheɗ hemenu bu medatte amu, bu amuam nakokib. Nahip eheɗ hak am naɗinab.

⁷ Na Kayak diignab attemnab daatte mattin anidkkutnu elelete? Ao, na Laa Nukka Ɠagattag Oh Ele, Nug oppiaawak daatte amu, na nuhignu doyak oh dookkutnu elelete? Iittanab!

⁸ Doyak Kayaknu amuam keeke laa hab eɗitta ta ukkak bia; na attem hena dookkut? Ge, doyak Kayaknu amuam bodok iitta, keeke Nami aab eɗitta noak bia; na attem hena dookkut?

⁹ Am genab, doyak Kayaknu amuam doyak okkai, naɗi. Am keeke wannu tom ukka batak, amu eɗittak bia; am keeke yuppan laih uma ukka batak, amu eɗittak bia.

¹⁰ Kayak Nug uɗia, maniguittakppa meidkkutai, o Nug hettoɗiak abenppa meidkkutai. Nug anam hekku amu, auntai laa Nug amegppa, ‘Na anam aib heme,’ akkunu elele? Laa iitta.

¹¹ Aɗinu? Danab laa nug hambuppuak haaha oitte ele amu, Kayak Nug genab nug hette dabmette. Ao, laa nug eheɗ heehe, Kayak Nug amu iite anidtte?

¹² Kayak genab anidtte, amge danab nug dabmak iittanab ele, nug danab doyak dabmak ena ele bekkunu ib iitta; donki dakkuɗ anig nug danab ii menuma, amubia.

¹³ Anam daatte, amge na Kayaknu danabnab daakkutnu na meut ohppa hekkut dayeb; na Nug unuqidkkutnu na eppen bahippe, nuhigppa tekku dayeb,

¹⁴ na hipunin henan daattem dimettan, ii hekkut dayeb, na kobol eheɗ laa nahip-ppa daamanu wagai mekkut dayeb amu,

¹⁵ na beɗunppa aab iitta ele daan; na baɗak iitta, ɠagattag daan oikkut.

¹⁶ Aɗinu? Na amu hekkut dayeb amu, uug nau gemu na doottem amu, uug amuam iitta meeb, na baula dab-ii-memana; uug amuam le noa gotte bia iitta meeb, na dabmekkut dayeb amu, na, ‘Matunu keeke,’ aakkuib dabmekkut.

¹⁷ Na anam hekkut dayeb, na enanag doon daan oikkut. Ao, nahip bau dayak am gatatu ele ii daama. Iitta. Amahlak enappa daakku.

¹⁸ Na ena bena daakkutnu dabmak aɗan oikkut amunu, na baɗak iittappa daakkut. Ao, Kayak Nug na atognoittebeb, na baɗak iittappa hik aon daakkut.

¹⁹ Na niikkutnu, na niiak abenppa ukkan qen niippe, laa nug heeb baɗakkutnu ii daama; laa kuɗum ag uɗin, ehanadkkutnu oɗ mettaglag.

²⁰ Na anam hekkut, amge laa ag nau hetteb ele, ag amelag nauhppeg, gatatu ooppa daaglag. Ag kekeɗ eppelagppa daan, oola ukkaknu ib laa iinab anidmana. Ag eɗun, ena bena daaglagnu dabmak aɗan oiglagnu hebeppeg ukkeb, anam ii bema anidkkulag amunu, ag anamib bena daaglagnu dabmak aon aɗan daanna, ag mauhkkulag.” Sopar nug Job amegppa anam aum.