Job 10 - Nobonob Baibel

¹ Da bau daattemnu amu, da eheɗ nau doottem. Ao, da anam doottem amunu, dahil naittuɗ mak ii lokkumpa. Ge, da oolppa ninig bia doottem amunu, da amu dabmein madikkul.

² Da Kayak amegppa akkul. ‘Na diig lokkumakppanu da amelppa, na eheɗ heme, ii amananu oɗ medattem. Ao, na da eheɗ hemi akkutnu daatte dayeb amu, na da hipunin atten atten hemi appe dookkulnu unuqidttem.

³ Na danab ah eheɗ hadattem am ena doottemte? Ge, na aɗi aɗi na eppenppa heme ele eheɗ hadattem am enate? Na nau hak danab ag keeke laa hekkulagnu lokkumakppa doonna maittak eheɗ aon hetteb amu, na ahilagnu, “Ag ena hetteb,” doottem am enate?

⁴ Na ig danab keeke anidttem bia anidttemte? Ge, ig danab ah wanppa daat mauhttem, na ig keeke anidttem bia anidttemte?

⁵ Ig danab oh wanppa daat mauhttem ele amu, ig haen elab ii daattem, amu na ele anam paha mauhttemte? Ao, ig danab ah, ihinig bau dayak am tutuib, amu nahip ele anamte?

⁶ Na anam daattemte amunu, diig amunu na dahil hak elele iitta oh anidkkutnu mattiak uɗat okkai hettemte? Ge, na dahil hipunin miagib anidkkutnu ii daye daye madittemte?

⁷ Na da beɗulppa aab laa ii daatte doottem. Ao, na ele auntai laa nug da ehaniɗa, na eppenppanu awiɗkkunu elele iitta doottem.

⁸ Na eppenppa heiɗna, bau dayak meɗame, akku gemu na eɗun heppe, da nauhen iitta mekkulte?

⁹ O Kayak, na attem henan heiɗme amu, na amu dabmekkutnu oɗ medattem. Na heiɗme, haen amuppa na waa keeke hak danab wan awa waa hette, amubia na da heiɗme; gemu na heppe, da eɗuen, gappud daakkulte?

¹⁰ Na hee, da mamel nug menuiɗkkunu elele dayom. Ao, na hee, da anai ooppa okkai elele memi.

¹¹ Na hena, da anai ooppa da beɗul oh elele meiɗme. Ge, na hee, da teppul, gaɗal, ebehil, amu diɗil ele oh elele tuɗitteg, ⌊da elele bemi⌋.

¹² Na da bau dayak meɗan, dahilnu oo bodoettak kobol dim lamidme. Yo, na amu henana, na da bau daakkulnu atognoiɗme.

¹³ Na anam heme, amge dabmak imuam na ootppa lokkumak dayom. Ao, da nahip dabmakppa, na dabmak imu aɗan daame doottem.

¹⁴ Nahip dabmakppa na da meiɗppe, da hipunin hekkul dayeb, na anidkkut dabmeme. Ao, da anam heppi anidna, na bu meɗakkutib dabmeme.

¹⁵ Anam amu, da nau hei, beɗulppa aab daatte dayeb, dahilnu gadonnab gadon. O iitta, da genab tutukku hak danab daakkul dayeb, da danab ah noolagppa ena daakkulnu elele iitta. Aɗinu? Gemu da uɗa nak nau doottem. Ao, uug da toniɗom daatte.

¹⁶ Da uɗa nak iitta ele doye oittem dayeb amu, na laion doɗ laa qeeb mauhkkunu meitta daatte bia dahilnu hettem; na nahip ɠagattag okkainab amuppa hee, da guittak okkainab aottem.

¹⁷ Hettoɗiak abenppa amu, na laa aɗi heehe anttomnu mattiak danab baubau onilagppa e uɗin, ag naippa da yaaiɗtteb. Na hee, nahip oo nauhak dahilnu tuɗitta, okkainab mette. Na hee, nahipad daup ag baubau eheɗ heiɗtteb.

¹⁸ O Kayak, na dahilppa anam hettem amunu, aɗinu na hee, da anai ooppanu domi? Da danab laa ii aniɗom haenppa mauhlom am enanag.

¹⁹ Da anai ooppa nakok laa ii digmelom am enanag; o anai da menuiɗebeb mauhppi, laa nug anai ooppanu aiɗa, paha moɗppa meiɗlo, amu ele enanag.

²⁰ Da mauhkkulnu miag iite daattem? O Kayak, na eppen bu aɗatte amu, na eppen amu eɗun aon heppe, da haen tutu amuib gamag ahak dookkulnu oɗ medattem.

²¹ Ao, haen elab iitta da wan imu uuen, da aben laa danab appanu eɗua ii uɗitte ele, da amuppa gokkul. Aben amuam aben gatatuib ele; am aben amahlak ii watte ele.

²² Aben amuam gatatu ele, tuqan gatatunab bia; appa amahlak ii daatte, keeke oh mauhnoak daatte; Appa amahlak daalo, amu ele gatatu daalo.’ ” Job nug anam aum.