Job 1 - Nobonob Baibel

Job, nug baegppan ele

¹ Anukkanab danab laa onig Job nug Us wanppa dayom. Danab amu nug Kayaknu neekkakppa ooppa kaliak laa iitta ele. Nug genab tutukku hak danab. Nug Kayaknu ebehi oh bodoetta le me, nug eheɗ laa hekkunu uua autanab awom.

² Job nug bekkod eblaih aɗit ele, aɗekkud ewam ele.

³ Nug baegppan nid am anam, amu Job nug ele en kuɗumnab ele. Nug sipsip 7,000, kamel 3,000, makau okkai ebehi ele 1,000, amu donki anig 500 ele. Nug doɗ amu oh ele, amu nug ele maɗi nid maɗi ah ele kuɗumnab ele. Danab digdig oh kaɗag uɗitteppanu daatteb ele amu, nug amu dilag laa oh eɗattom.

⁴ Amu Job bekkod ag anen anen ahilag haenppa ag laulkadppa hobul heppig. Ag anen anen anam henana, ag hobul heppig haen amu ohppa ag appinalkad ele onilagppa eeg doeg, ag oh daan, ee, le ele lappig.

⁵ Amu nug bekkod ag anam heegeg ukke ukke, eblaih aɗit ele amu oh ag ag laulkad anen anenppa hobul hena malaeg, Job nug ag Kayak ele ouqa dayaknu elele daaglagnu ag beɗulag oolag ele bappaidkkulagnu nai ahilagppa me ukkom. Job anam he, deɗ amu uue, wagɗe buttua Job nug aha, ahilag anen anennu manaknu ofa hattom. Nug, “Nid dahilad ag Kayak uuidna, hipunin heppigtai,” ana dabmeum amunu, nug anam hettom. Job nug hanhan anamib hettom.

Kayak ib oo ii ne, Satan nug Job ma anttak ebqak tatam mettom

⁶ Amu deɗ laa engel ag Yawe ag aɗi aɗi hetteb ippunidkkulagnu Nug gumidna gona daaegeg, Satan nug ele appa ukke, oh daappig.

⁷ Ag oh gona daaegeg, Yawe Nug Satan oɗ mettom. “Na adeppan uɗime,” awa oɗ mettom. Nug anam oɗ mette, am Satan nug nob ma aum. “Iitta. Da wan qaɗe ohppa ukken oiyeye, eɗue doinne hein, aakku uɗimi,” awa aum.

⁸ Satan nug anam a, Yawe Nug Satan aum, amu doya, Nug aum. “Na dahil maɗi nid Jobnu attem dabmettem? Wan ohppa danab laa nug bia laa iitta. Nug dahil neekkakppa danab ooppa kaliak laa iitta ele. Nug genab tutukku hak danab. Nug dahilnu ebehi oh bodoetta le me, nug eheɗ laa haknu am uua autanab aotte,” awa aum.

⁹ Yawe Nug anam a amu, Satan nug oɗeppa awa aum. “Job nug nahipnu ebehi oh bodoetta le mette amu, nuhig kobol amuam diig ele. Na hanhan ehanidttem, nug enanagib daatte amunu, nug hette.

¹⁰ Nahip ehanittak am Job nug, nug baegppan, nuhig keeke oh ele guppiɗ bia taliliatte daatte. Na ena ititte, aɗi uɗat nug hette am enaib beebe, nuhikkud doɗ ele huan appatna, kuɗumnab daatteb.

¹¹ Gemu na anam hee, nug nahipnu ena dootte, amge na eppen bahin heppe, nuhig keeke oh nauhakib daakku dayeb amu, nug na noomppanab dayaya, na eheɗ laa awaknu anak waappa daakkutnu nai akku,” awa aum.

¹² Satan nug anam a, Yawe nug amegppa eɗua aum. “Aakku, na Job ma anttak medakkutnu elele. Keeke nuhikkud oh amu, na amuppa aɗi hekkutnu na eppenppa daatte, amge na Job, nuhigppanab na keeke laa aibnab heme!” awa aum. Yawe Nug anam a, Satan nug aha ukkom.

¹³ Satan nug aha ukke, haen ukke, deɗ laa, Job bekkod, aɗekkud ele ag awalag okkai laugppa daan, ee okkai, wain ele lanan daaegeg,

¹⁴ deɗ amuppa nai awa uɗiak danab laa nug qaietta, Job toppa ta, amegppa aum. “Nahip maɗi nid ag nahip makau okkai ebehi ele uɗat mattaegeg, wan buuegeg, nahipad donki anig ele ag appa gikkiɗah lanana daappig.

¹⁵ Anam daaegeg, Seba danab ag ahan banenig uɗin, ag nahipad maɗi nid appa daappig ele oh qep elabppa aqaeg mauheg, nahip doɗ amu oh diin goppig. Da dakka, ag da ii aɗaileg, da oole, na amenppa akkulnu uɗimi,” awa aum.

¹⁶ Danab amu nug uɗia, nai amu Job amegppa mattia dayeye, nai awa uɗiak danab laa nug qaietta uɗia, Job toppa ta, amegppa aum. “Kayaknu aab aɗu, hab attannu na, sipsip oh, gumitta danab oh ele ewatte, iitta meppig. Da dakka aab da ii eiɗe, da oole, na amenppa akkulnu uɗimi,” awa aum.

¹⁷ Danab amu nug uɗia, nai amu Job amegppa mattia dayeye, nai awa uɗiak danab laa nug qaietta uɗia, Job toppa ta, amegppa aum. “Kaldia danab ag oinna ban hena danab ah aqadna ahilag keeke aon gotteb ele amu, danab amu ag huu ewam daan uɗin, ag nahipad maɗi nid kamel gumadppig ele oh qep elabppa aqaeg mauheg, ag kamel nahip oh diin goppig. Da dakka ag da ii aɗaileg, da oole, na amenppa akkulnu uɗimi,” awa aum.

¹⁸ Danab amu nug uɗia, nai amu Job amegppa mattia dayeye, nai awa uɗiak danab laa nug qaietta uɗia, Job toppa ta, amegppa aum. “Na begapad, aɗenad ele ag nahip nid danab naanaeg laugppa daan, ee okkai, wain ele lanan daaegeg,

¹⁹ ulah naɗi, naunab laippun atu taɗakppanu uɗia, lag huana ya loppaɗe, lag aakku na qeum. Lag na qa, laa oh lag amuppa daappig ele tonatte, ag mauheg, da dakka, da ii toniɗe, da oole, na amenppa akkulnu uɗimi,” awa aum.

²⁰ Danab amu oh ag uɗin dona, Job amegppa amu ohnu aeg doya, nug aha, lamen elab pattiɗa, ikki uɗug hoye ukke, nug dup noa, gateg qaun o, gomela, iɗu wanppa ma, nug Kayak binag ma,

²¹ nug aum. “Da anai ooppanu nemi, haen amuppa da aɗi keeke laa iitta. Da mauhen, mauhak abenppa ukkena, da haen amuppa ele da aɗitai keeke laa eppelppa aɗakkulnu elele iitta. Danab oh hetteb bia, da hamunab gokkul. Yawe Nug keeke da meɗe daaiyi, Nug eɗua ele aɗila awom. Am nuhig keeke. Ig Nug binag metu!” Job nug anam awa aum.

²² Uug digdig amu oh Job nuhigppa beum, amge nug hipunin laa ii heum; Kayak eheɗ heum ele nakok laa ii aum.