Jeremaia 9 - Nobonob Baibel

¹ O gadon, da tiinig laippu kekeɗ aqaeg mauhppig dilagnu amu, da ikkilppa le gottu dayeb, da amel leb ele le qeppuɗia bak dayeb, da amun, tuqan ele dahilad tiig laippu dilagnu gaappi, amel leb nekkunu ool daatte.

² O gadon, da tiig laippu dahilad ag Kayak noobppa gappai henana, ag Nug ippunattom bia Nug dim lamidkkulagnu uun oitteb amunu, da ag uuatten, ag ele oh ii daamtanu da atu taɗakppa aben laa ɗo danab daaglagnu lag laa daatte, da aben amu antten, ukke aguppa daakkulnu ool daatte.

³ Amu Yawe Nug atte. “Danab nug lat doɗo latppa ette, amubia danab ah imu ag nai hambuppuak maditteb. Ag ahilag wanppa doyak diig genabibppa ɠagattag ii daatteb. Iitta. Ag hambuppuak naippa, hambuppuak kobolppa ele laa eɗidna daatteb. Ag hipunin laa hewona, ag ahan, laa ele hetteb. Ag da am Yawe, ag amunu dabmak nakok laa ii aotteb,” awa atte.

⁴ Yawe Nug atte. “Juda ag lailkad dilagnu dabmeig! Ao, ag baelkadppa dilagnu oolagppa genab aib dooppig! Aɗinu ag anam hekkulag? Ag ohnab ag hambuppuak danab ah daatteb. Ge, ag lailkad oh ag nug onilkad nauhkkunu nai nau atteb.

⁵ Juda ooppa layag nug layag hambuppuidtte. Laa nug doyak diig genabib ii dim lamidtte. Ag akka ag heeg, ag lemaɗulag nai hambuppuak maditte. Ag danab uɗat huana he, beɗu bahi yaatte, ag amubia hipunin huana hetteb.

⁶ Jeremaia, na danab ah ag hambuppuak kobol huanak hetteb, na ag oolagppa daattem. Ao, ag hambuppuak amu oh dim lamidnana, ag da am Yawe, ag amu dabmekkulagnu uun autna aotteb.” Yawe Nug anam awa atte.

⁷ Amu Juda danab ah ag amu hetteb amunu, Yawe Nukka Ɠagattag Oh Ele Nug atte. “Antteg! Da ib laa iitta. Aɗinu? Dahilad danab ah ag hipunin hetteb amunu, da danab nug gol keeke babaitta epeɗia awak daakkunu uɗat hette, amubia da dahilad danab ah ma anttak madakkulnu, da ag dubuttid iitta daaglagnu, da amubia ahilagppa hekkul.

⁸ Danab nug lat doɗo e, doɗ keeke qe nauhtte, amubia ag lemaɗulagppa hambuppuak nai mattinna, laa heeg nauhtteb. Ao, Juda danab ah oh ag oɗelagppa ag mudippan lailkad amelagppa maɗoɗ nai maditteb, amge danab doɗ aokkunu pelem mette, oolagppa ag amubia ag lailkad eheɗ hattaglagnu dabmetteb.

⁹ Ag amu hetteb amunu, da ag bu iite madakkul? Ao, da wan imuppan danab ah, ag nau amu hetteb amu da ag bu iite madakkul?” Yawe Nug anam awa atte.

¹⁰ Amu da, Jeremaia, da ami. “O gadon, Juda wanppa qauko nauhppig daatteb amunu, da gaye, mahiak ele hekkul. Ao, atu taɗakppa gikkiɗah dad ele anamib amunu, da nai oo doyak ele madikkul. Wan am hele-ettak daatte, danab ah appa ele ii oitteb. Appa makau daanna, gikkiɗah lanana ii gaatteb. Ai ag appanu oolna, hagagaɗna goppig. Doɗ laa ele ii daatteb. Ag oh oolna goppig. Amu diig amunu da kobol beum, da amunu gaye, mahiak ele hekkul,” awe ami.

¹¹ Amu Yawe Nug inam awa atte. “Da heppi, Jerusalem am kinipan ameg okkai hume tak daakku. Doɗ jakal ag aguppa daaglag. Ge, da heppi, Judanu aab laala ag nauhakib daaglag. Danab laa appa daakkunu elele iitta daaglag,” awa atte.

¹² ⌊Amu qinob laa nug oɗmak inam hekku.⌋ “Yawe Nug he, wan imu nauhakib daatte. Nug he, wan imuam nauhaknab, atu taɗak nau, danab appa oikkunu elele iitta daatte. Nug anam heum, amge diig aɗinu Nug anam heum? Danab laa nug amunu diig dookkunu doyak dabmak ena ele elele aɗattete? Yawe Nug laa ippunittom, amu nug amunu diig doya, ab doot, oonig maidkkunu elete?” ⌊Nug oɗmak anam hekku.⌋

¹³ ⌊Oɗmak anam bekku amu, haen amuppa⌋ Yawe Nug inam akku. “Dahil ɗo, da miagib ag mattami amu, ag ɗo amu dimettan uun, ɗo laa dim lamidppig. Ag da oɗel ii dim lamidna, dahil ɗo ele dim ii lamidppig.

¹⁴ Ag anam da ii dim lamiɗppig. Iitta. Ag da oɗel dim lamidmananu dabmak ahilag ɠagattag eppe, ahilag dabmak dim lamidkkulagnu dabmenan heppig. Ag mamelkad aɗi ag kayak hambuppuak Bal iɗu iɗu dim lamadkkulagnu ippunadppig, ag amubia dim lamadppig. ⌊Amu diig amunu uug amu oh aakku beum.” Yawe Nug haen amuppa oɗmak amunu nob ma, anam awa akku.⌋

¹⁵ Juda danab ah ag Yawe anam dimettan, eheɗ oitteb amunu, Yawe Nukka Ɠagattag Oh Ele, Nug Israel dilag Kayak, Nug inam atte. “Antteg! Da heppi, uug danab ah imu dilagppa bekku. Uug amuam danab nug uud ad tiig mua ele latte, uud tiig mua nau ele latte, amubia daakku.

¹⁶ Da heppi, kekeɗ ag uɗin eɗadna heppeg, Juda danab ah ag wan laala, ag, amu ag mamelkad aɗi ele ag wan amu ii dooppig amu, ag wan amuppa, doɗ oolna, matatun gona, piɗe piɗe mauhnoak daatteb, Juda danab ah ag appa anam daaglag. Amu da heppi, kekeɗ ag lamadnana aqappeg, Juda danab ah ag padal mena autna aoglag,” awa atte.

¹⁷ Amu Yawe Nukka Ɠagattag Oh Ele Nug atte. “Ag keeke bekkunu miag daatte, ag amu pehettak dabmetteg! Ag dabmenana, ag ah qanak hekkulagnu onilagppa eig! Ao, ag ah ag qanak okkai hekkulagnu doon autna aotteb amu, ag ag onilagppa eig!” awa atte.

¹⁸ ⌊Amu da attem.⌋ “Heppeg, paha uɗieg! Ag uɗin, ihinignu qaneg! Ag qanappeg, ig amenig leb huanak naɗ! Ao, ig amenig leb, le ugakka gotte bia naɗ!” da anam awe attem.

¹⁹ Aɗinu ag amelag leb anam nekku? Juda danab ag Sion daatteb, ag gaanna akkulag. “Ig aakku padal memut. Ig uɗa nak naunab nau aot oittem. Aɗinu? Kekeɗ ag uɗin, lag ihinkad heeg nauhppig amunu, ig wan imu uut, laih gokkunigoitte,” aon akkulag.

²⁰ Aria gemu, ag Juda ah, ag Yawenu nai imu doyeg! Ag daulag human, nuhig nai doon autna aweg! Ag ag aɗelkad qanaknu kobol ippunadppeppeg doyeg! Ao ag akka akka ag nai oo doyak ele mattiak laa nug ippunidnana doyeg!

²¹ Aɗinu? Qinob uug okkai laa heeb anidna akkulag. “Mauhak nug ig launigppa gililppa ulah ibuppa noa, ig launig ooppa neum. Ge, nug aab aɗ ɠagattagnab ele ihinkad, nug amu ooppa noum. Mauhak nug nid naunau ibppa daan qiɗ hetteb ele, nug ag aqe mauhna malappig. Ao, Mauhak nug nid danab bau, ag aab haɗap-ppa qagmetteb ele, nug ag aqe mauhna malappig.” Ag anam aon akkulag.

²² Yawe Nug da nai imu appi dooglagnu da amelppa aum. “Yawe Nug inam awa atte. ‘Qinob, haen amuppa, danab mauhppig ele, ag gaɗalag am dad okkaippa kinipan bia niiglag. Ag danab ee aeg awewe, gumu kuɗum wanppa nena qetteb, ag gaɗalag am amubia daaglag. Ag anam daappeg, laa diin boumadkkulagnu laa ii daama. Iitta,’ ” awa atte.

²³ Amu Yawe Nug atte. “Danab nug doyak dabmak ena ele, nug doyak dabmak ena ele amunu dabmaama, nug nukka nug onig aib humom. Danab nug beɗuppa ɠagattag ele, nug ɠagattag amunu dabmaama, nug nukka nug onig aib humom. Danab nug enub okkai ele, nug en amunu dabmaama, nug nukka nug onig aib humom.

²⁴ Nug keeke amunu dabmaama, nug nukka nug onig aib humom. Iitta! Laa nug da dooiɗa, nug dahil hak, amuam da Yawe, da danab ah dilagnu oo mauhaknab kobol, nai doya mala hettoɗia epeɗia elele mettak kobol, amu genab tutukku hak kobol ele dim lamidttem amu, nug amunu diignu doyak tutukku ele, nug keeke aɗit amu dabmaama, da onil humaɗ! Da hak amu dim lamidttemnu diig am, kobol amunu da enanagnab doottem.” Yawe Nug anam atte.

^25-26 Amu Yawe Nug atte. “Isip danab, Juda danab, Edom danab, Amon danab, Moap danab, amu laa ag atu taɗak uma daatte, ag appa daatteb, ag oh gaɗa otaɗak dim lamidtteb. Ag kobol amu ag beɗulagppa hetteb, amge ag gaɗalagppaib anam da dim lamiɗtteb. Ag oolagppa ele da ii dim lamiɗtteb. Israel danab ah oh ele anamib; ag da oolagppanab ele ii dim lamiɗtteb. Anam amunu qinob, haen adekkuppa, da danab ah oh ag gaɗalagppaib da dim lamiɗtteb, ag da oolagppanab ele da ii dim lamiɗtteb amu, da ag bu madakkul.” Yawe Nug anam awa atte.