Jeremaia 8 - Nobonob Baibel

¹ Amu Yawe Nug inam ele atte. “Haen amuppa laa ag Juda dilag king, Juda dilag ehanittak anuqak danab, mana mettak danab, propet danab, Jerusalemnu danab ah ele ag anukka mauheg boumadppig ele, laa ag amu ebehilkad boumadppig abenppanu akkan,

² ag wanppa hamu maadppeg daaglag. Juda danab ah amu ag anukka bau daanna, ag aam kalam hoɗoppai ele dilagnu, ‘Ihinig kayak,’ anana, ag keeke amu noolagppa dup nona binalag mena, ag amu dilag oolag mauhak doon, ag amu dilag mana mettak danab dilag nai doon dim lamidna, ahilagppanu aɗi aɗi hekkulagnu nai ele aoppig. Juda danab ah ag amu heppig amu, haen amuppa ag ebehilkad am wan qaɗeppa kinipan bia daappeg, laa ag qagmena, moɗppa ii memana.

³ Amu haen amuppa da heppi, Juda danab ah, ag oh bia nau hetteb amu, ag kuɗumnab mauhkkulag, amge laala da heppi, kekeɗ ag laa ii mauhppig diin goppeg, wan laappa diia ukkak danab ah daaglag. Amu ag appa daanna, ag bau daan oiglagnu uuglag. Ag mauhkkulagnu oolag daakku.” Yawe Nukka Ɠagattag Oh Ele Nug anam atte.

Juda danab ah ag ib ena apiɗidna, ib eheɗppa goppig

⁴ Amu Yawe Nug aum. “Jeremaia, na Juda danab ah amelagppa inam appe doyeg! ‘Yawe Nug inam awa atte. Danab ag nena qetteb amu, ag eɗun iite ahatteb? Danab nug ib eheɗ awa gotte amu, nug eɗua, ib tutukku iite aotte?

⁵ Anam amunu aɗinu Juda danab ah ag ib eheɗ aon gonana, ag eɗun, dahilppa uɗiglagnu uutteb? Ao, aɗinu Jerusalem danab ah ag hanhan da dimeɗona kayak hambuppuak laala dim lamadna, ag eɗun, dahilppa uɗiglagnu uun, ii uɗitteb? Ag hambuppuak kayak aɗualadna, uuattak uun autna aotteb. Ag eɗun, dahilppa uɗiaknu uun, ii uɗitteb.

⁶ Da daul humen, nai dookkulnu daye autenab aottem, amge laa nug nai tutukku ii maditte. Laa nug nau hak nuhignu, “Da eheɗ hemi,” anana, oo ii eɗutte. Ag anen anen ohnab ag eheɗ hekkulagnu dabmetteb; ag dabmak amuib dim lamidtteb. Ag hos ag banppa qaiettan gotteb, ag amubia ahilag dabmak eheɗ dim lamidkkulagnu hetteb.

⁷ Stok nug oug haen uɗitte doya, nug aha, hagagɗa, laih oug haen iittappa gokkunu dootte. Ao, uppuɗil beɗulag nakok, ai swipt, amu trus ele, ag ele anam dootteb. Ai ag anam dootteb, amge dahilad danab ah ag ɗo da, Yawe, da ag dim lamidkkulagnu mattami ii dootteb.

⁸ Ag inam atteb. “Ig Yawenu ɗo ele amunu, ig am danab doyak dabmak ena ele,” amge ag diig attemun anam atteb? Genabnab genab, ahilag ippunittak danab ag uɗat okkai henan, ɗo dahil yaan ippunadppig, amge maɗi ahilag amuam meu iitta.

⁹ Danab ag akka, “Ig doyak dabmak ena ele aɗattem atteb,” amge ag da, Yawe, ag dahil nai geɗidna, ii dim lamidtteb, ag am doyak dabmak ena ele genab am iitta. Ag amu hetteb amunu, ag uɗa nak nau aoglag. Ag oo uug nau qak doon, ag doɗ pelemppa teum daatte, ag amubia daaglag.

¹⁰ Ag dahil nai geɗidna, ii dim lamidtteb amunu, da heppi, kekeɗ ag uɗin eɗadna, danab laa ag ahilag wan, ah ele diippeg, ahilkad daaglag. Aɗinu da anam hekkul? Juda danab ah oh, danab onig iitta, danab onig okkai ele, ag oh baubau awaknu hik aqeeqe oitteb. Ao, propet danab, mana mettak danab ele ag hambuppuak kobol dim lamidtteb.

¹¹ Ag dokta nug danab beɗuppa guittak okkainab awom antta, hamu bia doya, itak nakoknabib qataqette, ag dahil danab ah dilagppa anam hetteb. Ag, “Ig maɗoɗib daagnig, ig maɗoɗib daagnig,” anan daatteb, amge maɗoɗ laa ii daatte.

¹² Ag naunab nau hetteb amunu, ag uɗalag nettete? Iitta! Ag uɗa nak nakoknab laa ii dootteb. Ag uɗa nak kobol hetteb, amge ag amelag kokoɗ iinab ebatte. Ag anam hetteb amunu, ib laa ii daatte. Ag laa qep elabppa mauhtteb bia, ag ele mauhkkulag. Ahilag bu awak haenppa, ag nena qekkulag.’ ” Yawe Nug anam awa atte.

¹³ Yawe Nug atte. “Da heppi, ahilag ee meu ii oma. Grep muɗippa meu laa ii daama. Ad fig uɗug bunaɗppeg, meu ii oma. Da aɗi keeke Juda danab ah mattami amu, da ag eppelagppanu eɗuen hiɗakkul.

¹⁴ Juda ag akka akka ag inam akkulag. ‘Aɗinu ig ippa inam daattem? Ig qagmeta oolta, aab ɠagattag aɗ ele, amuppa gota, toettata daagnig. Ig amu hekkunignu diig am, ig Yawe, ihinig Kayak, ig nuhigppa hipunin hemut amunu, Nug he, ig oɗe qamutak ele, toettak daattem. Nug uud tiig mua nau ele lakkunignu mekkom.

¹⁵ Ig maɗoɗ daagnignu oonig dayom, amge iitta, keeke ena laa ii uɗitte. Ig eɗut ena daagnignu haen anidkkunignu oonig dayom, amge iitta, baɗak eheɗ nau aakkuib beum daatte.

¹⁶ Kekeɗ ag uɗin, Dan appa daaegeg, danab nug hos noobppa nokoɗu qe doya, hos miag daatte dootte, amubia ig kekeɗ ag miag daatteb doottem. Danab nug hos dawai gaye, danab doya ottaitte, amubia ig Juda danab ah ohnab ottaittem. Kekeɗ ag wan imu oh, aɗi keeke wan imuppa daatte, ag diippeg, ahilag daaglagnu, ag amu ohnu aɗi hekkulagnu oolag daatte hekkulagnuib uɗitteb. Ao, ag wan imunu aab okkai oh, danab ah appa daatteb ele amu, ag amu oh diippeg, ahilag daaglagnu, ag amu ohnu aɗi hekkulagnu oolag daatte hekkulagnuib uɗitteb.’ Juda danab ah ag anam akkulag,” awa atte.

¹⁷ Yawe Nug atte. “Ag dabmeig! Da heppi, mat nau ahilagppa bekkulag. Ao, da heppi, makkai eheɗ, laa nug heeb, ag nau ahilagnu ii hemananu elele iitta, makkai eheɗ amu ag oolagppa bena daaglag. Mat nau amu ag anam ahilagppa bena emaladkkulag.” Yawe Nug anam aakku atte.

Jeremaia nug Juda danab ah, nuhig tiig laippu, nug amu dilag mahiak hette

¹⁸ O Ehanittak dahil, da uug doottem. Da ool am gai-iitta meum daatte.

¹⁹ Da ele tiinig laippu ag wan laa, umanab daatte, ag appa gaanna daatteb. Ag gaanna, “Yawe Nug Sion appa ii daattete? Ao, ahilag King, Yawe, Nug gemu appa ii daattete?” atteb, amge Yawe Nug nob ma atte. “Ag kayak hambuppuak dottolkad noolagppa dup nona binalag meppig amunu, da oppoɗil beum. Ao, ag dottolkad wan laih laihnu, ag ehanadkkulagnu elele iitta, ag amu noolagppa dup nona binalag meppig amunu, da oppoɗil beum. Ag anam aakku heeg, bu anam aakku aoppig. Ag aɗinu anam heppig?” awa atte.

²⁰ Anam amu, Juda danab ah ag atteb. “Ee awak haen aakku ukka malom. Oug haen digmekkunu hette, amge ig padal maknu ehanittak laa ii anidmut,” aon atteb.

²¹ Da ele tiinig laippu ag aakku guittak naɗi okkai aon malappig amunu, da oolppa ele guittak okkai naɗi doottem. Da mahiak okkai hettem. Da antten, ameg iɗuak doottem.

²² Gileat appa marasin oɗe danab ehanadkkunu daatte. Appa dokta danab ah ehanadkkulagnu daatteb. Juda danab ah ag eɗun ena daaglagnu ib ele daatte amunu, aɗinu ag uun, eɗun ena ii daatteb?