Jeremaia 7 - Nobonob Baibel

Danab ag Kayak noobppa hambuppuak dup nona binag metteb ele, ag hamu hetteb

¹ Amu Yawe Nug nuhig nai imu Jeremaia metta, Nug inam aum.

² “Da am Yawe. Na Juda danab ah ag nai imu dooglagnu, na da laul odppa daanna, mehuqppe doyeg! Na mehuqnana, na inam a! ‘Ag Juda danab ah oh, ag lag imunu aɗ odppa Nug noobppa dup nona binag mekkulagnu uɗitteb ele, ag Yawenu nai imu doyeg!’ aon akkut.

³ Na amu anam mattin malona, na inam ele appe doyeg! ‘Yawe Nukka Ɠagattag Oh Ele, Israel dilag Kayak, Nug inam atte. “Ag Juda, ag ahilag hak nau uuna, ag eɗun, kobol ena dim lamidppeg, da uuadppi, ag wan imuppa inam daaglag.

⁴ Laa ag, ‘Yawenu mettid lag, lag amunu keeke oh ele ig oonigppa daatte amunu, uug laa ihinigppa ii bema,’ ge iitta mattin oitteb amu, ag nai amuppa hambubutteb. Ag laa ag nai amu dabmenana, ag nai amunu aib oolagppa genab dooppig.

⁵ Ag ahilag hak nau gaɗalagib ii uuna, ag genab uuglag dayeb, ag eɗun kobol ena dim lamidnana, ag laa dilagnu nai doya mala hettoɗia epeɗia elele mettak kobol dim lamidkkulag dayeb,

⁶ amu ag laa, ag wan laihnu danab, aria nid ag mamelkad mauhppig, amu ah ag gamulkad mauheg, qab daatteb, ag amu eheɗ hattanana, ahilkad keeke yab bia aotteb amu, ag kobol amu genab uun, ii hekkulag dayeb, ag wan imuppa danab hamu aqappeg ii mauhkkulag dayeb, ag gemu kayak hambuppuak dim lamadna, amuppa eheɗ aotteb amu, ag kobol amu ele uuglag dayeb,

⁷ diig amunu da uuadppi, ag tuɗidna wan imuppa daaglag. Da wan imu ag mamelkad aɗi hanhan ahilag daakkunu mattami.

⁸ Amge antteg! Ag nai hambuppuak, nai meu iitta elenu oolagppa genab dootteb.

⁹ Ag yab hetteb. Ag layag qe mauhak hetteb. Ag ewau pakkua gappai hak kobol hetteb. Ag hettoɗiakppa nai hambuppuak aon, nai amunu, ‘Am nai genab,’ ahilag naippa ɠagattag qettan maditteb. Ag kayak hambuppuak Bal noobppa daanna, kalu danab ile muttuɗig enanag bette ele maina, nug medatteb. Ag kayak laala ele, ag anukka kayak amu ii dooppig, ag kayak amu ele dim lamadtteb.

¹⁰ Ag kobol amu oh henana, ag da, Yawe, ag lag dahil, da onil lag amuppa daatte, ag da laul amuppa uɗin, da noolppa daanna, ag atteb. ‘Yawe Nug ehanikkeb, ig padal ii memata,’ aon atteb. Ag anam anana, ag kobol nau amu oh, da, Yawe, da kobol amunu oolppa uuaknab doottem, ag kobol amu oh tuɗidna hekkulag dayeb amu, da genab ehanadppi, ag padal iite memana?

¹¹ Ag amu hetteb amunu, lag imu, da onil lag imuppa daatte amu, lag imu ag heeg, yab danab naunab dilag lokkumak aben bia beum daatte. Anam daatte, amge da keeke ohnab ag hetteb, da aakku neekkadmi daattem.” ’ ” Yawe Nug anam aakku atte.

¹² Yawe Nug atte. “Ag ahan, Silo gona, Israel danab ah ag nau hak huanak heppig amunu, da Silo appa diig amunu hei nauhom amu, ag neegna antteg!

¹³ Ag nau hak amu oh heegeg, da, Yawe, da haen kuɗum ag amelagppa ii hemananu ami, amge ag daulag human, nai ii dooppig. Da ag onilagppa emi, amge ag, ‘Ig iikku daattem,’ ii appig.

¹⁴ Ag heppig amunu, da Silo appa hemi, da amubia iguppa dahil mettid lag, da amuppa hekkul. Lag amuppa amu, da onil aakku daatte; lag amu ag oolagppa daatte amunu, ag atteb. ‘Yawe heeb, ig padal ii memata,’ aon atteb. Amge da Silo appa hemi, da amubia aben imuppa, aben da ag mamelkad aɗi dilag daakkunu mattami amu, da imuppa ele hekkul.

¹⁵ Ag Juda danab ah, da heppi, ag da noolppa ii daamna. Da Israel danab ah, onig laa Epraim, da ahilagnu hemi, amubia da ag Juda, da ahilagppa anamib aakku hekkul.

¹⁶ Anam amunu, Jeremaia, na danab ah imu dilagnu da ag ehanadkkulnu aib oo doyakppa unuqiɗme. Na da ehanadkkulnu ɠagattag aib unuqiɗme. Aɗinu? Na amu hekkut amu, na hamu hekkut. Da daul humen ii doopa.” Yawe Nug anam awa atte.

¹⁷ Yawe Nug da amelppa anam ana, Nug imu ele aum. “Jeremaia, na Juda danab ah ag ahilkad aab anen anenppa, Jerusalem ibppa ele hetteb iite anidttem.

¹⁸ Nid naunau ag aab ilaknu aab aoegeg, ag mamelkad ag aab ilaeg, ah ag bret batappatak kayak hambuppuak laa onig Habnu Kuin, ag main nug mettaglagnu bappaidna medatteb. Ag da oppoɗi bekkunu wain gokkaɗaknu ofa kayak hambuppuak laala dilagppa hetteb.

¹⁹ Ag amu hetteb, amge diigppanab ag heeg, da eheɗ aottemte? Iitta. Ag akka ag ahilag eheɗ hak henana, ag eheɗ aonna, ag akka ag uɗa nak madatteb,” Yawe Nug anam awa atte.

²⁰ Ag nau amu hetteb amunu, Naɗi Yawe Nug imu atte. “Ag hetteb, ahilag hak amunu dahil oo nauhak, dahil oppoɗi bak ele bettep. Amu da oppoɗi bak amu gokkaɗppi, wan imuppa, danab qaɗelagppa, doɗ qaɗelagppa, atuppan adppa, ee wanppa bette ele ohppa gokku. Ukka, aab ewewe, laa qauhkkunu elele iitta bia, amu oh dilagppa daakku,” awa atte.

²¹ Amu Yawe Nukka Ɠagattag Oh Ele, Israel dilag Kayak, Nug da nai imu Juda danab ah amelagppa akkulnu da amelppa aum. “Ag Juda, ag doɗ digdig main meɗatteb amu, ag amu tuɗidna henana, ag manaknu ofa ele da meɗaglagnu bappaidtteb, amge ag teppu amu aon, ag akka ag aakkud laig! Da aib meɗappig.

²² Aɗinu? Haen da ag mamelkad aɗi omalatti, ag Isip uueg, da ag amelagppa ag aɗi aɗi hekkulagnunab ami amu, haen amuppa da ag manaknu ofa, amu mana mettak laala elenu aakkuib ag amelagppa ii ami.

²³ Iitta. Da haknunab nai imu ele ag matten, ag amelagppa ami. ‘Ag dahil nai amu doon dim lamidppeg, da ahilag Kayak daappi, ag dahilad danab ah daaglag. Ag ena daaglagnu, ag dahil hak oh dim lamitteg!’

²⁴ Da anam ag amelagppa ami, amge ag dahil nai ii dooppig; ag daulag human nai doon, elele ii dabmedappig. Iitta. Ag da oɗel dim lamidmananu dabmak ahilag ɠagattag eppe, ag oolagppa ahilag dabmak nau atten dayom amu, ag amu dim lamidppig. Ag da ii dim lamiɗppig. Iitta. Ag gomelag da meɗan goppig.

²⁵ Haen ag mamelkad aɗi ag Isip uun uɗippig uɗie uɗie, gemu batak, haen amu oh da hanhan propet danab dahilad ag dahil nai appeg dooglagnu maatti uɗippig

²⁶ Amge Israel ag dahil nai ii dooppig; ag daulag human, nai doon, elele ii dabmedappig. Ag da oɗel dim lamidmananu dabmak ahilag ɠagattag eppe, ag mamelkad aɗi dilag eheɗ hak eɗidna, eheɗ huan heegeg uɗie, gemu ele hetteb.” Yawe Nug da amelppa Israel dilagnu anam aum.

²⁷ Yawe Nug anam ana, Nug tuɗitta, da amelppa aum. “Jeremaia, na Juda danab ah amelagppa anam abeppe, ag nahip nai ii doomna. Na ag onilagppa ebeppe, ag nai noob laa ii mettamna.

²⁸ Anam amunu, na ag amelagppa inam appe doyeg! ‘Juda danab ah, ag Yawe, ahilag Kayak, ag Nug oɗe ii dim lamittegeg uɗie, gemu ele ii dim lamidtteb. Nug ag daulag bate, ag daug batak amu ii dabmeppig, ii dim lamidppig. Ag oolagppa doyak diig genabib ii daatte. Ao, ag oɗelagppa doyak diig genabibppanu nai laa ii bette.’ ” Yawe Nug da amelppa anam aum.

²⁹ Amu Yawe Nug atte. “Ag Juda, ag ikkilag uɗug otaɗna, buɗippeg ukkaɗ! Ag qauko attannab, igippa keeke laa ii daatte, ag amuppa tena, appa ag nai oo doyak ele mattieg! Aɗinu? Da Yawe, da ag gemu daatteb, ag dahil oppoɗi bak waappa daatteb, da ag dimatte, ag geɗadmi,” awa atte.

Juda danab ah ag eheɗ hak naunab nau oolnu noakppa heppig

³⁰ Yawe Nug atte. “Aɗinu ⌊da Juda geɗadmi⌋? Juda danab ah ag dahil neekkakppa eheɗ henan daatteb. Ag ahilkad kayak hambuppuak akkan, da laul, da onil aguppa daatte amu, ag da laul amuppa qappaladppig. Dottolkad amunu da oolppa uuaknab doyeye, ag da laulppa qappalatteg, dahil neekkakppa da laul aakku dubuttid tak ele daatte.

³¹ Oolnu noak onig Hinom Bekkanu Oolnu Noak, appa aben laa onig Topet daatte. Amu Topet appa Juda ag mana mettak aben kayak hambuppuak dilag mettid lag nakokppa bappaladna, appa ag bekkalkad, aɗelkad ele manadna, kayak hambuppuak madatteb. Da ag amu hekkulagnu iinab ami! Ag amu hekkulagnu dahil dabmakppa nakok laa iinab beum.

³² Ag amu hetteb amu, ag dabmeig! Butti, haen adekku danab ah ag aben amunu Topet ii amana. Ag oolnu noak amunu ele, ‘Hinom Bekkanu Oolnu Noak’ ii amana. Iitta. Kekeɗ ag uɗin, Juda danab ah eheɗnab aqappeg mauhppeg, laa ag ag gaɗalkad aguppa boumadppeg ukkeb, ambak dayeb, haen amuppa ag oolnu noak amuam onig, Danab Ah Eheɗnab Aqaeg Mauhppignu Oolnu Noak, ataɗkkulag.

³³ Amu haen amuppa danab ah gaɗalkad hamu wan qaɗeppa niippeg, ai hab waappa hagagaɗna oitteb, doɗ dakkuɗ ag wanppa oitteb ele, ahilag ee daaglag. Ag anam daappeg, laa ai o doɗ amu lamadkkunu ii daama.

³⁴ Da heppi, Juda wan am hele-ettak daakku amunu, Jerusalem appa, Judanu aab laa ohppa ele oo gamag ahak laa ii daama. Danab ah ele ag oo gamag ahak doon, ewau matulak ii aomna.” Yawe Nug anam awa atte.