Jeremaia 6 - Nobonob Baibel

Yawe Nug Juda danab ah bu madakkunu dabmeum

¹ Yawe Nug atte. “Ag Benyamin danab ah, ag ahan ooleg! Ao, ag Jerusalem appa aib daappig. Ag ahan ooleg! Uug naunab yawalti uɗitteppanu uɗitte. Appan laa uɗin heppeg, nauhak okkai nau daakku. Anam amunu, danab ah ag dooglagnu ag trampet Tekoa appa iwaleg! Ge, ag Bet Hakerem appa danab ah anidna, uug naunab uɗitte dooglagnu ag appa pilak, amunu at daakkunu qappeg!

² Sion aab am aab, neekkak nuhig enanag, amge da heppi, kekeɗ ag heppeg nauhkku.

³ Sipsip gumak danab kuɗum ag sipsip ahilkad akkan uɗin, aben anen anen panin heeg, sipsip ag gikkiɗah oh lae neeg, iitta me, aben nauhtte, kekeɗ ag amubia Jerusalem talilidna daan, heppeg nauhkku.

⁴ Kekeɗ dilag okkai ag daup ahilkad amelagppa akkulag. ‘Ag ban hekkulagnu babaitteg! Ahappeg, ig aam ameg tutukkuppa ban hekkunig!’ akkulag. Ag anam akkulag, amge haen ukkeb, ag eɗun, akkulag. ‘Ihinignu am gadon. Aɗinu? Haen malom. Gemunu amahlak iitta mette. Ao, uudoum, gatatu nekkunu hette.

⁵ Anam amunu, ig uupput dayebeb, gatatu neeb, ig tuqan ahapput, ag ele ban hetat, ig aab amunu lag enanagnab hepput nauhkkulag,’ aon akkulag.” Yawe Nukka Ɠagattag Oh Ele Nug anam awa atte.

^6-7 Am keeke amu bekkunu diig am, Yawe Nukka Ɠagattag Oh Ele Nug inam atte. “Jerusalem danab ah ag bu aoglagoitte. Ag lailkad gai-iitta daatteb ele, ag ag eheɗ hadatteb. Le moɗ laa, le appanu baabaib gotte, amubia Jerusalem danab ah ag nau henan daatteb. Jerusalem danab ah ag laa guittak mattanna heeg, nauhak okkai daatte. Aab okkai amuam danab guittak awom, o danab oɗe nau awom, am amubia daye andette daattem. Ag nau anam henan daatteb, ag bu aoglagoitte amunu, ag Juda dilag kekeɗ da ag amelagppa attem. ‘Ag Jerusalem eɗidkkulagnu ag ad oadna aɗ diigppa mena, aabnu aɗ letaɗna, aab ooppa nokkulagnu wan laihnu buun, aɗ amuppa gokkaɗppeg, aɗ elele baɗ!’

⁸ O Jerusalem danab ah, ag bu amu aomnanu, ag hamu bia aib dooppig. Iitta! Ag nau baula aomnanu dabmeig! Iitta dayeb amu, laa nug appa daakkunu elele iitta daakkunu, da dimatten heppi, ahilag wan am hele-ettak daakku,” awa atte.

⁹ Yawe Nukka Ɠagattag Oh Ele Nug anam anana, Nug imu ele atte. “⌊Ag Juda danab ah ag nau aomnanu nai dahil ii dabmekkulag dayeb amu, da kekeɗ amelagppa inam appi dooglag.⌋ ‘Ag danab nug qrep meu awawa, nug meu laa muɗippa ii daamanu eɗua, eppegppa muɗi oh aɗe, meu laippu tatam ii anttom aotte amu, ag amubia heig!’ awe akkul.” Yawe Nug anam awa atte.

¹⁰ Yawe Nug anam a, da, Jeremaia, da ami. “Da aun amegppa Kayaknu nau aomnanu dabmettak nai appi dookku? Aun nug daug huma dookku. Ag nai dooglagnu uuppig amunu, ag dooglagnu elele iitta. Yawenu nainu amu, ag oolagppa uuaknab dootteb. Ag Yawe nainu gamag ahak nakok laa ii dootteb.

¹¹ Juda danab ah ag hipunin huan heegeg, Yawe Nug amunu oppoɗi bak dootte, da oppoɗi bak amu ele doyeye, tuɗitten ii ippunadkkulnu ib laa ii anidttem,” awe ami. Da anam ai, Yawe Nug aum. “Na oppoɗi bak Juda dilagppa bekku amu, na amunu ag amelagppa appe doyeg! Na nid naunau ibppa qiɗ henan daatteb, nid danab bau qagmen daatteb, ewau daatteb, kaino ele amelagppa appe doyeg! Oppoɗi bak amuam ag ohnab tonadkku.

¹² Da eppel bahien, Juda danab ah bu madakkul amunu, da Juda laulkad diien, da amu laa, ahilag daaglagnu ag madakkul. Da Juda danab dilag wan anen anen, ahilkad ah ele diien, laa madappi, ahilkad daaglag,” awa aum.

¹³ Amu Yawe Nug atte. “Juda danab ah oh, danab onig iitta, danab onig okkai ele, ag oh baubau awaknu hik aqeeqe oitteb. Propet danab, mana mettak danab ele ag hambuppuak kobol dim lamidtteb.

¹⁴ Ag dokta nug danab beɗuppa guittak okkainab awom antta, hamu bia doya, itak nakoknabib qataqette, ag dahil danab ah dilagppa anam hetteb. Ag, ‘Ig maɗoɗib daagnig, ig maɗoɗib daagnig,’ anan daatteb, amge maɗoɗ laa ii daatte.

¹⁵ Ag naunab nau hetteb amunu, ag uɗalag nettete? Iitta! Ag uɗa nak nakoknab laa ii dootteb. Ag uɗa nak kobol hetteb, amge ag amelag kokoɗ iinab ebatte. Ag anam hetteb amunu, ib laa ii daatte. Ag laa qep elabppa mauhtteb bia, ag ele mauhkkulag. Da bu eheɗ madappi, ag nena qekkulag,” awa atte.

¹⁶ Yawe Nug inam atte. “Da ami. ‘Ag ib oɗatleppa daanna, ag pehettan neegna antteg! Ag, “Ig alankad ib attenppa oippig? Ib atten am ib ena?” ag oɗmak amu heig! Ag oɗ mattan, ib atten am ib ena doon, ag amuppa oinna, ag maɗoɗ aoglag,’ ami. Da anam ami, amge ag uuppig. Ag, ‘Ig ib amuppa ii oimta,’ appig.

¹⁷ Amu da aɗi uɗitte anttak danab ehanadkkulnu maatte, da, ‘Danab amu ag trampet iwalppeg, ag doyeg!’ ami, amge danab amu ag trampet iwalegeg, ag dooglagnu uuppig. Ag, ‘Ig ii doomta,’ appig.

¹⁸ Juda, ag amu heppig amunu, wanppan wan laala ohppan danab ah, ag nai imu doyeg! Ao, ag laa, ag aɗi heehe anttomnu mattiak danab aɗi, ag neegna antteg! Ag neegna doon, Juda dilagppa aɗi bekku antteg!

¹⁹ Wan atu ohppan danab ah, ag doyeg! Dahilad danab ah ag dahil nai doyaknu uun, ii doyegeg uɗie, gemu ele ii dootteb; ag dahil ɗo dim lamidkkulagnu ele dimettan, ɗo dahil waappa ii daaegeg uɗie, gemu ele waappa ii daatteb amunu, da heppi, ag bu eheɗ aon, ag nauhna autna aoglag. Ag eheɗ hekkulagnu lokkumakppa dabmenana maittak eheɗ aon heppig amunu, kobol amunu meu nau ahilagppa bekku.

²⁰ Juda danab ah, ag Sebanu kalu danab ile muttuɗig enanag bette, ag kalu amu amotna, da meɗatteb, amge ag hipunin hekkulagnu ii uutteb amunu, da kalu amunu ool hettete? Da amunu oolppa ena doottemte? Iitta! Ao, ag goɗen muttuɗig enanag hekkulagnu wan umanabnu keeke qaittobttob bia onig kalamus aon, da meɗatteb, amge ag hipunin hekkulagnu ii uutteb amunu, da kalamus amunu ool hettete? Da amunu oolppa ena doottemte? Iitta! Manaknu ofa ahilag amu, ag am pehettak iitta; da ii aopa. Ao, ahilag mana mettak laa amu, da amunu ena ii doottem.” Yawe Nug anam atte.

²¹ Anam amunu Yawe Nug atte. “Da heppi, Juda danab ah ag gai-iitta daappeg, kekeɗ ag eɗadkkulag. Mamelkad, bekkalkad ele ag danab nug menppa baeg ya, na qette bia nena qekkulag. Ao, ahilkad mudippan laippu, amu ag lailkad ele, ag ele danab nug menppa baeg ya, na qette bia nena qekkulag. Ag oh mauhkkulag,” awa atte.

²² Amu Yawe Nug atte. “Antteg! Ban daup ag wan laa yawalti uɗitteppanu daatte, ag appanu uɗiglag. Ao, wan ɠagattag laa umanab daatte, appanu daup ag ban hekkulagnu ahatteb.

²³ Daup amu ag lat, ban ele aɗatteb. Ag laa dilagnu oo gai-iitta doya oo metta ehanittak ii dootteb. Ag laa guittak mattaglagnu uug ii doon oitteb. Ag hos attan ban hekkulagnu oiyegeg, oqotti huana, yu koɗkoɗ eheɗ nau qette, oqotti amubia otte. O Sion danab ah, daup amu ag ahilag kobolppa huu mena, anam daanna, ag banelag uɗiglagnu daatteb.” Yawe Nug anam awa atte.

²⁴ ⌊O gadon, ig Juda⌋ ig daup amunu nai doot malamut, amu ig gai-iitta daattem. Ig eppenig am hamu daatte, danab eppeg laih laih oh mauhom, amubia. Ig doot, ig dabmakppa guittak okkainab doottem. Ao, ig ah nid aokkunu haaha, guittak okkainab dootte, amubia ig guittak okkainab oonigppa doottem.

²⁵ ⌊Kekeɗ amu uɗippeg, nau aomnanu nai inam daakku.⌋ Kekeɗ ag qep elab ele, ag heeg, baɗak nau, guittak ele aben ohppa daatte amunu, ag aab dimittim aib goppig! Ag ib aon, laih aib goppig.

²⁶ O dahilad danab ah ag lamen heɗiag ele takkan, uhuɗppa niinna, beɗulag itoɗin, itoɗinna, danab bekka laippu mauhe, huanaknab qanak baag eleppa mahitte, ag amubia mahieg! Aɗinu? He nauhak danab nug ihinigppa pahanab tula bekku.

²⁷ Amu Yawe Nug aum. “Jeremaia, danab ag aen, o gol, o silwa keeke, ag keeke amuam dubuttid ele, o dubuttid iitta dooglagnu uɗat hetteb. Aria, gemu amu, Juda danab ah ag am aen, o gol, o silwa keeke, ag amubia daatteb, amu da hei, na danab uɗat amu hetteb, na amubia daattem. Na Juda dilag hak, ahilag kobol ele tutukku, pehettan neegna anidna, na epeɗiatte!

²⁸ Na epeɗiadna, na inam anidkkut. Ag oh da eheɗ dimeɗan, dahil nai tappaeg nette. Ag oh ahan, laa onilag nauhkkunu nai nau maditteb. Ag oh oɗe dim lamidmananu dabmak ahilag ɠagattag eppom daatte; bras o aen ɠagattag, ɠagattag amubia daatte. Ag oh kobol diig ena iitta uɗig wak ele dim lamidtteb.

²⁹ Danab aen, o gol keeke, nug keeke amu babaitta epeɗia awak uɗat hette, amu amubia uug laala danab ah dahilad dilagppa beppeg, hipunin hak uuglagnu hemi, amge ag hipunin ii uuppig. Ag kobol nau hekkulagnu ii uuppig.” Yawe Nug anam aum.

³⁰ Gadon, Yawe Nug Juda danab ah geɗadkku amunu, laa ag ahilagnu, “Silwa laa dubuttid ele, danab silwa amuppa uɗat laa hekkunu elele iitta amunu nug geɗidkku amu, Juda danab ah ag amubia daatteb,” akkulag.