Jeremaia 51 - Nobonob Baibel

¹ Yawe Nug inam atte. “Da heppi, huu laa, ag keeke heeg nauhtte ele, ag ahan, Babilon wan, wan amunu danab ah ele ban hekkulag.

² Da heppi, wan laihnu daup ag Babilon gona, ag danab ulah ee aeg dappunkkeg iwale ukkaknu uɗat hette bia Babilon heppeg, nauhakib daakku. Ag Babilon heppeg nauhkku, haen amuppa ag Babilon talilidna daanna, ban hekkulag.

³ Anam amunu, Babilon dilag daup ag lat ahilkad omanadmananu, ag ahilkad ban hak lamen ɠagattag takkaladmananu, ag kekeɗ ag paha ban heig! Ag kekeɗ ag Babilon dilag nid bau aqeg! Aib uuadppeg daappig! Ag kekeɗ, ag Babilon dilag daup ohnab aqappeg, padal meig!

⁴ Kekeɗ ag heppeg, Babilon dilag daup ag Babilon aabnu ib ohppa guittak okkai aon, nena qena mauheg!” awa atte,

⁵ Aɗinu Babilon anam nena qena nauhkkulag? Kayak, Nug Yawe Nukka Ɠagattag Oh Ele, Israel dilag Kayak, Nug Israel, Juda ele uuata auta autanab ii awom. Laa amu, Babilon danab ah ag hipunin heegeg, Kayak, Nug Israel dilag Kayak Oppiaawak Ele, Nug nuhig neekkakppa ag beɗulagppa aab ambak daatte.

⁶ Ag wan laappan danab Babilon daatteb ag, ag Babilon uun ooleg! Ag mauhmananu ag Babilon uun, oolna laih ukkeg! Babilon hipunin heppig, diig amunu ag nauhkkulag. Ag nauhkkulag amunu, ag laa ag appa daappeg, Babilon ag ahilag hipuninnu nob amu aoppeg, ag laa ag ele Babilon beɗulagppa ag nob amu aon nauhmananu, ag appa aib daappig. Babilon danab ah ag hipunin heegeg uɗie, gemu ele heegeg, Yawe Nug eheɗ hak amunu nob tutukku madakkunu haen uɗiom daatte amunu, kekeɗ ag heppeg, Babilon nauhkku.

⁷ Wan atu laihppa danab ag hipunin heeg, Yawe Nug ahilagnu oppoɗi be, Nug Babilon ag bu madakkunu uɗat mattom. Nug matte amunu, Babilon kap golppa hak Yawe Nug eppegppa aɗom bia dayom. Yawe Nug danab ah hipunin heppig dilag oppoɗi beum amu, oppoɗi bak amuam wain nau kap-ppa daatte, amubia. Amu Yawe he, wan atu ohppan danab ah ag wain nau amu laeg, kaaka aqom.

⁸ Amge Babilon na qa, aoɗa nauhkku. Babilon guittak amu aokku amunu, ag Babilonnu mahieg! Ag marasin laa awa, guittak okkai doomanu metteg! Nug eɗua ena daakkutai.

⁹ ⌊Amu danab laa ag akkulag.⌋ “Ig hepput, Babilon ena daalo, amge elele iitta. Nug eɗua ena daakkunu ib laa iitta. Babilonnu bu awak am okkainab. Ge, bu amuam okkai naɗi amunu, ig Babilon uuta, ig eɗut anen anen ig wanenigppa gota daatu!” aon akkulag.

¹⁰ Amu Israel danab ah ag akkulag. “Yawe Nug ehanittak okkainab mekke, ig Babilon eppelagppa ii daattem. Ahappeg, ig Sion appa Yawe, ihinig Kayak, ig Nug attem attem heum apput doyeg!” aon akkulag.

¹¹ Ag lat doɗo babaitteg! Ahilag guppiɗ human aɗeg! Babilon ag heeg, Yawenu mettid lag nauhom amunu, Yawe Nug Babilon eheɗ hak amunu nob tutukku madakku. Yawe Nug heeb, Babilon nauhkkunu maittak awom daatte. Amunu Nug Midia dilag king Babilon ele ban hekkulagnu dabmak matta he, ag hekkulagnu yag bak dootteb.

¹² Ag Babilon aqaglagnu pilak humeig! Meitta dayak danab laa otiatteg! Aɗi uɗitte anttak danab ag abenlagppa matteg! Lokkuma dayaya, aha ban haknu dabmak babaitteg! Aɗinu? Yawe Nug Babilon dilagnu aɗi hekkunu dabmeum am, Nug hekku. Ao, Nug Babilon danab ah dilagnu aɗi bekkunu ɗo nai mattiom amu, Nug heeb bekku.

¹³ Ag Babilon danab ah, ag le okkai Yupretis, amu le naunau kuɗum ele daugppa daatteb, ag en huanak ele, amge ahilag gog tak haen aakku uɗiom daatte. Kekeɗ ag heppeg, ag padal mekkulag.

¹⁴ Yawe Nukka Ɠagattag Oh Ele Nug nukka, Nug onig awa, nuhig nai ɠagattag qetta aum. “Da genabnab genab heppi, kekeɗ dilag daup huanak, tap-lokus bia, ag Babilon aab ooppa nona eɗadna, ag gamag ahak okkainab doon ekkulag,” awa atte.

Yawe binag maknu ahi laa

¹⁵ Yawe Nug nuhig ɠagattagppa wan heum. Nug doyak dabmak ena ele nuhigppa wan ha, abenppa meum. Ao, Nug diignu doyak tutukku nuhigppa ele ha, hab nuhig abenppa meum.

¹⁶ Nug a, lombig hinqaknab ahaeg, hakkaɗ qette. Nug he, lombig amu wan atu ohppa ahatteb. Nug he, amemɗi awewe, gu ele ne, ulah ele Kayak meumppanu uɗitte.

¹⁷ Danab ah oh ag kayak hambuppuak dottolkad noolagppa dup nona binalag metteb ele ag doyak dabmak ena ele iitta. Ao, keeke golppa hak danab ag kayak hambuppuak dottolkad bappaidtteb ele, ag uɗalag nekku. Aɗinu? Dottolkad ag hetteb ele, amuam keeke hamu. Ag kayak genab laa iitta. Dottolkad amu ag ulah eeɗnan, bau ii daatteb. Iitta.

¹⁸ Ag am keeke diig iitta, keeke hamu. Danab aon aon aqaglagnu keeke. Ahilag bu awak haenppa Yawe Nug kayak hambuppuak dottolkad amu hettoɗiatteb, ag oh padal mekkulag.

¹⁹ Amge laa, Jakop buɗub dilag Kayak daatte, Nug amubia iitta. Iitta! Aɗinu? Nug keeke oh heum. Ge, Nug keeke oh, Jakop buɗub ele hattom. Jakop buɗub ag am nuhikkudnab danab ah. Nug onig am Yawe Nukka Ɠagattag Oh Ele.

Kayaknu daɗib

²⁰ Yawe atte. “Midia, ag am dahil daɗib bia. Ag am dahil ban haknu keeke. Midia, da na aɗaetten heppi, wanppan wan laala ag danab waa o aoɗtte, ag amubia daaglag. Da na aɗaetten heppi, ɗo maɗoɗ laala ag padal mekkulag.

²¹ Da na aɗaetten heppi, danab waa o aoɗtte, amubia hos, daup ag gomelagppa daatteb ele nauhkkulag. Da na aɗaetten heppi, danab waa o aoɗtte, amubia bannu karis, daup bannu karisppa oitteb ele nauhkkulag.

²² Da na aɗaetten heppi, danab waa o aoɗtte, amubia danab ah ele nauhkkulag. Da na aɗaetten heppi, danab waa o aoɗtte, amubia danab kaino, nid bau ele nauhkkulag. Da na aɗaetten heppi, danab waa o aoɗtte, amubia nid bau, ah makkun ele nauhkkulag.

²³ Da na aɗaetten heppi, danab waa o aoɗtte, amubia sipsip gumak danab, nuhikkud sipsip ele nauhkkulag. Da na aɗaetten heppi, danab waa o aoɗtte, amubia dad hak danab, nuhig uɗatnu makau ele nauhkkulag. Da na aɗaetten heppi, danab waa o aoɗtte, amubia gawana, ehanittak anuqak danab ele nauhkkulag.

²⁴ Ag ⌊Israel buɗub⌋ da ag amelagppanab heppi, Babilon danab ohnab ag Sionnu eheɗ aɗi aɗi hena, nob aoglagnu daatteb amu, kekeɗ ag nob amu ag mattaglag,” Yawe Nug anam awa atte.

²⁵ Amu Yawe Nug atte. “O Babilon, ag am qauko eotte ele wan atu oh he nauhtte bia daatteb. Ag heeg, wan atu oh nauhakib daatteb, amge da ahilag hak amunu eheɗ doyeye ool ii madattem. Danab layag ehale, baippa buɗibɗib noa nauhtte, amubia da dahil ɠagattagppa heppi, ag nauhkkulag, Da heppi, qauko eotte ele oug ma, nauhak daatte, ag amubia daaglag.

²⁶ Qauko eotte am oug me, men daatte am gai-iitta, amuppa keeke ena laa haknu elele iitta, danab men amu awa, keeke laa ii hette, amubia da heppi, Babilon wan am amubia daakku. Aɗinu? Babilon wan am hele-ettak hanhan daakku.” Yawe Nug anam awa atte.

²⁷ Daup ag anidna uɗin, Babilon ele ban hekkulagnu ag pilak qabappeg, attan dayaɗ! Ao, daup ag doon, Babilon ele ban hekkulagnu ag trampet wan atu kuɗumppa iwaleg! Heppeg, wanppan wan laalanu danab ag Babilon ele ban hekkulagnu babaitteg! Ao, ɗo maɗoɗ imu ag ban hekkulag; Ararat danab, Mini danab, am Askenas danab ele. Appan danab ag ahappeg, Babilon ele ban hekkulagnu ag nai meppeg ukkeb doyeg! Laa nug daup huanak Babilon ele ban hekkulagnu dilag okkai daakkunu otieg! Heppeg, bannu hos huanaknab, ag tap-lokus huanak daatteb bia daan, daup ag hos amu attan oin, ban hetteb ele ag goppeg, Babilon ele ban heig!

²⁸ Ge heppeg, Midia dilag king anen anen, Midia dilag gawana, amu ahilkad ehanittak anuqak danab oh ele, amu wan laa oh Midia waappa daan, Midia ehanadtteb, ahilag daup ele, ag oh Babilon gona, appa Babilon ele ban hekkulagnu babaitteg!

²⁹ Yawe Nug Babilon wan heeb nauhaknab dayeb, danab laa appa ii daamanu dabmeum, dabmak amu ɠagattag eppom daatte. Nug amu hekku amunu, danab guittak okkai naɗi doya, beɗu hahaɗeɗe, buɗibɗib oitte, Babilon amubia hekku.

³⁰ Yawe Nug amu heeb beeb, Babilon dilag daup ag kekeɗ ele ban hak uun, ban haknu aben ɠagattag ooppa wana, appa daaglag. Ag ban huana heppeg ukkeb, beɗulag bodoetteb, ag ah bia, gai-iitta daaglag. Kekeɗ ag Babilon amotppeg eokku. Ag aɗ od manak qaknu keeke aɗappeg qiikku.

³¹ Nai awa ukkak danab laa nug layag dim lamitta uɗieb, nug dimugppa laa ele uɗikku. Danab anam kuɗum uɗin, ban attem attem gotte Babilon dilag king amegppa appeg dookkunu uɗiglag, amge ag oh nai laippuib appeg dookku. Ag inam akkulag. “Kekeɗ ag Babilon aab eɗitteg, Babilon aab okkai oh ag eppelagppa daatte.

³² Ag le baag qak oh aon malan, ag aben aab guguittak qaittobttob huanak daatte manaeg ewewe, Babilon daup ag baɗak eheɗ nau dootteb,” aon akkulag.

³³ Amu Yawe Nukka Ɠagattag Oh Ele, Israel dilag Kayak, Nug inam atte. “Danab ag ee aeg mumuɗkkulagnu ee aeg mumuɗak abenppa mumuɗak uɗat amu baelagppa ee aeg ikkilkad huan tabatteb, amubia kekeɗ ag Babilon dilagppa hekkulag. Ge, danab ag wit keeke oɗuom anidna, ag gona otaɗadna aotteb, kekeɗ ag amubia hekkulagnu haen miag doum daatte,” awa atte.

³⁴ ⌊Juda danab ah ag akkulag.⌋ “Amu ig Juda amu, Babilon dilag king Nebukatnesar nug doɗ layag qe mauhe latte, nug ihinignu anambia heum. Ig nug eppegppa daattem. Nug he, ig kaaka daattem. Nug he, ig hinai, ooppa keeke ii inak, ig amubia daattem. Makkai okkai laa doɗ toppua gotte, amubia Nebukatnesar awikke, ig nug eppegppa daattem. Nug makkai doɗ beɗu enanag latte, nug amubia ig Juda, ihinig keeke enanag awe, nug eppegppa daatte. Nebukatnesar nug he, ig ig wanenigppa ii daattem.

³⁵ Babilon ag ig Juda, ag eheɗnab heigppig amunu, eheɗ hak amunu nob nau Babilon dilagppa baɗ! Ao, Babilon ag ig oikkeg, ig tiinig ne, ig kuɗum mauhmut amunu, eheɗ hak amunu aab Babilon beɗulagppa dayaɗ!” aon akkulag.

³⁶ Anam amunu, Yawe Nug atte. “Ag Juda, ag antteg! Babilon ahilagnu eheɗ heppig amunu, da ag Juda, da ag ehanadkkul. Da Babilon uug naunab madakkul. Da heppi, Babilon dilag le okkai am qaɗaiedakku. Ao, da heppi, le Babilon ag appa le lanaknu aotteb amu, le amu ele qaɗaiettaglag.

³⁷ Da heppi, kekeɗ ag heppeg, Babilon am kinipan ameg okkai hume tak daakku. Doɗ jakal, ag aguppa daaglag. Danab ah ag Babilon anidna, ag ameg iɗuak doon, ag Babilon danab ah dilagnu, ‘Keeke hamunab,’ dooglag. Danab laa Babilon appa ii daama.

³⁸ Babilon danab ah ag laion bau doɗ laa qekkunu gaatte, ag amubia hetteb. Ag laion nag ee aokkun liɗimtte, ag amubia hetteb.

^39-40 Babilon ag laion enug qe hette bia daatteb amunu, ag anam aakku daappeg, da ee naɗi ahilagnu babaitten madappi, ag lanana, le ele huana lappeg, kaaka aqeb, eheɗ imanna, ag niinna, baula ii ahamna. Ag anam niiakib niiglag. Danab nug sipsip nag, o nug sipsip dawai okkai, o meeme diia, aqak abenppa gotte, amubia da Babilon danab ah diikkul.” Yawe Nug anam atte.

⁴¹ Kekeɗ Babilon eɗadkkulag. Ao, wanppan wan ohppan danab ah ag aab laa binag metteb ele, aab amu, am Babilon, aab amuam kekeɗ eppelagppa daakku. Anam beeb, wanppan wan laala ohppan danab ag Babilon anidna, ag ameg iɗuak dooglag.

⁴² Babilon dilag kekeɗ ag yu titiɗa ba, wan tonatte bia, ag amubia Babilon tonaglag. Ao, yu koɗkoɗ huana qe, wan tonatte, kekeɗ ag amubia Babilon wan tonaglag.

⁴³ Babilonnu aab ag hele-ettak daaglag. Babilon am atu taɗak, qaɗaiettak daakku. Babilon wan nauheb, appa danab ah laa ii daama. Laa laih gokkunu ele appa ii oima.

⁴⁴ Am Yawe Nug atte. “Da Babilon dilag kayak Bel bu medakkul. Da bu medappi, nug aɗi aɗi toppua ukkom ele amu baheb, eɗua bekku. Gemu wan laappan danab huanak ag Bel noobppa dup nona binag mekkulagnu gotteb, amge da Bel bu medappi, danab ah ag amu ii hemana. Da heppi, Babilon aabnu aɗ na qekku,” awa atte.

⁴⁵ Yawe atte. “O Juda danab ah, dahilad danab ah, ag ahan, Babilon uun uɗieg! Ag mauhmananu ag am ooleg!” awa atte. Yawe Nug Babilon dilag eheɗ haknu oo huanak nauhe, Babilon bu eheɗ madakkunu hette amunu, ag ele bu amu aomnanu ag ooleg!

⁴⁶ Ag Yawe amu hekkunu ameg menana, ag maɗ laappa ulah nai, “Babilon wanppa nug qak naɗi daatte,” dooglag. Maɗ laappa, “Babilon dilag okkai nug okkai laa umu eɗidkkunu hette,” dooglag. Ag anam anam aakku dooglag, amge ag ulah nai amu doon, ag aib ottaippig, aib baɗappig.

⁴⁷ Amu Yawe Nug atte. “Aɗinu ag anam ii amana? Haen laa genabnab genab uɗikku, am haen amuppa da Babilon dilag kayak dottolkad bu madakkul. Babilon danab ah oh ag uɗa nak nau guittak ele doon, Babilon danab ah huanaknab mauhkkulag.

⁴⁸ Da amu heppi, habppa daatteb, wanppa daatteb ele ag gamag ahak okkainab doon, huan ekkulag. Ag amu hekkulag diig am, laa keeke he nauhtte ele, nug yawalti uɗitteppanu uɗia, Babilon aqakkunu ban hekku.” Yawe Nug anam awa atte.

⁴⁹ Babilon ag Israel danab ah huanak aqappig amunu, Babilon na qekkuoitte. Ge, Babilon ag wan atu ohppan danab ah aqaeg mauhppig amunu, ag nob aoglagoitte.

⁵⁰ Babilon nob aoglag amunu, ag Israel danab ah ag qep elabppa ii mauhppig ele, ag Babilon uun ukkeg! Ag hamu hamu appa aib daappig! Ag umanab wan laappa daatteb, amge ag Yawe dabmetteg! Ag Jerusalemnu dabmenan oiyeg!

⁵¹ ⌊Ag Israel danab ah, ag atteb.⌋ “Wan laihnu danab ag Yawenu mettid lag, amuppa Oo Gun ele, Oo Gunnab Ele, aben amu oh am Yawenu tituanak daattep amu, ag amu ooppa noppig. Ao ag noppig amunu, danab laa ag eheɗ aon aon iqaeg, diig amunu ig uɗa nak nau guittak ele doottem. Uɗa nak ig tonikkom daatte,” aon atteb.

⁵² Ag anam doon atteb, amge Yawe Nug atte. “Haen laa uɗitte, amu haen amuppa da Babilon dilag kayak dottolkad bu madakkul. Da amu heppi, Babilon wanppa danab ah guittak okkai aon, ag aiqakkaglag.

⁵³ Babilon ag hab attan tena, appa aab aɗ ɠagattagnab ele hekkulag dayeblob, da heppi, keeke he nauhak danab laa ag gona, heppeg nauhlo.” Yawe Nug anam awa atte.

⁵⁴ Yawe Nug heeb, Babilon nauhkku, haen amuppa Babilon appanu gayak okkainab aheb, laa dooglag. Laa amu, danab keeke loppaɗe, oqotti otte, oqotti amuam huanak okkai Babilon appa daakku. Oqotti amuam Babilon wanppa appanu aheb, laa dooglag.

⁵⁵ Yawe Nug Babilon heeb nauhkku. Nug heeb, Babilon appa ag gemu keeke digdig heegeg, oqotti otte amu, oqotti amuam iitta mekku. Kekeɗ huanaknab ag wana, yu koɗkoɗ eheɗ qette, amubia ag Babilon appa ban hebeppeg, ahilag ewak baag okkainab daakku.

⁵⁶ Keeke he nauhak danab ag Babilon ele ban hekkulag. Kekeɗ amu ag Babilon daup eɗadppeg, ag eppelagppa daaglag. Kekeɗ ag Babilon daup dilag lat qiialadkkulag. Aɗinu amu bekku? Yawe Nug am Kayak Nug danab ah hipunin hetteb ele nob madatte amunu, Nug Babilon eheɗ heppig, Nug ag eheɗ amunu nob elele ag madakku

⁵⁷ Amu Yawe Nug atte. “Da heppi, Babilonnu ehanittak anuqak danab, doyak dabmak ena ele danab, gawana, ban daup ikki danab, ban daup ele ag danab le ɠagattag huanak lawowa, niie ukke mauhtte, amubia Babilon danab amu ag mauhkkulag.” Yawe Nukka Ɠagattag Oh Ele, Nug king daatte, Nug anam awa atte.

⁵⁸ Yawe Nukka Ɠagattag Oh Ele Nug atte. “Kekeɗ ag Babilonnu aɗ, amuam teppu okkai ele, ag aɗ amu loppaɗppeg, na qa wanppa daakku. Ag aɗnu od attan tak adppa hak manadppeg eoglag. Amuam genab anam bekku. Anam bekku amunu, Babilon danab ah ag ena daaglagnu hik aqeeqe, uɗat okkainab heegeg, beɗulag bahi ya auta autanab aotte amu, ag hetteb amu oh am hamu. Ao, Babilon danab ah ag ena daaglagnu uɗat okkai hetteb, amge uɗat amu oh am aab ewa iitta mekku, aakkuib,” awa atte.

Jeremaia nug Seraia buk itoɗiak ele laa mettom

⁵⁹ Amu Juda dilag king Sedekaia nug king abenab awa, nuhig king dayaknu maɗ waɗeleppa nug he, nug Seraia ele Babilon gopiɗ. Seraia nug Sedekaianu ehanittak danab okkai laa, amu aa gokkulahnu daaeheh, Jeremaia nug Neria bekka Seraia, Masea alag amu, nug nai imu nug mettom.

⁶⁰ Nai nug mettom amu, nai amuam uug naunab oh Babilon dimppa bekkunu nai imu. Jeremaia nug nai aɗi aɗi Babilon dilagnu Yawe he doyom amu, nug nai amu oh buk itoɗiak eleppa ya, nug Seraia mettom.

⁶¹ Jeremaia nug buk itoɗiak ele amu Seraia metta, nug aum. “Na gona, Babilon tewona, na nai buk imuppa daatte oh danab ah dooglagnu ebqe! Laippu laa aib tippalme!

⁶² Na ebqewona, na unuqidna inam a! ‘O Yawe, na aben imu heppe nauhkku amunu, danab o doɗ laa ippa ii daamanu ame. Na aben imu hanhan danab, doɗ ele iitta, hele-ettak daakkunu ame,’ unuqidnana akkut.

⁶³ Na anam unuqidna malon, na buk itoɗiak ele imu aon, men laa aon, buk imu qaɗeppa mena muɗippa qakkan, na buk buɗippe, Yupretis leppa ukkaɗ!

⁶⁴ Na buɗippe, Yupretis leppa ukkeb, na inam a! ‘Buk amu le ooppa noa, eɗua ii bema, amubia uug naunab, Yawe Nug heeb, Babilon dilagppa bekku; am uug amu heeb, Babilon nauhkku. Eɗua ena ii daama, Babilon danab ah ele ag nena qekkulag,’ aon a!” Jeremaia nug Seraia amegppa anam aum. Amu Jeremaianu nai iguppa batatte.