Jeremaia 50 - Nobonob Baibel

Babilon danab ah dilag nai

¹ Yawe Nug Babilon danab ah dilagnu, ahilag wannu ele aɗi bekkunu dayom propet Jeremaia amegppa a doya, laa amelagppa aum amu, nai amuam iikku.

² “Ag laa wanppan wan ohppa danab ah dooglagnu nai laa imu appeg doyeg! Ao, danab nug danab ah laa ag anidna, dabmak aon, at amu gumidna wakkulagnu nug pilak laa qabatte, ag anam hena, nai imu appeg doyeg! Ag nai huppu nakok laa aib uuppig! Ohnab appeg doyeg! Ag inam aig! ‘Kekeɗ ag Babilon eɗadppeg, Babilon ag eppelagppa daakku. Kekeɗ ag heppeg, Babilon dilag kayak Bel nug uɗa nekku. Babilon dilag kayak Marduk, nug baɗak eheɗ nau dookku. Babilon danab ah dilag kayak hambuppuak dottolkad am uɗa nak nau dooglag. Dottolkad amu, ag am baɗak eheɗ nau dooglag.

³ Wanppan wan laa, yawalti uɗitteppanu daatteb, ag banelag uɗin, Babilon ele ban hekkulag. Ag heppeg, Babilon wan am nauhakib daakku. Laa appa ii daama. Danab, doɗ ele ag oolna gokkulag,’ aon aig!”

⁴ Amu Yawe Nug atte. “Haen amuppa amu, Israel danab ah, Juda danab ah ele ag ahan, ag gaanna, ag da, Yawe, ahilag Kayak, ag da aniɗna dim lamiɗkkulagnu mattiɗkkulag.

⁵ Ag gonana, ag laa Sionnu ib adeppa daattenu oɗ mattan doon, ag appigppa gokkulagnu gokkulag. Ag amu hena, ag Sion tewona, ag da, Yawe, ag da ele ig nug tituana nai qakkak hanhan daakkunu qakkagnig. Ag nai qakkak amu daulag ii atima,” awa atte.

⁶ Yawe atte. “Dahilad danab ah ag sipsip qettoɗna oitteb bia daappig. Ahilkad gumak danab ag diiadna, eheɗ goppig. Ag heeg, dahilad danab ah ag sipsip qaukoppa matatun gona oitteb, ag amubia daappig. Ag sipsip qaukoppa oinna, ahilag niiaknu aben enanagnu daulag atitte, amubia dahilad danab ah ag eheɗ daanna oippig.

⁷ Ahilag kekeɗ ag anadna, ag doɗ nau sipsip qa latte, amubia ag eheɗ hadappig. Kekeɗ ag amu henana, ag appig. ‘Israel ag Yawe, ahilag ehanittak genab, Israel mamelkad aɗi dilag keeke ena bekkunu dabmak aɗa oiyaknu diig ele, ag nuhigppa hipunin heppig amunu, “Ig Israel eheɗ hadattem amu, ig beɗunigppa amunu aab laa iitta,” ’ ” aon appig.

⁸ Amu Yawe atte. “Ag anam eheɗ hattana appig, amge O dahilad danab ah, ⌊da Babilon bu madakkul amunu,⌋ ag ahan, Babilon wanppanu ooleg! Ag Babilon wanppa aib daappig! Ag meeme dawai, sipsip laa diin, laih gotteb bia hena, ag ahan ukkeg!

⁹ Aɗinu ag oolkkulag? Da heppi, huu okkainab, ɠagattag ele laala yawalti uɗitteppanu daatteb, ag ahan qagmena, ag Babilon ele ban hekkulagnu uɗiglag. Ag yawalti uɗitteppanu uɗin, Babilon ele ban hekkulagnu aben aon, keeke bappaidna, ag Babilon eɗidkkulag. Ag lat doɗo ekkulag amu, lat doɗo amu oh daup dabmak enanag ele bia daaglag. Laippu laa hamu ii goma. Iitta. Oh am Babilon daup aqaglag.

¹⁰ Anam amunu, kekeɗ ag Babilon eɗidna, ag Babilon dilag keeke diin gokkulag. Ag keeke kuɗumnab aoglag amunu, ag elele dooglag; danab nug ee lae ne, oo dittia auta aotte, ag amubia elele dooglag.” Yawe Nug anam awa atte.

¹¹ Amu Yawe Nug atte, “Ag kekeɗ ag dahiladnab danab ah eheɗ hattana, ahilag keeke aon gotteb ele, ag amunu oolag gamag ahatte. Makau balat, mameg qakkaknu muɗi uhuqe, enanag dootte bia, ag dahilad danab ah dilagppa eheɗ heppignu enanag dootteb. Ag hos dawai enanag doyaya, huana gaatte bia, ag gamag ahak doon etteb.

¹² Ag anam hetteb amunu, ag Babilon danab, ag anilkad ag uɗa nak okkai ele dooglag. Ao, laa ag ag menuadppig ele, ag uɗa nak nau guittak ele dooglag. Ag Babilon danab ah Babilon wanppa daatteb, ahilag huu am wanppan wan laa oh oolagppa nagnag daakku. Ahilag wan am wan meu waknu nakokib elele, atu qaɗaiettak, am atu taɗak, anamib daakku.

¹³ Da, Yawe, da Babilon dilagnu ool nauheb, bu madakkul. Bu madappi, Babilon wan am hele-ettak daya autanab aokku. Danab laa appa ii daama. Anam dayeb, laa nug Babilon guguittak oiyaya, guittak okkainab awom antta, nug ameg iɗuak doya, Babilon danab ah awa awa aqakku.

¹⁴ Ag kekeɗ, ag lat pimaltteb ele, ag Babilon talilidna daan, nug ele ban hekkulagnu babaitteg! Babilon danab ah ag Yawe, nuhigppa hipunin heppig amunu, ag Babilon dilag kekeɗ ag lat doɗo eheɗ ewatteg! Ag laippu laippu aib eppig. Ag kuɗum, eheɗnab ewatteg!

¹⁵ Ag talilidna daanna, ban hekkulagnu baalag okkaippa eig! Ag amu hena, ban heppeg, Babilon ag eppelagppa daakku. Ag heppeg, bannu lag attan ta ukkak menppa hak heppig am nena qeppeg, aabnu aɗ ele na qekku. Yawe Nug ag ahilag eheɗ haknu nob tutukku madatte amunu, ag kekeɗ, ag nob tutukku amu, Babilon laa dilagppa eheɗ heppig, amubia ag Babilon matteg!

¹⁶ Babilon dilag kekeɗ ag heppeg, laa Babilon appa ee ebatte ele aib dayom! Laa nug ee oɗuom haenppa appa ee aotte ele aib dayom! Kekeɗ ag uɗin, qep elabppa Babilon heppeg nauhkku. Ag heppeg nauhkku amunu, danab aun Babilon ted iitta amu, ag anen anen ahan, ag baelkad dilagppa ukkeg! Ao, ag anen anen wanelagppanab eɗun ukkeg!

¹⁷ Israel am sipsip ag oolna, matatun gona daatteb bia daatteb. Laion nug sipsip lamatte gona, tamtam daatteb, Israel ag amubia daatteb. Tatam Asiria dilag king nug uɗia, doɗ layag qe mauhe latte bia heeg, Israel nauhom. Dimnab amu, Babilon dilag king Nebukatnesar nug uɗia, nug Juda danab ah he nauhna autna aoppig,” awa atte.

¹⁸ Anam amunu, Yawe Nukka Ɠagattag Oh Ele, Nug Israel dilag Kayak, Nug inam atte. “Da Babilon dilag king, nuhig wan ele bu medakkul. Da Asiria dilag king bu mettami, amubia da Babilon dilag king bu medakkul.

¹⁹ Amge da heppi, Israel danab ah ag eɗun, ag wanelagppa daaglag. Sipsip ag Karmel, am Basan ele appa gikkiɗah lanan, ena daatteb, amubia Israel ag ena daaglag. Ag Epraimnu qauko nakokppa, Gileat wanppa ele ee elele aon, oolag dittieb, elele daaglag,” awa atte.

²⁰ Yawe Nug atte. “Haen amuppa laa ag Israel danab ah ag hipunin atten atten heppig ele, ag hipunin amu eɗun anidna dabmekkulagnu mattiglag, amge ag ii anidmana. Ao, laa ag Juda danab ah ag hipunin atten atten heppig ele, ag hipunin amu eɗun anidna dabmekkulagnu mattiglag, amge ag ii anidmana. Aɗinu? Da Yawe, da heppi, Israel danab ah oɗo yaak daaglag. Ag anam daappeg, da amu dilag hipunin uhuqadkkul,” awa atte.

²¹ Yawe Nug atte. “⌊Ag Babilon dilag kekeɗ,⌋ ag ahan, banelag gona, Babilon ele ban heig! Ag danab wan maha laa Babilon ooppa daatte onig Merataim, ag appa daatteb, amu danab aab onig Pekot ele appa daatteb amu, ag ag ele ban heig! Ag Babilon danab ah lamadna, aqana heppeg, ag dahilnuib, pelemppa dayeg! Ag da haknunab nai ag amelagppa attem amu, ag amu oh heig! Keeke nakok laa aib tippalppig.

²² Babilon wanppa ban hak oqotti okkai daakku. Ge, Babilon wanppa keeke huanaknab heeb, nauhaknu oqotti daakku.

²³ Babilon nug tutui qaknu hama bia dayaya, wan laa oh he nauhppig, amge kekeɗ ag heppeg, Babilon am waa aoɗa autanab awom bia daakku. Wan atu laa ohppan danab ah ag anidna, ameg iɗuak dooglag.

²⁴ O Babilon, da pelem meppi, na laippun, ii dabmettemppa tekkut. Babilon danab ah, ag da, Yawe, ag da ag banel uɗippig amunu, kekeɗ ag uɗin anadna diiglag.

²⁵ Da, Naɗi Yawe Dakka Ɠagattag Oh Ele da Babilon wanppa bu mettak uɗat laa hekkulnu daattem amunu, da kekeɗ ag uɗin, Babilon ele ban hekkulagnu, da dahil bu mattaknu keeke babaitte, kekeɗ eppelagppa memi daatte.

²⁶ Ag Babilon dilag kekeɗ, ag umanabnu uɗin, ma lakkanu ee aeg aon, dimittim meppeg nauhaɗ! Ag heppeg, Babilon danab ah ag ee aeg qagmak okkaippa dimittim daatte bia dayeg! Ag heppeg, Babilon danab ah padal meig! Laippu laa oɗo yaak aib dayom!

²⁷ Babilon dilag daup enanag, ag makau gaiɗ bia daatteb, amge ag kekeɗ ag Babilon dilag daup amu oh aqappeg mauheg! Ag Babilon, ag ahilagnu gadonnab gadon. Aɗinu? Ahilag bu awak haen aakku uɗiom daatte,” awa atte.

²⁸ Babilon dilag uug awak haen digma beebeb, Israel danab ah laa ag Babilonnu ahan, eɗun oolna Israel wanppa gona, Sion appa ag Yawe, Nug ig Israel, ihinig Kayak, ag Nug Babilon dilag daup anukka nug laug heeg nauhom, gemu Nug kobol nau amu heppignu nob aakku mattomnu madippeg doyeg!

²⁹ Amu Yawe Nug atte. “Babilon ag da, Yawe, Israel dilag Kayak Oppiaawak Ele, ag da oɗel tappaeg neum amunu, kekeɗ ag laa appeg, latppa ban hetteb ag uɗin, Babilon aqeg! Ag Babilon talilidna daanna heppeg, Babilon laippu laa aib oola ukkom. Babilon danab ah ag eheɗ heppig amunu, ag nob matteg! Ag eheɗ digdig heppig, amubia ahilagppa heig!

³⁰ Babilon ag da oɗel tappaeg neum amunu, kekeɗ ag Babilon dilag danab bau ibppa aqappeg mauhkkulag. Deɗ amuppa Babilonnu daup oh ag mauhna malaglag,” awa atte.

³¹ Yawe, Nug Yawe Nukka Ɠagattag Oh Ele, Nug atte. “Babilon, ag am beɗuppa tak danab, amge da ahilag hak amunu eheɗ doyeye ool ii madattem. Aɗinu? Ahilag bu awak haen aakku uɗiom daatte.

³² Anam amunu, Babilon danab ah ag beɗuppa tak danab, ag baelag qena, nena qeppeg, laa ehanatteb eɗun ahaglagnu laa iitta. Da heppi, aab ahilkad am aab ewatta, wan laala Babilon talilidna daatteb ele ewadkku,” awa atte.

³³ Yawe Nukka Ɠagattag Oh Ele Nug inam atte. “Kekeɗ ag Israel danab ah eheɗ hadatteb. Juda danab ah ele anamib, Laa ag eɗadna diieg, ag eppelagppa daatteb ele amu, laa amu ag ɠagattag aɗualadtteb. Ag heppeg, Israel, Juda ele ag eɗun, ag wanelagppa gokkulagnu iinab hetteb.

³⁴ Gemu anam daatte, amge laa Nug qagaiettakppanu eɗua uhuqaknu ehanittak ahilag daatte, Nug am ɠagattag. Laa amu, Nug onig am Yawe Nukka Ɠagattag Oh Ele. Nug Israel, Juda dilag nai hettoɗiakppa elelenab madikku. Nug amu hekkunu diig am, Nug amu heeb, Israel, Juda ele dilag wanppa maɗoɗ daakku, amge Babilon danab ah, ahilag wanppa ag maɗoɗ iitta ele daaglag,” awa atte.

³⁵ Amu Yawe Nug atte. “Ag kekeɗ ag uɗin, qep elabppa Babilon aqeg! Ag danab ah oh Babilon wanppa daatteb ele, ag am oh qep elabppa aqeg! Ag Babilon dilag ehanittak anuqak danab, Babilon dilag doyak dabmak ele danab ele oh aqeg!

³⁶ Ag Babilon dilag propet hambuppuak qep elabppa aqeg! Ag amu heppeg, propet hambuppuak ag danab Yawenu dab-ii-mena, ii dim lamidtteb ele daatteb am miag atikku. Ag kekeɗ ag Babilon dilag daup qep elabppa aqeg! Ag aqadppeppeg, ag baɗak eheɗ nau dooglag.

³⁷ Ag kekeɗ ag qep elabppa Babilon dilag hos aqanna, ag bannu karis ele heppeg nauheg! Ag wan laihnu danab, ag uɗin, Babilon danab ehanadtteb ele amu, am ele aqeg! Ag aqappeppeg, danab amu ag ah bia daaglag. Ag kekeɗ ag qep elabppa wagai mena, Babilonnu en oh aweg! Ag amu heppeg, Babilon ag keeke iitta ele daaglag.

³⁸ Laa heeb, Babilon dilag le qaɗaietteg! Anam heeb, le am qaɗaiettaglag. Aɗinu uug amu oh Babilon wanppa bekku? Ag kayak hambuppuak dottolkad noolagppa dup nona binalag metteb. Amu Babilon danab ah ag dottolkad amu dabmenana, ag kaaka danab hette bia hetteb.

³⁹ Anam bekku amunu, atu taɗakppan doɗ dakkuɗ, haaina ele ag Babilon wanppa daaglag. Ai hipunai nug appa daakku. Danab ah ag hanhan baula appa ii daamna. Buɗub buɗub doobob, laa appa ii daama.

⁴⁰ Kayak he, Sodom, Gomora ele, aab laala aab aɗit amu gukkuatak daappig ele nauhna autna aoeg, danab ah appa laa ii daappig. Amu anambia, laa nug Babilon appa ii daama. Ao, appa danab laa ii daama,” awa atte.

⁴¹ Amu Yawe Nug atte. “Antteg! Ban daup ag wan laa yawalti uɗitteppanu daatte, ag appanu uɗiglag. Ao, wan ɠagattag laa umanab daatte, king kuɗum ag wan amu waappa daan ehanadtteb ele amu, daup amu ag appanu ban hekkulagnu ahatteb.

⁴² Daup amu ag lat, ban ele aɗaglag. Ag laa guittak mettaglagnu uug laa ii doomna. Ag laa dilagnu oo gai-iitta doya oo matta ehanittaknu kobol nakok laa dim ii lamidmana. Ag hos attan daanna oippeppeg, oqotti ahilag am yu heehe, oqotti otte amubia. O Babilon danab ah, ag ag ele ban hena aqaglagnu ag huu men uɗiglagnu bappaidkkulag.

⁴³ Babilon dilag king nug daup amunu nai dookku amu, nug aɗi keeke hekkunu laa iitta, nug gai-iitta daakku. Nug ooppa guittak naɗi dookku; ah nid aokkun haaha, guittak dootte, guittak amubia nug ooppa dookku.

⁴⁴ Laion laa nug atu duppu Jodan le guguittak daatteppanu ba, sipsip dilag gikkiɗah dad enappa ta, sipsip diikkun lamatte ooltteb, amubia da heppi, Babilon danab ah ag ahilag wanppa ii daamna. Kobol amuam pahanab anam bekku. Da amu hewoya, da laa da nug uɗat amu hekkunu ool hette ele, da nug Babilon gumadkkunu tituankkul. Aɗinu? Laa nug da bia daattete? Laa nug da amu ii hepanu ab, da ii hekkulte? Sipsip gumak danab nug laion, o doɗ nau laa qeeb mauhkkunu hette, o lamitteb gokkunu hette, gumak danab laa nug dahilnu amubia hekkunu elelete? Iitta!” awa atte.

⁴⁵ Anam amunu, O Babilon danab ah, ag Yawe, Nug ahilagnu aɗi maittak daatte amu, ag dabmak amu doyeg! Ao, Nug ag Babilon daatteb, Nug ag aɗi uug madakkunu dabmeum, dabmak amu ɠagattag eppom daatte amu, ag amu doyeg! Nug heeb, doɗ nau sipsip nakkud diia gotte, amubia Babilonnu amu, kekeɗ ag ahilkad nid aɗualadna, diin gokkulag. Amu Babilon ag eheɗ heegeg uɗie, gemu ele hetteb, diig amunu kekeɗ ag ahilag wan heppeg nauhkku.

⁴⁶ Kekeɗ ag ban hena, Babilon eɗadppeg, ag eppelagppa daappeg, haen amuppa wan atu ohppan danab ah ag doon, ottaikkulag. Babilon danab ah ag haen amuppa eheɗ gaaglag, amu danab wanppan wan laala ag gayak amu dooglag.