Jeremaia 5 - Nobonob Baibel

Laippu laa nug doyak diig genabib ele ii dim lamidtte

¹ Amu Yawe Nug aum. “Ag Jerusalem ooppa ib ohppa oinna, aab amunu qagmak abenppa ele oinna, tutukku neekkeg! Ag anam hena, ag ⌊danab ah aab okkai amuppa wan imunu hakib henan daatteb, ag oolagppanu⌋ danab, o ah laippu laa nug genabib hak kobol hette, nug doyak diig genabib anidkkunu mattiak hette ele, na amu laippu laa anidkkut dayeb amu, da aab okkai amu heppi ii nauhma.

² Aab okkai amuppan danab ah ag ahilag nai ɠagattag qettaglagnu ag, ‘Yawe Nug genab bau daatte, genab amubia,’ atteb, amge ag nai amu hamu atteb. Ag ahilag nai amuppa ag aɗi keeke hekkulagnu maditteb, amge ag ii dim lamidtteb,” awa aum.

³ Yawe Nug anam a amu, da Nug amegppa ami. “O Yawe, na danab aun aɗi ag doyak diig genabib dim lamidkkulagnu hetteb ele, na danab ah amubia mattiadttem, ⌊amge nahip danab ah ag amubia ii hetteb⌋. Na bu mattame, amge ag eheɗ heppignu oolagppa guittak ii dooppig. Na oɗoɗadme, amge ag bu mattak nahip amu ii dabmena, oolag eɗukkunu uuppig. Ag heeg, ag na oɗen dim lamidmananu dabmak ahilag ɠagattag eppom. Ag oolag eɗukkunu uun, iinab heppig,” awe ami.

⁴ Da anam awoya, da dabmemi. “Danab ah imu ag Yawenu ib ii dootteb. Ao, ag Kayak Nug ag aɗi aɗi hekkulagnu ɗo mattom amu, ag ii dootteb. Ag ii dootteb amunu, ⌊da doottem,⌋ danab ah imu ag doyak amunu daɗek danab ah daatteb. Ao, ag am laa ag dabmak tutukku iitta ele bia daatteb.

⁵ Imu ag am anam amunu da ukke, ahilkad ikki danab amelagppa nai madikkul. Aɗinu? Ikki danab ag, ag am danab ag Yawenu ib aakku dootteb bia doottem. Ao, ag Kayak Nug ag aɗi aɗi hekkulagnu ɗo mattom amu, ag dootteb bia doottem.” Da anam dabmemi, amge iitta. Ag ele anen anen Yawe waappa daaglagnu uuppig. Ao, ag nuhig ɗo dim lamidkkulagnu uuppig.

⁶ Danab ah imu oh ag anam hetteb. Ag Yawe oɗe huana tappaeg nette. Ao, ag haen kuɗum tuɗidna, Yawe dimettona kayak hambuppuak laala dim lamadtteb. Anam amunu, kekeɗ ag laion laa atuppanu uɗia, doɗ, o danab qe mauhtte bia heppeg nauhkkulag. Doɗ wulp, nug atu taɗak appanu uɗia, doɗ, o danab qe mauhtte bia kekeɗ ag heppeg, danab ah imu ag nauhkkulag. Doɗ laa onig lepad, pusi okkai amu, nug aab guguittak dayaya, aun laa aab dimittim uɗikku amu, doɗ amu nug aha, danab amu aɗa he, nug beɗu huppu naunau na niitte, amubia kekeɗ ag heppeg, danab ah imu ag nauhkkulag.

⁷ Da anam dabmemi, amu Yawe Nug inam atte. “O Juda danab ah, da attem hein, bu ii madapa? ⌊Ag eheɗ heegeg,⌋ ag bekkalkad ag da dimeɗan, ag kayak laala, ag kayak hambuppuak amu onilagppa ahilag nai ɠagattag qedatteb. Da ahilag keeke oh ag bau daaglagnu ag mattami, amge ag ohnab ag kayak hambuppuak laulkadppa gona, nug noobppa dup nona binag mena, ah appa daatteb ele, ag amu ele ewau pakkuna gappai kobol hetteb.

⁸ Juda danab ag am hos dawai, beɗu enanag ele, hos anig papalkkunu duttunak huan dootte, ag amubia daatteb. Ag mudippan lailkad dilag ah ele niiglagnu oolag huan hette. Ag hos dawai nug hos anig mauhnoak papaladtte, ag amubia hetteb.

⁹ Ag amu hetteb amunu, da ag bu iite madakkul? Ao, da wan imuppan danab ah, ag nau amu hetteb amu, da ag bu iite madakkul?

¹⁰ Da bu madakkul. Da ahilag kekeɗ amelagppa ahilagnu inam akkul. ‘Juda danab ah imu ag da, Yawe, ag dahiladnab ii daatteb. Ag am dahil grep dad bia, amu danab ag grep dad heeg nauhtte bia, ag Juda danab ah dilag kekeɗ, ag Juda aqeg! Ao, danab ag muɗi grep ebekkud elabnab meppig qiin diitteb, amubia ag kekeɗ ag Juda danab ah aqeg! Amge ag heppeg, aib iitta meum,’ awe akkul.

¹¹ Da amu hekkulnu diig am, Israel danab ah, Juda danab ah ele ag da ippunadmi bia da dim lamiɗkkulagnu uun autna aoppig.” Yawe Nug anam aakku atte.

¹² Juda danab ah ag Yawe, nuhignu hambuppun atteb. “Ig eheɗ hettemnu amu, Nug keeke aɗitai laa ii hema. Uug laa ihinigppa ii bema. Kekeɗ ag uɗin, ii iqamna. Enug haen ihinigppa ele ii bema. Iitta.

¹³ Propet danab ag ulah hamu bia daatteb. Yawenu nai ahilagppa ii daatte amunu, ag uug bekkunu atteb amu, uug amu ahilagppa baɗ!” Juda danab ah ag anam aon atteb.

¹⁴ Ag anamnab aakku atteb amunu, Yawe Kayak Nukka Ɠagattag Oh Ele Nug inam atte. “Danab ah ag anam aakku atteb amunu, Jeremaia, da heppi, dahil nai na oɗenppa daatte amu, nai amuam aab aɗu bia daakku. Da heppi, danab ah ag dahilnu anam atteb ele, ag am ad aab bau bia daappeg, aab aɗu aab bau amu ewebeb, iitta mekku,” awa atte.

¹⁵ Amu Yawe Nug inam ele atte. “O Israel danab ah, da wan umanunabnu daup ag banelag uɗiglagnu hettem. Wan amuppan danab ah ag memetalkad anukkanab wan amu aoppig daatteb. Huu amu ag aguppaib daatteb; ii iitta metteb. Ag Israel, ag danab amu dilag nai ii dootteb. Ao, ag ahilag mattiak am, ag oolag ii maidtte.

¹⁶ Wan amuppan daup oh ag ban danab ɠagattagnab. Ag lat doɗoppa danab kuɗum aqaeg mauhtteb.

¹⁷ Wan amuppan danab ag uɗin, datta ee ahilag, ma lakka mak ele lae nekkulag. Ao, ahilag makau, sipsip ele ag aqan lae nekkulag. Ag ahilag grep meu, wain, ad fig meu ele ag lae nekkulag. Ge, ag ahilkad nid, nid ahin ele aqaglag. Ag Israel, ag aab ɠagattag aɗ ele ooppa daan, ‘Ippa ig enaib daagnig,’ atteb, amge kekeɗ amu ag uɗin qep elabppa heppeg, aab amu oh nauhkkulag.

¹⁸ Dahilad danab ah, ahilagppa anam bekku, amge da heppi, haen amuppa kekeɗ ag ag ohnab aqappeg ii mauhmana.

¹⁹ Am inam bekku. Da heppi, amu beeb, deɗ laa Israel danab ah ag, ‘Yawe, ihinig Kayak amu, aɗinu Nug ihinignu imu inam heum?’ oɗ mettaglag amu, na ag amelagppa inam akkut. ‘Yawe Nug amunu inam atte. “Ag da uuiɗna, kayak hambuppuak, wan laihnu diin uɗippig amu, ag ippa, wan ahilagppa kayak amu waalagppa daanna, ag oɗelag dim lamidppig, amubia ag wan laalappa, wan amuam ahilag wan iitta, ag appa gona, wan amuppan danab waalagppa daan, ag oɗelag dim lamidkkulag.” ’ ” Yawe Nug anam awa atte.

²⁰ Amu Yawe Nug da amelppa aum. “Jeremaia, na nai imu Jakop buɗub amelagppa appe doyeg! Ao, na Juda danab ah ag dooglagnu nai imu appe doyeg!

²¹ ‘O Juda danab ah, ag dabmak tutukku iittappa oitteb. Ag kaaka oitteb. Ag amelag ele, amge ag aɗi keeke ii anidtteb. Ag daulag ele, amge ag nai ii dootteb,’ ” awa aum.

²² Amu Yawe Nug inam ele atte. “Ag Juda, ag dahilnu ebehilag oh bodoetta iite le mekku? Ao ag da noolppa daanna, ag iite baɗamna? Da yu ihippa, yu tom amu eɗidmanu ihi memi. Ao, yu nug tom amu ii eɗidma, gemu, butti aɗi ele tom anamib aakku daakku. Yu duban nug okkai qekku, amge tom amu loppaɗa, tom laappa ii tema. Ge, yu duban am wagainab meebeb, oqotti huanak okku, amge tom amu ii loppaɗma. Iitta.

²³ Yu nug anam dahil ɗo dim lamidtte, amge ag Juda danab ah, ag da oɗel dim lamidmananu dabmak ahilag ɠagattag eppe, ag da dimeɗan, dahil nai tappaeg nette. Ag oh ag dahil ibppa gomananu, ag ib laa aon, piɗe wappig.

²⁴ Ag dabmak tutukku aolob, ag inam alob. ‘Yawe, ihinig Kayak, Nug gu nekkunu daatte haenppa gu he nette amunu, ig ee ele daattem. Nug anam hette amunu, ig nuhignu ebehinig oh bodoetta le maɗ!’ Ag anam mattilob, amge ag dabmak tutukku amu ii aotteb amunu, ag anam ii atteb.” Yawe Nug anam awa atte.

²⁵ Amu ag anam dabmelob, Yawe heeb, keeke elele aolob, amge ag ahilag eheɗ hak he, Yawe Nug gu he ii ne, ag ee ele ii aotteb. Ao, ag hipunin heegeg, hipunin amu ag heeg, ag keeke ena ena ele ii aotteb.

²⁶ Amu Yawe Nug inam awa atte. “Dahilad danab ah oolagppa nau hak danab daatteb. Ag ib giginppa keeke danab ah maadna daatteb. Danab amu ag danab ah aɗuadkkulagnu ag danab laa nug ai aokkunu uhui mette, ag amubia hetteb. Ao, ag danab ah aɗualadkkulagnu, danab doɗ aoglagnu pelem metteb bia hetteb.

²⁷ Danab nug ai uhuippa awa, ai lakka maatte, ambak daatte, amubia danab amu laulkadppa en huanak daatte, amge ag keeke amu aoglagnu amu, ag kobol hambuppuakppa hena aoppig. Ag keeke kuɗum amu anamppa aoppig amunu, ag enub danab, ɠagattag ele daatteb.

²⁸ Ag keeke oh ele, beɗulag am enaib daatte. Ag ahilag eheɗ hak am batak iitta; hakib hetteb. Hettoɗiakppa ag nid laa mamelkad mauhppig naippa ii ehanatteg, ag nai doya, hettoɗia, epeɗia, elele mettak kobol nakok laa ii anidtteb. Ao, ag daɗek danab ah ii ehanatteg, ag aɗi keeke aoglagnu daatteb amu, ag ii aotteb.

²⁹ Ag amu hetteb amunu, da ag bu iite madakkul? Ao, da wan imuppan danab ah, ag nau amu hetteb amu, da ag bu iite madakkul?” Yawe Nug Nug anam awa atte.

³⁰ Amu Yawe Nug inam ele atte. “Juda danab ah ag kobol naunab nau laa hetteb. Da amu antten, eheɗ ottaimi.

³¹ Kobol naunab nau ag hetteb am inam. Propet danab ag doonna, propet nai hambuppuak maditteb. Mana mettak danab ag akka, ahilag dabmak dim lamidna, danab ah gumadtteb. Propet, mana mettak danab ele ag anam aakku hetteb, amge dahilad danab ah ag kobol amunu oolag mauhtte. Anam, amge ib amu batakppa ag attem anidkkulag?” awa atte.