Jeremaia 49 - Nobonob Baibel

Amon danab ah dilagnu nai

¹ Amon danab ah dilagnu amu, Yawe Nug inam atte. “Israel danab ah ag nid danab laa iite menuadppig? Israel buɗub laa iite daatte? Iitta. Israel danab ah ag nid danab menuadppig. Ag buɗulkad ele amunu, gemu Amon danab, ag kayak hambuppuak Molek noobppa dup nona, nug binag metteb ele, aɗinu danab amu ag Gad wanppa daatteb? Aɗinu Amon danab ag Gadnu aabppa daatteb?” Yawe Nug oɗ ma, anam atte.

² Yawe Nug anam oɗ ma ana amu, Nug ele atte. “Gemu anam daatte, amge haen laa uɗitte. Haen amuppa da heppi, Amon dilag aab okkai Raba, appa ban ahakku. Ban aheb, aab amuam nauhakib dayebeb, aab naunau aab amu talilidna daatteb amu, aab eoglag. Ag Amon ag Israel lamadppig, amge haen amuppa Israel, ag ag lamadkkulag,” awa atte.

³ Amu Yawe Nug atte. “O Hesbon danab ah, kekeɗ ag aab Ai heppeg nauha auta autanab aokku amunu, ag huana gayeg! Ag laih gokkulagnu hena, eɗun laih gokkulagnu hekkulag, amge iitta. Ib ahilkad oh am keldoak daaglag. Ag danab ah Raba daatteb, ag huana eig! Ag lamen heɗiag ele takkana, ag mahiak heig! Kekeɗ ag ahilag kayak Molek, nuhig mana mettak danab, nuhig ehanittak anuqak danab ele diin, wan laappa diia ukka laih me dayak danab daaglagnu gokkulag amunu, ag Raba danab ah ag aab okkainu aɗ ooppa oolna, laih wana, eɗun laih uɗieg!

⁴ Ag Amon danab ah, ag am nai tappe nak danab ah. Amu aɗinu ag ahilag wanppan oolnu noak wan ittagnab elenu dabmena, ag akka ag binalag metteb? Ao, ag Amon, aɗinu ag oolnu noak ahilkad meu huanak ottenu dabmena, ag akka, ag binalag medatteb? Amon danab ah, ag da dim lamiɗlob, amge ag ii hetteb. Iitta. Ag ahilag en okkainu oolagppa genab dootteb. Ao ag, ‘Aun nug banenig uɗiglagnu elele? Laa iitta!’ anan oitteb.

⁵ Amunu da heppi, laa ag taliliadna daatteb ele, ag heppeg, ag eheɗ baɗaglag.” Naɗi, Nug Yawe Nukka Ɠagattag Oh Ele, Nug anam awa atte. Am Nug inam ele atte. “Ag Amon amu, kekeɗ ag ag oh lamadppeg, ag wanelagppa ii daamna. Ag lamadppeg, Amon ag oolak danab laih laih gona matatun daappeg, laa nug eɗua diia, qagmaadkkunu laa iitta.

⁶ Amge dimppa da heppi, Amon danab ag eɗun, ena daaglag.” Yawe Nug anam awa atte.

Edom danab ah dilag nai

⁷ Edomnu amu, Yawe Nukka Ɠagattag Oh Ele, Nug inam atte. “Teman appa amu, danab laa nug doyak dabmak ena ele iittate? Appa laa nug eheɗ bemanu dabmak awa dabmak amu dim lamittak kobol dim lamitta, okkai danab ulum nai ena iite medatte? Teman danab ah dilag doyak dabmak ena ele am iitta meumte?

⁸ Ag Dedan buɗub, ag Esau buɗub oolagppa aab Dedan appa daatteb amu, ag ahan ukkeg! Ag ahan oolna, wan oɗe naɗippa dayeg! Aɗinu? Da Esau buɗub bu madakkul. Da bu madappi, ag padal mekkulag amunu, ag ele padal memananu, ag ooleg!

⁹ Danab ag grep meu aotteb ele, ag grep meu aonna, ag Yawe aum bia daɗek danab grep meu nakok aon lakkulagnu ag grep meu laippu laippu iite uumna? O yab danab ag tuqan uɗin, ag aɗi keeke yab aoglagnu oolag hette aakkuib iite aon gokkulag?

¹⁰ Amge Esau buɗubnu ag anam ii daamna. Da heppi, kekeɗ ag uɗin, ag Esau danab ah dilag keeke ohnab akkan gokkulag. Ag lokkumna daamnanu da heppi, kekeɗ ag ahilag lokkumak aben oh anidkkulag. Esau danab, ah, nid, mudippan laippu ele, ag oh mauhna, iitta mekkulag.

¹¹ Amge ahilkad nid naunau, anilkad mamelkad iitta amu, da ag mauhmananu ehanadkkul. Ahilkad ah qab ele, ag dahilnu oolagppa genab dooglagnu elele,” awa atte.

¹² Yawe Nug inam atte. “Bu mettak dahil am le nau kap-ppa daatte bia. Danab nug bu aokkunu daatte amu, nug le nau amu mettai latte. Huu laa, ag Esau buɗub eheɗ nau heppig bia ii heppig, amge da le nau amu mattai lappig. Ag lappig amunu, Esau buɗub ag naunab heegeg uɗie, gemu ele hetteb amunu, da ag le nau amu lakkulagnu iite madakkul? Da madakkul. Ag genab bu aoglag. Ag bu aqak amu ii eɗidmana,” awa atte.

¹³ Amu Yawe atte. “Da dakka, da onil awen, dahil nai ɠagattag qetten, da attem. Kekeɗ ag heppeg, Edomnu aab Bosra nauhakib daakku. Danab ah laa ag amu anidna, ag ameg iɗuak doon, ag Edom danab ah aon aon aqanna, ag Edom danab ah eheɗ laa awaknu anak waappa daaglagnu anana oiglag. Amu Edomnu aab oh amu nauhattak hanhan daaglag.” Yawe Nug anam atte.

¹⁴ Da, Jeremaia, da Yawe Nug nai awa ukkak danab laa nug wanppan wan laalappa danab amelagppa nai ab dooglagnu me ukkom doomi. Danab Yawe me ukkom ele amu, nug nai imu ab dooglagnu me ukkom. “Ag laa ag Esau buɗub, am Edom aakku, ag ag ele banelag gokkulagnu qagmeig! Ge, ag ban hekkulagnu aheg!” Yawe Nug anam akkunu me ukkom.

¹⁵ Amu gemu Yawe Nug atte. “Esau buɗub, da heppi, ag wanppan wan oh oolagppa nakoknab daaglag. Danab ag ahilagnu ena iinab dooglag.

¹⁶ Ag Esau buɗub ag qauko igippa daatteb. Ag ahilag aab baippa kalatteb. Ag anam daanna, ag heeg, danab ah laa ag baɗak eheɗ nau dootteb. Ag am dada danab. Ag anam daatteb, amge keeke aɗit amu ag buppualatteh, ag eheɗ dabmena, ‘Ig neta ii qemata,’ anan oitteb. Ag aben ɠagattag, ai igel daatteb bia daatteb, amge da ag appanu aɗualadppi nekkulag,” awa atte.

¹⁷ Yawe atte. “Da heppi, Edom wan nauhkku amunu, danab ah laa ag anidna, ameg iɗuak dooppeg, laala ag wan amu guguittak oinna, ag Edom eheɗ nau awom anidna, ag dabmak huanak aona, Edom danab ah aon aon aqaglag.

¹⁸ Kayak he, Sodom, Gomora ele, aab laala aab aɗit amu gukkuatak daappig ele nauhna autna aoeg, danab ah appa laa ii daappig. Appa beum amu, amubia laa nug Edom appa ii daama. Ao, appa danab laa ii daama,” awa atte.

¹⁹ Yawe atte. “Laion laa nug atu duppu Jodan le guguittak daatteppanu ba, sipsip dilag gikkiɗah dad enappa ta, sipsip diikkun lamatte ooltteb, amubia da heppi, Edom danab ah ag ahilag wanppa ii daamna. Kobol amuam pahanab anam bekku. Da amu hewoya, da laa da nug uɗat amu hekkunu ool hette ele, da nug Edom gumadkkunu tituankkul. Aɗinu? Laa nug da bia daattete? Laa nug da amu ii hepanu ab, da ii hekkulte? Sipsip gumak danab nug laion, o doɗ nau laa qeeb mauhkkunu hette, o lamitteb gokkunu hette, gumak danab laa nug dahilnu amubia hekkunu elelete? Iitta!” awa atte.

²⁰ Anam amunu, O Edom danab ah, ag Yawe, Nug ahilagnu aɗi maittak awom amu doyeg! Ao, Nug ag Teman daatteb, Nug ag aɗi uug madakkunu dabmeum, dabmak amu ɠagattag eppom daatte amu, ag amu doyeg! Nug heeb, doɗ nau sipsip nakkud diia gotte, amubia kekeɗ ag Edom, ahilkad nid diin gokkulag. Yawe Nug heeb, ag Edom, ag eheɗ heegeg uɗie, gemu ele hetteb, diig amunu kekeɗ ag ahilag wan heppeg nauhkku.

²¹ Edom na qekku, haen amuppa wan atu ohppan danab ah ag doon, ottaikkulag. Edom danab ah ag haen amuppa eheɗ gaaglag, amu danab ag umanab, Le Kokoɗ daugppa daatteb, ag gayak amu dooglag.

²² Antteg! Ai igel hagagaɗa oiyaya, doɗ aokkunu noa ukka, eɗua tette, amubia kekeɗ ag Bosra danab ah diiadppeg, ag eppelagppa daaglag. Amu beeb, deɗ amuppa Edom dilag daup ag ah nid aokkun hette bia daaglag.

Damaskus danab ah dilag nai

²³ Damaskus danab ah dilagnu amu, Yawe Nug inam atte. “Danab ah Hamat, Arpat ele daatteb, ag oo uug nau qak dooglag. Aɗinu? Ag nai uug ele aakku dooglag. Ag nai amu doon, ag dabmak kuɗum aon, gai-iitta daaglag. Ag oolag maɗoɗ ele ii daama. Iitta. Ag oolag am yu nug hanhan noa gotte, eɗua bette, ag oolagppa anambia dooglag.

²⁴ Damaskus danab ah ag gai-iitta daaglag. Ag oolkkulagnu henana, baɗak naɗi okkai doon, ag guittak nau ele aoglag; guittak amuam ah nid aokkun haaha, guittak nau dootte, amubia.

²⁵ Danab ah anukka Damaskus appa gamag ahak naɗi ele doon daappig, amge qinob aab okkai amuppa danab ah ii daamna.

²⁶ Gadon, genabnab genab, kekeɗ ag aqappeg, Damaskus nid danab bau ag ibppa nena qekkulag. Damaskusnu daup oh ag padal mekkulag.” Yawe Nukka Ɠagattag Oh Ele, Nug anam awa atte.

²⁷ Amu Nug imu ele atte. “Da heppi, kekeɗ ag uɗin, Damaskus aab manappeg ewa, aɗ am nauhakib daakku. Ao, da heppi, kekeɗ ag uɗin, Benhadat, Damaskus dilag okkai, ag nuhikkud aab aɗ ɠagattagnab ele manappeg, nauhakib daaglag,” awa atte.

Nebukatnesar, am atu taɗakppan danab ah ele dilag nai

²⁸ Nai imuam Kedar, amu Hasor dilag huu digdig, Babilon dilag king Nebukatnesar nug ahilagppa ban ha, ag eɗattom amu, ⌊nai imuam, amu ii beum haenppanu⌋ nai ahilagnu. Yawe Nug ahilagnu inam atte. “Ag Kedar danab ah, huu laala ag kaɗag uɗitteppanu daatteb ele amu, ag doyeg! Da, Yawe, da ⌊Nebukatnesar amegppa⌋ ami. ‘Na ahan, banelag gona, Kedar aqe! Ao, na danab kaɗag uɗitteppanu daatteb heppe, ag padal meig!’ ami.

²⁹ Anam amunu, Nebukatnesar, nuhikkud daup ele ag ahan, ag Kedar aɗi, ag ahilkad peh lag, ahilkad sipsip, ahilkad peh lag tonaknu lamen, ahilkad en, amu ahilkad kamel ele akkan gokkulag. Ag uɗin amu hekkulagnu daappeg, danab laih laihnu ag Kedar aɗi ag dooglagnu enana, ‘Baɗak eheɗ nau ag taliliatta daatte ⌊amunu dabmeig⌋!’ aon akkulag.” Yawe Nug anam atte.

³⁰ Amu Yawe Nug imu ele atte. “Ag Hasor daatteb amu, Babilon dilag king Nebukatnesar nug ag eɗatta diieb, ag nug eppegppa daaglagnu dabmak awom daatte. Ao, nug attem ha heeb, ag nug eppegppa daaglagnu maittak awom daatte. Anam amunu, ag ahan ooleg! Ag gona, wan oɗe okkai, ag amuppa dayeg!” awa atte.

³¹ ⌊Amu Yawe Nug Nebukatnesar amegppa atte.⌋ “Na, nahipad daup ele ag huu laa, ag uug iitta doon daatteb, ag, ‘Laa eheɗ ii heigma,’ anan oitteb ele, ag amu dilag ele banelag gona, aqaglagnu ban heig! Huu amu ag aab aɗ eleppa ii daatteb. Ag akka ag piɗe daanna oitteb.

³² Ag Babilon ag ahan goppeg, huu amu ele ban heppeg, ahilkad kamel am ahilag daaglag. Makau ahilkad huanak, amu ele ahilag daaglag. Huu amuppan danab ag uma, piɗe ana daatteb amu, da heppi, ag ulah keeke ehale gotte, ag amubia matatun gona, piɗe piɗe daaglag. Da heppi, uug naunab ag taliliatta dayaya, tonadkku.

³³ Ag gona anam heppeg amu, aab Hasor appa amu, doɗ jakal ag daaglag. Aab amu hanhan hele-ettak daakku. Danab ah appa ii daamna. Ao, danab laa appa ii daama.” Yawe Nug anam atte.

Elam danab ah dilag nai

³⁴ Sedekaia nug Juda dilag king abenab awe, haen elab ii ukke, Yawe Nug propet Jeremaia nai laa Elam dilag mette doyom. Nai amuam inam.

³⁵ “Yawe Nukka Ɠagattag Oh Ele, Nug inam atte. ‘Antteg! Da heppi, Elam daup latppa ban hetteb, ahilag ɠagattagppa Elam ɠagattag daatte amu, da heppi, ag oh mauhppeg, Elam am gai-iitta daakku.

³⁶ Ulah aben ohppa uɗitteb, amuam yawalti, kaɗag, yau, am qaban ele. Ulah amu oh aben ohppa uɗin, keeke uug iitta ele aon, laih gotteb, amubia da heppi, kekeɗ ag uɗin, Elam eɗadna heppeg, Elam danab ah ag wanppan wan ohppa matatun gona daaglag. Ge, Elam danab ah ag diia ukka laih me dayak danab ah wanppan wan ohppanab daaglag. Wan laippu laa ii eɗidmana.

³⁷ Da heppi, laa ag Elam aqaglagnu hetteb, ahilag kekeɗ amu, ag eɗadna autna aoppeg, Elam ag waa aoɗa malom daatte bia daaglag. Da heppi, uug naunab, am dahil oo nauhak huanaknab amu, uug amu ahilagppa bekku. Uug amuam, kekeɗ ag uɗin, qep elabppa aqadppeppeg, oolna gobeppeg, kekeɗ ag lamadna aqadppeg, padal mekkulag.’ ” Yawe Nug anam awa atte.

³⁸ Am Yawe Nug atte. “Da dahil sia king, Elam appa mein, hettoɗiatten heppi, Elam dilag king, nuhikkud ehanittak anuqak danab laa ele ag iitta mekkulag,” awa atte.

³⁹ Amu Yawe Nug imu ele atte. “Da gemu amu hekkul, amge dimppa haen laappa da heppi, Elam danab ah ag eɗun, gemu ena daatteb bia, haen amuppa ag anam daaglag.” Yawe Nug anam awa atte.