Jeremaia 48 - Nobonob Baibel

Moap danab ah dilag nai

¹ Moapnu amu, Yawe Nukka Ɠagattag Oh Ele, Israel dilag Kayak, Nug inam atte. “Kekeɗ ag aab Nebo heppeg nauhkku amunu, Nebonu am gadonnab gadon. Kekeɗ aab Kiriataim heppeg nauheb, appan danab ah ag uɗa nak nau guittak ele doon, kekeɗ eppelagppa daaglag. Kekeɗ ag aab Misgab ele heppeg nauheb, appan danab ah ag uɗa nak nau guittak ele dooglag.

² O Moap danab ah, auntai laa nug ag binalag ii mette. Kekeɗ ag ⌊ahilag aab tomppa daatte onig⌋ Hesbon eɗidna, ag appa daan, ib attenppa Moap heppeg nauhkkunu nai mattiglag. Ag akkulag. ‘Ahappeg, ig Moap hepput nauhaɗ!’ aon akkulag. Aab onig Madmen, appa amu kekeɗ ag qep elabppa heppeg, hele-ettak daakku.

³ Kekeɗ ag aab Horonaim ag aoglagnu ban henana, keeke heppeg nauhebeb, loppaɗak uɗat okkai hebeppeg, Horonaim danab ah ag eheɗ gaan ekkulag.

⁴ Kekeɗ ag heppeg, Moap am laa waa o aoɗa daatte bia daakku. Moap nid naunau ag laa ehanadkkunu gaaglag.

⁵ Moap ag Luhit tekkulagnu tenana, ag eheɗ nau gaaglag. Danab ib awa, Horonaim gotte amu, haen kekeɗ ag Horonaim appa keeke heppeg nauhebeb, danab ah gaappeg, laa ib amuppa dayaya dookku.

⁶ Ag Moap, ag ahan ooleg! Ag mauhmananu ag ahan oolna, atu taɗakppa lokkumna dayeg!

⁷ Ag ahilag hakppan, ahilag en okkaippanu ele ehanittak aoglagnu oolagppa genab dootteb. Ag anam oolagppa genab dootteb amunu, kekeɗ ag uɗin eɗadna, aɗualadna diiadna goppeg, ag gona, diia ukka laih me dayak danab ah wan laappa daaglag. Kekeɗ ag amu henana, ag ahilag kayak Kemos, nuhikkud mana mettak danab, nuhikkud ehanittak anuqak danab laa ele diin goppeg, ag diia ukka laih me dayak danab wan laappa daaglag.

⁸ Kekeɗ ag uɗin, ag Moap, ahilkad aab oh ag heppeg nauhadkkulag. Ag aab laippu uuppeg, ena ii daama. Laa oolnu noakppa daatteb, laa uɗemppa daatteb, oh am anamib.” Yawe Nug anam aakku aum.

⁹ Am Yawe Nug atte. “⌊Kekeɗ ag qaiettan uɗiglag, amge ii uɗiak haenppa⌋ ag Moap ⌊nauhmananu,⌋ ag oolna gokkulagnu ag tappaɗadppeg, Moap ag ai hagagaɗa ooltte bia ooleg! Aɗinu? ⌊kekeɗ ag heppeg,⌋ wan ahilag am nauhakib dayeb, ahilkad aab am hele-ettak daaglag, appa danab ah ii daamna.” Yawe Nug anam atte.

¹⁰ Danab nug Yawe uɗatnu hamu bia doyaya, uɗat amu haaha, pehettak ii hette amu, nug eheɗ laa awaknu anak waappa dayaɗ! Ao, laa nug Yawe oɗe ii dim lamitta, qep elab nuhigppa danab ii aqadtte amu, nug eheɗ laa awaknu anak waappa dayaɗ!

¹¹ Yawe Nug inam atte. “Moap huu ag digmena, wan ahilagppa ena, hamuib daaegeg uɗie, gemu ele ag anam daatteb. Danab wain hette ele nug botolppa ina, balalppa me, uɗalak keeke iitta hamu daatte, amubia Moap huu ag daappig, gemu ele daatteb. Kekeɗ ag uɗin eɗadna diieg, wan laappa diia ukka laih me dayak danab ah ii daappig. Anam amunu, danab nug wain botolppa ina me, hamu uɗalak ele iitta dayaya, lanak baag dayom, anamib daatte amu, amubia Moap ag anam daappig, gemu ele aakku daatteb.

¹² Amge haen miag doum daatte, haen amuppa da, Yawe, da heppi, kekeɗ ag uɗin, Moap heppeg nauhkku. Ag danab laa ag wain botolppanu gokkaɗeg noa, wain iitta me, botol ele ag aoɗtteb amu, kekeɗ ag amubia hekkulag.

¹³ Kekeɗ ag amu heppeg, Moap danab ah ag ahilag kayak Kemosnu, nug ag ehanadkkunu elele iitta amunu, ag nuhignu uɗalag nekku. Anukka Israel ag Betel appa makau nag dottog golppa hak, ag amunu oolagppa genab doyeg, ii ehanatte, uɗalag neum, amubia Moap danab ah ag uɗalag nekku.

¹⁴ Ag Moap ag atteb, ‘Ig am ban danab ɠagattag. Ig ban ɠagattag hettem,’ aon atteb, amge attem hena, ag anam atteb?

¹⁵ ⌊Ag anam aib appig. Aɗinu?⌋ Kekeɗ ag uɗin heppeg, Moap nauhak daakku. Kekeɗ ag uɗin, Moap dilag aabppa gona, aab aona, ag Moap dilag nid danab bau ena ena daatteb amu, ag aqappeg mauhkkulag.” King naɗi, Nug onig am Yawe Nukka Ɠagattag Oh Ele, Nug anam awa atte.

¹⁶ Amu Yawe Nug atte. “Kekeɗ ag heppeg, Moap na qekkunu haen miag doum daatte. Ao, uug naunab Moap dilagppa bekkun haen am miagnab.

¹⁷ Ag huu laa oh Moap talilidna daatteb, ag huu laa ag nug onig okkai ele daatte dootteb ele, ag oh nuhignu mahieg! Ag nuhignu mahin, ag inam aig! ‘O gadonnab gadon, gumak laa ɠagattag okkai ele aakku na qeum. Ao, laa king ehah enanag ele, nug aakku na qeum.’ Ag anam aon aig!

¹⁸ Ag danab ah Dibon daatteb, ag binag amahlak oppiaawak ele, ag binag amu uun, ag nena, wan qaɗaiettaknab, amuppa dayeg! Aɗinu? Laa nug Moap heeb nauhkku amu, nug ahilagppa banelag uɗia, nug ban ha, ahilag aab ɠagattag aɗ ele oh heeb nauhkkulag.

¹⁹ Ag danab ah Aroer aabppa daatteb, ag ahan gona, ib daugppa daanna neegppeg ukkeb, danab ag ooltteb, ah kekeɗ aqamnanu oolna gobeppeg anadkkulag. Anadna amu, ag amelagppa aig! ‘Aɗi beebe ooltteb?’ oɗ matteg!

²⁰ ⌊Amu oɗmak amunu nob am,⌋ kekeɗ ag heegeg, Moap ag nena qena, nauhppig daatteb amunu, ag uɗa nak nau guittak ele dootteb. Ag gaanna huana eig! Ag ahan, Arnon le daugppa kekeɗ ag Moap eɗadna heeg, ag nauhppig eig!

²¹ Moapnu aab uɗem attan daattebppa bu aakku aoglag. Amuam Holon, Jaser, am Mepat.

²² Dibon, Nebo, Bet Diplataim,

²³ Kiriataim, Betgamul, Betmeon,

²⁴ Keriot, Bosra ele. Ge, Moap aab oh, aab laala uma daatteb, laala miag daatteb amu, ag oh bu aoglag.

²⁵ Moap gai-iitta daakku. Nug danab eppeg qiiom, gai-iitta daatte, Moap anam daakku.” Yawe Nug anam awa atte.

²⁶ Moap danab ah ag Yawe waappa dayaknu uun, ag Nug oɗe tappaeg neum amunu, kekeɗ ag heppeg, Moap ag uɗa nak doyeg! Ag danab nug le ɠagattag huana la, kaaka qe, bahaha, na qa, bahakppa niia, buɗibɗib oiya, dimppa kaaka qak iitta me, uɗa nak nau dootte, Moap ag amubia doyeg!

²⁷ Ag Moap ag Israel aon aon iite aqappig? Ag Moap, ag Israel dilagnu, “Yabhok danab lailkad aakku,” dabmena, ag Israel dilagnu aɗi nai maditteb, ag amu mattinna, ag Israel dilagnu, “Keeke hamunab,” doon, ag ikkilag matuɗtteb, amge amuam genabte amunu ag anam hetteb?

²⁸ Ag Moap, ag amu heppig, gemu ele hetteb amunu, gemu ag ahilkad aab uun, aben hamu, men eleppa dayeg! Ag ai uppuɗil beɗulag nakok, nug teɗ nuhig men oɗenu oɗe guguittak hette, ag amubia dayeg!

²⁹ Moap danab ah, ag am dada danab ah amu, ig amu doomut. Ge, Moap danab ah ag dada hena, ag akka ahilagnu anuqaknab dootteb amu, ig doomut. Ag dada danab ah, beɗuppa tak danab ah ele. Ag dada hena laa eɗittaknu dabmak aotteb.

³⁰ Amu Yawe Nug atte. “Moap danab ah ag dada naunab hak hetteb amu, da doottem, amge ag amuppa meu ena laa ii aomna. Ag keeke okkai okkai hettebnu oɗelagppa maditteb, amge nai amuppa keeke laa ii bette, iitta.

³¹ O gadon, diig amunu da Moap dilag qanakkul. Moap oh dilag da gaakkul. Da Moap danab Kirheresnu guittak doyeye, aiqagakkul.

³² O Sibma danab ah, ag am grep dad meu huanak otte bia. Grep muɗi amuam ebekkud elab elab. Eppeg laa ukka, Le Mauhak amuppa batom. Laa am ukka, Jaser aabppa batom. Anam dayom, amge he nauhak laa am heeb, keeke amu oh nauheb, Jaser danab ah ag amunu gaaglag, amubia da ag Sibma danab ah, ag nauhppeg, da ahilagnu gaakkul.

³³ Moap dilag dadppa, ad meu okkunu gamag ahak laa ii daama. Gamag ahak oh am iitta mekku. Da heppi, ag grep meu aon, wain hekkulagnu ele ib oo nak daakku amunu, laa nug grep leppu aokkunu uɗat haaha, gamag ahak doya, huana ii ema. Moap wanppa ewak okkai daakku, amge ewak amuam gamalag aheb ii emana.

³⁴ Uug okkai beeb, da heppi, le Nimrim ele qaɗaiedakku amunu, danab ah Hesbonnu, Elealenu ele ag baɗan eppeg, danab ah Jahasnu ag doon, Soarnu ele doon, danab ah aab laa uma daattep, Horonaimnu am Eklat Selisianu ele amu, ag dooglag.

³⁵ Moap appa da heppi, laa ag kayak hambuppuak dilag mettid lag nakokppa doɗ main, kayak hambuppuak madatteb, ag kalu danab ile muttuɗig enanag bette ele aon manan, ahilkad kayak madatteb ele amu, ag iitta mekkulag.” Yawe Nug anam awa atte.

³⁶ O gadon, da oolppa da Moapnu oo doyak okkainab doottem. Ge, da danab ah Kirheres daatteb ele, da ahilagnu oo doyak okkainab doottem. Moapnu danab ah, Kirheres danab ah ele amu, kekeɗ ag uɗin, en ahilag aon gokkulag.

³⁷ Kekeɗ heppeg, Moap ag uug okkainab anidna, ag ikkilag uɗug hoin, akkaɗilag ele hoin aoglag. Ag ⌊ahilkad kayak hambuppuak ag ag dabmadakkunu, ag⌋ oh eppelkad guittak madappeg, ag lamen heɗiag ele takkaglag.

³⁸ Lag oh attan, koɗokko uɗem ukkakppa, aab haɗap ohppa ele Moap danab ah ag eheɗib gaaglag. Amu Yawe Nug atte. “Oo doyak okkai amu daakkunu diig am, da heppi, Moap nauhkku. Waa ena iitta laa, danab laa waa amunu oo ii hette, laa nug waa amu o aoɗtte, amubia da heppi, Moap nauhkku.” Yawe Nug anam awa atte.

³⁹ O gadon, Moap am nauhakib daakku, waa aoɗom daatte bia. Moap danab ah ag eheɗ qanaglag. Moap danab ah ag uɗa nak doon, ag laa iɗulag anidmananu ag dimattaglag. Moap nauheb, laa ag Moap danab ah aon aon aqaglag. Laa ag Moap wan talilidna daatteb, ag Moap nauheb anidna, Moap, nuhigppa beumnu anidna, ameg iɗuak doon oiglag.

⁴⁰ Amu Yawe Nug inam atte. “Moap, ag antteg! Ai igel doɗ aokkunu noa ukka, eɗua tette, amubia kekeɗ ahilagppa uɗiglag.

⁴¹ Kekeɗ ag uɗin, Keriot eɗadna, wan amuppan aab aɗ ɠagattagnab ele aoppeg, Keriot danab ah ag eppelagppa daaglag. Amu beeb, deɗ amuppa Moapnu daup ag ah nid aokkunu hette bia daaglag.

⁴² Moap ag da, Yawe, ag da waalppa dayaknu uun, da oɗel tappaeg neum amunu, kekeɗ ag heppeg, Moap am wanppan wan laa ii daama.

⁴³ Ag Moap danab ah, ag baɗak eheɗ nau dooglag. Ag doɗ wan moɗppa na qette, ag amubia hekkulag. Ag doɗ pelemppa notte, ag amubia hekkulag.” Yawe Nug anam awa atte.

⁴⁴ Ge, Yawe atte. “Da Moap danab ah ahilag bu awak haenppa bu madakkul amunu, aun nug baɗak eheɗ nau anidmanu ooltte amu, nug wan moɗppa na qekku. Laa nug moɗppa na qa, eɗua dimittim doa, nug eɗua, pelemppa tekku.” Yawe Nug atte.

⁴⁵ Amu Yawe Nug atte. “Moapnu danab ah ag aab laalappanu oolkkulag ele, ag Hesbon guguittak daan, ehanittak aoglagnu oolag hekku, amge ag ehanittak laa ii aomna. Aɗinu? Aab huana ewawa ukka, danab nakok uma daatte beɗu ewe nauhtte, amubia kekeɗ ag Hesbon, aab amuam anukka King Sihonnu aab okkai, ag appa ele gona, Moap heppeg nauhkkulag. Moap danab ag ban hak danab, amge kekeɗ ag heppeg, ag nauhkkulag.

⁴⁶ O Moap danab ah, ahilagnu am gadonnab gadon. Ag kayak Kemosnu danab ah, amge kekeɗ ag heppeg nauhkkulag. Aɗinu? Ag ahilkad nid danab diin goppeg, ag wan laappa diia ukka laih me dayak danab ah wan amuppa daaglag. Ao, kekeɗ ahilkad nid ahin diin goppeg, ag wan laappa ag eppelagppa daaglag.

⁴⁷ Ahilagppa anam bekku, amge dimppa, haen adekkuppa da heppi, ag Moap, ag eɗun, ahilag wanppa daaglag.” Yawe Nug anam awa atte. Nai amuam Moap bu aokkunu nai aakku.