Jeremaia 46 - Nobonob Baibel

Yawe Nug Isipnu aum

¹ Nai imu Yawe Nug propet Jeremaia wanppan wan laalanu nai mette doyom.

² Josaia bekka Jehoiakim, Juda dilag king, nug king abenab awa, nuhig king dayaknu maɗ waɗeleppa, haen amuppa Babilon dilag king Nebukatnesar, nuhikkud daup ele ag Isip dilag okkai, Paro Neko, nuhikkud daup ele Yupretis le guguittak, Karkemis appa ban hena, Nebukatnesar nug Paro eɗittom. Amge nug ii eɗittom haenppa Yawe he, Jeremaia nug Isipnu nai doyom amu, nai amuam inam.

³ “Ag Isip dilag daup, ag ahilkad guppiɗ babaitteg! Ag guppiɗ okkai, guppiɗ nakok ele babaitteg! Ag bapaidna malona, ag ahan, ban hekkulagnu ukkeg!

⁴ Ag dayaknu keeke hos gomeppa mena qakkona, ag hos attan tena dayeg! Ag ikkilagppa aen hat mena, ag ban hak abenppa gona dayeg! Ag ahilkad ban bappaidna, ag beɗulag eheɗ aomnanu keeke laa ele meig!

⁵ Ag amu hekkulag, amge da aɗi iikku anidttem? Da Isip dilag daup ag baɗak eheɗ nau doon, ag eɗun ooltteb. Babilon dilag daup ag Isip dilag daup eɗadppig. Isip ag eheɗ ooltteb. Ag eɗun neegnana, ii ooltteb. Iitta. Ag oolna ukkakib eheɗnab gotteb. Baɗak eheɗ nau ag taliliatte daatteb.

⁶ Isip danab nug huana qaiedakkunu elele amu, nug qaietta ukka, ena daakkun elele iitta. Isip danab nug ɠagattag ele, nug kekeɗ qe-eɗatta ukka, ena daakkun elele iitta. Yawalti uɗitteppanu, Yupretis le guguittak appa ag taataɗ qettan, nena qetteb.

⁷ Le Nil titiɗa ba, le okkainab daatte amu, atteg dilag daup ag amubia iikku hetteb? Ao, le laa kuɗum ag ui huana o, le okkainab daatte amu, atteg dilag daup ag amubia iikku hetteb?

⁸ Daup amu ag am Isip dilag daup aakku. Ag le Nil nug titiɗa ba, okkainab daatte, ag amubia hetteb. Ao, ag le laa kuɗum ag ui o, le okkainab daatte, ag amubia hetteb. Isip ag atteb. ‘Ig ahat, ig wan atu ohppa gota, ahilkad okkai daagnig. Ig aab kuɗum hepput nauhakib daappeg, danab ah appanu ele aqapput mauhkkulag,’ aon atteb.

⁹ Ag Isip daup dilag hos, ag huan qaiettan, ban hekkulagnu ukkeg! Ag ban danab ag bannu karis lamadtteb ele, ag ahilkad bannu karis huana lamatteg! Ag daup baelagppa oin, ban hetteb ele, ag Kus danab, ag Put danab guppiɗ maotteb ele, ag Lidia danab latppa ban hetteb ele amu, ag oh ahan, laippuppa tappa ukkak hena, ban hekkulagnu ukkeg!

¹⁰ Ag amu hekkulag, amge aun laa ag eɗadkkulag amu, keeke amuam Kayak, Nug Yawe Nukka Ɠagattag Oh Ele, amuam Nug eppegppa daatte. Deɗ amuam Yawe nob tutukku eɗua mettaknu deɗ. Ao, nuhikkud kekeɗ dilagppa Nug nob tutukku eɗua madakku. Danab nug ee, o le elelenab lana male, oo dittiom, amubia danab mauhadppeppeg, elele metteb, ban iitta mekku. Aɗinu? Danab nug doɗ kuɗum aqe mauheg, tiilag gokkaɗe, mana Yawe medatte, amubia Kayak, Nug Yawe Nukka Ɠagattag Oh Ele Nug heeb, yawalti uɗitteppanu, Yupretis le guguittak appa danab kuɗumnab mauhkkulag.

¹¹ O gadon, ag Isip danab ah ag eɗun ena daaglagnu ag oɗe danab nug Gileat appa marasin ena aokkunu gotte, ag amubia heig! Ag hekkulag, amge ag ib digdigppa eɗun ena daaglagnu hetteb, danab marasin digdig awe ii ehanidtte, amubia ag eɗun ena ii daamna. Ag danab oɗe nau awa, eɗua ena daakkunu marasin laa iitta, amubia ag eɗun, bau daaglagnu ib laa iitta.

¹² Wanppan wan laappan danab ah ag ahilag uɗa naknu dooglag. Ag Isip, ag ahilag gayak baag am wanppan wan ohppa dayebeb dooglag. Aɗinu? Ahilag daup ag oolnana, nug ehanittaknu ii dabmenana, laa nug paha gokkunu haaha, layag ibppa daatte ii dabmedatta, layag baegppa qeeb, aa oh neya qekkulah.” Yawe Nug anam aum.

¹³ Aria, nai imuam Yawe Nug Babilon dilag king Nebukatnesar nug Isip ele ban hekkulagnu uɗikkunu propet Jeremaia amegppa ana, Nug aum.

¹⁴ “Jeremaia na nai imu Isip wanppa appa mehuqppe doyeg! Appa na Mikdol, Mempis, Tapanes ele Isip danab ah ag dooglagnu appe doyeg! ‘O Isip danab ah ban wan atu ag talilidna daatteb ele amuppa daatte. Appan danab ah qep elabppa mauhtteb amunu, ag Isip dilag daup ag ahan, ag ban hekkulagnu, abenppa gona daan, ag babaitteg!

¹⁵ Ag amu hekkulag, amge ag kekeɗ ii eɗadmana. Aɗinu? Yawe Nug heeb, ag Isip, ahilkad daup ag nena qena wanppa niiglag.

¹⁶ Ahilkad daup ag oolnana, ag baelkad am keeke laa aɗeb nena qena ahanna gonana, baula nena qekkulag. Ag gonana, lailkad nena qeppig ele beɗulkad qena, nena qekkulag. Amu ⌊wan laalappan daup Paro ehanidtteb ele⌋ ag akka akka ag akkulag. “Ahappeg, ig eɗut, ig wanenigppa, ig baenkadppa daattebppa, kekeɗ iqaglagnu ii daattebppa gotu!” aon akkulag.

¹⁷ Ag gona, appa tena, ag akkulag. “Isip dilag king Paro, nug oɗeppaib mattiak danab; keeke laa ii hette. Nug keeke hekkunu haen dayom, amge nug ii heum,” ’ aon akkulag.” Yawe Nug Jeremaia amegppa anam aum.

¹⁸ Yawe Nug Jeremaia amegppa anam ana, nug imu ele Jeremaia amegppa a, nug Isip dooglagnu aum. “Yawe Nukka Ɠagattag Oh Ele, Nug King, Nug inam atte. ‘Da genab bau daattem, genab amubia laa nug ɠagattag okkainab uɗieb, Isip ele ban hekkulag. Laa uɗikku amu, nug laa eɗattak daatte. Aɗinu? Nug qauko onig Tabor, qauko laala ooppa daatte, amge danab nug neekka antta, qauko laa ii dabmette, amubia nug laa eɗattak daatte. Ao, nug qauko onig Karmel, yu guguittak daatte, danab nug neekka antta, keeke laa ii dabmette, amubia nug laa eɗattak daatte.

¹⁹ Laa uɗikku amu, nug heeb, ag Isip ag ahilag aab okkai Mempis am nauhakib daakku. Aab amuam nauhakib dayebeb, danab o ah laa appa ii daama amunu, ag Isip ag diia ukka laih me dayak danab ah wan laappa daaglagnu ag keeke laippu laippu aon gokkulagnu battamppa ineg!’ ” awa aum.

²⁰ Amu Yawe Nug atte. “Laa Yawalti uɗitteppanu uɗin, Isip danab ah eheɗ hattaglag, ag am qabuttid nau makau balat enanagnab emaltte, ag amubia hekkulag.

²¹ Wan laalappan daup, Isip ag daden mattegeg, ag ahilkad daupnab ele daatteb amu, daup amu ag makau nag aɗ ooppaib dayeye, ittag huanak ele daatte bia daatteb amunu, ag ban hekkulagnu elele iitta. Kekeɗ uɗin, ban hebeppeg, ag Isip dilag daup ele oh eɗun oolna gokkulag. Laihppan daup ag ɠagattag daan, ban ii hemana. Aɗinu? Uug naunab haen aakku ahilagppa uɗitte. Ao, ag ahilag bu awak haen aakku uɗitte.

²² Kekeɗ huanak ag uɗippeg, Isip ele ban hekkulag amunu, Isip dilag daup ag mat laa kekeɗ antta oolala, oɗeppa sss hette, ulah oqotti otte, ag amubia hekkulag. Kekeɗ ag hebeb aɗan, danab ad oadtte bia ag amuppa anam ban hekkulagnu uɗiglag.

²³ Kekeɗ huanaknab uɗin ban hekkulag. Ag tap-lokus, danab ebaqaknu ele iitta bia uɗiglag. Ag uɗin, Isip dilag daup huanak aqappeg mauhkkulag. Ag danab nug atuppa ad huanak oadtte, ag amubia hekkulag.

²⁴ Isip danab ag uɗa nak nau aakku aoglag. Daup yawalti uɗitteppanu uɗiglag amu, ag Isip eɗadppeg, Isip ag, ag eppelagppa daaglag,” awa atte.

²⁵ Amu Yawe Nukka Ɠagattag Oh Ele, Israel dilag Kayak, Nug atte. “Isip dilag kayak hambuppuak laa onig Amon, aben nuhig am Tebes amu, da nug, Isip dilag kayak hambuppuak laa, aria Paro, Isip danab okkai, Isip danab ah, amu laa Paronu ehanittak aoglagnu dabmetteb ele amu, da haen elab iitta, da amu oh bu madakkul.

²⁶ Da heppi, Babilon dilag king Nebukatnesar nug ag eɗatteb, ag nuhig, am nuhikkud daup dilag okkai eppelagppa daaglag. Ag anam daaglag, amge haen ukkeb, dimppa Isip danab ah ag eɗun, Isip daaglag.” Yawe Nug anam awa atte.

Yawe Nug heeb, Israel danab ah ag eɗun, ahilag wanppa daaglag

²⁷ Amu Yawe Nug Israel danab ah amelagppa inam atte. “O Jakop buɗub, ag dahilad maɗi nid amu, ag aib baɗappig. Ao, ag Israel danab ah, ag oo uug naunab qak aib dooppig. Aɗinu? Da ag ehanadppi, ag wan atu umanabnu eɗun uɗin, ag wanelagppa daaglag. Ao, ag gemu daatteb, ag wan laappa gona, diia ukka laih me dayak danab ah appa daaglag amu, da ag buɗulkad ehanadppi, ag appanu eɗun uɗin, ag wanelagppa daaglag. Haen amuppa amu Jakop buɗub ag maɗoɗ, ɠagattag ele ag wanelagppa daaglag. Laa nug heeb, ag ii baɗamna.

²⁸ Anam amunu, O Jakop buɗub, ag dahilad maɗi nid amu, ag aib baɗappig. Aɗinu? Da ag ele daattem. Da heppi, ag gona, wan laalappa matatun daaglag amu, da wan amu oh hadappi, iitta mekkulagtai. Da anam hekkul oo iitta, amge da ag Jakop buɗub, da ahilagnu anam ii hepa. Da heppi, ag ii iitta memana. Da bu madakkul, amge da ahilag eheɗ hak eleleppa hein, nai doya mala hettoɗia epeɗia elele mettak kobol dim lamitten, ag toliatten, bu madakkul. Amu eɗittak ii madapa. Ag eheɗ heppig amunu, da anam hekkul. Da ahilag eheɗ haknu hamu bia doyen, bu ii madakkulnu ii hepa. Iitta. Da kobol eleleppa madakkul.” Yawe Nug anam awa atte.