Jeremaia 45 - Nobonob Baibel

Yawe Nug heeb, laa ag Baruk qeppeg ii mauhma

¹ Anam, amge amu ii nak haenppa, haen Josaia bekka Jehoiakim, Juda dilag king, nug king abenab awa, nuhig king dayaknu maɗ waɗeleppa, haen Baruk nug buk itoɗiak eleppa nai Jeremaia nug mattieye yom, haen amuppa propet Jeremaia nug nai imu Neria bekka Baruk amegppa aum.

² “Baruk, Yawe, Israel dilag Kayak, Nug na amenppa inam atte.

³ ‘Na ame. “O dahilnu gadonnab gadon. Aɗinu? Yawe Nug he, guittak dahil dayom amu, gemu guittak amu aakkuib ii daatte. Iitta. Gemu da oo doyak okkai ele doottem. Da gayeye, beɗul bahi ye, hik awe ena daakkulnu ib laa iitta,” ’ aon ame,” awa aum.

⁴ Nai amunu amu, Yawe Nug aum. “Jeremaia, na nug amegppa imu ele appe doyaɗ! ‘Yawe Nug inam atte. “Da danab nug keeke babaitta, eɗua loppaɗtte, amubia da heppi, keeke da Juda wanppa bappaidmi ele am nauhakib daakku. Da danab nug keeke eppe be, eɗua hiɗatte, amubia da wan imuppa aɗi aɗi eppaladmi amu, da hiɗakkul.

⁵ Da anam hekkul amunu, na keeke okkai nakka nahipnu aokkutnu am enate? Na anam aokkutnu aib heme. Aɗinu? Da heppi, danab ah imu ag padal mekkulag, amge da ele heppi, na adeppa adeppa gokkut amu, appa ag na nidappeg ii mauhmana. Iitta. Na bau daakkut.” ’ ” Yawe Nug Jeremaia amegppa anam a, Jeremaia nug Baruk amegppa aum.