Jeremaia 44 - Nobonob Baibel

Yawe Nug heeb, Juda danab ah Isip daappig ag padal mekkulag

¹ Yawe Nug Jeremaia, Juda danab ah Isip daappig dilag nai laa imu ele mette doyom. Juda danab ah amu laa ag Isip ooppa aben laa yawalti uɗitteppanu daatte, ag aben amuppa aab onilag Mikdol, Tapanes, amu Mempis ele amuppa daaegeg, laa ag Isip ooppa aben laa yau uɗitteppanu daatte, ag aben amuppa daappig. Nai Jeremaia nug ahilagnu doyom am inam.

² “Yawe Nukka Ɠagattag Oh Ele, Israel dilag Kayak, Nug inam atte. ‘Ag uug naunab nau da hei, Jerusalem, Judanu aab laa ohppa ele beum anidna malappig. Gemu aab amu ag hamu daatteb. Danab ah appa ii daatteb, nauhakib daatteb.

³ Juda danab ah ag eheɗ hak heppig amunu, aab amu ag anam daatteb. Juda danab ah ag kalu danab ile muttuɗig enanag bette main, kayak hambuppuak mattanna, ag kayak laala, ag, amu ag mamelkad aɗi ele kayak amu ii dooppig, ag kayak amu noolagppa dup nona binalag meppig amunu, amuppa ag heeg, da oppoɗil beum.

⁴ Haen kuɗum da dahilad maɗi nid, ag propet, da ag maatti gona, ag da oɗel aon, Juda danab ah amelagppa, “Ag kobol nau, da kobol amunu oolppa uuaknab doottem, kobol amunu da nau ninig ele doottem amu, ag kobol amu aib heppig,” appig,

⁵ amge Juda danab ah ag nai amu ii dooppig, ag daulag ii human doon, elele ii dabmedappig. Ag amu henana, ag ahilag nau hak hekkulagnu ii uuppig. Iitta. Ag kalu danab ile muttuɗig enanag bette tuɗidna maina, kayak hambuppuak madappig.

⁶ Juda ag amu heppig amunu, dahil oo nauhak huanaknab ba dayeye, da hei, Juda danab ah ele ag bu eheɗnab aoppig. Bu amuam Jerusalem appa, Judanu aab laala eleppa dayaya he, aab amu oh am hele-ettak daappig, gemu ele anamib daatteb,’ awa atte.

⁷ Yawe Nukka Ɠagattag Oh Ele, Israel dilag Kayak, Nug anam anana, Nug imu ele atte. ‘Tatam anam beum amunu, aɗinu ag gemu tuɗidna eheɗ hebeppeg, uug naunab nau laa ahilagppa bekkunu hetteb. Ag hetteb amu, ag amu tuɗidnaib hekkulag dayeb, uug naunab nau ahilagppa beeb, Juda danab, Juda ah, Juda nid naunau, Juda nid yuɗ ele oh ⌊Isip uɗin daatteb⌋ ag mauhkkulag. Oh mauhppeg, ⌊ippa⌋ Juda buɗub oɗo yaak laa ii daama.

⁸ Ag eppelagppa kayak hambuppuak dottolkad bappaidtteb, amu ag Isip daanna oiglagnu uɗin daanna, ippa ag kalu danab ile muttuɗig enanag bette main, kayak hambuppuak madatteb. Aɗinu ag heppeg, da oppoɗi bak dookkul? Ag amu tuɗidna hekkulag dayeb amu, ag akka ag hena, ag beɗulagppa ag nauhkkulag. Anam beeb, danab ah wanppan wan laa ohppan ag anidna, ag aon aon aqan, ag eheɗ laa awaknu anak waappa daaglagnu akkulag.

⁹ Anukka ag mamelkad aɗi, ahilkad king, ahilkad kuin ele, amu gemu ag ippa Isip daatteb amu, ahilkad ah ele ag Juda wanppa, Jerusalem aabppa ele daanna, nau digdig hedappig amu, ag amu daulag atiomte?

¹⁰ Juda danab ah tatamnu amu, ag nau amu henana, ag amu dabmenan, “Ig nau hemut,” ii anana, akka akka ag onilag qeeg ii ne, gemu ag Isip ippa ina daatteb ele, ag ele anam ii hetteb. Anukka, haen amuppa Juda ag ebehilag oh dahilnu bodoetta le ii meum, gemu ele ag ippa ina Isip daatteb amu, ag ebehilag oh dahilnu bodoetta le ii mette. Anukka, haen amuppa Juda danab ah ele ag dahil ɗo, dahil nai laa ele, da ag am ag mamelkad aɗi ele mattami amu, ag amu ii dim lamidppig, ag gemu Isip ippa ina daatteb amu, ag ele ii dim lamidtteb,’ ” awa atte.

¹¹ Ahilag hak anam daatte amunu, Yawe Nukka Ɠagattag Oh Ele, Israel dilag Kayak, Nug inam atte. “Da heppi, uug naunab beeb, ag Juda ag uɗin Isip daaglagnu uɗippig amu, uug amu ag oh tonatteb, ag nauhkkulagnu da dabmak aoi ɠagattag eppom daatte.

¹² Uug naunab Juda wanppa beum, dimppa ag kuɗum iitta, ag laib laib uug haen dimppa bau daan, Juda wanppa daappig, amge ag haen amuppa Isip gona daaglagnu dabmak aoeg ɠagattag eppom daye, ag aakku heppig. Ag uɗin, Isip wanppa daatteb; am ag amu heppig amu, da heppi, ag nauhkkulag. Ag oh Isip daanna nauhkkulag. Ag qep elabppa, o enugppa mauhkkulag. Danab okkai ukkeb, danab onig iitta ele, ag oh qep elabppa, o enugppa mauhkkulag. Danab ah laa ag ahilagnu ag eheɗ laa awaknu anak waappa daaglagnu anana, ag anadna, ameg iɗuak doon, ag naippa yaaladnana, ag aon aon aqaglag.

¹³ Juda ag uɗin Isip daatteb amu, da ag qep elabppa, enugppa, oɗe nau danab kuɗum aqe mauhtteb eleppa bu madakkul. Da Jerusalem danab ah bu mattami, amubia da ag Isip daatteb bu madakkul.

¹⁴ Juda danab ah uug nau dimppa oɗo yaak daan, Juda wanppanu ahan Isip daaglagnu uɗippig amu, ag bu amu aoglag. Ag uug amu qe-eɗidkkulagnu elele iitta. Ag qe-eɗidna, bau daan, eɗun Juda wanppa gona daaglagnu oolag huana hette, amge ag anam ii hemana. Oola ukkak danab laib laibnab aakkuib ag hekkulag.” Yawe Nug anam awa atte.

¹⁵ Jeremaia nug nai amu doya, danab ah amelagppa a, Juda danab ah kuɗum Isip ooppa aben laa yau uɗitteppanu daatte, ag aben amuppa daaegeg, laa ag Isip ooppa aben laa yawalti uɗitteppanu daatte, ag aben aɗit amuppa daappig, amu ag oh haen amuppa uɗin daanna, Jeremaianu nai dooppig. Ag daappig ele, ag oolagppa danab laa ag ahilkad ah ag kalu danab ile muttuɗig enanag bette manadna, kayak hambuppuak mattaegeg dooppig amu, ag, ahilkad ah ele, amu danab ah laa oh ele ag Jeremaianu nai doon, ag nug amegppa appig.

¹⁶ “Na, ‘Da Yawe oɗe awen, iikku ag amelagppa madittem,’ ana, nai ig amenigppa mattie doomut amu, ig daunig humat, nai amu ii doomta.

¹⁷ Ig kayak laa onig Astoret, onig laa Habnu Kuin, ig nug noobppa dup nota, nug binag mekkunignu nai atat, ɠagattag qakkamut amu, ig genabnab genab anam aakku hekkunig. Ig kalu danab ile muttuɗig enanag bette mait, nug mettagnig. Ig nuhignu wain gokkaɗaknu ofa hekkunignu wain gokkaɗkkunig. Ig, ig mamenkad aɗi, ihinkad king, ihinkad ehanittak anuqak danab laa ele anukka Judanu aabppa, Jerusalem appa ele heppig, amubia ig hekkunig. Aɗinu? Anukka, ig Juda wanppa amu hemut, haen amuppa ig ee ele daamut, uug laa ihinigppa ii beum.

¹⁸ Ig anukka anam hemut, amge ig amu uut, ig baula kalu danab ile muttuɗig enanag bette mait, Habnu Kuin ii mettamut, ig wain gokkaɗaknu ofa nuhignu hekkunignu wain ii gokkaɗmut, haen amuppa digma uɗie, uɗie, gemu ele ig keeke iitta ele daat, ig qep elabppa, enugppa ele mauhttem,” aon appig.

¹⁹ Ag oh anam aeg, ah laala daappig ag appig. “Haen ig kalu danab ile muttuɗig enanag bette mait, Habnu Kuin mettata, ig bret batappatak nug dottog bia hetata, wain gokkaɗaknu ofa hekkunignu wain gokkaɗmut, haen amuppa ihinkad danab ag iite dooppig?” aon appig.

²⁰ Ag anam aeg, Jeremaia nug amu dilag oh, danab ele, ah ele, ag nug naippa nob meppig ele amu, nug ag oh amelagppa aum.

²¹ “Anukka ag mamelkad aɗi, ahilkad king, ahilkad ehanittak anuqak danab laa, ag gemu ippa Isip daatteb, amu Juda danab ah laa oh ele ag anukka Juda wanppa daanna, ag Judanu aabppa, Jerusalem aabppa ele ag kalu danab ile muttuɗig enanag bette ele aon manan, kayak hambuppuak madappig amu, Yawe Nug amu anttom ag iite dootteb? Nug amu antta amunu, dabmaama, dabmakppa iite meum.

²² Yawe Nug amu antta, amunu dabma, Nug ag ahilag nau hak digdig, ahilag hak nug amunu ooppa uuaknab dootte ele, Nug ag uuatteb, ag hak amu tuɗidna hekkulagnu elele ii doya, Nug he, danab ah laa ag wan amuam eheɗ laa awaknu anak waappa daakkunu anan oiyegeg, wan amuam hele-ettak, wan meu waknu nakokib elele, am anam dayom, amu danab ah appa ii daappig. Gemu ele anamib daatte.

²³ Ag kalu danab ile muttuɗig enanag bette manan, kayak hambuppuak medappig, ag Yawe, nuhigppa hipunin heppig, ag Yawe oɗe ii dim lamidppig, ag nuhig ɗo, nuhig nai ele ii dim lamidppig amunu, uug naunab ahilagppa beum. Uug beum amu ag aakku anidtteb,” awa aum.

²⁴ Jeremaia nug anam awowa, nug tuɗitta, danab oh ah oh ele amelagppa aum. “Ag Juda danab ah Isip ippa uɗin daatteb ele, ag Yawenu nai imu doyeg!

²⁵ Yawe Nukka Ɠagattag Oh Ele, Israel dilag Kayak, Nug atte. ‘Ag danab, ahilkad ah ele ag appig. “Ig genabnab genab kalu danab ile muttuɗig enanag bette mait, Habnu Kuin mettagnig. Ig genabnab genab wain gokkaɗaknu ofa nuhignu hekkunignu wain gokkaɗkkunig,” appig. Ag oɗelagppa anam hekkulagnu anan nai qagappig. Ag nai anam anan qagappig, ag eppelagppa ele anamnab aakku heppig. Ge, ag ahilag nai amu ag eppelagppa dim lamidna, autnanab aon heegeg uɗie, gemu ele hetteb,’ ” awa atte.

²⁶ Amu Yawe atte. “Ag amu hetteb amunu, ag Juda oh, ag Isip uɗin daatteb ele, ag Yawenu nai imu doyeg! Nug atte. ‘Da onil okkai ele awen, amuppa da dahil nai ɠagattag qetten, da attem. “Ag oolagppanu laa nug baula da onil awa, nuhig nai laa ɠagattag qedakkunu ha, ‘Naɗi Yawe bau daatte, genab amubia,’ ana, amuppa nai nuhig ɠagattag ii qettama,” ’ ” awa atte.

²⁷ Yawe Nug ahilagnu inam atte. “Aɗinu anam bekku? Da heppi, uug ahilagppa bekku. Da heppi, ena ahilagppa ii bema. Juda danab ah Isip daatteb ag qep elabppa, enugppa ele mauhadppeppeg ukkeb, iitta mekkulag

²⁸ Laib laibib ag qep elabppa ii mauhna, eɗun Juda wanppa gokkulag. Anam beeb, Juda danab ah oɗo yaak daan, uɗin Isip wanppa oitteb ele, ag ahilag nai am ɠagattag daakku, o dahil nai am ɠagattag daakku, ag amu dooglag,” awa atte.

²⁹ Amu Yawe Nug imu ele atte. “Da bu matten, aɗi uug laala ahilagppa bekkunu appi, amu aakku bekku dooglagnu da bu okkai ag madakkul. Amu da ag genab Isip wan imuppa bu okkai ag madakkul dooglagnu, da at imu ag mattai bette anidtteb, ag anam dooglag.

³⁰ At am inam. Da heppi, Isip dilag Paro, Hopra, nug kekeɗ ag nug qeppeg mauhkkunu oolag hette, nug ag eppelagppa daakku. Babilon dilag king Nebukatnesar, nug Juda dilag king Sedekaia qeeb mauhkkunu oo he, da hei, Sedekaia nug Nebukatnesar eppegppa dayom, amubia Paro, nug kekeɗ nug qeppeg mauhkkunu oolag hette, nug ag eppelagppa daakku.” Yawe Nug anam awa atte.