Jeremaia 42 - Nobonob Baibel

¹ Ag appa tena, Karea bekka Johanan, Hosaia bekka Jesania, daup dilag okkai laa oh, amu danab ah ele, danab laa ag onilag ele, laa ag am onilag iitta, amu oh ele ag Jeremaia toppa goppig.

² Ag nug gumidna tena, nug amegppa appig. “Ig keeke laanu oɗ medapput, na ihinig oɗmak dookkutnu oɗ medattem. Na Yawe, nahip Kayak, na Nug unuqidppe, Nug ig Juda danab ah oɗo yaak daattem, Nug ig ehanikkeb, ig ena daagnignu oɗ medattem. Aɗinu? Ig Juda ig anukka kuɗumnab daamut, amge gemu na anidttem imu, ig laib laibib daattem.

³ Na Yawe, nahip Kayak, na Nug oɗ medappe, Nug ig adeppa gokkunig, ig attem attem hekkunig ab doognignu oɗ medattem,” appig.

⁴ Ag Jeremaia anam oɗ mettaeg, propet Jeremaia nug nob ma aum. “Am ena. Da ahilag nai aakku doomi. Da genab Yawe, ahilag Kayak, ag da oɗ meɗappig bia da Nug unuqidppi, Nug aɗi ab dookkul amu, da nai amu oh appi dooglag. Da nuhig nai ooppanu keeke nakok laa ii lokkumpa,” awa aum.

⁵ Jeremaia anam ag amelagppa a, ag appig. “Ig Yawe, nahip Kayak, Nug na amenppa ig aɗi aɗi hekkunignu akkutnu ana, meitteb ihinigppa uɗin appe doognig amu, ig anamib hekkunig. Ig ii hekkunig dayeb amu, Yawe, Nug nuhig diignu oo metta ii uuak kobol dim lamidtte amu, Nug aha, bu megakkunu oonig daatte.

⁶ Yawe, ihinig Kayak, na Nug unuqidkkutnu ig meittut gottem ele, Nug aɗi akku amu, ig ena, elele daagnignu, Nug keeke ig oonig hette hekkunignu akku dayeb, o Nug keeke ig oonig ii hette hekkunignu akku dayeb, am keeke hamu. Ig Nug aɗi akku aakkuib dim lamidkkunig. Aɗinu? Ig anam hekkunig dayeb, am ig ena, elele daagnig,” aon appig.

⁷ Ag anam aeg, deɗ eblaih waɗele uue, deɗ eblaih laih eleppa Yawe Nug nuhig nai imu Jeremaia mettom.

⁸ Jeremaia nug Yawenu nai amu doyom amunu, nug Karea bekka Johanan, daup dilag okkai laa nug ele daappig, am danab ah, laa ag onilag ele, laa am onilag iitta amu, nug ag oh onilagppa e doppig.

⁹ Ag doeg, nai Jeremaia doya, ag amelagppa aum am inam. “Yawe, Israel dilag Kayak, Nugib ag da Nug unuqitten, ahilag unuqittak Nug medakkulnu meiɗppig ele amu, Nug inam atte.

¹⁰ ‘Ag Juda, ag hipunin heegeg, da bu madakkulnunab dayom, amge da gemu ag daattebnu oolppa guittak doottem amunu, gemu amu, ag wan imuppa daappeg, da danab lag he, ena daatte, amubia da ehanadppi, ag ena bena daan oiglag. Da danab lag loppaɗe nauhtte, da ahilagppa amubia ii hepa. Ge, ag wan imuppa daan oiglag amu, da danab nug ee eppe, ena ba, meu otte, amubia da ehanadppi, ag ena daan oiglag. Da danab ee hiɗe bunaɗtte, da amubia ahilagppa ii hepa. Iitta.

¹¹ Ag gemu Babilon dilag king baɗidtteb, amge ag nuhignu aib baɗappig. Da ag ele daatta, da ag ehanadppi, ag padal ii memana. Da ag ehanadppi, Babilon dilag king ahilagppa eheɗ laa ii hema amunu, ag nug aib baɗidppig,’ awa atte.

¹² Amu Nug inam ele atte. ‘Da ahilagnu ool doyeb, ool matten heppi, Babilon dilag king nug ele ahilagnu oo doya, oo matta ehanattatta, nug ab, ag eɗun wan daappigppa daaglag.’ Yawe Nug anam awa atte.

¹³ Amge ag Yawe, ahilag Kayak, ag Nug oɗe dim lamidkkulagnu uun, ‘Ig wan imuppa ii daamta. Ig laih gota daagnig,’ anana,

¹⁴ ag, ‘Iitta. Ig Isip gota, appa daagnig. Appa ig ban hak laa ii anidmata. Appa ig ban uɗittenu trampetnu gayak ii doomta. Appa ig enug ii iqama,’ akkulag amu,

¹⁵ Yawe Nug aɗi aɗi ahilagppa bekkunu atte amu, ag Juda danab ah oɗo yaak daatteb ag, ag nuhig nai doyeg! Yawe Nukka Ɠagattag Oh Ele, Israel dilag Kayak, Nug amunu inam atte. ‘Ag Isip gona daan oiglagnu dabmak aoeg ɠagattag eppom daatte dayeb, ag appa gona daan oiglag dayeb amu,

¹⁶ appa ag qep elabppa mauhkkulag. Gemu ag enug aqamanu dabmak aon baɗak doon oitteb, amge ag Isip gona daan oiglag dayeb amu, enug aqeb mauhkkulag.

¹⁷ Ge, aun aɗi laa oh ag Isip gona daaglagnu dabmak aoeg ɠagattag eppom daatte, ag dabmak amu dim lamidna gona, Isip daanna oiglag amu, ag ohnab qep elabppa, enugppa, oɗe nau danab kuɗum aqe mauhtteb eleppa ele mauhkkulag. Da heppi, uug naunab ahilagppa beeb, ag oolagppanu laippu laa nug uug amu eɗitta, ena iinab daakku. Laippu laa nug uug amu iinab qe-eɗitta bau daakku. Iitta! Ag ohnab ag uug naunab da heppi bekku amu, ag uug amu anidnana, mauhkkulag,’ awa atte.

¹⁸ Aɗinu anam daakku? Am Yawe Nukka Ɠagattag Oh Ele, Israel dilag Kayak, Nug atte. ‘Da ool nauhe, oppoɗil beebe, Jerusalem danab ah bu eheɗ mattami, amubia ag laa, ag Isip gona daanna oiglag dayeb, da oppoɗil beeb, bu eheɗ ag madakkul. Danab ah laa ag ahilagnu ag eheɗ laa awaknu anak waappa daaglagnu anana, ag anadna, ameg iɗuak doon, ag naippa yaaladnana, ag aon aon aqaglag. Ag Isip gona daan oiglag, ag baula ahilag wan imu iinab anidmana.’ ” Yawe Nug anam awa atte.

¹⁹ Jeremaia nug Yawenu nai Juda danab ah amu amelagppa anam awowa, nug tuɗitta aum. “O Juda danab ah oɗo yaak ippa ina daatteb, Yawe Nug ag amelagppa, ‘Ag Isip aib goppig,’ aakku a dooppig daatte amu, ag imu dabmena autna aweg! Da gemu ag nau aomnanu dabmettak nai imu ag amelagppa attem.

²⁰ Ag Isip gokkulagnu dabmetteb amu, amuam ag mauhkkulagnu hetteb. Aɗinu? Ag da Yawe, ahilag Kayak, da Nug unuqidkkulnu ag da amelppa, ‘Na Yawe, ihinig Kayak, na Nug ihinignu unuqidppe, Nug aɗi ab appe, ig doot, Nug aɗi aɗi hekkunignu akku amu, ig aakku hekkunig,’ appig.

²¹ Ag anam aeg, da hei, Yawe Nug ag aɗi hekkulagnu aum, da amu oh ag amelagppa ami, amge ⌊da iikku anidttem⌋ ag Yawe, ahilag Kayak, Nug ag aɗi hekkulagnu ab, da appi, ag dooglagnu da amelppa aum amu, ag amu dim lamidkkulagnu uuppig. Ag ii hemana.

²² Anam amunu, ag gemu nai imu doon autna aon, dabmakppa aɗeg! Ag Isip gona daan oinna, appa ag qep elabppa, enugppa, oɗe nau danab kuɗum aqe mauhtteb eleppa ele mauhkkulag.” Jeremaia nug Juda danab ah amu amelagppa anam aum.