Jeremaia 40 - Nobonob Baibel

Babilon dilag daup okkai laa nug he, Jeremaia nug maniguittak ii dayomnu kaya

¹ Nebusaradan, nug daup Nebukatnesar gumappig dilag okkai amu, nug Rama dayaya, nug Jeremaia Jerusalem appa Jerusalem danab ah, amu Juda danab ah laa ele nug ag Babilon diia ukka maatteb, ag appa diia ukka laih me dayak danab ah daaglagnu daappig oolagppa maniguittakppa, senppa qakkak dayomnu uhuqak daakkunu a, dimppa Yawe Nug Jeremaia nai laa mette doyom.

² Amu Nebusaradan, nug daup ag Nebukatnesar gumappig dilag okkai amu, nug Jeremaia antta, nug amegppa aum. “Yawe, Nug nahip Kayak amu, Nug uug naunab imu aben imuppa bekkunu aum.

³ Nug anam aum amu, gemu Yawe Nug anamib bekkunu he, aakku beum. Nug aɗi bekkunu aum, amuibnab gemu aakku beum daatte. Uug amu oh beumnu diig am, ag Juda danab ah, ag Yawe, nuhigppa hipunin heppig. Ag Nug oɗe ii dim lamidppig.

⁴ Gemu da hei, sen eppenppa qakkak ele am uhuqakib daatte. Na uɗippe, da ele oh Babilon gokkunihnu oot hette dayeb amu, oh goɗa, appa da na atognoidkkul. Amge na anam oiyaknu oot ii daatte dayeb amu, na ii gomana. Nahip-ppa daatte. Antte! Wan imu oh daatte. Na adeppa gokkut am na ukkakib gokkut.” Nebusaradan nug anam awa, Jeremaia amegppa aum.

⁵ Nebusaradan nug anam a, ⌊Jeremaia Juda wanppa daakkunu ana,⌋ nug aha gokkunu heehe, Nebusaradan nug eɗua amegppa aum. “Na ahan, eɗun gona, Ahikam bekka Gedalaia, alag am Sapan, Babilon dilag king nug Juda dilag okkai daakkunu nug tituanom amu, na eɗun, nug gumidna gona daakkut, o iitta, na laih adeppa gona daakkut am na nakka,” awa aum. Nug anam awowa, nug Jeremaia ee keeke mettowa, keeke enanag laa ele nuhig daakkunu hamu metta, he ukkom.

⁶ Nebusaradan nug anam aum amunu, Jeremaia nug Ahikam bekka Gedalaia, Mispa dayom, nug nug gumitta ukkom. Nug ukke, nug danab ah Babilon dilag daup ag ag diia ukka laih me dayak danab ah Babilon wanppa daaglagnu ii diippig, Juda wanppa daappig, nug ag ele oh Gedalaia ele daappig.

Laa ag Gedalaia qeeg mauhom

⁷ Amu Juda dilag daup okkai laa, ag ahilkad daup ele ag Babilon dilag daup ag Babilonnu uɗin, Juda dilag aabaab eɗadna diippig, haen amuppa ag aabppa ii daappig, ag aab dimittim atu laih laihppa daappig. Ag anam daanna, ag Babilon dilag king nug Ahikam bekka Gedalaia, nug Juda wannu gawana daakkunu, nug Juda danab ah daɗeknab daaegeg, Babilon wanppa diin appa diia ukka laih me dayak danab ah daaglagnu ii goppig ele gumadkkunu tituanom doyona,

⁸ ag Gedalaia gumidna, Mispa goppig. Ag goppig ele am, Netania bekka Ismael, Karea bekoɗ Johanan amu Jonatan ele, Tanhumet bekka Seraia, Netopa danab Epai bekkod, amu Maka danab laa, nug bekka Jasania ele. Ag am ahilkad daup ele oh goppig.

⁹ Ag gona teeg, Ahikam bekka Gedalaia, nug alag am Sapan, nug ag ena daaglagnu ag amelagppa nuhig nai ɠagattag qetta aum. Nug aum. “Ag Babilon waappa daan, ahilag maɗi nid daaglagnu aib baɗappig. Ag wan imuppa daan oinna, ag Babilon dilag king waappa daan, nuhig maɗi nid daaglag dayeb amu, ag enaib daaglag.

¹⁰ Da amu, da ippa Mispa daappi, Babilon dilag okkai ag anigkkulagnu uɗiglag amu, ag uɗippeg, ig qagmeta daat, nai mattignig. Amge ag amu, ag gona, ee laala, amuam grep meu wain haknu, ad meu aam haenppa lep mette, amu olip meu goɗen haknu ele, ag amu aon, hinaippa inana, aab anen anen ag aguppa daaglagnu aoppig amu, ag aguppa daan oiyeg!” awa aum.

¹¹ Aria, haen Juda laa ag ⌊ban neene, ag ahan ban haenppa oola ukkak danab ah wan laalappa daaglagnu goppig,⌋ amuam ag Moap, Amon, Edom, amu wan laala ohppa goppig amu, ag appa daanna, ag Babilon dilag king nug Juda danab ah ohnab ii diia ukkom, laa oɗo yaak uuatte daappig doon, ag nug Ahikam bekka Gedalaia, nug Sapan alag amu, nug ahilag okkai daakkunu otiom ele doon,

¹² ag ahan, eɗun Juda wanppa goppig. Ag gona, Gedalaia, Mispa dayom, ag appa nug gumidna goppig. Kekeɗ ag uɗieg, ag ahan wan atu ohppa gona matatun daappig am eɗun goppig. Ag eɗun gona daanna, ag wain, ad meu aam haenppa lep mette ele am huanak aoppig.

¹³ Aria, deɗ laa Karea bekka Johanan, amu daup dilag okkai laa ele, ag tatam aab dimittim daaegeg Babilon dilag daup ag ahan ukkaeg, ag ahan, Mispa appa Gedalaia gumidna goppig.

¹⁴ Ag gona, ag Gedalaia amegppa appig. “Gedalaia, Amon dilag king Balis nug Netania bekka Ismael na nitteb mauhkkutnu me uɗiom amu, na amu iite doottem,” aon appig. Ag anam appig, amge Ahikam bekka Gedalaia nug ahilag nai am doya, ooppa genab ii doyom.

¹⁵ Nug ooppa genab ii doye, haen laa Karea bekka Johanan nug nukka, laa ii doyegeg, nug Gedalaia gumitta, Mispa ukkom. Nug ukka, Gedalaia amegppa aum “Na uuiɗppe, da ukken, da Netania bekka Ismael lokkumakppa qeppi mauhkku. Da amu heppi, laa nug ii dooma. Nug na nitteb mauhppe, Juda danab ah ag na waatppa daan oitteb ele ag ahan gona, matatun laih laih daaglag. Anam bekku dayeb, Juda laippu laippu oɗo yaak bau daanna, gemu ippa ina daatteb ele, ag oh mauhkkulag. Am aɗinu kobol nau amu bekku?” awa nug amegppa aum.

¹⁶ Johanan nug ukka, Gedalaia amegppa anam aum, amge Ahikam bekka Gedalaia nug Karea bekka Johanan amegppa aum. “Iitta! Na anam aib heme! Aɗinu? Na Ismaelnu attem am genab iitta,” awa aum.