Jeremaia 4 - Nobonob Baibel

Israel ag attemppa eɗun, Yawe toppa gokkulagnu elele

^1-2 Amu Yawe Nug inam atte. “O Israel danab ah, ag eɗun, da waalppa daaglanu oolag daatte dayeb amu, ag eɗun, dahilppa uɗieg! Ag kayak hambuppuak dottolkad, da amunu oolppa uuaknab doottem amu, ag dottolkad amu agappeg goppeg, ag ib eheɗ amu tuɗidna ii gokkulagnu dayeb, ag kobol genab, ag nai doya mala hettoɗia epeɗia elele mettak kobol, amu genab tutukku hak kobol ele dim lamidnana, ag, ‘Yawe genab bau daatte, genab amubia,’ ag nai amuppa ahilag nai ɠagattag qedappeg, ⌊da ag itittak ena madappi, wan ohppa danab ah ag amu anidna, unuqiɗppeg,⌋ da ag itadppi, ag dahilppa gamag ahak doon, ag da binal meɗaglag,” awa atte.

³ Yawe Nug ag Juda danab ah, Jerusalem danab ah ele Nug ahilagnu inam atte. “Danab nug wan ii buuak, hamu daye, keeke qaun ele benan daattebppa keeke eppe, keeke amu ena ii ba, meu ena iinab otte. Iitta. Danab nug uud keeke qaun ele amu heeb iitta meeb, wan amu buueb, wan buuakppa keeke ebakku, am meu okku amunu, ag amubia ag oolagppa anam heig!

⁴ Ge, ag Juda danab ah, Jerusalem danab ah ele, ag ahilag hak nau ohnab uuna, tutukku oiyeg! Ag gaɗa dimittimppaib aib anam heppig. Iitta. Ag genabnab genab oolag unuqag, amuppa anam heig! Ag amu ii hekkulag dayeb, ag ahilag hak nau, diig amunu dahil oppoɗi bak ba, aab huan ewewe, laa heeb qauhkkunu elele iitta, am amubia daakku,” awa atte.

Uug okkainab Juda dilagppa bekku

⁵ Yawe Nug da Jeremaia, Nug da amelppa inam ele aum. “Na nai imu Juda danab ah, Jerusalem danab ah ele amelagppa appe doyeg! ‘Trampet iwalak danab ag, ag trampet amu wan ohppa aben ohppa iwaleg!’ Na amu awona, na inam ele appe doyeg! ‘Ag Juda, ag qagmeppeg, ig oh aab ɠagattag aɗ ele anen anen amu, ig oolta, amuppa gotu!’

⁶ Ag laa ag ib epponaknu at ib daugppa, o qauko igippa metteb ele, ag danab ah ag Sion ukkak ib anidkkulagnu at amu qappeg! Ag Juda danab ah ⌊Sion nakok guguittak daatteb,⌋ ag paha aab ahilag anen anenppanu, ag ena daaglagnu, ⌊ag aab amuppa⌋ paha oolna ukkeg!” Yawe Nug da anam akkulnu amelppa aum. Yawe Nug anam da amelppa ana malowa, Nug nai tuɗitta aum. “Juda danab ah, ag amu hekkulag diig am inam. Da hei, laa yawalti uɗitteppanu nug eheɗ hadakkunu uɗitte. Nug keeke kuɗum loppaɗeb nauhkkulag ⌊amunu ag padal mena autna aomnanu, ag anam ooleg⌋!” Yawe Nug anam da amelppa aum.

⁷ Yawe Nug anam a, da, Jeremaia, da Juda danab ah amelagppa ami. “Laa amu uɗitte amu, nug am laion laa nug teɗ nuhigppan aha, doɗ aqeeb mauhkkulagnu oitte bia uɗitte. Ao, laa nug wan kuɗum he nauhtteb ele, nug uɗikkun aakku ahom. Nug heeb, ag Juda, ag ahilag wan am nauhaknab daakkunu ahom. Ao, nug heeb, ahilkad aab kuɗum am nauhakib daaglag. Danab ah laa appa ii daamna. Iitta.

⁸ Anam bekku amunu, ag lamen heɗiag ele takkanna, ag mahia, gayak okkai ele heig! Aɗinu? Ihinig hipunin haknu amu, Yawenu oo nauhak huanaknab aakku daatte. Ii iitta meum,” awe ami.

⁹ Da anam ai, Yawe Nug aum. “Laa uɗitte ele, nug uɗieb, deɗ amuppa ag Juda, ag ahilag king, ehanittak anuqak danab laa oh ele ag baɗan, gai-iitta daaglag. Mana mettak danab ag anidna, ameg iɗuak dooglag, amu propet danab ag dabmak huanaknab aoglag,” awa aum.

¹⁰ Yawe Nug anam a, da ami. “O Naɗi Yawe, na ib oo ii neme amunu, laa ag Juda danab ah imu hambuppunna, ‘Maɗoɗ ahilagppa daakku,’ aegeg, danab ah imu ag amunu oolagppa genab dootteb, amge qep elab ig baanigppanab aakku daatte,” awe ami.

¹¹ Amu uug amu beebeb, Yawe Nug Jerusalem danab ah, Juda danab ah ele amelagppa inam akku. “Danab, nuhikkud daup ele uɗitteb amu, ag am ulah gakkaɗaknab atu taɗakppanu dahilad danab ah daattebppa uɗitte bia uɗitteb, amge ulah amuam danab ah ahilag uɗat hekkulagnu ehanadkkunu ii uɗitte.

¹² Iitta! Ulah amuam ulah ɠagattagnab, danab ah aqadtte. Ulah amuppa da ag Juda danab ah bu madakkul.

¹³ Antteg! Danab amu, nuhikkud daup ele ag ulah lombig ye, paha paha laih gotte bia uɗitteb. Nuhig bannu karis ag kilibob huana gotte bia uɗitteb. Nuhig hos ag ai igel paha paha hagagaɗa gotte, ag amubia oitteb. Anam amunu, Juda danab ah ag anidna, ag, ‘O gadonnab gadon, ig eheɗ aognig! Gadonnab gadon. Aɗinu? Ig aakku padal mekkunig!’ akkulag.

¹⁴ O Jerusalem danab ah, Juda danab ah ele, ag oolag dubuttid ele amunu, ag padal ii memananu, ag ehanittak aoglagnu, ag dubuttid amu oppieg! Ag nau hekkulagnu dabmak aɗan daatteb; amu haen gane laa ele ukkeb, ag dabmak amu uuglag.

¹⁵ Aɗinu? Ag paha anam ii hekkulag dayeb amu, nai awa uɗiak danab Dan appanu uɗia, nai uug ele ab dooglag. Ao, laa nug Epraim wanppa, qauko daattebppanu uɗia, kekeɗ uɗin, appa digmena wan heeg nauhom ab dooglag,” awa akku.

¹⁶ Amu Yawe Nug atte. “Ag wanppan wan ohppa danab ah amelagppa inam appeg doyeg! Ge, Jerusalem appa ag appeg doyeg! ‘Wan umanu daup ag uɗitteb. Ag Juda dilag aab oh eɗadkkulagnu dabmenana, ag bannu ewak aakku etteb.

¹⁷ Juda danab ah ag da dimeɗan, dahil nai tappaeg neum amunu, danab ag dad okkai laappa eheɗ laa bemanu wan maha amu talilidna daatteb, amubia daup amu ag Jerusalem talilidna daaglag,’ aon aig!

¹⁸ O Juda danab ah, ag eheɗ henan daappig amunu, ag beɗulagppa uug imu ahilagppa bekku. Imuam ahilag bu awak aakku. O gadonnab gadon, am mua naunab ele. Bu amuam ag meulagnab guittak medakku.” Yawe Nug anam awa atte.

Jeremaia nug kekeɗ ag uɗin Juda heppeg nauhkkulagnu tuleglegppa anttom

¹⁹ O gadon, da, ⌊Jeremaia, da⌋ guittak naunab nau doottem. Da danab guittak nau doya, beɗu itoɗia hette, guittak amubia da doottem. Da oolppa guittak nau anam doottem. Gamalppa uttu taub dahil huanaknab qutu qutu edatte. Da oɗel qamutak daakkulnu elele iitta. Aɗinu? Da ban bekkun daatte, da amunu trampet iwalak aakku doyen malami. Ao, da ban hettebnu ewak aakku doomi.

²⁰ Dahil neekkakppa da kekeɗ ag eɗikkon, baula eɗigna, eɗun baula eɗikkegeg anidttem. Dahil neekkakppa ihinig wan oh nauhakib daatte anidttem. Dahil neekkakppa ag ihinkad peh lag paha heeg nauhppig anidttem. Ao, dahil neekkakppa kekeɗ ag ihinkad dayak pahanab heeg nauhppig anidttem.

²¹ Da neekkak dahilppa anam andette, da kekeɗ dilag pilak ele ge iitta anatten, ahilag trampetnu gayak ele anamib doottem; amu haen gane laa ele ukkeb, da amu baula ii anidkkul, baula ele ii dookkul?

²² Amu Yawe Nug atte. “⌊Imu bekkunu diig am,⌋ dahilad danab ah ag da dab-ii-meɗan ii dim lamiɗtteb ele. Ag da ii dooiɗtteb. Ag nid naunau, kaaka hetteb bia hetteb. Ag diignu doyak tutukku laa iitta. Ag eheɗ hekkulagnu doon autna aotteb. Ag ena hekkulagnu ib ii dootteb,” awa atte.

Jeremaia nug dimppa uug nau bekkun tuleglegppa anttom

²³ Amu da, Jeremaia, ⌊da tuleglegppa⌋ neekki ukke, da wan imu anidmi; amu wan am iɗu laa iitta anidmi. Keeke laa appa ii dayom ele anidmi. Amu da ele neekki ukke, hab anidmi, amu habppan amahlak laa ele ii dayom anidmi.

²⁴ Da neekki ukke, qauko ele anadmi, amu qauko okkai ag uɗalegeg, qauko nakok ag danab ameg uuette, pehettak ii daatte, ag amubia heppig anidmi.

²⁵ Da neekki ukke, danab laa ii anidmi, ai oh ele ag hagagaɗna goppig; laippu laa dayeye ii anidmi.

²⁶ Da neekki ukke, wan dad enanag dayom, wan amuam gemu atu taɗak antten, aab oh nauhattak aakkuib ele anadmi. Keeke oh anam nauib daaegeg anidminu diig am, Yawe, Nug ig hipunin heutut antte, nuhig oo nauhak huanaknab, amuppa uug amu oh beum.

²⁷ Keeke anam bekku. Aɗinu? Yawe Nug inam awa atte. “Dahil oo nauhak huanaknab am heeb, wan oh nauhkku, amge da heppi, wan am nauha auta autanab ii aoma.

²⁸ Da dahilad danab ah bu anam madakkulnu ain malami; da nai dahil ii baolipa. Ao, da maittak amu awen malami. Da dabmak dahil ii eɗupa, amunu bu amu anam daakku. Anam dayebeb, wanppa danab ah ag mahiak okkai hekkulag. Habppa gatatu manak daakku.

²⁹ Kekeɗ ag uɗin, ban henana eppeg, danab ah aabppa daatteb ele ag oolkkulag. Laa ag atuppa gona, lokkumkkulagnu hekkulag. Laa ag gona, men okkai okkai daatteb, ag appa lokkumkkulagnu hekkulag. Anam dayeb, aab oh am hamu daaglag. Appa danab ah ii daamna.” Yawe Nug anam atte.

³⁰ Haen amu bekku amu, Yawe Nug Juda danab ah amelagppa inam akku. “O Juda danab ah, kekeɗ ag uɗin, ag eheɗ hattana daatteb amunu, ag eheɗ amu aoppig ele, ag aakku aɗi hetteb? Am imu bia. Ib baag ah laa, danab laa ag nuhignu ena doon, nuhig hak attenppa ag eɗun, nuhignu eheɗ doon, ag baula eɗun nuhignu ena dooglagnu nug lamen kokoɗnab tagakka, bala ena ena ele ma, nug amegppa bala, kala ena ele mette. Ib baag ah nug danab amu ag eɗun, nuhignu ena dooglagnu anam hette, amge danab ag nuhignu oolag huana nauhtte amunu, ag nuhig hak amu ohnu ii dabmemana, amubia ag Juda ag ahilag kekeɗ ag eɗun, ahilagnu ena iinab doon, ahilag kekeɗ daanna, aqappeg mauhkkulagnu hetteb,” awa akku.

³¹ ⌊O gadon tuleglegppa da⌋ gayak doottem. Da ah nug nid tatamnu aokkunu haaha, ewawa aiqagatte, da gayak amubia doottem. Da gayak doottem am, ag Juda danab ah, ahilag. Ah laa nug laa ehanidkkunu eppeg bahia, “O gadonnab gadon, da mauhkkulnu hettem. Da danab nau eppelagppa daaiyi, ag heppeg mauhkkulnu hettem,” atte amu, ag Juda danab ah ag amubia daatteb doomi.