Jeremaia 39 - Nobonob Baibel

Babilon dilag daup ag Jerusalem eɗidna aoppig

¹ Babilon ag Jerusalem eɗidppignu kaya am iikku. Sedekaia nug Juda dilag king abenab awa, nuhig king dayaknu maɗ eblaih waɗelenu kalam eblaih laih eleppa Nebukatnesar nug nuhikkud daup oh ele ag Jerusalem aoglagnu wana, aab amu oo mettan, aqaglagnu maadna daappig.

² Ag anam daan heeg ukke, Sedekaia king dayaknu maɗ 11ppa, kalam ebqak waɗele, kalam amunu deɗ eblaih waɗeleppa Babilon ag aab okkainu aɗ amu heeg, giɗo naɗi dayom.

³ Giɗo anam daye, Babilon dilag kingnu ehanittak anuqak danab imu ag ooppa gona, aɗnu od laa onig Gamagppan Od, ag aguppa heɗep nena daappig; Samgar danab onig Nergal Sareser, ban daup ikki anuqak laa onig Nebo Sarsekim, kingnu ehanittak anuqak danab okkai okkai laa onig Nergal Sareser, amu Babilon dilag kingnu ehanittak anuqak danab laa oh ele.

⁴ Babilon dilag danab okkai amu ag anam heeg, haen Juda dilag king Sedekaia, Juda dilag daup oh aab okkai amu ooppa daappig ele ag amu anidna amu, ag tuqan amuppa king omeppa wana gona, aabnu aɗ laih laih doa qal mettak daapiɗ oɗeppa wana, dimittim gona, ag oolna, atu onig Araba, ag appa gokkulagnu goppig.

⁵ Ag anam oolppig, amge Babilon dilag daup ag dim lamadna gona, Sedekaia nug uɗem okkai Jeriko guguittak appa ugekke, ag nug qe-eɗidna aɗappig. Ag aɗan, Babilon dilag king nug Hamat wanppa aab onig Ripla appa dayom amunu, daup ag Sedekaia aon gona, appa Nebukatnesar eppegppa meeg, nug ag nuhignu aɗi aɗi hekkulagnu aum.

⁶ Babilon dilag king nug a, Ripla appa Sedekaia noobppa ag Sedekaia bekkod oh aqaeg mauheg, Juda dilag anuqak danab oh ele aqappig.

⁷ Amu heeg, Nebukatnesar nug a, ag Sedekaia ameg laih laih oh ahuɗeg nauhe, ag nug qakkaknu keeke brasppa hak, ag amuppa nug qakkona, ag aon, Babilon wanppa gokkulagnu qagappig.

⁸ Appa ag Sedekaianu anam heppig, amge Babilon daup Jerusalem daappig amu, ag kingnu lag enanagnab manaeg ewe, danab ah laulkad ele manatteg ewegeg, ag aab aɗ ele loppaɗeg, nauhakib dayom.

⁹ Babilonnu daup laa onig Nebusaradan, nug daup Nebukatnesar gumappig dilag okkai amu, ⌊nug appa uɗat gumappig amu⌋, nug a, daup ag Juda danab ah Jerusalem daappig, ag oh, amu Juda danab ah laa ag matu gona, ag akka ag beɗulag Babilon daup eppelagppa meppig ele, ag amu ele oh diin ukkaeg, ag Babilon wanppa diia ukka laih me dayak danab ah daappig.

¹⁰ Amge Nebusaradan, nug daup Nebukatnesar gumappig dilag okkai amu, nug he, Juda danab ah daɗeknab, ag keeke iitta ele, nug ag daaglagnu uuatta he, ag dad okkai, grep dad daappig ele aoeg, ahilagnu daappig.

¹¹ Amge amu oh ii nak haenppa, Babilon dilag king Nebukatnesar nug Nebusaradan, nug daup Nebukatnesar gumappig dilag okkai amu, nug nug amegppa Jeremaianu haknunab anak imu ab, daup ag dooglagnu nug amegppa aum.

¹² “Ag Jeremaia mattin anidna, ag nug aon, nug atognoig! Ag nug guittak nakok laa aib medappig. Nug ag nuhignu aɗi hekkulagnu ag amelagppa ab, ag aum bia heig!” awa aum.

¹³ King Nebukatnesar nug anam aum amunu, Nebusaradan, nug daup Nebukatnesar gumappig dilag ikki, amu Nebusasban, nug ban daup ikki anuqak laa, aria Nergal Sareser, nug kingnu ehanittak anuqak danab okkai okkai laa, amu Babilon dilag kingnu daup dilag okkai laa oh ele

¹⁴ ag heeg, laa ag gona, Jeremaia nug daup Juda dilag king gumappig laulag haɗap-ppa maniguittak dayom amu, ag nug appanu aoeg, Babilon dilag okkai amu ag Jeremaia, Ahikam bekka Gedalaia eppegppa menana, ag nug amegppa nug Jeremaia ehanitteb, nug eɗua nug laugppa gokkunu appig. Ag anam appig amunu, Jeremaia nug Juda danab Juda wanppa daappig, Babilon appa diia ukka laih me dayak danab ah ii goppig, nug ag ele daappig. Gedalaia nug am Sapan alag.

¹⁵ Amu Jeremaia nug daup ag king gumappig laulag haɗap-ppa maniguittak dayom, haen amuppa Yawe Nug nuhig nai imu Jeremaia mettom.

¹⁶ “Na ahan gona, Kus danab Ebetmelek amegppa inam appe doyaɗ! ‘Yawe Nukka Ɠagattag Oh Ele, Nug Israel dilag Kayak, Nug inam atte. “Da matu aab okkai imuam nauhakib daakkunu, ena ii daamanu ami. Da anam ami, amu haen elab iitta, da heppi, nai amu meu okku. Haen amuppa na amenppanab nai amu meu oobob anidkkut,” awa atte.

¹⁷ Yawe Nug anam anana, Nug imu ele atte. “Amge nahipnu amu, da ehanidppi, na baɗadttem ele amu, laa ag na amu eppelagppa ii meidppeg daamna.

¹⁸ Aɗinu? Na dahilnu ootppa genab doottem amunu, da ehanidppi, na qep elabppa ii mauhmana. Nahip keeke am padal mekku amge na ii mauhmana.” Yawe Nug anam awa atte.’ ” Yawe Nug Jeremaia amegppa anam aum.