Jeremaia 37 - Nobonob Baibel

King Sedekaia nug Jeremaia Kayak unuqidkkunu oɗ mettom

¹ Amu Jehoiakim Juda dilag king daye ukke, nug bekka Jehoiakin nug abenabppa king ba dayeye, Babilon dilag king Nebukatnesar nug he, Josaia bekka Sedekaia nug king abenab awa, Juda dilag king dayom.

² Amge nug, nuhikkud ehanittak anuqak danab, amu Juda danab ah ele ag Yawenu nai Nug propet Jeremaia oɗeppa mattiom amu, ag daulag human, nai amu ii dabmedappig.

³ Ag nai amu ii dabmedappig, amge King Sedekaia nug Selemia bekka Jehukal, amu Masea bekka Sepanaia, nug mana mettak danab, nug ele aa nuhig nai aoya goya, propet Jeremaia amegppa, “Na Yawe, Nug ihinig Kayak, na Nug ig ehanigkkunu unuqidkkutnu oɗ medattem,” akkulahnu maate gopiɗ.

⁴ Haen amuppa ag Jeremaia maniguittakppa ii meeg dayom amunu, nug adeppa adeppa danab ah gumatta oikkunu gun laa ii dayom.

⁵ Babilon dilag daup ag Jerusalem oo mettan, aqaglagnu maadna daaegeg, Paro am nuhikkud daup ele ag ahan uɗiglagnu uɗiegeg, Babilon dilag king, nuhikkud daup ele ag nai doon, ag Isip ele ban hekkulagnu ahan, Jerusalem uun goppig, haen amuppa Sedekaia nug nai amu Jeremaia dookkunu me ukkom.

⁶ Amu haen amuppa Yawe Nug nuhig nai imu propet Jeremaia mettom.

⁷ “Da, Yawe, da Israel dilag Kayak, da inam attem. Aa eɗuya goya, Juda dilag king, nug aa dahil nai aoya gopeɗ dookkunu maate uɗipiɗ amu, aa nug amegppa inam apeɗ doyaɗ! ‘Paro, nuhikkud daup ele, ag uɗin ehanidkkulagnu Isip wan uun uɗitteb amu, ag eɗun, ahilag wanppa Isip, appa gokkulag.

⁸ Ag eɗun goppeg, Babilon daup ag eɗun uɗin, aab imuppan danab aqaglagnu ban hena, ag aab okkai imu eɗidna aon, manappeg eokku,’ ” awa atte.

⁹ Yawe Nug anam anana, Nug imu ele atte. “Ag agakka hambuppualadmananu, ag, ‘Babilon ag genab hamu uuigna gokkulag,’ aib anam dabmeppig. Aɗinu? Babilon ag anam iinab hemana.

¹⁰ Ag Juda, ag imu ii hemana, amge Babilon daup ag aab imuppan danab aqaglagnu ban hetteb amu, ag Juda ag ahan, ag eɗadna, kuɗumnab aqappeg mauhlob, laib laib guittak okkai eleib ahilkad peh lagppa daalob, laib laib anam ag appan ahan uɗin, ag Juda eɗadna, aab okkai imu manappeg eolo.” Yawe Nug anam atte.

Danab okkai ag Jeremaia maniguittakppa meppig

¹¹ Amu Babilon daup ag, “Paro, nuhikkud daup ele uɗitteb,” doon, ag ahan, Jerusalem uun, ag ag ele ban hekkulagnu goppig, amu dimppa

¹² Jeremaia nug Benyamin wanppa ukka, nuhig aab ikkinu wan ooppa wan laa nuhig daakkunu dayom, nug amu aokkun gokkunu dabma aha, Jerusalem uua gokkunu ukkom.

¹³ Nug anam heum, amge haen nug aabnu aɗ od laa onig Benyamin od, nug appa ta, aab dimittim gokkunu ukke, daup od amu gumappig ele dilag okkai Iriya, nug Jeremaia aɗom. Iriya mameg am Selemia, nug alag am Hanania. Iriya nug Jeremaia aɗa, nug aum. “Na ahan, Babilon daup gumadna goppe, ag ele daaglagnu hettem,” awa aum.

¹⁴ Iriya nug anam a, Jeremaia nug eɗua, nob ma aum. “Iitta. Da Babilon gumatte goppi, ag ele daagnignu ii gottem,” awa nob ma aum, amge Iriya nug nuhig nai am dookkunu uua, Jeremaia aɗa, awa ukka, Judanu king, nuhig ehanittak anuqak danab eppelagppa meum.

¹⁵ Nug eppelagppa me, ⌊ag nug Jeremaianu nai aum am doon,⌋ ag oolag nauhe, ag heeg, laa ag Jeremaia ad mahappa makkuɗeg, ag Jeremaia aon gona, nai yaak danab Jonatan laugppa meppig. Aɗinu? Okkai danab ag matu heeg, lag amuam maniguittak lag dayom.

¹⁶ Amu lag Jeremaia maniguittak nau gatatu eleppa meeg, haen elab nug appa dayom

¹⁷ Jeremaia appa haen elab daye, dimppa King Sedekaia nug laa me, nug ukka, Jeremaia omala, Sedekaia dayomppa ukkom. Aria, Jeremaia nug Sedekaia toppa daye, Sedekaia nug laa ii daaegeg, aya daayya, nug oɗ mettom. “Yawe Nug nai laa a doomete,” awa oɗ mettom. Oɗ mette amu Jeremaia nug aum. “Ao, Yawenu nai laa daatte. Yawe Nug heeb, na Babilon dilag king eppegppa daakkut,” awa aum.

¹⁸ Jeremaia nug anam awowa, nug King Sedekaia amegppa tuɗitta aum. “⌊O king,⌋ da aɗi kobol eheɗ laa nahipnu, o nahipad ehanittak anuqak dilagppa, o Juda danab ah dilagppa hemi amunu, na hee, da maniguittakppa daattem?

¹⁹ Propet laa ag dimppa aɗi bekkunu nai genab iitta mattina, ag na amenppa, ‘Babilon ag uɗin, na nittaglagnu, wan imuppan danab ah ele aqaglagnu ban ii hemana,’ appig amu, ag gemu adeppa daatteb?

²⁰ Amge, o dahil naɗi, na king, gadon, na dahil nai dookkutnu oɗ medattem. Na uuiɗppe, na dahilnu keeke laa hekkutnu oɗ medakkulnu ool daatte. Na heppe, da nai yaak danab Jonatan laugppa eɗue ii gopanu oɗ medattem. Da eɗuen, appa gokkul dayeb amu, da mauhkul,” awa aum.

²¹ Jeremaia nug anam a, King Sedekaia nug he, danab king gumappig laulag haɗap-ppa, amuppa ag Jeremaia meeg dayom. King nug anam ana, nug ag ib onig Keeke Manaknu Ib, ag appanu deɗ anen anen bret maha laippu aon, Jeremaia mettaglagnu ele aum. Ag anam hebeppeg ukkeb ukkeb, bret aab okkai amuppa iitta meeb, haen amuppa bataglagnu aum. Nug anam aum amunu, Jeremaia nug king gumappig laulag haɗap amuppa dayom.