Jeremaia 36 - Nobonob Baibel

King Jehoiakim nug buk itoɗiak ele Jeremaia tatam yom amu, nug buk amu amote ewom

¹ Josaia bekka Jehoiakim, Juda dilag king, nug king abenab awa, nuhig king dayaknu maɗ waɗele ooppa Yawe Nug Jeremaia nai laa mette doyeye, Nug aum.

² “Jeremaia, na buk itoɗiak ele laa aon, da aɗi nai kuɗum na amenppa Israel wan, Juda wan, amu wanppan wan laa oh ele dilagnu ain malami amu, na buk amuppa ye! Da Josaia king daye digmein, na amenppa ai uɗie uɗie, gemu batak nai mattimi amu, na nai amu ohnab buk amuppa ye!

³ Na anam buk amuppa yaappe, Juda danab ah ag uug naunab digdig da heppi, ahilagppa bekkunu da maittak aomi doon, ag anen anen ag nau hak ahilag uuglagtai. Ag anam nau hak ahilag uuglag dayeb amu, da ahilag nau hak, ahilag hipunin ele uhuqen madakkul.” Yawe Nug Jeremaia amegppa anam aum.

⁴ Yawe Nug Jeremaia amegppa anam aum amunu, Jeremaia nug Neria bekka Baruk onigppa e uɗia dayeye, Yawe Nug nai oh Jeremaia amegppa mattiom amu, Jeremaia nug nai amu Baruk amegppa mattieye, Baruk nug buk itoɗiakppa yom.

⁵ Nug anam mattia male, Baruk nug nai amu oh ya male, Jeremaia nug amegppa aum. “Danab okkai ag da Yawenu mettid lakka gokkulnu aib aeg, da appa gokkulnu elele iitta

⁶ amunu, na da abenal aon, appa gokkutnu ool daatte. Na ee ohnu kud ma dayaknu deɗ laappa, na deɗ amuppa buk na Yawe nai ippuniɗe, da ai, na yaame imu amu, na buk itoɗiak amu aon, Yawenu mettid lag, na amuppa gona, danab ah appa daatteb ele dooglagnu na buk amuppan nai ebqekkut. Juda danab ah ag ahilkad aab anen anennu uɗitteb ele amu, na ag amelagppa ebqeppe, ag doyeg!

⁷ Yawe Nug danab ah imu dilag haknu oo nauhe, oppoɗi beum daatte; ag bu okkainab aoglagnu daatteb atte amunu, na ebqeppe, ag doon, ag anen anen ag Yawe unuqidnana, ag nau hak ahilag uuglagtai,” awa aum.

⁸ Jeremaia nug anam a, Neria bekka Baruk nug propet Jeremaia nug hekkunu aum bianab heum. Nug Yawenu mettid lakka ukka, appa nug Yawenu nai buk itoɗiak amuppa dayom amu, nug amu ebqeum.

^9-10 Deɗ nug ukka ebqeum ele, deɗ amuam inam. Josaia bekka Jehoiakim, nug Juda dilag king, nug king abenab awa, nuhig king dayaknu maɗ tanig elenu kalam eblaih waɗeleppa okkai danab ag deɗ laappa Jerusalem danab ah oh, Juda danab ah ag Juda aab laalappan uɗin, Jerusalem daappig, ag oh Kayak noobppa ee ohnu kud mena daaglagnu appig amu, Baruk nug deɗ amuppa Yawenu mettid lakka ta, Jeremaianu nai oh buk itoɗiakppa dayom ele ebqeum. Yawenu mettid lagnu mana mettak danab dilag haɗap-ppa, lag ooppa ukkaknu od bauppa oo laa daatte, oo amuam Sapan bekka Gemaria, nug am nai yaak danab amu, nuhig aakku, amu Baruk nug oo amuppanu, nai amu danab ah oh dooglagnu ebqeum. Gemaria nug amu qagmaknu nai bukppa yaaknu danab.

¹¹ Baruk nug appa dayaya, buk itoɗiak amu ebqeeqe, Sapan alag Mikaia, nug am Gemaria bekka, nug Yawenu nai buk itoɗiakppa daye doyeye,

¹² Baruk nug ebqa male, Mikaia nug aha, kingnu lag enanagnab, appan nai yaak danabnu oo laa, nug oo amuppa ukkom. Kingnu ehanittak anuqak danab oh ag aguppa daappig. Ag daappig ele am nai yaak danab Elisama, aria Semaia bekka Delaia, Akbor bekka Elnatan, Sapan bekka Gemaria, Hanania bekka Sedekaia, amu kingnu ehanittak anuqak danab laa oh ele.

¹³ Mikaia nug appa ukka, nug ag amelagppa Baruk nug danab ah dooglagnu buk itoɗiak eleppa nai ebqe dooppig amu, nug nai amu oh ag amelagppa mattie dooppig.

¹⁴ Ag amu doon, kingnu ehanittak anuqak danab ag Netania bekka Jehudi, nug alag am Selemia, dokkiab am Kusi, ag nug ukka, Baruk amegppa, “Na buk itoɗiak ele na danab ah amelagppa ebqeme ele amu, na buk amu aon do!” akkunu meeg ukkom. Ag meeg ukka, Baruk amegppa anam aum amunu, Neria bekka Baruk nug aha, buk amu aɗaɗa, ag gumatta ukkom.

¹⁵ Nug appa ukka te, ag nug amegppa appig. “Na heɗep nena daan, buk amu ebqeppe doognignu oonig daatte,” appig. Ag anam appig amunu, nug aakku ebqeum.

¹⁶ Nug ebqa male, ag nai amu oh doon, ag nug neekkidnana, baɗan, ag Baruk amegppa appig. “Ig king nai imu oh dookkunu ig akkunigoitte!” aon appig.

¹⁷ Ag amu anana, ag Baruk oɗ medappig. “Na nai amu oh yaame amu, diig attemun? Jeremaia nug a doon yaamete? Na appe doognig!” aon appig.

¹⁸ Ag anam oɗ mettaeg, Baruk nug aum. “Ao, nug nai imu oh mattieye, da buk itoɗiak eleppa inkppa aakku yaami,” awa aum.

¹⁹ Baruk ag amelagppa anam a, ag nug amegppa appig. “Na Jeremaia ele aa goya, aben adekkuppa aa lokkumak dayeɗ! Laa nug aa adekkuppa daattep amu, aa aibnab ippunidpiɗ!” aon appig.

²⁰ Kingnu ehanittak anuqak danab ag Baruk amegppa anam awona, ag buk itoɗiak ele amu qagmaknu nai yaak danab Elisama, nug king laugppa oo laappa uɗat hette, ag buk itoɗiak ele oo amuppa mewona, ag king gumidna goppig. King nug nug laugppa oo laa haɗap heqoppa dayom amu, nug appa dayom. Nug appa dayeye, ag nug gumidna gona, ag keeke amu ohnu nug amegppa mattieg doyom.

²¹ Ag aeg doya, nug Jehudi nug buk itoɗiak ele amu awa dokkunu me, nug ukka, buk amu awa uɗiom. Buk amuam king laugppa oo laappa, nai yaak danab Elisama, nug oo amuppa uɗat hette ele, nug buk amu oo amuppanu awa doa ebqe, king, am nuhikkud ehanittak anuqak danab oh king guguittak hippaidna daappig ele, ag oh dooppig.

²² Amuam kalam eblaih waɗele, oug haen amunu, oo king nug dayomppa, oo amuam oug haenppa dayaknu oo. Anam dayom amunu, oo amuppa ag aen tappiɗ nakokppa aab ilaeg ewewe, king nug aab uɗikka dayom.

²³ King nug aab anam uɗikka dayeye, Jehudi nug buk itoɗiak ele ebqaaqa, nug maha ewam o waɗele ebqa male, king nug buk amu awa, qep nagppa maha ebqa malom ele okkula awa, aabppa buɗie te ewewe, Jehudi baula maha ewam o waɗele ebqe, nug baula anam heum. Anam heeh ukke, king buk oh aabppa mane ewom.

²⁴ King, nuhikkud ehanittak laa nug ele daappig amu, ag nai amu oh dooppig, amge ag ii baɗappig. Ag eheɗ heppignu ahilkad lamen ele ii pattiɗppig.

²⁵ King, laa ele ag hamu bia doyeg, king anam heehe, Elnatan, Delaia amu Gemaria ag genab king nug heum bia hemananu, nug buk itoɗiak ele maneb ii eomanu nug amegppa appig, amge nug ahilag nai dookkunu uua, ii doyom.

²⁶ King nug danab ewam dilag nai doya, kobol ena laa ii heum. Iitta. Nug nug bekka laa Jeramel, Asriel bekka Seraia, amu Apdel bekka Selemia ele, ag ahan gona, yaak danab Baruk, amu propet danab Jeremaia ele aɗalatna, maniguittakppa maatkkulagnunab amelagppa aum. Nug ag amu hekkulagnu aum, amge Yawe Nug danab aɗit amu lokkumatom amunu, ag mattialatna anatkkulagnu elele iitta.

²⁷ Aria, nai Jeremaia a, Baruk buk itoɗiak eleppa yom amu, king nug buk amu mane ewe, dimppa Yawe Nug nuhig nai imu Jeremaia mettom.

²⁸ “Jeremaia, na buk itoɗiak ele laa aon, nai buk itoɗiak tatamnuppa yaak dayom, Juda dilag King Jehoiakim mane ewom ele amu, na nai amu oh buk laa amuppa ye!

²⁹ Na nai amu oh buk itoɗiak ele laappa yona, na Juda dilag king Jehoiakim amegppa inam appe doyaɗ! ‘Yawe Nug inam atte. “Na buk itoɗiak ele laa amu manae ewe, na ame. ‘Jeremaia, aɗinu na Babilon dilag king nug genab uɗia, wan imuppa ban ha heeb, wan nauhakib dayebeb, ippa danab, doɗ ele ii daamna buk amuppa yaame?’ aon ame.” ’ ” Jeremaia nug nai amu doyom.

³⁰ Jeremaia nug nai amu doya, nug nai imu ele doyom. “Anam amunu, da Yawe, da Juda dilag king Jehoiakimnu inam attem. ‘Nug buɗubppan laa nug Dawitnu sia kingppa heɗep na dayaya, king daakkunu laa ii daama. Laa ag Jehoiakim qeppeg mauheb, ag nug gaɗa buɗippeg, dimittim na, wanppa dayebeb, amunppa aam qeeb, tuqan am oug nau qekku.

³¹ Da nug, nug bekkod amu nuhikkud ehanittak danab laa, ag nau heppig amunu, nau hak amunu da ag bu madakkul. Da Jehoiakim aɗi dilagppa, danab ah Jerusalem daatteb, amu Juda danab ah ele, da uug naunab digdig ahilagppa hekkulnu ami amu, uug amu oh, da heppi, ag aakku bekkulag. Ag dahil nai dooglagnu uun ii dooppig amunu, da anam aakku hekkul.’ ” Yawe Nug anam aum.

³² Yawe anam a, Jeremaia nug nai amu doyom amunu, nug buk itoɗiak ele laa awa, Neria bekka Baruk, nug am yaak danab, nug mette awe, Jeremaia nug nai mattieye, aakku nug bukppa yom. Buk itoɗiak laa tatamnu, buk amuppa nai oh daye, Juda dilag king Jehoiakim aab aɗuppa mane ewom ele amu, nug nai amu oh buk imuppa eɗua yom. Nug amu ye, Jeremaia nug nai laa amubia kuɗum laa ele tuɗitta a ne, nug amu ele yom.