Jeremaia 35 - Nobonob Baibel

Rekap buɗub dilag nai

¹ Josaia bekka Jehoiakim, nug Juda dilag king, nug king dayeye, Yawe Nug Jeremaia nai laa mette doyeye, Nug aum.

² “Na ahan gona, na Rekap buɗub ag Yawenu mettid lag, amuppa heqo laih oo laala daatteb, ag appa oo laappa na ele qagmena daaglagnu oɗ madakkut. Na amu heppe uɗippeg, na wain laa ag lakkulagnu matte!” awa aum.

³ Yawe Nug anam aum amunu, da, Jeremaia, da ahe, Habasinia alag Jasania, nug mameg am Jeremaia amu, da nug, nug amakkud, amu nug bekkod ele, ag Rekap buɗub aakku, da ag omaladppi uɗiglagnu gomi.

⁴ Da ukken, omalatte uɗien, da Yawe laug heqo laih oo laa, oo amuam Kayaknu danab laa onig Igdalia bekka Hanan bekkod dilag oo amu, da oo amuppa temi. Igdalia nug am Kayaknu danab. Oo amu heqo laih amu kingnu ehanittak anuqak danab dilag oo dayom. Oo amu waappa Salum bekka Maseanu oo dayom. Masea nug laugnu od gumom.

⁵ Da omalatti, ag uɗin daaegeg, da tappiɗ laala wain ele, kap ele awen, Rekap buɗub amu noolagppa mein, da ag amelagppa ami. “Ag wain aon laig!” awe ami.

⁶ Da anam ami, amge ag appig. “Ig wain ii lattem. Aɗinu? Anukka ig mamenig laa, nug am Rekap bekka Jonadap, nug haknunab nai imu ig mekkom. ‘Ag amu, ag buɗulkad ele ag wain aib lappig!

⁷ Keeke laa amu, ag lag ii buuadmana, ee ii eppamna, grep ele ii eppamna. Ag keeke amu aɗan ii oimna. Iitta. Ag hanhan peh lagppaib daanna oiglag. Ag oiyeb oiyeb danab anam daanna, ag haen elab wan ag daattebppa daaglag,’ awa aum.

⁸ Nug anam aum amunu, ig Jonadap, nug am Rekap bekka, ig mamenig anukkanu, ig nug ɗo oh ig mekkom amu, ig ɗo amu oh dim lamidtata, gemu ele hettem. Ig, amu ig waankad, ig bekkankad, amu ig aɗenkad ele ig oh wain nakok laa ii lamut.

⁹ Ig lag ele amuppa daagnignu ii buumut, amu ig grep dad, eenu dad ele iitta. Ig ee eppak laa ele ii hemut. Iitta.

¹⁰ Ig peh lagppaib daaut uɗie, gemu ele anamib daattem. Ig mamenig anukkanu, Jonadap, nug haknunab anak amu ig mekkom, amu aakkuib ig iikku dim lamidttem.

¹¹ Ig mamenig anukkanu anam haknunab anak amu mekke, ig dim lamittutut uɗie, gemu ele hettem, amge Babilon dilag king Nebukatnesar nug wan imu aokkunu nuhikkud daup ele ban hekkulagnu uɗin, wan imuppa beeg, ig amut. ‘Ahappeg, ig Babilon dilag daup, Aram dilag daup ele eppelagppa daamtanu, ig gota, Jerusalem appa teta, nakok daagnig,’ amut amunu, ig uɗit, ippa Jerusalem iikku daattem.” Rekap buɗub ag Jeremaia amegppa anam appig.

¹² Rekap buɗub ag anam aeg, Yawe Nug nuhig nai imu Jeremaia mettom.

¹³ “Da, Yawe Dakka Ɠagattag Oh Ele, da Israel dilag Kayak, da inam attem. ‘Jeremaia, na ahan gona, Jerusalem danab ah, Juda danab ah laa oh ele amelagppa inam appe doyeg! “Ag kaya imuppa ippunittak aon, dahil nai dim lamidkkulagnu dabmak iite aoglag?

¹⁴ Rekap bekka Jonadap, nug nug bekkod ag wain ii lamananunab ag amelagppa aum, amu ag haknunab anak nuhig aakku dim lamitteg uɗie, buɗub gemu ele dim lamidtteb. Ge, Jonadap nug haknunab anak amu aum amunu, nug buɗub ag digmena, wain ii laeg uɗie uɗie, gemu ⌊nai imu yaak haenppa⌋ ele, ag anamib hetteb. Amge da Yawe, da ag Israel amelagppa haen kuɗum ag aɗi aɗi hekkulagnu nai mattii, ag da oɗel ii dim lamidna, gemu ele ii hetteb.

¹⁵ Da haen kuɗum dahilad maɗi nid, ag propet amu, da ag maatti, ag gona, ag Israel, ag amelagppa inam appig. ‘Ag anen anen ag nau hak ahilag uun, ii henana, ag ena hak henana, ag kayak laa dim lamadna, waappa daan, ag oɗelag dim lamidkkulagnu aib heppig. Ag amu hekkulag dayeb amu, ag haen elab wan imuppa, da wan imu ag mamelkad aɗi mattami amu, ag wan imuppa haen elab daaglag.’ Da propet oɗelagppa haen kuɗum anam ami, amge ag daulag human, nai dahil ii dabmedappig. Ag dahil nai ii dooppig.

¹⁶ Rekap bekka Jonadap buɗub ag mamelag anukkanu, ag nuhig haknunab anak dim lamitteg uɗie, gemu ele hetteb, amge Israel danab ah, Juda danab ah ele, ag dahil nai ii dim lamittegeg uɗie, gemu ele ii dim lamidtteb.” ’ ” Da Yawe da anam attem.

¹⁷ Ag amu hetteb amunu, da, Yawe, da am Kayak Dakka Ɠagattag Oh Ele, da Israel dilag Kayak, da attem. “Doyeg! Da heppi, uug naunab oh, amu da Jerusalem danab ah oh dilagppa, amu Juda danab ah laa oh ele dilagppa bekkunu ami amu, uug amu oh am bekkulag. Da ag amelagppa nai mattimi, amge ag daulag ii human dooppig. Da ag onilagppa emi, amge ag nai nob laa ii meɗappig.” Da Kayak, da anam awe attem.

¹⁸ Yawe Nug Jeremaia amegppa anam a, Jeremaia nug Rekap buɗub amelagppa inam aum. “Yawe Nukka Ɠagattag Oh Ele, Israel dilag Kayak, Nug atte. ‘Ag mamelag anukkanu Jonadap, ag nuhig haknunab anak dim lamidna, ag aɗi aɗi hekkulagnu aum amu, ag amu oh dabmenan, anamib hetteb,’

¹⁹ Ag amu hetteb amunu Yawe Nukka Ɠagattag Oh Ele, Israel dilag Kayak, Nug inam atte. ‘Rekap bekka Jonadap, nug buɗub am iitta ii memana. Iitta. Hanhan nug buɗubppan laa nug da waalppa dayaya, da oɗel dim lamidkku,’ awa atte.” Jeremaia nug Jonadap buɗub amelagppa anam aum.