Jeremaia 33 - Nobonob Baibel

Yawe Nug heeb, nuhikkud danab ah ag eɗun, ahilag wanppa daaglagnu aum

¹ Amu Sedekaia nug he, Jeremaia nug daup king gumappig laulagnu haɗap-ppa maniguittak dayeye, tatam Yawe Nug nuhig nai laa Jeremaia mettowa, amu dimppa Yawe Nug baula nai Jeremaia medatta, Nug nuhig nai imu Jeremaia mettom.

² “Da Yawe, da wan hein, da nuhig abenppa daakkunu memi. Da onil am Yawe, amu da nai imu na, Jeremaia, da na amenppa attem.

³ ‘Juda danab ah, ag da unuqiɗppeg, da unuqittak ahilag nob matten, da keeke okkainab, ag ii dootteb ele, danab ah ag ahilag dabmakppa mattin anidkkulagnu elele iitta, da keeke okkainab amu ag ippunadkkul,’ ” awe attem.

^4-5 Aɗinu? Am genab, ag Juda, ag Babilon ele ban hena, aab okkai imu ooppa domananu, ag lag hamu, kingnu lag enanagnab laala ele loppaɗadna, men, ad keeke aabnu aɗ ɠagattag qettaglagnu uɗat mettaeg, lag daappigppa aben hamu daatte. Amu Yawe, Israel dilag Kayak, Nug lag amunu, aben ag daappignu inam atte. “Da ool nauha, oppoɗil beum daatte amunu, da heppi, Babilon dilag daup ag aab imu ooppa uɗin, danab kuɗumnab aqadppeg mauhadppeg, ag gaɗalag aben amuppa ambak daaglag. Aab okkai imuppan danab ah ag nau hak huanaknab heegeg uɗie, gemu ele hetteb amunu, da ena ii anadpa. Da heppi, nau hak ahilagnu bu nau aoglag.

⁶ Anam, amge qinob da heppi, ag eɗun ena daaglag; danab oɗe ele eɗua ena daatte, ag amubia daaglag. Da danab ah dahilad ehanadppi, ag eɗun ena daappeg, da heppi, ag maɗoɗ, baɗak ele iitta daan, ag oo gamag ahak dooglag.

⁷ Da Juda danab ah, Israel danab ah ele ag wan laalappa diia ukka laih me dayak danab ah gona daatteb, ⌊daaglag ele amu,⌋ da omaladppi, ag eɗun uɗin daappeg, da heppi, ag anukka ɠagattag daappig bia, ag haen amuppa eɗun, anam daaglag.

⁸ Da Israel danab ah, Juda danab ah ele ag dahilppa hipunin heppig amu, da hipunin amu oppien madakkul. Ge, Israel danab ah, Juda danab ah ele ag dahil nai tappaeg neene, dahilppa hipunin heppig amu, da hipunin amu oh uhuqen madakkul.

⁹ Da Israel danab ah dilagppa, Juda danab dilagppa ele anam hewoya, da Jerusalemnu dabmein, da gamag ahak dookkul. Amu wanppan wan ohppan danab ah ag kobol ena ena da Jerusalem appa hekkul anidna, ag onig okkai, binag ele da meɗaglag. Ge, ag da maɗoɗ okkai, enub okkai ele Jerusalem danab ah madakkul anidna, ag dahilnu ebehilag oh bodoetta le meebeb, ag beɗulag hahaɗkku.” Yawe Nug anam atte.

¹⁰ Amu Yawe Nug inam atte. “Na attem. ‘Aben imuam hele-ettak, wan meu waknu nakokib elele, am anam daakku, amu danab, doɗ ele imuppa ii daamna,’ aon attem. Na attem am genab, Judanu aab, aab Jerusalem imu ele nauhakib daaglag, amu danab, doɗ ele ag appa ii daamna, amge da heppi, aben amu ohppa danab ah ag qinob eɗun daanna,

¹¹ ag gamag ahak okkai doon oiglag. Danab ah ele ag ewau matulak aonna, ag gamag ahak doon oiglag. Danab ag Yawe laugppa daan, ena heme anaknu ofa hekkulag. Ag doɗ amu main, Yawe mettanna, ag inam akkulag. ‘Yawe Nug am enaib. Ao, nuhig oo mauhaknab kobol ii iitta mette. Anam amunu, ig Yawe Nukka Ɠagattag Oh Ele, ig Nug amegppa “Ena hen mekkame,” aot atu!’ Ag anam akkulag. Ag anam akkulagnu diig am, da heppi, ag ahilag wanppa enaib daaglag.” Yawe Nug anam awa atte.

¹² Amu Yawe Nukka Ɠagattag Oh Ele, Nug inam atte. “Aben imuam qinob hele-ettak daakku, amu danab, doɗ ele imuppa ii daamna, amge amu dimppa da heppi, sipsip gumak danab ag wan imuppa daappeg, gikkiɗah dad sipsip dilag ele dayeb, gumak danab ag sipsip ahilkad appa atognoadkkulag.

¹³ Amu wan imu ooppa maha laa qauko qauko daatteppa, qauko nakok qauko okkai diigppa daatteb, wan imu ooppa qaban uɗitteppa daatteb, appa, aria, Negeb appa, Benyamin wanppa, aab naunau Jerusalem talilittak daattebppa, amu Judanu aab oh eleppa, aben amu ohppa sipsip gumak danab ag daanna, ahilkad sipsip gumadnana, ag ahilkad sipsip ebaqadkkulag.” Yawe Nug anam awa atte.

¹⁴ Amu Yawe Nug atte. “Deɗ laa uɗitte amu, deɗ amuppa da aɗi nai enanag dahil ɠagattag qetten, Israel danab ah, amu Juda danab ah ele amelagppa ami amu, deɗ amuppa da heppi, meu okku.

¹⁵ Haen amuppa da heppi, danab laa Dawit buɗubppanu bekku; ad diigppa ita bau bette, amubia bekku. Nug am genab tutukku danab. Nug ba, nug wan imuppa hanhan nai doya mala hettoɗia epeɗia elele mettak kobol, kobol tutukku ele, nug amu dim lamidkku.

¹⁶ Aria, haen amuppa da Juda danab ah ehanadppi, ag padal ii memana. Ao, haen amuppa da heppi, Jerusalem danab ah ag baɗak iittappa daanna oiglag. Ag anam daan oippeppeg, danab ah wan ohppanu ag Jerusalem onig laa ele ataɗkkulag. Onig amuam, ‘Yawe Nug am Ihinig Kobol Genab Tutukkunu Diig Daatte,’ akkulag.

¹⁷ Aɗinu ag anam akkulag? Yawe Nug amunu inam atte. ‘Dawit buɗunppanu laa ag anen anen ahilag haenppa Israel dilag king bena, sia kingppa daaglag.

¹⁸ Anam daakku amu, anamib mana mettak danab, ag ele Lewi buɗub amu, ag da noolppa hanhan daan, manaknu ofa, ee aegnu ofa, amu doɗ laala manan meɗaglagnu ele hekkulagnu aakku daaglag. Lewi buɗub ag daanna, uɗat amu hekkulagnu ii iitta memana,’ ” awa atte.

¹⁹ Amu deɗ laa Yawe Nug nuhig nai imu Jeremaia mettom.

²⁰ Nai mette amu, Jeremaia nug inam doyom. “Da, Yawe, da inam attem. ‘Da amahlak hanhan amunppa, nuhig haenppa daakkunu, gatatu hanhan tuqan, nuhig haenppa daakkunu ele nai qakkami, amu laa nug heeb, amun, tuqan ele aa ahilah haenppa ii daaglahnu am elele iitta.

²¹ Aria, amubia, da Dawit buɗub, Lewi buɗub ag mana mettak danab, ag ele, ag oh daanna, da noolppa dahil ɗo maɗoɗnu uɗat hetteb amu, da ag oh ele nug tituanta nai qakkamut, nai amuppa aɗi aɗi daakkunu nai qakkamut amu, laa heeb, keeke amu ii bekkunu elele iitta. Nai amuppa da Dawit, nug buɗub ele ag hanhan king daaglagnu, Lewi buɗub ag hanhan da noolppa dahil uɗat hekkulagnu ami amunu, anamib daakku.

²² Da heppi, dahil maɗi nid Dawit buɗub, amu Lewi buɗub, ag dahil ɗo maɗoɗnu uɗat da noolppa hetteb ele amu, ag appatna daaglag. Ahilag ebqak am hoɗoppai habppa daatteb, o yu ihippa abuɗ niitte bia, ag amubia daaglag.’ ” Yawe Nug Jeremaia nai amu mettom.

²³ Amu Yawe Nug nuhig nai imu Jeremaia mettom.

²⁴ “Jeremaia, na wan laappan danab ag, ‘Yawe Nug Israel danab ah, Juda danab ah ele, Nug ag nuhikkud daaglagnu tituanattom amu, Nug ag geɗatom,’ atteb ele amu, na amu iite doome? Ag amu atteb amunu, ag dahilad danab ah dilagnu ena iinab doon, ag danab ah dahilad dilagnu, ag wan imuppan wan laala oolagppan wan laanu danab ah ii dabmetteb.

²⁵ Anam amu, da Yawe, da amunu inam attem. Da amahlak hanhan amunppa, nuhig haenppa daakkunu, gatatu hanhan tuqan, nuhig haenppa daakkunu ele nai ii qakkami dayeb, habnu, wannu ele attem attem ba gokkunu ɗo ii memi dayeb amu,

²⁶ da Jakop buɗub geɗatten, da dahil maɗi nid Dawit buɗub laa nug Abraham, Aisak, amu Jakop ele buɗulkad gumadkkunu ele ii tituanpa. Amge anam iitta. Da nai amu qakkami, ɗo ele amu memi amunu, da gumadkkunu tituankkul. Aɗinu da amu hekkul? Da Israel, Juda ele dilah danab ah dilag ool gai-iitta doye, ool matten ehanadppi, ag eɗun, wan imuppa uɗin, enaib daaglag.”