Jeremaia 32 - Nobonob Baibel

Jeremaia nug wan maha laa daden meum

¹ Amu Sedekaia nug Juda dilag king dayeye ukke, maɗ eblaih waɗele uue, maɗ eblaih laih oh ooppa, amuam Nebukatnesar Babilon dilag king daakkunu maɗ 18 amu, maɗ amuppa Yawe Nug Jeremaia ⌊wan laa daden mekkunu⌋ nai laa mette doyom.

² Haen nug Jeremaia amegppa amunu aum amu, Babilon dilag king, amu nuhikkud daup ele ag Jerusalem oo mattan, aqaglagnu maadna daaegeg, propet Jeremaia nug King Sedekaia oɗeppan nai bia, nug Juda dilag daup king gumappig ele laulag, lag amuam Juda dilag kingnu lag enanagnab guguittak, nug lag amunu haɗap-ppa maniguittak dayom.

³ Juda dilag king Sedekaia nug Jeremaia maniguittak daakkunu anan, Jeremaia amegppa inam aum. “Na dimppa aɗi bekkunu nai madittem amu, aɗinu na anam madittem? Na dimppa aɗi bekkunu nai mattinna, na danab ah amelagppa inam attem. ‘Yawe Nug inam atte. “Da aab okkai imu Babilon dilag king eppegppa meppi, nug eɗitta aokku.

⁴ Nug aokku amu, Juda dilag king Sedekaia nug ele genabnab genab Babilon dilag daup eppelagppa daakku. Nug uug amu ii eɗidma. Iitta. Babilon dilag daup ag nug aɗan, ag aon gona, Babilon dilag king eppegppa meppeg, nug Babilon dilag king amegppanab antta, noobppa dayebeb, Babilon dilag king aɗi aɗi oɗ mettebeb, nai madikku.

⁵ Nug Sedekaia awa, Babilon ukkeb, Sedekaia appa dayebeb, da nuhigppa aɗi hekkul amu da hekkul,” awa atte.’ Na anam anana, na attem. ‘Yawe Nug anam atte amunu, ag Juda, ag Babilon dilag king, nuhikkud daup ele ban hekkulag dayeb amu, ag Juda ag Babilon ii eɗadmana. Ag nena qekkulag.’ ⌊Jeremaia, na anam eheɗ anan heme amunu, na maniguittak daakkut.⌋” Sedekaia nug Jeremaia amegppa anam aum.

⁶ Amu Jeremaia nug maniguittak dayeye, Yawe Nug wan maha laa daden mekkunu aum amu, Jeremaia nug amunu inam aum. “Yawe Nug nuhig nai imu da, Jeremaia, Nug da meɗom.

⁷ ‘Jeremaia na mamen nakok Salum bekka Hanamel, nug uɗia, na amenppa inam akku. “⌊Uug nau dahilppa be, da men doɗonu tutunab daattem amunu,⌋ da wan maha laa Anatot guguittak meppi, laa daden mekkunu hettem. Na da ele ii tiinih laippunab. Da anam na bia laa iitta. Na da ele ii tiinih laippunab amunu, ihinig ɗoppa na wan amu daden mekkutnu elele daattem, amge amu aakkuib iitta. Ihinig ɗoppa laa daden meeb, wan amu laa eppelagppa daamanu, na wan amu daden mekkutoitte,” ’ ” awa akku.

⁸ Yawe Nug da amelppa Hanamelnu aum amu, anamnab da amal nakok Hanamel nug uɗia, da daup king gumappig laulagnu haɗap-ppa daamippa ba, nug da amelppa aum. “Dahil wan maha laa Benyamin wanppa, Anatot guguittak daatte amu, na ihinig ɗoppa wan amu laa eppegppa dayaknu qagaiettakppanu eɗua uhuqak hekkutnu daattem amunu, laa ag daden memananu, wan amu nahip daakkunu na daden me!” awa aum. Nug anam aum, da amu bekkunu tatam Yawe oɗeppa doomi amunu,

⁹ da wan maha amu daden mein, da amal Hanamel eppegppanu aomi. Wan amuam Anatot guguittak daatte. Da 200 gram silwa awen, wan amu daden mekkulnu Hanamel mettami.

¹⁰ Aun wan amu mameg daattenu pepa amu, da pepa amuppa da onil yaai, danab laala ag pepa amuppa aɗi nai daatte anidna malan, onilag ele yaaeg, da pepa amu itoɗi qe, da pepa amu laa hamu kolamnanu qataqemi. Da qataqein maloya, da silwa amu skelppa mein mettami.

¹¹ Da amu hewoya, da amunu pepa laa qataqak ele, laa amubia amge qataqak iitta, da pepa aɗit amu ohppa aun wan mameg daatte, wan amuppa aɗi aɗi bekkunu elelenu nai dayom amu, da pepa aɗit amu oh awen,

¹² da pepa aɗit amu oh Neria bekka Baruk mettami. Neria mameg am Masea. Da amal Hanamel, laa ag pepa aɗit amuppa aɗi aɗi daatte anidna, onilag yaappig, amu Juda laa lag amunu haɗap-ppa daappig oh ele noolagppa da pepa aɗit amu Baruk mettami.

¹³ Da pepa amu Baruk mettai, laa oh daappig ele ag da neekkiɗna daaegeg, da Baruk amegppa nai imu mattimi.

¹⁴ “Yawe Nukka Ɠagattag Oh Ele, Israel dilag Kayak, Nug atte. ‘Na pepa aɗit imu oh, laa qataqak ele, laa qataqak iitta, aɗit ohppa wan maha daden maknu nai daatte amu, na pepa aɗit imu oh aon, waa ooppa, pepa haen elab ena daakkunu inatna, ⌊waa ameg elelenab qe⌋!’ awa atte.

¹⁵ Aɗinu na anam hekkut? Yawe Nukka Ɠagattag Oh Ele, Israel dilag Kayak, Nug amunu inam atte. ‘Butti aɗi, Israel danab ag wan imuppa daan, lag, wan, grep dad ele meppeg, laa ag daden mekkulag,’ awa atte.” Da Baruk amegppa anam ami.

¹⁶ Da Jeremaia, da pepa aɗit amu Neria bekka Baruk mette male, da Yawe amegppa unuqitten ami.

¹⁷ “O Naɗi Yawe, na ɠagattag nahip-ppa, nakka ebehinppa ele hab, wan ele heme. Aɗi keeke uug ele na hekkutnu elele iitta laa ii daatte.

¹⁸ Na nahip oo mauhaknab kobol dim lamidnana, buɗub buɗub doobob tausen gane batak ehanadttem, amge na danab hipunin hetteb ele bu aqatte ukke, ag buɗulkad menuattak huu laippu bia ewam, o waɗele batak amu, bu qak amunu uug ag ele aqadtte. O Kayak, na onin okkai ele, na ɠagattag ele, na onin am Yawe Nakka Ɠagattag Oh Ele.

¹⁹ Amu na doyak dabmak ena okkai ele nahip-ppa, ɠagattag okkai nahip-ppa ele kobol danab haknu elele iitta hettem. Na danab oh neekkadna, ag aɗi aɗi hetteb amu, na ahilag hak amuppa na ag epeɗiadna, nob eleleib madattem. Laa na ahilag hak anidna, na nob ena madattem, laa na ahilag hak anidna, na nob nau madattem.

²⁰ Anukka na Isip wanppa na nahipnu dabmettaknu kobol danab haknu elele iitta, amu uɗat ɠagattagnab ele hee, uɗie uɗie, gemu ⌊nai imu yaak haenppa⌋ ele, uɗat ɠagattag anamib hettem. Na ig Israel, ig oonigppa heme, danab laa oolagppa ele heme. Na uɗat ɠagattag amuppa danab ah ag na am onin ele doyegeg uɗie, gemu ele, ag dootteb.

²¹ Na nahip ɠagattag okkaippa, na ebehin eleppa na nahipnu dabmettaknu kobol danab haknu elele iitta, amu uɗat ɠagattagnab ele henana, na Israel danab ah omalatte, ag Isip uun uɗippig. Na amu heehe, Isip danab ag eheɗ nau baɗappig.

²² Na Israel omaladna, diin uɗin, wan Israel mamelkad aɗi madakkutnu nahip nai ɠagattag qettan mattime amu, na Israel mattame. Wan memetalkad madakkutnu ame amu, wan amuam wan enanag, wan ittag ele, amuppa ee meu huana otte.

²³ Na ag mattae, ag wan amuppa uɗin, danab daappig eppelagppanu aoppig, amge ag na oɗen ii dim lamidppig, nahip ɗo ele dim ii lamidppig. Ag na aɗi hekkulagnunab ame amu, ag ii heppig amunu, na uug nau imu ahilagppa hee beum.

²⁴ Antte! Kekeɗ ag aab okkai imu eɗidkkulagnu ag wan buun, aon uɗin, gokkaɗegeg beebe, aɗ eleleppa bekkunu hetteb. Aab imuppan danab ah ag qep elabppanu mauhakppa, enugnu mauhakppa, oɗe nau danab kuɗum aqe mauhtteb, mauhak amuppa ele, Babilon ag aab okkai imu eɗidna aoglag. O Yawe, na aɗi keeke bekkunu ame amu, kobol anam aakku beebe na anidttem.

²⁵ Anam amu, na ame bia na heppe, Babilon ag aab okkai imu ag eɗidna aoppeg, ag eppelagppa daakku. Anam daakku, amge O Naɗi Yawe, na da amelppa, ‘Wan maha laa silwappa daden mewona heppe, laa amunu hak pepappa yaak anidna, ag onilag ele yeeg!’ ame amu ⌊da amunu diig tutukku ii doottem⌋.” Da Jeremaia, da unuqitten anam ami.

²⁶ Jeremaia nug anam a, Yawe Nug nuhig nai imu Jeremaia mettom.

²⁷ “Da am Yawe. Da danab oh dilag Kayak daattem. Keeke laa haknu uug nau ele amu, uug amu nug da eɗile, da hekkulnu elele iitta daattemte? Iitta!” awa atte.

²⁸ Anam amunu, Yawe Nug atte. “Haen elab iitta da heppi, Babilon dilag king Nebukatnesar, nuhikkud daup ele ag aab okkai imu eɗidna aoppeg, ag eppelagppa daakku.

²⁹ Babilon daup, ag gemu aab okkai imuppan danab ah aqaglagnu ban hetteb, ag aab okkai imu eɗidna, ooppa uɗin, maippeg eokku. Ewebeb, Jerusalem danab ah ag lag laala koɗokkoppa tena, appa ag kalu danab ile muttuɗig enanag bette ele main, kayak hambuppuak Bal mettona, ag wain gokkaɗaknu ofa kayak hambuppuak laala dilagnu ele heeg, da oppoɗil beum amu, Babilon dilag daup ag lag amu ele maippeg eokku.

³⁰ Israel huu, Juda huu ele ag memetalkad anukkanab, ag digmena, kobol digdig, danab nug kobol amu hette nug da neegttemppa eheɗ hette amu, ag kobol amu aakkuib heegeg uɗie, gemu ele hetteb. Genab, ag eppelagppa kayak hambuppuak dottolkad bappaidna, ag heegeg, da oppoɗil beum daatte.

³¹ Danab ag Jerusalem aab kalappignu uɗie, gemu ele appan danab ah ag heeg, da ool nauhe, oppoɗil ele beum amunu, da aab amu da noolppa ii daamanu hekkuloitte.

³² Da heppi, aab amu nauhkku diig am, Israel danab ah, Juda danab ah ele ag eheɗ hak digdig heegeg uɗie, gemu ele heeg, da oppoɗil beum daatte. Ge, ahilag king, king dilag ehanittak anuqak danab, ahilkad mana mettak danab, propet danab amu, Jerusalem danab ah, Juda danab ah laa oh ele, ag oh anamib heegeg uɗie, gemu ele hetteb.

³³ Ag da dimeɗan, ag dahilppa doaknu uuppig. Da ippunittak haen kuɗum ag madakkulnu hemi, amge ag dooglagnu daulag ii human dooppig. Da ag toliatte, bu mattami, amge ag oolag ii eɗuom. Iitta.

³⁴ Ag kayak hambuppuak dottolkad, da keeke amunu oolppa uuaknab doottem, ag dottolkad amu lag da onilppa daatte, ag lag amuppa qappalatteg, lag dahil aakku dahil neekkakppa dubuttid tak ele dayom.

³⁵ Ag oolnu noak onig Hinom Bekkanu Oolnu Noak appa kayak hambuppuak Balnu mettid lag nakok bappaladna, amu aben amuppa ele ag bekkalkad, aɗelkad aqan manadna, kayak hambuppuak Molek medappig. Ag ahilkad nid manadna, kayak hambuppuak madappig amu, da ag kobol amu hekkulagnu iinab ami. Kobol amunu da oolppa uuaknab doottem. Ag amu hekkulagnu dahil dabmak nakok laa iinab dayom. Ag anam hetteb amunu, Juda danab ah ag hipunin hena, bu aoglagnuib daatteb.” Yawe Nug anam atte.

Juda danab ah bu aoglag, amge Yawe heeb, ag eɗun, ena daaglag

³⁶ Amu Yawe Nug atte. “Jeremaia, na aab okkai imunu attem. ‘Aab okkai imuppan danab ah ag qep elabppanu mauhakppa, enugnu mauhakppa, oɗe nau danab kuɗum aqe mauhtteb, mauhak amuppa ele, Babilon ag aab imu eɗidna aoglag,’ aon attem. ⌊Amu Jeremaia, na amu attem am na genab attem⌋, amge da Yawe, Israel dilag Kayak, da attem.

³⁷ Qinob da wan oh, da dahilad danab ah ag ahilag eheɗ hak amunu ool huanak nauhe, oppoɗi bak okkainab ele doyen heppi, kekeɗ ag eɗadna diin, wan atu laalappa goppeg, matatun daaglag ele amu, da wan amu ohppanu qagmaatten omaladppi, ag eɗun uɗin, wan imuppa daaglag. Da ag ehanadppi, ag baɗak iittappa daaglag.

³⁸ Ag dahilad danab ah daaglag, da ahilag Kayak daakkul.

³⁹ Ag, amu ag buɗub dimppa dokkulag ele, ag dahilnu ebehilag oh bodoetta le mekku dayeb amu, ag ena, elele daaglag. Anam amu, ag dahilnu ebehilag oh bodoetta le mekkunu da heppi, ag oolag unuqagppa, ahilag dabmakppa ele ag da noolppaib dup nona, da binal mekkulagnu, ag da oɗelib dim lamidkkulagnu dabmak anam daakku.

⁴⁰ Da heppi, da ag ele ig nug tituana nai qakkak hekkunig amu, nai qakkak amuam hanhan alet daakku. Nai amuppa da hanhan enaib hadakkul; da kobol amu ii tuqe aopa. Ag da dimeɗan, kayak laa dim lamidmananu da heppi, ag dahilnu ebehilag oh bodoetta le mekku.

⁴¹ Da ena hadakkulnu ool gamag ahebeb, da genabnab meul ohppa ena hadappi, ag wan amuppa ee laa datta enanag bette, ag amubia wan imuppa enanag bekkulag.” Yawe Nug anam awa atte.

⁴² Amu Yawe Nug atte. “Da hei, uug naunab imu danab ah imu dilagppa iikku beum daatte, amubia da eɗue, ena hadappi, enanag daaglagnu nai dahil, da nai amu mattie, ɠagattag qettami amu, nai dahil amu ele am meu okku.

⁴³ Jeremaia, na wan imunu attem. ‘Yawe Nug wan imu Babilon danab eppelagppa mekku amunu, wan imuam hele-ettak, wan meu waknu nakokib elele, am anam daakku, amu danab, doɗ ele ippa ii daamna,’ aon attem, amge butti haen adekkuppa danab ag wan imuppa daanna, ag wan meppeg, laa daden mekku.

⁴⁴ Ge, danab ag wan imu ohppa wan maha laala silwappa daden mekkulag. Ag amu hekkulagnu ag pepa bappaidna, danab hette ele nug pepa amuppa nug onig yeeb, laa pepa amuppa aɗi aɗi nai daatte anidtteb ele, ag ele ag onilag yaappeg, ag pepa amu ɗo daatte bia qataqekkulag. Ag Benyamin wanppa, aab naunau Jerusalem talilittak daattebppa, Judanu aab ohppa, wan maha laa qauko qauko daattebppa, qauko nakok qauko okkai diigppa daatteb, aben amuam wan imu ooppa qaban uɗitteppa daatte, aben amuppa, am Negeb appa ele ag anamib hekkulag. Ag amu hekkulagnu diig am da, Yawe, da heppi, ag eɗun, ena daaglag.” Yawe Nug anam awa atte.