Jeremaia 31 - Nobonob Baibel

Israel danab ah ag eɗun Kayak dim lamidkkulag

¹ Amu Yawe Nug atte. “Dimppa, haen laappa amu, da Israel dilag aab ikki ohnu Kayak daappi, ag am dahilad danab ah daaglag,” awa atte.

² Amu Yawe Nug imu ele atte. “Danab ah ag qep elabppa ii mauhkkulag amu, ag atu taɗakppa daappeg, da ahilagnu ii helom bia me, da ehanadkkul. Da uɗien, Israel ehanadppi, ag maɗoɗ ele daaglag,” awa atte.

³ Amu anukka Yawe Nug ig Israel danab gumikka uɗia, Nug mattiaya inam aum. “Da oo mauhak tuqa ii awak eleppa ahilagnu ool mauhom, gemu ele amu hettem. Ao, da oo mauhaknab kobol dim lamittette, dahilppa uɗiglagnu eeɗadmi.

⁴ Da ag Israel danab ah ehanadppi, ag eɗun, ɠagattag daaglag. Ag am ah makkun laa padal mekkunu haaha, eɗua ena daya aha, tambarin eppegppa aɗa, musik haaha, oo gamag ahak okkai ele ahi goɗatte, ag amubia hekkulag.

⁵ Ag Israel baula qauko nakok Samaria guguittak daatteb heqoppa muɗi grep eppaglag. Ge, dad gumak danab ag amu ebappeg, muɗi meu ob, ag meu amu aon lanana, ag oolag gamag ahakku.

⁶ Aɗinu? Amu haen laa dimppa haen laa bekku, amu haen amuppa aɗi uɗitte anittak danab Epraim wanppa, qauko nakok daattebppa daatteb ag, ‘Ahappeg, ig Sion tetu! Ge, ig Yawe, ihinig Kayak, ig Nug gukuidtta gotu!’ aon ekkulag.” Yawe Nug anam atte.

⁷ Yawe Nug ⌊ag Israel ehanatteb, ena daaglag amunu,⌋ Nug inam atte. “Ag Israel, ag oo gamag ahak doon ahi etteg! Ao, ag wanppan wan oh oolagppan wan laa anuqak daatte, ag ⌊Yawe ag ehanattomnu gamag ahak doon,⌋ huana eig! Ge, ag Yawe binag humappeg, laa ag, ag doyatteg! Ag ‘O Yawe, na nahipad danab ah, ag oɗo yaak daatteb amu, na ag padal memananu ehanadkkutnu oɗ medattem,’ aon aig!

⁸ Antte, Israelnu wan laa, yawalti uɗitteppanu daatte, da appanu Israel danab ah diie uɗikkul. Yo, da ag wan batakppanu diie qagmaadkkul. Danab ah kuɗumnab, ag uɗiglag. Kuɗum laa ag beɗulag ena ele, amge laala ag amelag gaɗuak ele, laala ag baelag mauhak ele, laala ag ah oolkad ele, laala amu, ag ah nid menuadkkulagnu miag daatteb ele oh uɗiglag.

⁹ Ag gaanna uɗiglag. Yo, ag unuqiɗppeppeg, da omladppi eɗun uɗiglag. Da ag le daugppa noolag awe anuqe goppi gokkunig. Yo, da ag ib laa tutukku, ib ena, baelag ii qekkulag eleppa omaladkkul. Aɗinu? Da Israel mameg daattem; Israel nug am dahil nid danab tatamnu daatte.” Yawe Nug anam awa atte.

¹⁰ Danab ah wanppan wan ohppanu ag daulag human, Yawe aɗi atte amu doyeg! Ag doon, amu appeg, danab ah wan laalappa daatteb ag doon autna aoglag. Nug Israel danab ah matatun goppig ele eɗua diia, laippu qagmaadkku, aon appeg doyeg! Yo, Nug sipsip gumak danab laa sipsip nuhikkud dabmadatte bia ag dabmadakku.

¹¹ Aɗinu? Yawe Nug Israel danab ah qagaiettakppa daamnanu uhuqadkku. Ao, Nug nuhikkud danab ah kekeɗ ɠagattag eppelagppa dayaknu qagaiettakppanu eɗua uhuqak hekku.

¹² Israel danab ah ag oolag huana gamag ahakku amunu, ag Sion qaukoppa tena, ag qalan ahi ettaglag. Yo, Yawe Nug ag keeke ohnu madakku amunu, ag oolag huananab gamag ahakku. Nug ag ee aeg, wain bau, amu olip goɗen ele madakku. Nug heeb, sipsip, makau ele nalkad kuɗumnab menuadkkulag. Dad, gu ele awawa, meu huana otte, amubia ag elele daaglag.

¹³ Haen amuppa, nid ahin bau ag oolag huana gamag aheb, ag goɗaglag. Yo, danab bau, amu danab kaino ele ag oolag huana gamag ahakku. Yawe atte. “Ag oolagppa uug doon mahiglag, amge da ag gamag ahak madakkul. Ao, ag oo doyak dooglag, amge da heppi, ag oolag meeb, oolag gamag ahakku.

¹⁴ Da heppi, mana mettak danab ag ee elelenab ele daaglag. Ao, da heppi, danab ah dahilad ag elele daaglagnu ehanittak dahil aon, elelenab daaglag.” Yawe Nug anam awa atte.

Yawe Nug Israel dilag oo gai-iitta doya oo matta ehanadkku

¹⁵ Yawe Nug inam atte. “Laa Rama appa gayeye dootteb. Ge, appa laa nug eheɗ gayaya, mahitte. Amuam Rahel, nug nid nuhikkud oh iitta meppig amunu, nug nid dilagnu gayaya, mahiadtte. Nug mahiatta gayeye, laa heeb, oo mekkunu uua daatte,” awa atte.

¹⁶ Rahel anam gaatte, amge Yawe Nug atte. “Da heppi, na bekkanad, aɗenad dilagnu uɗat heme am meu okku. Anam amunu, na aib gaame. Amen leb ele aib neum. Nahipad nid ag kekeɗ wanelagppanu eɗun uɗin daaglag,” awa atte.

¹⁷ Ge, Yawe Nug atte. “Nahipad nid ag eɗun uɗin daaglag amunu, na eɗun ena daakkutnu, na keeke ena bekkunu dabmak aɗan oikkutnu elele. Nahipad nid ag eɗun, ahilag wanppanab uɗin daaglag,” awa atte.

¹⁸ Amu Yawe Nug atte. “Da genab Israel danab ah ag mahitteb doomi. Ag mahina atteb. ‘Makau nag nug nai ii doyaya, kobol digdig heehe, mameg bu mettom, amubia Kayak, na ig bu anam mekkame. Ig bu aakku aomut. O Yawe, na am ihinig Kayak amunu, na ehanigppe, ig eɗut nahip-ppa uɗignignu oɗ medattem.

¹⁹ O Kayak, ig na uuidta oimut, amge ig anam oiut, ⌊na bu mekke,⌋ ig oonig eɗuom. Ao, na he, ig eheɗ hemut oonig maitte, ig uɗa nak eheɗ doomut. Ig nid bau daatta, ig kobol uɗa nak nau guittak ele heut uɗiom amunu, ig uɗa nak nau doomut.’ Israel danab ah ag anam appig doomi.

²⁰ Ag anam atteb, amge Israel danab ah ag am da bekkalad, da ahilagnu oo doyaknab iite doottem? Da ahilagnu ool huana iite mauhtte? Da ahilag eheɗ haknu dabmein, bu madakkulnu haen kuɗum attem, amge da amu heinne, da ahilagnu dabmettem, ahilagnu daul ii atitte. Da amu hettem amunu, da ag ele laippu daagnignu ool naɗi daatte. Da ahilagnu ool doyeb, ool matten ehanadkkul.” Yawe Nug anam awa atte.

²¹ O Israel danab ah, ⌊ag eɗun, ahilag wanppa uɗiglagnu amu,⌋ ag ib atten atten aon uɗiglagnu ele, ag ib amu giginppa at maadna, pilak human galatteg! Ag ib attem attem aon oiglag amu, ag amu dabmena autna aweg! O Israel danab ah, ag ahan, eɗun ahilag aab anen anenppa uɗiglag.

²² O Israel danab ah, ag am nid ah laa, nug mameg oɗe ii doyaya, kobol digdig hette, ag amubia da dimeɗona kayak hambuppuak laala dim lamadtteb; amu haen gane laa ele ukkeb, ag kobol amu uun, eɗun Yawe ele laippu daaglag? ⌊Yawe Nug heeb, ag eɗun uɗiglag⌋ am kobol baunab aakku. Ah ag digmena, danab gumalob amuam kobol baunab aakku daalo, amubia Yawe Nug heeb, ag eɗun uɗiglag am kobol baunab aakku.

Yawe Nug heeb, Juda danab ah ag eɗun, ag wanelagppa uɗiglag

²³ Yawe Nukka Ɠagattag Oh Ele, Israel dilag Kayak, Nug inam atte. “Da heppi, Juda danab ah ag eɗun, ahilag wanppa uɗiona, ag Juda wanppa, aab laala eleppa daanna, ag Yawenu mettid lag Jerusalem ooppa qaukoppa daattenu amu, ag inam akkulag. ‘Yawe Nug qauko nuhignu tituanak daatte, Nug laug genab tutukku hak kobol inak ele qauko amuppa daatte, Nug qauko, lag amu ele itatteb, anam dayeɗ!’ aon akkulag.

²⁴ Amu haen amuppa danab ah ag Juda wanppa, wan amunu aab laalappa ele laippu daanna oiglag. Dad gumak danab, sipsip gumak danab ele ag anam daan oiglag.

²⁵ Aɗinu? Da heppi, danab ag beɗulag bodoedatte ele, ag ɠagattag aoglag. Da heppi, danab ag gai-iittanab daatteb ele, ag eɗun, ena daaglag.

²⁶ Ag anam daanna, ag akkulag. ‘Da ahe, neekki ukke, enanag niimi aakku doomi,’ aon akkulag.” Yawe Nug anam awa atte.

²⁷ Amu Yawe Nug atte. “Haen laa uɗitte amu, haen amuppa da heppi, Israel danab ah, Juda danab ah ele ag wanelagppa daanna oinna, ag, amu ahilkad sipsip, makau keeke ele oh kuɗum appatna daaglag.

²⁸ Tatam da hei, ag nauhppig, danab nug uud hiɗatte, o lag loppaɗtte, o laa kekeɗ eɗadtte, o keeke he nauhtte, da amubia dabmak elelenab awen hemi. Da tatam anam hemi, amge haen uɗitte, haen amuppa da amu hekkulnu elelenab dabmein hemi, amubia da elelenab dabmein, da heppi, ag ena daaglag; danab nug lag ha autanab aotte, o dad eppa autanab aotte, da amubia hekkul.” Yawe Nug anam aakku atte.

²⁹ Amu Nug imu ele atte. “Haen amuppa danab ah ag gemu attebbia baula ii amana. Gemu ag atteb. ‘Nid mamelkad ag grep ninig ele lappig, amge nid ahilkad ag aelag nette,’ aon atteb, amge haen amuppa ag baula anam ii amana. Iitta.

³⁰ Aɗinu? Haen amuppa ⌊ag dooglag,⌋ aun nug grep meu ninig ele lakku, nug aegib nekku. ⌊Ag dooglag,⌋ aun nug hipunin hekku, nugib mauhkku,” awa atte.

³¹ Yawe Nug atte. “Haen laa uɗitte, haen amu uɗieb, haen amuppa da heppi, Israel danab ah, am Juda danab ah ele, da ag ele ig nug tituana nai qakkak bau hekkunig.

³² Nug tituana nai qakkak bau amu, da tatam ag mamelkad aɗi anukka haen da eppelag aɗen omalatti, Isip wan uun, ahan goppig ele, haen amuppa da ag ele nug tituanta nai qakkamut, am amubia iitta. Haen amuppa amu, da danab nug ah nuhig atognotte, amubia da ag gumadmi, amge ag nug tituana nai qakkak amu tippalppig,” awa atte.

³³ Amu Yawe Nug imu ele atte. “Anam amunu, nug tituana nai qakkak bau, da heppi, ag Israel danab ah, da ag ele haen amuppa hekkunig am inam. Da heppi, dahil ɗo oh ahilag dabmakppa daakku. Ao, da heppi, dahil ɗo oh ag oolagppa daakku. Da ahilag Kayak daakkul, ag am dahilad danab ah daaglag.

³⁴ Amu da heppi, ig nug tituana nai qakkak amu heta malota amu, danab laa nug layagtai, o awagtai, o amagtai baula amegppa, ‘Na Yawe doye!’ ii ama. Iitta. Ag anam ii amananu diig am, ag ohnab, danab onig iitta, danab onig okkai ele, ag oh da dooiɗna oiglag amunu, ag laa nug laa amegppa, ‘Na Yawe doye!’ akkunu ii hema. Aɗinu? Da ahilag nau hak uhuqen madakkul. Yo, da ahilag hipunin daul atikku.” Yawe Nug anam atte.

³⁵ Amu Yawe Nug he, aam amunppa amahaltte, Nug a, kalam, hoɗopai ele tuqan amahaltteb. Nug he, yu duban qe, oqotti huana otte. Nug onig am Yawe Nukka Ɠagattag Oh Ele, amu Nug atte.

³⁶ “Da aamnu nai bappaidmi, kalam, hoɗopai ele dilag nai bappaidmi, yunu nai ele bappaidmi; amu keeke amu ohnu ɗo nai mattien ɗo amu memi, ɗo amu iitta mekkulag dayeb, Israel ag da noolppa huu daatteb bia ii daamna. Amge anam iinab bema,” awa atte.

³⁷ Anam amu, Yawe Nug imu ele atte. “Danab laa nug hab genab melemel ma, elab amu gane dookku dayeb, o danab nug wannu ukku ohnu keeke hettoɗia, amu oh doya malakku dayeb amu, da Israel dilag eheɗ hak dabmein, Israel buɗub oh geɗadkkul, amge anam iinab bema,” awa atte.

³⁸ Amu Nug atte. “Haen uɗitte amu, haen amuppa, danab ag aab okkai imu dahilnu eɗun bappaidkkulag. Ag Hananelnu lag attan ta ukkak menppa hakppa digmeppeg ukkeb, aɗnu od onig Daugppan Od, appa batak eɗun bappaidkkulag.

³⁹ Appanu nuhig tom am tutukku ugakka, qauko nakok onig Garep ukka, eɗua Goa gokku.

⁴⁰ Aria oolnu noak onig Hinom, appa ag danab boumadtteb, aab uhuɗ ele buɗieg gotte amu, aben amuam dahilnu tituanak daakku. Aria, wan adqaɗ bia ukka ukka, oolnu noak onig Kidron batak, aab okkainu aɗnu od onig Hosnu Od batak, wan amu oh ele am dahilnu tituanak daakku. Kekeɗ ag baula uɗin, ippan danab ii diin gomana. Ag baula heppeg, aab okkai imu baula ii nauhma.” Yawe Nug anam awa atte.