Jeremaia 30 - Nobonob Baibel

Yawe Nug Israel Juda ele ehanadkku

¹ Deɗ laa Yawe Nug Jeremaia nai laa metta, Nug aum.

² Yawe, Israel dilag Kayak, Nug atte. “Jeremaia, na buk itoɗiak ele aon, aɗi nai laala da na amenppa akkul amu, na nai na amuppa ye!

³ Aɗinu? Haen laa dimppa da heppi, Israel danab ah, Juda danab ah ele ag wan laalappa gona, appa diia ukka laih me dayak danab ah daatteb, ⌊daaglag ele amu,⌋ ag appanu eɗun uɗin, wan imu, da ag mamelkad aɗi, ahilag daakkunu mattami amu, ag imuppa daaglag,” awa atte.

⁴ Amu nai imu amu, Yawe Nug Israel dilagnu, Juda dilagnu ele mattie, ⌊Jeremaia mattiom⌋.

⁵ Yawe Nug inam atte. “Danab laa ag danab ah baɗan eegeg dootteb. Baɗak eheɗ nau daatte, maɗoɗ ii daatte.

⁶ Oɗ mattan doye! Danab nug ah nid menutte bia nid menukkunu elelete? Iitta amunu, aɗinu da danab ɠagattag ohnab anen anen ag ah nid aokkun oo eppegppa lamuhitte bia, ag oolag lamuhieg anadttem? Aɗinu da danab ɠagattag iɗulag oh hakkab eppom anidttem.

⁷ Haen amuam haen nau. Haen laa am haen amubia ii dayom, gemu ii daatte, butti aɗi ele anambia ii daama. Haen amuppa amu, Jakop buɗub ag uug nau aoglag, amge da ehanadppi, ag ii padal memana.

⁸ Haen amuppa amu, da Jakop buɗub ag danab laa waalagppa daamnanu da ehanadppi, ag anam ii daamna; danab nug doɗnu duugppan tuqai makau duugppanu loppaɗe, hamu oitte, amubia da hekkul. Jakop buɗub ag baula wan laihnu danab waalagppa daan, ahilag begbeg maɗi nid ii daamna.” Yawe Nukka Ɠagattag Oh Ele, Nug anam awa atte.

⁹ Ag laa waalagppa ii daan, ahilag maɗi nid ele ii daamna. Iitta. Ag Yawe, Nug am ahilag Kayak, ag Nug waappa daan, Nug oɗe dim lamidkkulag. Ag ahilag king, nug Dawit buɗub laa amu, ag nug waappa ele daan, nuhig maɗi nid maɗi ah ele daaglag. Dawit buɗub king daakkunu amu, Yawe, Nug amunu atte. “Da tituanen ehanidppi, nug king daakku,” awa atte.

¹⁰ Amu Yawe Nug atte. “Da amu hekkul amunu, ag Jakop buɗub, ag dahilad maɗi nid amu, ag aib baɗappig. Ao, ag Israel danab ah, ag oolag uug nau aib qeum. Aɗinu? Da genab ag ehanadppi, ag wan laa, wan laa amuam umanab daatte, ag appanu eɗun uɗin, ena daaglag. Ao, da ehanadppi, ag buɗulkad ag wan laappa diia ukka laih me dayak danab ah daaglag amu, ag appanu eɗun uɗin, ena daaglag. Da amu heppi, haen amuppa ag Jakop buɗub, ag maɗoɗ, ɠagattag ele daappeg, laa ag heppeg ii baɗamna.

¹¹ Da ag ele daattem amunu, da ag ehanadppi, ag ena daaglag. Da heppi, ag gona, wan laalappa matatun daaglag amu, da wan amu oh hadappi, iitta mekkulagtai. Da anam hekkul oo iitta, amge da ag Jakop buɗub, da ahilagnu anam ii hepa. Da heppi, ag ii iitta memana. Da bu madakkul, amge da ahilag eheɗ hak eleleppa hein, nai doya mala hettoɗia epeɗia elele mettak kobol dim lamitten, ag toliatten, bu madakkul. Amu eɗittak ii madapa. Ag eheɗ heppig amunu, da anam hekkul. Da ahilag eheɗ haknu hamu bia doyen, bu ii madakkulnu ii hepa. Iitta. Da kobol eleleppa madakkul.” Yawe Nug anam awa atte.

¹² Amu Yawe Nug inam awa atte. “Ag Jakop buɗub, ag danab nug layag guittak okkainab mette, ihi nau awe, dokta babaitteb ena daakkunu ib laa iitta bia daatteb. Ao, ag Jakop buɗub ag am danab nug guittak okkainab awe, ihi nau daye, dokta babaitteb, eɗua ena bekkunu ib laa iitta bia daatteb.

¹³ Laa hettoɗiakppa ehanatta, nai laa ii maditte. Ag danab nug ihi nau awe, eɗua ena daakkunu ehanittak laa iitta, ag amubia daatteb. Ao, ag danab oɗe nau awe, eɗua ena daakkunu ehanittak laa iitta, ag amubia daatteb.

¹⁴ Wan atu laalappan danab ag ehanadkkulagnu appig amu, danab amu ag ag Juda, ag ahilagnu ag daulag aakku atia malom. Ahilagnu ag, ‘Ag keeke hamu,’ doon oitteb. Ag Jakop buɗub, ag beɗulagppa aab nau ele. Ao, ahilag hipunin am huanak. Am anam amunu, da Yawe, da kekeɗ makkuɗadlo bia da ag makkuɗadmi. Ao, danab nug laa guittak medakkunu ooppa uug ii dootte amu, da amubia ag bu mattami.

¹⁵ Ag danab nug ihi nau ele dayaya gaatte bia gaatteb, amge diig aɗinu ag anam gaatteb? Ag danab nug guittak nau, laa nug heeb, iitta mekkunu elele iitta, nug anam ele dayaya gaatte bia gaatteb, amge diig aɗinu ag anam gaatteb? Amunu diig am, ag beɗulagppa aab nau ele, ag ahilag hipunin huanak amunu, da bu nau amu mattami.

¹⁶ Anam, amge aun aɗi ag, ag Jakop buɗub heppeg nau daaglag amu, huu amu ag nau aakku aoglag. Ag Jakop buɗub, ⌊da heppi,⌋ ahilag kekeɗ ag diia ukka laih me dayak danab ah daan, laih, ag wanelag iittappa gona daaglag. Jakop buɗub, laa ag ag ele ban hena, ag ahilag keeke aon gotteb amu, laa ag kekeɗ amu ele ban hena, ag ahilkad keeke aon gokkulag. Aun aɗi ag uɗin, ag Jakop buɗub dilag keeke, ag ele diin gotteb amu, da heppi, laa ag uɗin, amu dilag keeke akkan gokkulag.

¹⁷ O Jakop buɗub, laa ag ahilagnu nau, danab ah hamu bia dootteb. Ao, ag danab ah Sion daatteb, laa ag ahilagnu oo doyak ii dootteb. Amunu da heppi, danab beɗuppa oɗe nau ele, nug eɗua ena daatte, amubia ag eɗun ena daaglag. Ge, da heppi, ag danab ihi nau ele eɗua ena daatte, ag amubia ena daaglag.” Yawe Nug anam awa atte.

¹⁸ Amu Yawe Nug inam atte. “Da Jakop buɗub, da ahilagnu ool doyeb, ool matten ehanadppi, ag eɗun, ag wanelagppa ag laulkad eɗun bappaladna daaglag. Aab okkai Jerusalem am nauhakib daakku, amge ag eɗun, nuhig kinipan ameg hume takppa, appa ag aab eɗun bappaidkkulag. Ag aab bappaidna, ag kingnu lag enanagnab nuhig abenppa eɗun bappaidppeg daakku.

¹⁹ Da anam ehanadppi, Jakop buɗub ag ahi ettanna, ag ahi amuppa, ‘Ena hen mekkame,’ da amelppa akkulag. Ag oo gamag ahak okkai doon, gamag ahaknu heppeg, oqotti okku. Da heppi, ag appatna, kuɗum daaglag. Ag ahilag ebqak am tutu ii mema. Da heppi, ag danab onilag ɠagattag ele daaglag; danab laa ag ahilagnu, ‘Ag binalag ele,’ dooglag.

²⁰ Anukkanab Jakop buɗub bekkalkad ag ena daanna oippig amu, haen amuppa da heppi, Jakop buɗub bekkalkad ag anamib baula daaglag. Da heppi, Jakop buɗub ag huu okkai laippu ɠagattag da noolppa anam daaglag. Ag anam daappeg, wan attenppan danab ag ɠagattag daan, ahan Jakop buɗub eheɗ hattaglag dayeb amu, da aakku danab amu bu madakkul.

²¹ Jakop buɗub oolagppanunab laa, nug ahilag okkai daakku. Ao, ag oolagppanu laa nug king daakku. Da nug da gumiɗa uɗikkunu omalkkul. Da nug omalppi, nug da gumiɗa uɗikku. Aɗinu? Laa nug nukka nug, ‘Da dakka, da Yawe guguitten wakkul,’ ana hekkunu am elele iitta.

²² Da anam hekkul amunu, ag am dahilad danab ah daaglag; da am ahilag Kayak daakkul.” Yawe Nug anam awa atte.

²³ Antteg! Yawe Nug danab ah nau hetteb ele bu madakku. Bu mattak amuam Yawenu oppoɗi bak baaba, am ulah huanak eheɗ nette, o kilibob okkai nette, amubia daakku.

²⁴ Yawe Nug bu madakkunu dabmak awe, ɠagattag eppom amunu, nuhig oo nauhak huanaknab am hamu ii iitta mema. Iitta. Bu mattak amu ha malak dimppa, am iitta mekku. Dimppa ag imu oh dabmena, oolag maidkku.