Jeremaia 3 - Nobonob Baibel

Uɗa nak am hipunin dim lamidtte

¹ Amu Yawe Nug atte. “Danab ah aa ewau daattep, ah nug ⌊gappai heeb,⌋ danab nug nuhig ah amu lamitteb, ah nug ukka, danab laa awa, ⌊baula gappai heeb,⌋ danab amu ele nug ah amu lamitteb, danab nug tatam ah amu awa lamittom amu, nug eɗua, ah amu baula aokku am enate? Kobol augigiak amuppa wan am Kayaknu neekkakppa dubuttid tak ele iite daama. Anam, amge ag Juda, ag kayak hambuppuak kuɗum noolagppa dup nona binalag meegeg uɗie, gemu ele hetteb. Ag ib baag ah nug danab kuɗum ele niiglagnu hette, ag amubia hetteb. Ag anam hetteb, amge da tuɗitten, ag eɗue diiadkkulnu onilagppa ettem.

² Ag Juda danab ah ag qauko ikkilkad ohppa neegna, ahilag hak antteg! Ib baag ah nug aben ohppa danab kuɗum ele niitteb, amubia ag Juda ag qauko ohppa kayak hambuppuak noolagppa dup nona binalag meegeg uɗie, gemu ele hetteb. Ag danab nau, nug laanu keeke yab aokkunu ib meitta daatte bia, ag kayak hambuppuak digdig aoglagnu heegeg uɗie, gemu ele hetteb. Ag kayak hambuppuak noolagppa dup noa binag mak kobol, amuam gappai kobolbia, ag kobol amu henana, ag nau hak kobol digdig laa ele heegeg uɗie, gemu ele hetteb amunu, ag kobol amu hettebppa, ag amuppa heeg, wan am dubuttid tak ele daatte.

³ Ag amu heegeg uɗie, gemu ele hetteb amunu, da hei, gu ii nette. Ge, ag amu heegeg uɗie, gemu ele hetteb amunu, da hei, aam haenppanu gu laa ii nette. Ag eheɗ hetteb, amge ag hamu bia dootteb. Ag ib baag ah nug kobol nau hette, amge nug amunu hamu bia doya, uɗa nak nakok laa ii dootte, ag amubia hetteb.

⁴ Ag anam hetteb, amge ag da amelppa atteb. ‘O ig mamenig, ig nid nakok daautut, na ig lainignab daame.

⁵ Gemu na ihinignu oot nauhom daatte amu, oo nauhak amuam hanhan anamib daakkute? Ao, na ihinignu oppoɗin beum, amu nahip oppoɗi bak amuam haen ohib daakkute? Na nahip oo nauhak amu iite tuqan aomna?’ Ag anam atteb, amge ag eheɗ hak huanak tuɗidib hetteb.” Yawe Nug anam atte.

Israel danab ah ag Yawe ii dim lamidppig

⁶ Amu Josaia nug Juda dilag king dayeye, Yawe Nug da, Jeremaia, Nug da amelppa inam aum. “Israel danab ah ag da dimeɗona kayak hambuppuak laala dim lamadna, kobol nau digdig heppig amu, na amu anidmete? Israel danab ah ag ewau pakkua gappai hak bia hena, ag qauko nakok igippa, ad okkai eppelkad bahia ukkak ele oh waalkadppa ele ag kayak hambuppuak digdig noolagppa dup nona binalag meppig.

⁷ Da dahil dabmakppa, ‘Israel danab ah ag eheɗ hak amu oh hena malona, ag eɗun, dahilppa uɗiglag,’ ami, amge iitta. Ag eɗun, dahilppa ii uɗippig. Ag ii uɗieg, Juda danab ah, ag Israel ele ee makkegbia daatteb amu, ag da ippunadmi bia da dim lamiɗkkulagnu uun hena, ag Israel heppig anidppig.

⁸ Juda ag Israel da dimeɗona kayak hambuppuak laala dim lamadppig anidna, ag da danab nug ah nuhig ewau pakkua gappai hette, diig amunu lamidtte bia, da Israel danab ah ahilag eheɗ haknu nob nau matten lamadmi anidppig, amge Juda danab ah, ag da ippunadmi bia, da dim lamiɗkkulagnu uun henana, ii baɗappig. Iitta. Ag ele ah gamu uuitta ukke, danab laa ele oittep bia, ag da uuiɗna, kayak hambuppuak kuɗum noolagppa dup nona binalag meppig.

⁹ Israel danab ah ag eheɗ heppignu uug laa ii dooppig. Ag anam heegeg, wan am dubuttid tak ele daye, ag da dimeɗan, ag kayak hambuppuak dottolkad menppa hak, adppa hak ele, ag amu noolagppa dup nona binalag meppig, amuppa ag danab ah ag ewau pakkuna gappai hak kobol hetteb bia heppig.

¹⁰ Israel ag anam heegeg, da ag uug nau mattami, amu Juda, ag da ippunadmi bia da dim lamiɗkkulagnu uun hetteb amu, ag anidppig, amge ag genab eɗun dahilppa ii uɗippig. Iitta. Ag ameg qakkak hakib hena, gaɗalagib eɗun dahilppa uɗippig.” Yawe Nug anam atte.

¹¹ Yawe Nug anam awowa, Nug tuɗitta, da amelppa aum. “Israel danab ah ag da dimeɗona kayak hambuppuak laala dim lamadppig, Juda danab ah ag da ippunadmi bia da dim lamiɗkkulagnu uun hetteb. Anam amu, ahilag kobolppa, ahilag hakppa ele Israel dilag eheɗ hak am okkai, amge Juda danab ah, ag ahilag kobolppa, ahilag hakppa ele ag ahilag eheɗ hak am okkainab.

¹² Amunu, Jeremaia, na yawalti uɗitteppanu neegna, dahil nai imu Israel dilagppa appe doyeg! Yawe Nug inam atte. ‘Israel, ag da dimeɗona kayak hambuppuak laala dim lamattegeg uɗie, gemu ele hetteb amu, ag eɗun, da Yawe, ag dahilppa uɗieg! Aɗinu? Da laa dilagnu oo gai-iitta doya, oo metta ehanattaknu diig daattem amunu, da tuɗitten, ahilagnu oo nauhak ii doopa. Da hanhan ahilagnu oo nauhak ii doopa.’ Da Yawe, da anam aakku attem.

¹³ Da ag keeke laippuib hekkulagnu attem. Ag genab kobol eheɗ heeg, aab ag beɗulagppa daatte miag aig! Ag beɗulagppa aab daattenu diig am inam; ag da Yawe, ahilag Kayak, ag da dimeɗan, dahil nai tappaeg ne, ag kayak hambuppuak laihnu akkan, amu noolagppa dup nona binalag meppig. Ag ad okkai eppelkad bahia ukkak ele oh waalkadppa kobol nau amu henana, ag dahil nai ii dim lamidppig.

¹⁴ O Israel danab ah, ag da dimeɗona kayak hambuppuak laala dim lamadppig ele, da Yawe, da ag amelagppa attem. Ag eɗun, dahilppa uɗieg! Aɗinu? Ah nug gamunu daatte, amubia ag am dahilad daatteb. ⌊Ag eɗun, dahilppa uɗiglag dayeb,⌋ ag oolagppan aab anen anennu laippu da nug tituane, omalen, Sion uɗikkul. O ag oolagppanu aab ikki anen anennu aɗit laa da tituanate, da omalatten, Sion uɗikkul.

¹⁵ Da Sion omalatten uɗien, da ag, Israel, da ag gumak danab, sipsip gumak danab bia, da gumak danab ena, ag da ool hette bia oolag hekku, da ag maadppi, ag gumadkkulag. Ag doyak ena, diignu doyak tutukku ele aɗan, ag gumadkkulag.

¹⁶ Da anam heppi, haen amuppa ag huana appatna, kuɗumnab daaglag. Ag anam daanna, danab ag, ‘Anukka ig ena daamut. Kayaknu Tituanak Nainu Kunup kontrak inak ele ig oonigppa dayom,’ ii amana. Iitta. Ag kunup amunu ii dabmenana; ag oolagppa ii daatte ele ii dabmemana. Ag laa ele ii hemana.

¹⁷ Haen amuppa danab ah ag Jerusalemnu, ‘Yawenu sia king,’ akkulag. Ag anam appeg, wanppan wan ohnu danab ah ag Jerusalem appa da onil binag mekkulagnu qagmekkulag. Danab ah oh ag haen amuppa baula da oɗel dim lamidmananu dabmak ahilag ɠagattag ii eppeb, aɗi eheɗ hekkulagnu oolag daatte amu, ag amu hekkulagnu dabmenana ii hemana.

¹⁸ Haen amuppa Juda danab ah, Israel danab ah ele ag oh qagmena, wan laa yawalti uɗitteppanu daatte, ag wan amuppanu ahan uɗin, wan da ag mamelkad aɗi ag aulag daakkunu mattami ele, ag uɗin, wan amuppa daaglag.

¹⁹ Da dakka, da oolppa, ‘Da danab nug bekkod ena hadatte, amubia da ena hatten, wan aulag enanag, enanag laa oh eɗattaknab, da wan amu madakkulnu ool daatte,’ ami. Da ag dahilnu, ‘Mama,’ akkulagnu, ag da ii dimeɗan, ag eɗun, ii dim lamiɗmananu uuglagnu dabmemi.

²⁰ Da anam dabmemi, amge iitta. Ag Israel buɗub oh, ag da ippunadmi bia da dim lamiɗkkulagnu uun heppig. Ag ah laa nug gamu uuitte, danab laa ele oittep bia heppig. Da Yawe, da anam aakku attem,” awa aum.

Israel danab ah ag ahilag hipunin mehuqom

²¹ Qauko ikkilkadppa qanak baag laa doyeg! Baag amuam Israel danab ah ag kobol eheɗ dim lamidna, kaliak henana, ag Yawe, ahilag Kayak daulag atiom dootteb amunu, ag gaanna, Nug oo doyakppa unuqidtteb.

²² Ag anam hetteb amunu, Yawe Nug atte. “O danab ah, ag da dimeɗona kayak hambuppuak laala dim lamadtteb ele, ag eɗun, dahilppa uɗieg! Ag uɗippeg, da heppi, ag baula da ii dimeɗona kayak hambuppuak laala ii dim lamidmana. Ag baula dahil nai dim lamidkkulagnu ii uumna,” awa atte. Nug anam atte amunu, Israel danab ah ag atteb. “Ao, na am Yawe, na ihinig Kayak amunu, ig nahip-ppa gokkunig.

²³ Anukka ig qauko nakok igippa kayak hambuppuak noolagppa dup nota binalag metata, muttub ele qemut, amge amu oh am ii ehanikkom. Yawe, Nug ig Israel, ihinig Kayak, Nugib ehanikkeb, ig padal ii memata.

²⁴ Anukkanab, ig memettankad haenppanu uɗie, gemu ele kayak hambuppuak laala ag heeg, ig mamenkad dilag keeke, ihinkad keeke ele ag mattamut. Amuam keeke ig oh aognignu uɗat ɠagattag hetata aomut; ihinkad sipsip, makau ele, amu ihinkad nid danab, ihinkad nid ahin ele.

²⁵ Ig Yawe, ihinig Kayak, ig nuhigppa hipunin hemut; ig am ig mamenkad ele. Anukkanab ig mamenkad aɗi ag amu digmeeg, uɗie uɗie, gemu ig ele ig oh Yawe, ihinig Kayak, ig Nug oɗe ii dim lamidmut. Anam amunu, ig uɗa nak nau doottem. Ao, uɗa nak nau guittak ele ig tonikkom daatte,” aon atteb.